3
1 A-akhi, khapo ta nidchum aju ay Kristo an niˈmahu, ja hay nomnomon ju ja hana gwa ad langit an gwachaan Kristo an inu-umpfun ay ni nun-appit hi agwan Jos Ama. 2 Hana gwa ad langit chi nomnomnomon ju, pfu-un hana gwah to lota. 3 Ti natoy chin kanaman an nitakhuwan ju, ja nichatan aju hi pfakhu hi piˈtakhuwan ay Kristo an gwa ay Ama na ad langit. 4 Ja machakngan ayya chin ipatikhagwan ni gloryan Kristo an narpugwan tay pfakhu an piˈtakhuwan, ja matikhaw khu hini glorya ta-o an ninidchum ay hija.
Chuˈkhon ta-o chin napfahulan an piˈtakhuwan
5 Mahapor an chuˈkhon ju chin napukhit an nomnom ja ugali ju. Epokhong ju hana akhakhaˈ-ihaw an ugali, amat hana me-eloˈ hi pfu-un ahagwa, ja hana khun mangat ay ni napukhit an penhod chi achor. Achi aju na-amnagwan, ti hana na-amnagwan ja un hana khina-u heto lota chi Apo Jos cha. 6 Khapo hay hato an ugali ja umali hini pfungot Apo Jos hana tatakhu. 7 Amat heto chin nitakhuwan ju chin agkhuy ju immunuchan ay Apo Jos. 8 Muti ad ugwani ja epokhong ju an amin hay hato: hana pfungot, ja hana pumaˈ-iyan hi ibpfah takhu, ja hana pahiw, ja an amin chi hay napukhit hi hapit. 9 Ja achi aju munlahlah hi ibpfa ju hi takhu, ti chin-ug ju hana napukhit an nomnom ja ugali ju chin agkhuy ju namatiyan, 10 ja inchat Apo Jos ay chaˈju hini pfakhu an nomnom, ja khuna khu ipabpapfakhu ingkhanah omaˈ-at aju ay hija ja umannung an annilaon ju hija. 11 Ay tay an pfakhu an piˈtakhuwan ad ugwani ja numpapadchung ta-o an ma-id chi hay akhaˈkhaja, Hudju ja Hentil, nakugit ja agkhuy, ja hana narpu hi uchumna an pfuglay an numpfino-ob-on chi hapit ja ugali cha, ja hana ma-id achar na, himpfut ja pfu-un. Hi Kristo chamchama ja angkhay chi ma-ar-ali ja gawwacha hija ay chita-o an amin an namati.
12 Hotti chaˈju an pinilin Apo Jos an tatakhu na ja an podpodhona, ja hay hato chi aton ju. Manghinkikinna-ahi aju ja muntitinnolong aju. Mumpakumbaba aju ja na-umlong ja na-anuh aju. 13 Anuhan ju hana pungkulangan hana papadchung ju an tatakhu, ja manghempepennakawan aju nu gway pfimmahor ay chaˈju an amat ay ni enat Apo Jos an namakawan ay chaˈju. 14 Ja achi omanay hay hato, ti mahapor an gway pamhod. Ti nu makha-utan aju ayya hi pamhod hot mehamad hini pun-oh-ohhaan ju.
15 Pachot-anan ju hini i ju pun-oh-ohhaan hi nomnom khapo hi neˈ-oh-ohhaan ju ay Kristo. Ti enajakhan chita-o ay Apo Jos ta mun-oh-ohha ta-o an amat hi ohah achor. Ja khun aju munyaman ay hija. 16 Hay hana hapit Kristo ja etoloy ju an khokhotan ta paˈ-innilaon ju. Inchatan chaˈju hi maphod an nomnom ta khun aju manghintitinnuchu ja manghintitinnukhun. Ekanta ju hana Hapit Apo Jos an Psalm, ja hana uchumna an kantan chi namati an pundayaw ay Apo Jos ja mangpapfi-ah hi pammati an gwachaan hi panagyaman ay Apo Jos. 17 Chaˈjuy tatakhun Hesus an Apo ta-o hotti mahapor an pa-ennongan ju an amin chi aton ja hapiton. Ja khun aju munyaman ay Jos Ama khapo ay ni enat Hesus.
Hay mitukhun hana pamilya
18 Chaˈju an pfinapfai, mahapor an naˈna-unnud aju hana enah-ahagwaan ju, ti hitay chi aton chi hay nidchum ay Apo Hesus. 19 Ja chaˈju an linala-e, mahapor an podpodhon ju hana enah-ahagwaan ju ja achi aju mabmapfungot ay chicha.
20 Chaˈju khu an empfapfalay, unuchon ju an amin hana tukhun hana a-ammod ju, ti hitay chi penhod Apo Jos an ugalin chi namati. 21 Chaˈju an a-ammod an linala-e, tikhan ju ta achi munheglay aton ju an humingar hay hana empfapfalay ju, ti pfumanug cha.
Hay mitukhun hana himpfut ja hana a-ap-apo cha
22 Chaˈju an himpfut, unuchon ju an amin chi allon hana a-ap-apo ju heto lota. Pa-ennongan ju an muntamu, anong un chaˈju achi titigkhan, ti pfu-un hay takhu ja angkhay chi khapo na hi i ju puntamuwan ta podpodhon chaˈju, muti aton ju khapo ta podhon ju, ja podhon ju khu an munserbi ay Apo Hesu Kristo. 23 Nu nga chah ni tamuwan ju ja ipa-annung ju koma, ti hi Kristo chi punserbiyan ju an pfu-un hay padchung ju an takhu. 24 Ti anila ju an gway lagpfu ju an hija hini pfanoh an ichat Kristo, ti hi Kristo hini Apo an khun ju punserbiyan. 25 Muti hana ayya muntortoloy an mangat hi napukhit ja hay pundusaan Apo Jos chi hahadchon cha, ti ma-id chi hay akhaˈkhaja ay Apo Jos, ti punchichipatona hini atona an manugwi hi tatakhu.