Lúkà 20

À bere Yèésù ní nɛ̀ɛ́ fúu ńkpá‐ɛ̀?

Ó ɖi nɔ́dzɔ́-kã̀, tsí Yèésù wà nɔ́gbà-ilé-Ɔ̀ɖáyé† si, tsí wà tsɛ̀kɔ́ fú ɔ̀nyà ŋa, tsí wà dzíkɔ̀ ɖíɖɔ̃̀ ti nára-Ɔ̀ɖáyé fú ŋa. Tsí onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa má nára-onùgbó-ìlú ŋa gbo, à wáa tó, 2 tsí wà bèrèé ní: Ikpá mɛ̀ɛ́ wà fúu, tsí ó wà ń tse iŋɛ́ nyɛ̀ŋɛ̀ ŋa ná? Nɛ̀ɛ́ tútú fúu ńkpá-ìrɔ́-bɛ́ɛ̀ ná? Kó fɔ̀ɔ́ fú àŋa.

3 Tsí Yèésù wà dzɔ́ŋù fú ŋa ní: Òŋu bàkó bèrè ŋá náfɔ̀ ɔ̀kã̀ntso bɛ́ gé, tsí ká dzɔ́ŋù‐ɛ̀ fú òŋu fòò. 4 Nɛ̀ɛ́ bɛ Yòhánà† Awɛ̀fúnɛ wá ní kó wáa wɛ̀† fú ɔ̀nyà ŋa ná? Ɔ̀ɖáyé nàmí ɔ̀nyà ŋa ni?

5 Tsí à nyí, tsí wà ɖìkpá fú ara-ŋa ní: Bí à náa fɔ̀ yèé fáà? Bí àŋa dzɛ́ fúu báàyí ní Ɔ̀ɖáyé ni, nákó bere àŋa ní, tsí kí tse tsí àŋa kò gba afɔ̀‐ɛ̀ gbɔ́? 6 Tsí bí àŋa sì fɔ̀ gbo ní ɔ̀nyà ŋa ni, ɔ̀nyà kpó yèé wà bɛ̀#ɛ́ nákó ta àŋa nóòkúta kpa, iŋɛ́ yèé tse#ɛ́, à karalé ní Yòhánà ni agbáfɔ̀-Ɔ̀ɖáyé fɔ̀† ni. 7 Tsí à tédzú fɔ̀ fú Yèésù ní: Àŋa kò ma ɛnɛ yèé bɛ̀ɛ́ wá#á.

8 Tsí Yèésù gbo ní: Ó sã̀! Ó ɖi, òŋu gbo, òŋu kàkó ɖíre ɛnɛ yèé fú òŋu ńkpá, tsí òŋu wà ń tse iŋɛ́ ŋa#á fú ŋa.

Yèésù mú àtsìtsɛ́ yíyàábàɖí kã̀ŋa kpòwe

(Màtéwò 21:33-46, Mákò 12:1-12)

9 Yèésù tɔ́ wà kpòwe fú ɔ̀nyà ŋa ró. Tsí ó ní: Olóko-kã̀ wà, tsí ó tsoko-egi-ɔtí† si. Tsí ó mú oko#ɛ́, tsí ń fú ɔ̀nyà kã̀ŋa ní ká wà tseé, tsí wà fú òŋu nákpálà tòŋu wá, tsí òŋu ká‐ɛ̀ ǹɖe lɔ nɔ́ɔ̀nà. Nákó kpɛ̃́ bɛ̀ tã́ná kó bɔ̀ wá.

10 Kíbí ɔɖɔ̃́ ɖɔ̃#ɛ́, ó bɛ arú‐ɛ̀-kã̀ lɔ fú àtsìtsɛ́ ŋa#á ní ká fú òŋu nákpálà tòŋu wá. Ó ɖi, kíbí arú‐ɛ̀#ɛ́ wáa tó#ɛ́, àtsìtsɛ́ ŋa#á kpaá, tsí lée lɔ nɔ́wɔ́ nákpo. 11 Tsí olóko#ɛ́ sɛ̃̀ bɛ arú‐ɛ̀-kã̀ wá ró, tsí à kpa òŋu gbo, tsí tsoró báa, tsí à lé òŋu gbo lɔ nɔ́wɔ́ nákpo. 12 Tsí olóko#ɛ́ tɔ́ bɛ arú-ɛ̀kɛ́ɛta wá, tsí à kpa òŋu gbo títí ɖáàkpà si nára‐ɛ̀, tsí à lée fùɖá nóko#ɛ́.

