4
1 Chaˈju an a-ap-apon chi himpfut, ja onoˈnongon ju ta hay magpong chi aton ju ay chicha. Ti anila ju an anong un chaˈju ja gway Apo ju ad langit an manugwi ay chaˈju.
Hay mitukhun an amin hana namati
2 Hay oha hi alloˈ ay chaˈju an amin, ja itugtukha ju an khun mungkalalag, ja enhehemad ju, ja khun aju munyaman ay Apo Jos. 3 Mungkalalag aju ayya ja khun chaˈmi pi-idchum an ekalalakhan. Epfokha ju ay Apo Jos ta hijay mangpaˈ-igwin hay homalegwa ay ni i mi aton an mangtudtuchu ay ni omaˈ-atan Kristo, an agkhuy nipa-innila chin hophopapna. Hitay an khun mi itudtuchu chi khimmapo hi ujaˈ nipfaluchan ad ugwani. 4 Ekalalakhanaˈ ta hini atoˈ an muntudtuchu ja nalaka hi ma-awatan, ti hitay chi amatan chi muntudtuchu. 5 Ep-ephod ju an miˈtakhu ta ma-id koma pahigwon hana agkhuy namati, ja mehahagkhana aju an amin hi timpo an mangali ay ni omaˈ-atan Kristo. 6 Tikhan ju ta megngor ja ma-uloy hini aton ju an mangali ja annilaon ju koma hini maphod an pampfar ju hi oha-ohanna an gway epfokha na.
7 Hi Tikikus ja oha an akhi ta-o an namati ja an podpodhon ta-o. Hijay honakhoˈ ta ipa-innila na ay chaˈju an amin hana naˈna-at ay ha-in. Mapagtarkan hija an khun tomolong ay ha-in, ja padchung u an khun munserbi ay Apo Hesus. 8 Hijaot un u honakhon hija ta ipa-innila na hini omaˈ-atan mi heto ja ta ipapfi-ah na hini nomnom ju. 9 Hi Onesimus an narpu hina ja oha khu an mapagtarkan an ibpfa an podpodhon ta-o. Hijay pun-ibpfan Tikikus an umali hina ja ipa-innila cha an amin hana naˈna-at heto.
10 Hi Aristarkus an niˈpfabpfalud ay ha-in ja pakumustaan chaˈju, ja amat khu ay Mark an ibpfan Barnabas. Hi Mark chin inaliˈ an mangiliyon ju hu-un umali hina. 11 Ja pakumustaan chaˈju khu ay Hesus Justus. An amin hana Hudju heto an namati, ja un angkhay hay hato tolo chi nun-i-ibpfaˈ an khun muntudtuchu hato tatakhu ta gway aton cha an midchum ay ni Pun-ap-apugwan Apo Jos. Mun-an-anlaaˈ khapo hi tolong cha ay ha-in.
12 Hi Epafras an narpu hina gwachaan ju an khun munserbi ay Kristo Hesus, ja tan pakumustaan chaˈju. Itugtukha na an mangkalalakhan ay chaˈju ta mehamad hini pammati ju ja ta paˈ-innilaon ju an amin hana penhod Apo Jos. 13 Tihtikhuwaˈ hana liyaˈ na an khun manamuwan hay hana ap-aphochan ju, ja hay hana khu namati ad Laodisea ja Hierapolis. 14 Ja pakumustaan chaˈju khu ay Luke, hini podpodhon ta-o an choktor, chicha ay Demas.
15 Allon ju hana i-ibpfa ta-o an namati hichi ad Laodisea an pakumustaaˈ chicha, ja amat khu ay Nimfa ja hana namati an khun mummeha ay ni pfalay na. 16 Napfalin ayya an empfaha ju hitay tulaˈ ja impi-uy ju ad Laodisea ta peˈpfahan hana namati an khun ma-amung an mummeha hichi. Ja gwa khu han tulaˈ u hichi ad Laodisea hotti peˈpfaha ju khu nu ipa-ali cha ay chaˈju. 17 Ja allon ju ay Arkipus ta ikhibpfoh na hini tamu an impulang Apo Hesus ay hija.
18 Ha-in an hi Paul chi nangkhulit ay tay me-ang-angonoh an tulaˈ. Omod aju hina? Achi ju alichuwan an nipfabpfaluchaˈ pay hotti ekarkalalakhanaˈ.
Hi Apo Jos chi mangkhohkhohan ay chaˈju an amin.