13
Chin nannakhan cha ay Barnabas ja hi Saul an i mangaskasaba
1 Hichi ad Antokya ja nidchum hay hana namati hana uchumna an profeta ja hana manudtuchu. Hay ngachan hay hato ja hi Barnabas, hi Simeon an nangadnan khu hi Niger, hi Lucius an eCyrene, hi Manaen an nun-ibpfan Ari Herod, ja hi Saul. 2 Gwa han ohan arkhaw an khun mun-ayunar hay hachi namati ad Antokya ja khun cha mundaydayaw ay Apo Jos. Ja inalin ni Espiritu Santo ay chicha hi, “Et-on ju cha Barnabas ay Saul, ti gwa han ipatamuˈ ay chicha.” 3 Hotti entortoloy cha an mundaydayaw ja nun-ayunar ja hen-a cha hi Barnabas ja hi Saul ta engkalalakhan cha ja un chaot honakhon chicha.
Chin immajan cha Paul ad Cyprus
4 Amat hichi ja enedchong ni Espiritu Santo cha Barnabas ay Saul ta nunchayyu cha ad Seleusia ja un chaot munlukhan hi papor ta umuy cha ad Cyprus. 5 Ja nitnud hi John Mark an tomolong ay chicha. Un chaot emmatam hichi ad Cyprus ja intaˈchug cha han pfuglay an ad Salamis, ja ente-a cha an muntudtuchu ay ni hapit Apo Jos hay hana sinagoga an khun a-amungan chi Hudju.
6 Leneˈgwoh cha ad Cyprus ja ingkhana ad Pafos an nanittuman cha han ohan Hudju an hi Bar-Jesus an mun-anap, ja allona hi un profetan Apo Jos hija muti achi umannung. 7 Hitay an mun-anap ja hijay pun-i-ibpfan han manomnom an Gobernador an hi Sergius Paulus. Empapfokhan tay Gobernador cha Barnabas ay Saul ti penhod na an chonglon hini hapit Apo Jos. 8 Muti hi Bar-Jesus an hay ngachana hi hapit chi Griego ja Elimas, an hay podhona an hapiton ja mun-anap, ja podhona an paˈ-iyon chin khun ituchun cha Barnabas ay Saul ta achi pattiyon chin Gobernador. 9 Muti hi Saul an nangadnan hi Paul ja nagwachaan ay ni apfalinan ni Espiritu Santo ja neˈpfottog ay Elimas 10 ja inali na hi, “He-a an empfalay chi diablo, he-a hini pfumuhur an amin hi magpong. Na-uti-ot hini nomnom mu, ja ehahallam an amin hana magpong an hapit Apo Jos. 11 Ad ugwani ja dusaon chi-a ay Apo Jos. Pfulagwon chi-a ta achi mitikhaw hini matam hi at hichi hi arkhaw.” Unagkhu himpfumagkha ja achi mitikhaw chin matan Elimas ja khun mun-ap-apo-ap hay mamchon ay hija. 12 Unagkhu tinnig chin Gobernador hitay an na-at ay Elimas ja namati, ti nakaskasda-aw hini apfalinan Apo Hesus an khun cha itudtuchu.
Chin immajan cha Paul ad Antokya an provincian chi Pisidia
13 Amat hichi ja nakak cha Paul hichi ad Pafos ja nunlukhan cha han papor an umuy hichi ad Perga an provincian chi Pamfilia, ja un muntaynan hi John Mark ta mumpfangngad hichi ad Jerusalem. 14 Amat hichi ja empacheh cha Paul an umuy hichi ad Antokya an provincian chi Pisidia. Ne-atam cha ad Antokya ja unot nachakngan chin Hapfachu an pungngilinan chi Hudju ja niˈjuy cha hichi sinagoga ja ni-ipfun cha. 15 Napfalin an nepfaha chin intulaˈ Moses ja chin uchumna an intulaˈ hachi profetan Apo Jos, ja empapfokhan hachi a-ap-apon chuy sinagoga cha Paul ja inali cha hi, “A-akhi, nu gwacha ayya chi piˈtukhun ju ja niˈ-ali ju mah.” 16 Hotti lemmeggwat hi Paul ja penajapana hachi tatakhu ta khomenong cha, ja inali na hi, “Chaˈju an a-akhiˈ an holag Israel ja chaˈju khu an Hentil an khun meˈdayaw ay Apo Jos, chonglon ju hitay alloˈ. 17 Hini Jos ta-o an holag Israel ja pinili na chin a-ammod ta-o ja nunholakhona chicha ta chenom-or cha hichi ad Egypt. Ja enekak na chicha ad Egypt khapo ay ni otong an apfalinana. 18 Hinalimunana chicha hi apat chi polo hi tagwon hichi let-ang ingkhana hi 19 enapfak na chin peto an nasyon hichi ad Kana-an ja empfanoh na chin a-apo ta-o.