13 Tsí olóko#ɛ́ tsèsérè, tsí ní: Bí òŋu kó tse fáà báàyí? Òŋu kó tédzú bɛ ɔma bíbí-òŋu, àrínódzú-òŋu lɔ fú ŋa. Bóyá, à nákó nɛ́ àrísá fú òŋu.

14 Tsí ó bɛ̀ɛ́ lɔ. Kíbí ɔma#á káà tó#ɛ́, ɛnɛ ŋa#á ríi, tsí à wà wí fú ara-ŋa ní: Ɛ̀hɛ̃́ɛ̃̀ɛ̃̀, ɔma-olóko#ɛ́ gìɖì ní. Òŋu ní bàkó wáa dzogú-oko#ɛ́. Ó ɖi, àŋa kó kpaá nóòkú gbòkã́, tsí oko#ɛ́ kó kí fú àŋa.

15 Tsí à múu, tsí fàá fùɖá nóko-egi-ɔtí#ɛ́, tsí kpaá nóòkú.

Tsí Yèésù fɔ̀ ní: Báàyí#ɛ́ fe, à ma iŋɛ́ yèé olóko-egi-ɔtí#ɛ́ nákó wáa tse fú àtsìtsɛ́ ŋa#áà? 16 Nákó wáa mú ŋa, tsí kpa ŋá nóòkú kpó, tsí nákó mú oko-egi-ɔtí#ɛ́, tsí ń bɔwɔ́-olòmírɛ̃̀ ŋa.

Kíbí ɔ̀nyà ŋa gbɔ́ afɔ̀ nyɛ̀ŋɛ̀#ɛ́, à ní: Kpɛ́rɛ́! Kàkó dzɛ́ bɛ́ɛ̀ láyé!

17 Tsí Yèésù nyí, tsí wà wo odzú-ŋa kã̀kã̀, tsí wà wí fú ŋa ní: Bí kò tsi bɛ́ɛ̀ fee, kí tse tsí à kpòwe-kã̀ si ńǸwé-Ɔ̀ɖáyé† ní:

“Òkúta yèé amalé ŋa kɛ́ sɔ taánù#ɛ́,

òŋu#ɛ́ ní wáa kpã́dzú lárè, tsí gbé négo-ilé#ɛ́,

àtsùgbée ilé#ɛ́ kó máa ɖíwó#ɛ́”?^*

18 Ó ɖi, bí ɔ̀nyà-kã̀ tsubú dzì ńǹtá-òkúta#á, ɛnɛ nyɛ̀ŋɛ̀ nákó tsɛ́ kpó wíríwírí, tsí bí òkúta#á sì dzì ńǹtá-ɔ̀nyà-kã̀, nákó tɛ̀ ɛnɛ nyɛ̀ŋɛ̀ má kpó kpɛ̀nlɛ̀ɛ̀.

19 Kíbí Yèésù wí bɛ́ɛ̀#ɛ́, akɔ́nɛ nɛ́kpa-Ɔ̀ɖáyé† ŋa òŋu onùgbó-atsɛbɔ-Ɔ̀ɖáyé† ŋa, à wò ní àŋa kó múu. Iŋɛ́ yèé tse#ɛ́, à mà rere ní àŋa ní ó kpòwe nyɛ̀ŋɛ̀ fú#ɛ́. Ó ɖi, à sì wà sá fú ɛnɛ yèé ŋa kpérí si bɛ̀ɛ́#ɛ́.

À wà mú afɔ̀-owó-lómbà sísã, tsí wà ń sɔ ɔ̀kpákù fú Yèésù

(Màtéwò 22:15-22, Mákò 12:13-17)

20 Báàyí#ɛ́, à kpé Yèésù tsítsɔ́, tsí à bɛ ɔ̀nyà ŋa lɔ ńɖɔ̀‐ɛ̀ ní ká lɔ káà sɔ ɔ̀kpákù fúu. Ɛnɛ nyɛ̀ŋɛ̀ ŋa náa tse kíbí à dzɛ́ atsòtítɔ́ ŋa bɛ́, tsí à náa wà bèrèé náfɔ̀ àtóoríi ká gbɔ́ oŋù-íbàɖí-kã̀ nárũ‐ɛ̀ gé, tsí ká múu lɔ fú kɔ̀màɖã́ã̀. Òŋu ní nɛ́kpá, tsí kó nyáa kpɛdzɔ́ báa, tsí fɔ̀ ní ká kpaá nóòkú#ɛ́.

