MATTHEW
Hini omaˈ-atan tay an libju
Hitay an Ebanghelyo an intulaˈ Matthew ja ipa-innila na an hi Hesus hini Hennag Apo Jos an Mamahhod an pinilin Apo Jos an manakhu ja mun-ap-apo hana Hudju ja an amin hana mamati ay hija. Impa-innila na an chin ingkarin Apo Jos chin hophopapna hay hachi tatakhu na an Hudju ja nipa-annung khapo ay Hesus.
Ay tay an tulaˈ ja ipatikhaw na an hi Hesus hini natakhay an mehtolo an hennag Apo Jos an umali heto lota. Hotti gwa ay hija hini apfalinan an mangpa-innila ay ni urchin Apo Jos ja ay ni atona an mun-ap-apo.
Hana intuchu na an nitulaˈ ay tay an libju ja pinanuh Matthew. Hay oha hi intulaˈ na ja chin tukhun Hesus hi gwachaana hichi pfuludna hi hay amatan chi pi'takhuwan, tamu ja hay lagpfun chi midchum ay ni Pun-ap-apugwan Apo Jos. (Kapitulo 5-7) Hay oha khu an intulaˈ na ja chin imbilin Hesus hachi himpolo ta chugwa an adalana an hennag na an i muntudtuchu. (Kapitulo 10) Intulaˈ na khu hana in-arig Hesus an oma'-atan ni Pun-ap-apugwan Apo Jos. (Kapitulo 13) Ja intulaˈ na hana intuchun Hesus hi maˈma-at ja unot machakngan hini Pun-ap-apugwan Apo Jos an apogpokhan tay lota. (Kapitulo 24, 25)
Cho-or hana istorya an ay tay libjun Matthew ja angkhay chi achakngana. An amat hachi manomnom an linala-e an nannig chin pfittuwan ja immuy cha ad Betlehem, ja chin chimmalanan Peter chin tuˈjap chi chanum. Ja chin khu nangakhahan Hesus chin chugwa an napfulaw, ja chin nangalan cha hi pelaˈ chin ta-on chi ekan ta gway empfajad cha hi pakha. Ja hachi khu pangngarig chin ay numpokhah hi ubas, ja chin chugwa an unga, ja chin kasar chin empfalay chi ari, ja chin himpolo an pfabpfalahang.