20 Nete-a hichin immajan cha ad Egypt ingkhana chin immajan cha ad Kana-an ja immuy chi apat hi khahot ta han lemay polo hi tagwon. Napfalin hitay ja enhaad Apo Jos hana mun-ap-apo ay chicha ingkhana hi nun-ap-apugwan Samuel an profeta na. 21 Chin nun-ap-apugwan Samuel ja empfokha cha ay Apo Jos hay Ari cha. Ja pinilin Apo Jos hi Saul an empfalay Kish an holag Benjamin ta hijay mun-ari, ja nun-ari hi apat chi poloh tagwon. 22 Ja enaan Apo Jos hi Saul ta empallog na hi Ari David an mun-ari ay chicha. Ja tinihtikhuwan Apo Jos hini omaˈ-atan David hi nangarjana hi, ‘Hinuy empfalay Jesse an hi David, ja podpodhoˈ hija, ti khuna unuchon an amin hana penhod u hi atona.’a 23 Holag David chin inalin Apo Jos an Manakhu ay chita-o an holag Israel, ja nipa-annung hitay chin nangpa-aliyana ay Hesus. 24 Nahhun hi John Bautista an immali ja unot hi Hesus. Ja engkasaban John ay chita-o an holag Israel an mahapor an chuˈkhon ta-o hana pfahor ta-o ja numpabautisar ta-o. 25 Unot gwa an mapfalin chin tamun John ja inali na hi, ‘Ngay anila ju hi omaˈ-ataˈ? Pfu-un ha-in hini mamahhod an Manakhu hi tatakhu. Hijay metob ay ha-in, ja anong un u podhon an mumpfalin hi himpfut na ja achiyaˈ ma-ipfilang, ti munnaud hija an napfagto.’”
26 Ja entoloy Paul an nunhapit ja inali na hi “A-akhiˈ an holag Abraham, ja chaˈju khu an Hentil an khun meˈdayaw ay Apo Jos, chita-o chi nangpa-innilaan Apo Jos ay ni atona an manakhu hi tatakhu. 27 Muti hachi tatakhu hichi ad Jerusalem ja chin a-ap-apo cha, ja agkhuy cha immatunan an hi Hesus hini hennag Apo Jos an Mamahhod. Ja anong un cha khun pfahaon hi ahapfahapfachu hana intulaˈ chin profetan Apo Jos chin nahop, ja agkhuy cha na-awatan an hi Hesus hini khun cha hapiton ay ni intulaˈ cha. Muti impa-annung cha chamchama hay hachi inalin hachi profeta chin nanugijan cha ay Hesus. 28 Anong un ma-id pfahor na hi pamatajan cha, ja chinagchag cha hi Pilato ta empapatoy na. 29 Gwa an napfalin an impa-annung cha an amin chin nitulaˈ an ma-at ay Hesus ja empah cha hija chin kros ja i cha inlupfuˈ. 30 Muti minahuwan Apo Jos hija. 31 Chin nummahuwana ja cho-or chi arkhaw hi numpatikhana chin numpun-ibpfa na an narpu ad Galilee hi immajan cha hichi ad Jerusalem. Ja chicha ad ugwani chi mangpa-innila ay Hesus ay chita-o an Hudju. 32 Hotti tayya an immali ami heto an mangpa-innila ay tay maphod an hapit Apo Jos an hija hitay. Chin ingkarin Apo Jos chin a-ammod ta-o, 33 ja impa-annung na ad ugwani ay chita-o an holag cha chin nummahuwan Hesus. Hijah tay chin inalin Apo Jos ay ni me-aggwa an Psalm hi nangarjana hi,
‘He-a chi empfalay u
Ja ad ugwani ja impatikhaw u an ha-in chi amam.’b
34 Ja gwa hana uchumna an ingkarin Apo Jos an nipa-annung ay Hesus. Hay ingkari na ja mahuwana hi Hesus ta achi khu matoy, ja hitay chi oha an nitulaˈ an hapit Apo Jos hi nangarjana hi,
‘Ichat u an ichat ay chaˈju an amin hana bindisyon an ingkariˈ ay Ari David.’c
35 Hi Hesus hini nipa-annungan tay an ingkari na, ti gwacha khu han allon ni oha an Psalm an inalin Ari David ay Apo Jos hi,
‘Anilaˈ an ha-in an naˈna-unnud an empfalay mu, ja achim apfuluton an mapfuluˈ hitay achor u.’d