21 Tsí ɛnɛ nyɛ̀ŋɛ̀ ŋa káà tó, tsí wà wí fúu ní: Akɔ́nɛ, àŋa mà ní náa wà wíìnyɛ̀, tsí wà kɔ́nɛ nóòtítɔ́. Kà wo odzú-nɛ gbo. Tsí kíbí ká tse fáà gbo, tsí dzɔdzú-Ɔ̀ɖáyé#ɛ́, náa wà ɖíreé fúnɛ òŋu òtítɔ́. 22 Báàyí fee, ɛkpa-Ɔ̀ɖáyé† wà fú ɔ̀nà ní ká sã owó-lómbà fú ɔ̀gã́-ìdzɔba ńlɛ̀-Rómà† nàmí kò fú ɔ̀nà bɛ́ɛ̀? Àŋa kó sãã́ã̀ nàmí àŋa kó máa sãã́?

23 Tsí Yèésù rí ɔgbɔ̃́ yèé à wà ɖá#á mà, tsí ó wà wí fú ŋa ní: 24 Ká kɛ́ owó-ɛyɔ-kã̀ wá káyí!

Tsí à kɛ́ɛ wá. Tsí ó wà bèrè ŋá ní: Éwo-nɛ̀ɛ́ òŋu ɛ́kɔ-nɛ̀ɛ́ wà ńǹtá‐ɛ̀?

Tsí à dzɔ́ŋù fúu ní: Ti ɔ̀gã́-ìdzɔba ni.

25 Tsí Yèésù ní: Ó sã̀! Ó ɖi, ká kɛ́ iŋɛ́ yèé dzɛ́ ti ɔ̀gã́-ìdzɔba#á, tsí ń fú ɔ̀gã́-ìdzɔba, tsí yèé dzɛ́ ti Ɔ̀ɖáyé#ɛ́, ká ń fú Ɔ̀ɖáyé.

26 Tsí à kò rí ɔ̀nà-kã̀ kpókpó, tsí ká nyáa múu nódzú-ɔ̀nyà ŋa nóŋù-afɔ̀ yèé ŋa ó wà fɔ̀#ɛ́. Tsí kíbí náa dzɔ́ŋù fú ŋa gbà#á, ó mù ŋá, tsí à tédzú tsikó.

À wà mú afɔ̀-òkú ŋa kó sɛ̃̀ dzí wá náyé, tsí wà ń sɔ ɔ̀kpákù fú Yèésù

(Màtéwò 22:23-33, Mákò 12:18-27)

