MARK
Hini omaˈ-atan tay an libju
Hini nangtulaˈ ay tay an libju ja hi Mark an empfalay Mary ad Jerusalem (Acts 12:12). Hana nangachar ay tay Biblia ja manoˈchoˈ-or ay chicha chi mangali an hitay Mark ja hija hi John Mark an akhin Barnabas (Kolosas 4:10). Ja hijay nitnud ay cha Paul ay Barnabas chin pengpenghan chi i cha nunlawlagwan an ay nangaskasaba ay tay Ebanghelyo (Acts 12:25; 13:5). Anila ta-o khu an hi Mark ja oha hija an neˈkakadwa ay Apostol Peter (1 Peter 5:13). Cho-or khu hana mangali an hi Peter hini nun-achalan Mark hana intulaˈ na an en-enat Hesu Kristo.
Intolong Mark hitay libju hana Hentil an tatakhu, nidchum hana Hentil an gwa ad Rome. Hijaot un tortollo hana padtu ay ni Daan an Tulag an niˈtulaˈ na, an achi amat ay cha Matthew ay Luke. Inidchum khu Mark an enlawlawag hana ugalin chi Hudju ta ma-awatan hana Hentil, amat ay ni Mark 3:17; 7:1-4, 11, 34.
Hitay an libju an intulaˈ Mark ja ipa-innila na an hi Hesus ja netoˈkhong an numpfalin hi takhu an munserbi ay Apo Jos ja hana tatakhu. Hini versikulo an nitula-an tay ja gwa ay ni 10:45 an allona hi, “Amat ay ha-in an Na-ilangitan an Takhu, an agkhujaˈ immali ta chaˈju an tatakhu chi munserbi ay ha-in. Muti immaliyaˈ an munserbi hana cho-or an tatakhu ja ta matojaˈ an pfajad chi pfahor cha.” Penhod Mark an hana mamaha ay tay an intulaˈ na ja ma-awatan cha an hi Hesus ja maphod an amin chi khuna aton, hijaot un choˈchoˈ-or hini inali na an ena-enat Hesus mu hana intudtuchu na. Penaneknekana hini apfalinan ja ha-ad Hesus an Empfalay Apo Jos khapo hachi nakaskasda-aw an milagro an en-enat na, khapo hi nangakhahana hachi gway chokhoh na ja nangpakakana hachi napukhit an ispiritu an nun-ehoˈlong.
Hini ang-angonoh tay an libju ja agkhuy nidchum hachi nahnahhun an manuskrito an nitulaˈ hi Griego an hapit (16:9-20). Hotti hay allon chi uchumna ja ma-id maptoˈ nu hi Mark chi nangtulaˈ.