36 Hi David ayya, napfalin an enat na hana penhod Apo Jos chin atattakhu na, ja natoy. Ja nilupfuˈ ay ni nilub-an chin a-ammod na ja napfuluˈ chin achor na. 37 Muti hi Hesus ayya ja agkhuy napfuluˈ chin achor na ti minahuwan Apo Jos.” 38 Entoloy Paul an nunhapit, ja inali na hi, “A-akhiˈ, mahapor an innilaon ju hitay. Khapo chin enat Hesus ja mapfalin an mapakawan an amin chi pfahor ta-o. Hitay chi ipa-innila mi ay chaˈju ad ugwani. 39 Khapo ay tay enat Hesus ja ipfilang Apo Jos hi magpong an amin hana mamati ay hija, muti ma-id chi oha hi mipfilang hi magpong hi pannig Apo Jos khapo hi pangunuchana ay ni urchin Moses. 40 Hotti tikhan ju gwot niˈ ta achi ma-at ay chaˈju chin impatulaˈ Apo Jos chin profeta hi nangarjana hi,
41 ‘Chonglon ju, chaˈju an khun tomangkhatangkha, ti gwa han atoˈ ad ugwani an atattakhu ju an natnat-on, hot masda-aw aju, muti matoy aju chamchama. Ti achi ju pattiyon, anong un gway mangpa-innila ay chaˈju!’”e Angkhay hitay hi inalin Paul.
42 Gwa an pfimmutay cha Paul ay Barnabas ay chuy sinagoga, ja inalin chin tatakhu hi, nu mapfarpfalin, ja etoloy cha koma hini itudtuchu cha ay ni umali an Hapfachu. 43 Pfimmutay cha an amin chin tatakhu ja cho-or chi nitnud ay cha Paul ay Barnabas an Hudju ja Hentil an khun miˈ-unud ay ni urchin chi Hudju. Ja tinukhun cha Paul ay Barnabas chicha ta etortoloy cha an monhochor ay ni khohkhoh Apo Jos.
44 Unot nachakngan chin Hapfachu, ja na-amung an amin chin tatakhu ay chuy an pfuglay ta chonglon cha hini hapit Apo Jos. 45 Unagkhu tinnig chin Hudju hachi atakhutakhu an na-amung ja emmaˈ-amoh cha. Ja unagkhu nunhapit hi Paul ja ente-a cha an mamahiw ay hija ja an mamaˈ-i chin khuna hapiton. 46 Muti agkhuy temma-ot cha Paul ay Barnabas ja inali cha hi, “Mahapor an chaˈju an Hudju chi mahhun an pangtuchugwan mi ay tay hapit Apo Jos. Muti tayya an chin-ug ju, hotti un chaˈju hon hinugwi ju hini achor ju an achi mipfilang an miˈtakhu ay Apo Jos hi ma-id chi pogpogna. Hotti nangamong aju ta hay hana Hentil chi i mi pangtuchugwan. 47 Ti amat heto chin inalin Apo Jos an,
‘Piniliˈ chaˈju an manilagwan hay hana Hentil ta tuchugwan ju an amin hay hana tatakhu heto lota ay tay hapit u, ta gway aton cha an miˈtakhu ay ha-in hi ma-id chi pogpogna.’”f
48 Ja unot chengngor hachi Hentil chin inalin Paul ja mun-an-anla cha ja khun cha haphapiton hini aphod ni hapit Apo Jos an chengngor cha. Ja an amin hana pinilin Apo Jos an miˈtakhu hi ma-id chi pogpogna ja namati cha. 49 Ja nunchongor chin hapit Apo Jos an amin hachi apfuglapfuglay hichi. 50 Muti chinagchag chin Hudju hay hachi a-ap-apon chuy an pfuglay ja hana ma-ar-ali an pfinapfai an khun meˈdayaw hachi Hudju ta miˈpahiw cha ay cha Paul ay Barnabas. Amat hichi ja empakak cha ay chuy pfuglay cha ad Antokya. 51 Cha Paul ay Barnabas ja pinuˈpu-an cha chin chapor ay chuy chapan cha ta panginnilaan chin tatakhu ad Antokya an napfalin chin tukhun cha ay chicha hotti un cha ikhad. Amat hichi ja empacheh cha an umuy ad Ikonium. 52 Ja hay hachi nataynan an namati hichi ad Antokya ja nagwachaan cha hi an-anla ja ay ni apfalinan ni Espiritu Santo.