23
Chin nang-ajan chan Hesus ay Pilato
1 Amat hichi ja initnud hachi tatakhu an in-uy hi Hesus ay Pilato an gobernador ad Judea ta mahumarja. 2 Enchalom cha hi Hesus ja inali cha hi, “Tinnig mi hitay an takhu an una allilagwon hay hato tatakhu ay tay an pfuglay mi. Ja intukhuna khu an achi mi ichat hana pakha ay ni Emperador ad Rome. Ja allona khu chi un hija hini Kristo an Ari an pinilin Apo Jos.” 3 Ja empfokhan Pilato ay Hesus hi, “Un chah he-a hini Arin chi Hudju?” Tempfar Hesus ja inali na hi, “Ti niya mah an inalim.”
4 Amat hichi ja inalin Pilato hachi a-ap-apon chi papachi ja hachi tatakhu hi, “Ma-id chi machakngaˈ hi hay panghiˈ-ingan hi pangchaloman ay tay an takhu.” 5 Muti impapilit cha an khun cha allon hi, “Hitay hini mangchokhochokhor hi atakhutakhu ta achi cha unuchon hini khupferno. Ente-a na hichi ad Galilee ja ingkhana ad Judea ja tan ne-atam heto ad Jerusalem.”
Chin nang-ajan chan Hesus ay Herod
6 Chengngor Pilato hay hato inali cha ja empfokha na nu eGalilee hi Hesus. 7 Unagkhu inannilan Pilato an eGalilee hi Hesus ja impa-uy na ay Herod an Ari hichi ad Galilee, ti netongor ja gawwacha ad Jerusalem. 8 Ja madmachennor hi Herod an nanikhaw ay Hesus, ti napfajag an penhod na an tikhagwun hija. Ti chengngor na an amin hini ena-enat Hesus ja podhona an piˈtikhaw hay atona hi milagro. 9 Cho-or chin empfokhapfokha na muti agkhuy tenomtompfar hi Hesus.
10 Ja chin a-ap-apon chi papachi ja memehtolon chi urchin an numpangataˈchug, ja impapilit cha an gway pfahor Hesus. 11 Amat hichi ja hi Herod ja hachi hinchalo na ja khun cha kekejan hon pinahiw cha hi Hesus. Linupfungan cha hija hi maphod an amat hi lopfong chi ari ja un chaot epapfangngad ay Pilato. 12 Cha Pilato ay Herod ja munchuˈ-ukhan cha muti ay chuy an arkhaw ja ente-a cha an mungkhayyum.
Chin nangarjan cha an epepatoy cha hi Hesus
13 Empapfokhan Pilato hachi a-ap-apon chi papachi, ja hachi uchumna an ap-apo, ja hachi tatakhu. 14 Ja inali na ay chicha hi, “In-ali ju hitay an takhu ja inali ju an intudtuchu na hay aton chi tatakhu an ngumangannu. Muti tayya an chengngor ju an menahmahaˈ hitay impapfahor ju ay hija ja ma-id umannung. 15 Anong un hi Herod ja ma-id chinakngana hi pfahor tay an takhu. Hijaot una empapfangngad ay chita-o. Hotti tayya an ma-id matikhaw hi ujaˈ panghiˈ-ingan an pamatajan ay hija. 16 Hotti ipahuplit u hija ja un u ipfu-aan.” 17 Hay khun aton Gobernador Pilato hi un Pfehtan chin Nalohan chin Angher Apo Jos, ja emmengha ay hija an khun mangpfu-aan hi oha hi nipfalud an piliyon hachi tatakhu. 18 Ja nunchechehhan hay hachi tatakhu an nangiˈgwap hi, “Epapatoy mu hi Hesus! Ti hi Barabas chi podhon mi hi ipfu-aam!” 19 Hitay an hi Barabas ja nipfalud, ti pemmatoy ja nginangannu nay khupferno. 20 Niˈhapit khu hi Pilato hachi tatakhu khapo hi pamhod na an mangpfu-aan ay Hesus. 21 Muti hi-u-ugwap cha an nangali hi, “Epepfakhat mu! Epepfakhat mu hi kros!” 22 Ja impetlon Pilato an niˈhapit hachi tatakhu ja inali na hi, “Anagkha? Ngay tugwali pfahor na? Ma-id ay chita chinakngaˈ hi enat na hi panghiˈ-ingan hi pamatajan ay hija. Hotti tayya an ipahuplit u hija ja un u ipfu-aan.” 23 Muti entotoloy cha pay an nangiˈgwap hi, “Epepfakhat mu hi Hesus hay kros!” Ja na-unud chin khun cha iˈgwap.
24 Hotti inapfulut Pilato chin inali cha an epapatoy na hi Hesus. 25 Impfu-aana chin empfokha cha an hi Barabas an ngimmangannu ja pemmatoy. Ja impulang na hi Hesus ay chicha ta aton cha hini podhon cha an aton ay hija.
Chin nangpfakhatan cha ay Hesus
26 Ini-itnud hachi hinchalo hi Hesus, ja enalaw cha han hi Simon an eCyrene an umuy ad Jerusalem. Ininat cha hija ja impapi-ug cha chin kros ja khuna i-un-unud ay Hesus. 27 Cho-or chin tatakhu an khun mangun-unud ay Hesus ja khun kumila hachi uchumna an pfinapfai, ti nignikhaon cha hija. 28 Nunligkhoh hi Hesus ja inali na ay chicha hi, “Chaˈju an pfinapfai an eJerusalem, achiyaˈ kilaan ta hay hana achor ju ja hana empfapfalay juwot niˈ chi kilaan ju. 29 Ti umali han arkhaw an punlikhatan ju hot allon ju hi, ‘Akhaˈkhaja hana pfinapfai an agkhuy emmempfalay ja agkhuy numpahuhu ta ma-id meˈchagkha hi hay i cha punlikhatan.’ 30 Ay chuy an timpo chi pangarjan chi tatakhu hi, ‘Megchay aju adniˈ, ton pfuludna, ta khapfunan chaˈmi.’ 31 Nu ay ha-in an ma-id pfahor na ja palikhatonaˈ hot munnaˈnaud pay hana gway pfahor na.” 32 Ini-itnud cha khu han chugwa an pfalud an i cha peˈpfakhat.
