17
Chin nangkalalakhan Hesus hachi adalana
1 Empa-opoh Hesus an nangali hay hato ja entangad na ad uchu an mungkalalag ay Ama na ja inali na hi, “Ama, nachakngan hini eneˈcham an timpo, hotti ipapfagpfagtuwaˈ an Empfalay mu, ta gway atoˈ an mangpapfagpfagto ay he-a. 2 Ti inchatanaˈ hi apfalinan an mangpadchong an amin hi tatakhu. Hotti an amin hana pinilim an tatakhuˈ, ja ichataˈ chicha hi piˈtakhuwan an ma-id chi pogpog na. 3 Ja hini omaˈ-atan chi piˈtakhuwan an ma-id chi pogpog na ja hija hini nanginnilaan cha ay he-a an oh-ohha an umannung an Jos, ja ay ha-in an hi Hesu Kristo an hennag mu an immali heto lota. 4 Empapfagpfagtoˈ he-a ay ni nangataˈ hay hana impatamum ay ha-in ta medaydayaw a heto lota, ja tayya an pfinalin u. 5 Ad ugwani ja mumpfangngachaˈ ay he-a, Ama, hotti epfangngad mu ay ha-in hichin gloryaˈ an gawwa ay ha-in hi agkhuy pay narmugwan tay lota ja hi agawwachaaˈ ay he-a.
6 Impa-innilaˈ he-a hay hana pentoˈ mu an tatakhuˈ. Tatakhum chicha ja impulang mu ay ha-in, ja inunud cha hini hapit mu. 7 Hotti ad ugwani ja inannila cha an narpu ay he-a an amin hana gwa ay ha-in. 8 Intuchuˈ ay chicha hana intuchum ay ha-in, ja inapfulut cha. Ja inannila cha an umannung an he-a chi narpugwaˈ, ja pattiyon cha an he-ay nannag ay ha-in.
9 Khun u ekalalakhan chicha ad ugwani. Achiˈ ekalalakhan hana agkhuy namati, an hay ekalalakhaˈ ja hay hana tatakhu an inchat mu ay ha-in, ti tatakhum chicha. 10 An amin hana tatakhuˈ ja tatakhum, ja tatakhuˈ an amin hana tatakhum. Ja ma-edaydayawaˈ ad ugwani khapo ay chicha. 11 Tan umaliyaˈ ay ni achaam ad ugwani ja taynaˈ hitay lota, muti tan gawwacha cha pay ay tay lota. Hotti hay kalalag u ay he-a, Ama an Nasantuwan, ja halimunam chicha ay ni apfalinam an amat ay ni inchat mu ay ha-in ta mun-oh-ohha cha an amat ay ni nun-oh-ohhaan ta. 12 Ay tay ninidchumaˈ ay chicha ja hinalimunaˈ chicha ay ni apfalinam an inchat mu ay ha-in. Ja ma-id oh-ohhah na-utaw ay chicha, an un angkhay hini oha an neˈcha an ma-utaw, ta gway aton ni nitulaˈ an Hapit mu an mipa-annung. 13 Ja tan umaliyaˈ ay he-a ad ugwani, hijaot un u allon hay hato ay chicha ja un u taynan hitay lota, ta munnaud chi pun-an-anlaan cha ay ha-in. 14 Intuchuˈ an amin hini tukhun mu ay chicha ta unuchon cha, hijaot un apfoholan hana agkhuy namati chicha. Ti ma-id niˈ-ib-ibpfaan cha hay hana agkhuy namati an amat khu ay ha-in an ma-id niˈ-ibpfaaˈ ay chicha an agkhuy namati. 15 Achiˈ allon hi un mu agwiton hay hato ta taynan cha hitay lota. Muti ekalalag u ta haniyam chicha ta achi cha ma-apfak ay Satanas. 16 Ti amat cha ay ha-in an ma-id chi niˈ-ib-ibpfaana hay hana agkhuy namati an tatakhun Satanas. 17 Hini Hapit mu ja hija hini umannung. Hotti ipa-innilam ay chicha ta chuˈkhon chay pfahor ja naˈna-unnud cha ay ni umannung an Hapit mu. 18 Hennakhaˈ an immali heto lota an mangtudtuchugwan hato tatakhu, hotti honakhoˈ khu chicha an umuy hay hana agkhuy namati ta itudtuchu cha hini tukhun mu. 19 Khapo hay hato mangapfulut ay ni umannung an tukhun ja ichat u hitay piˈtakhuwaˈ ta gway aton ni piˈtakhuwan cha an meˈcha ay he-a.
20 Pfu-un hay hato ja angkhay chi ekalalakhaˈ an idchum u an amin hay hana mamati ay ha-in khapo hi puntudtuchugwan cha. 21 Hay kalalag u, Ama, ja mun-oh-ohha cha koma an amin ja meˈ-oh-ohha cha ay chita, an amat ay he-a an gawwacha ay ha-in, ja gawwachaaˈ khu ay he-a. Mun-oh-ohha cha koma ta pattiyon chi tatakhu an he-a chi nannag ay ha-in. 22 Inchat u ay chicha hini glorya an inchat mu ay ha-in ta mun-oh-ohha cha an amat ay ni nun-oh-ohhaan ta. 23 Ha-in chi gawwacha ay chicha, ja he-ay gawwacha ay ha-in. Hot mun-oh-ohha cha ja annilaon chi tatakhu an he-ay nannag ay ha-in, ja penenpenhod mu chicha an amat ay ni enat mu an namenhod ay ha-in. 24 Hay podhoˈ, Ama, ja hay hana tatakhu an impulang mu ay ha-in ja umali cha an meˈheto hina ad langit an umaliyaˈ, ta piˈtikhaw cha hini glorya an inchat mu ay ha-in khapo ta penenpenhochaˈ ay he-a nete-a chin agkhuy pay narmugwan tay lota. 25 Ama an magpong, hana agkhuy namati ja ma-id anila cha ay he-a. Muti anilaˈ he-a, ja inannilan hay hato an he-a chi nannag ay ha-in. 26 Impa-innilaˈ he-a ay chicha ja etortoloy u an aton, ta hini pamhod mu ay ha-in ja gawwacha ay chicha, ja gawwachaaˈ khu ay chicha.”