FILIPOS
Hini omaˈ-atan tay an libju
Hitay an tulaˈ ja intolong Apostol Paul hay hana namati ad Filipos, chin nahhun an iglesia an pfinangon Paul hichi provincian chi Macedonia ad Europa. (Acts Kapitulo 16:6-40) Chin nuntula-an Paul ja gwa an nipfabpfalud khapo hi i na nangaskasabaan ay ni Ebanghelyon Apo Hesu Kristo.
Hay oha hi nuntula-an Apostol Paul ja podhona an munyaman hachi namati ad Filipos hana tolong an impipaw-it cha ay hija. Podhona khu an tukhunon chicha ti unchani ja na-upay cha khapuh nipapfalluchana ja hachi cho-or an likhat an horhortapon cha khapuh namatiyan cha.
Intukhuna khu ay chicha an un-unuchon cha hini enat Kristo an impa-umlong na hini achor na chin gwachaana heto lota. Ja nomnomon cha koma hana ap-aphochan chi ibpfa cha an takhu ta pfu-un hini achor chay nomnomon cha ja angkhay. Empanomnom na ay tay an tulaˈ an tinakhun Apo Jos chicha khapo ay ni otong an khohkhoh na ja hini pammati cha ay Hesu Kristo ja angkhay, ta achi cha punhohodlanan hini pangatan cha ay ni urchin Moses ja hana uchumna an allon chi tatakhu hi ma-unud. Inali na khu ay tay an tulaˈ an ichat Apo Jos chi lenong hana khun mungkalalag ay hija ja ichat na khu hana linagpfun an amin hana namati chin pidchuman ta-o ay Kristo ad langit.