33 Ja unchaagkhu ne-atam ay chuy pfurpfulludna an amat hi ulun chi paang, ja empfakhat cha hi Hesus chin kros. Neˈpfakhat cha khu hachi chugwa an pfalud ay chi kros cha, ja nun-appit chin oha hi agwan Hesus, ja nun-appit chin oha hi ikhid. 34 Ja inalin Hesus hi, “Ama, pakawanom adniˈ hay hato tatakhu, ti agkhuy cha anila hitay khun cha aton.” Ja numpfeleng hachi hinchalo nu ngay mumpangala hay hachi lopfong Hesus. 35 Khun titigkhan hachi numpangataˈchug an tatakhu hi Hesus ja ente-an hachi a-ap-apon chi Hudju an mamahiw ay hija ja khun cha allon hi, “Tinakhu na hana uchumna an tatakhu ja chaad mah ta haniyana hichuy achor na nu hija chi Kristo an pinilin Apo Jos?” 36 Anong un hachi hinchalo ja nehnot cha ay Hesus ja niˈpahiw cha hija. Intumuˈ cha han pfimmanger an pfajah chin ta-o na 37 ja inali cha hi, “Takhuwom hini achor mu nu he-a hini Arin chi Hudju.” 38 Ti gwa han nitulaˈ ay chuy kros Hesus an allona hi, “Hijah tay hini Arin chi Hudju.”
39 Chin oha an pfalud an neˈpfapfakhat ja pinahiw na hi Hesus ja inali na hi, “Un chah pfu-un he-a hi Kristo? Chaad mah ta takhuwom hini achor mu ja chaˈmi!” 40 Muti chin oha an pfalud ja inhingar na hija ja inali na hi, “Un chah ma-id ta-ot mu ay Apo Jos ta allom hinuy? An un ta-o numpapadchung an nahugwi an matoy. 41 Ja chita ayya ja nahugwi ta khapo hana enat ta an napukhit. Muti hitay an takhu ja ma-id napukhit hi enat na.” 42 Amat hichi ja inali na ay Hesus hi, “Achiyaˈ adniˈ alichuwan an pi-idchum nu umali a an mun-ap-apo.” 43 Ja inalin Hesus ay hija hi, “Umannung hitay alloˈ ay he-a, ad ugwani an arkhaw ja midchum a ay ha-in ad Paradise.”
Chin natajan Hesus
44,45 Gwa an nahaˈ-ad ja himpfumagkha ja hemmelong chin hukhit ja munhehellong an amin ay chuy an lota ingkhana hichin napujaw. Ja hichi Templo ad Jerusalem ja himpfumagkha ja na-ittang chin ma-uˈtor an kurtina an nanahhalin ay chuy Na-assantuwan an Kwarto. 46 Ja iniˈgwap Hesus an nangali hi, “Ama, ichat u ay he-a hitay lennagwaˈ.” Nakhibpfoh hitay an inali na ja na-ongoh chin hochohcha na. 47 Unot tinnig chin kapitan chi hinchalo hichin na-at ja nundaydayaw ay Apo Jos ja inali na hi, “Umannung an ma-id pfahor tay an takhu.” 48 An amin chin tatakhu an na-amung an nannig hay hato an na-at ja immanamut cha ja khun cha pun-ug-ug hachi pfokhaˈ cha hi tutuju cha. 49 Ja hay hachi nangin-innila ay Hesus ja hay hachi pfinapfai an ninitnud ay hija an narpu ad Galilee ja nuntaynan cha ta tikhan cha nu ngay ma-at.
Chin nilub-an Hesus
50,51 Gwacha han ohan lala-e an hay ngachana ja hi Josep an e-Arimatea an provincian chi Judea. Maphod ja magpong hija an takhu. Oha khu hija an mamannod ay ni Pun-ap-apugwan Apo Jos hi tatakhu. Ja anong un oha hija an membron chi Sanhedrin ja agkhuy immapfulut chin nunhahappitanan cha an aton cha ay Hesus. 52 Ja immuy ay Pilato an i nangippug ta i na ilupfuˈ chin achor Hesus. 53 Amat hichi ja i na empah chin achor Hesus ja pinuttiputana hi pfinacha ja unaot ipahikhop han linijangan cha an pfato an lupfuˈ an ma-id pay i nilupfuˈ. 54 Ja gwa an mahilip ay chuy Alemana an arkhaw chi Punhakhanaan hachi Hudju hotti mete-a hini arkhaw chi ngilin.a
55 Hachi ayya pfinapfai an narpu ad Galilee an ninitnud ay Hesus ja nangunud cha ay Josep. Tinnig cha chin lupfuˈ ja chin enat Josep an nanglupfuˈ chin achor Hesus. 56 Immanamut cha ja nunhakhana cha hi mumpfango an lanob ta gway epelanob cha chin achor Hesus. Ja timmungaw cha ay chuy an Hapfachu an miˈngilin, ti hitay chi urchin Moses.