27 Ɛgbɛ́-kã̀ gbo wà, tsí à náa kpèé ní ɛgbɛ́-Sàɖùké† ŋa. Ɔma-ɛgbɛ́ ŋa ní náa wà fɔ̀ ní òkú ŋa kàkó sɛ̃̀ dzí wá náyé ró#ɛ́. Tsí ɔ̀nyà kã̀ŋa ǹɖe náàŋírĩ-ŋa, tsí sɔ́ tìmá-Yèésù, tsí wà bèrèé ní: 28 Akɔ́nɛ, Mɔ̀ɔ́sè kɔ ɛkpa-Ɔ̀ɖáyé† si fú àŋa ní: Bí ɔ̀nyà-kã̀ wà, tsí ó náya, tsí kò bíma tã́ná ó kú, bí ɛnɛ nyɛ̀ŋɛ̀ nɛ́ ìnàbí, ó wà ní ìnàbí‐ɛ̀-kã̀ kó tsókpó-aya#á, tsí aya#á kó bíma fúu. Ńbɛ̀ɛ́, ɔma#á nákó dzɛ́ ti òkú#ɛ́.^* 29 Kíbí ó dzɛ́ bɛ́ɛ̀#ɛ́ fee, ká fɔ̀ ní ìnàbí méedze kã̀ŋa wà, tsí ɛnɛ-onùgbó#ɛ́ náya, tsí kú náàrìmáa bíma. 30 Tsí ɔmàná‐ɛ̀ tsókpó-aya#á, tsí tɛ̀ɛ̀ gbo lɔ bɛ́ɛ̀. 31 Tsí ɛnɛ-ɛ̀kɛ́ɛta gbo tsókpó-aya#á, tsí tɛ̀ɛ̀ gbo lɔ bɛ́ɛ̀ ké. Tsí àŋa méedze#ɛ́ kpó, à náya#á, tsí kú kɔ̀ɔ́ dzɔ̀ɔ́ náàrì bíma. 32 Tsí ńǹtã̀ntã́‐ɛ̀#ɛ́, ɔnɔbɛ̃̀ɛ̃#ɛ́ gbo wáa kú. 33 Báàyí fee, nɔ́dzɔ́ yèé òkú ŋa nákó sɛ̃̀ dzí wá náyé#ɛ́, ti nɛ̀ɛ́ aya#á nákó dzɛ́ náàŋírĩ-ŋa, kíbí ó dzɛ́ ní àŋa méedze#ɛ́ kpó, à náya#á wòrí#ɛ́?

34 Tsí Yèésù wà dzɔ́ŋù fú ŋa ní: Ɔ̀nyà-ìtalɛ̀ bí ŋa, à náa náya, tsí nɔ́kɔ gbo. 35 Ó ɖi, ɛnɛ yèé ŋa dzɔ ní Ɔ̀ɖáyé kó sɛ̃̀ dzí ti náàŋírĩ-òkú ŋa wá náyé, tsí ká wáa gbé náyé yèé bàa náànyìwà#á, àŋa òŋu, afɔ̀-ká náya òŋu ká nɔ́kɔ kàkó tsɛdzɔ́-ŋa ró. 36 Tsí à kàkó kú láyé ró, iŋɛ́ yèé tse#ɛ́, à wà kíbí adzítsɛ́-ɔ̀rɔ̃† ŋa bɛ́, tsí kíbí à sɛ̃̀ dzí ti náàŋírĩ-òkú ŋa wá náyé#ɛ́, à dzɛ́ ɔma-Ɔ̀ɖáyé ŋa. 37 Mɔ̀ɔ́sè† gìɖì gbo ti wí wáa lɔ ní òkú ŋa nákó sɛ̃̀ dzí wá náyé. Ó kɔ si ńǸwé-Ɔ̀ɖáyé† ní Ɔ̀ɖáyé mú ara‐ɛ̀ ŋa òŋu ńsùyɛ̀-kã̀ yèé wà gbã̀ bìlàbìlà#á. Tsí ó wíìnyɛ̀ ti nára-Ɔ̀ɖáyé Ɔlɔ́dzɔ́, tsí wà fɔ̀ ní Ɔ̀ɖáyé ní dzɛ́ Ɔ̀ɖáyé-Àbàràhámì†, tsí dzɛ́ Ɔ̀ɖáyé-Ìsákà† gbo, tsí dzɛ́ Ɔ̀ɖáyé-Yàkúbù† gbo#ɛ́.

38 Tsí Yèésù fɔ̀ máa ní: Ó ɖi, Ɔ̀ɖáyé kò dzɛ́ Ɔ̀ɖáyé-òkú ŋa. Ɔ̀ɖáyé ɔ̀nyà-àwáàyɛ̀ ŋa ní ó dzɛ́#ɛ́. Òkpì‐ɛ̀ ní dzɛ́ ní ɔ̀nyà ɔ̀kã̀lɔ́ɔ̀kã̀, ni ɔ̀nyà-àwáàyɛ̀ nódzú-Ɔ̀ɖáyé ni.

39 Tsí akɔ́nɛ nɛ́kpa-Ɔ̀ɖáyé† kã̀ŋa ní: Akɔ́nɛ, ò fɔ̀ɔ́ rere héŋú.

40 Ó ɖi, à wà sá, tsí à kò ɖɔ́ɔ̀rɔ̀-ká bèrèé náfɔ̀-kã̀ kpókpó sɔ ró.

Kírísítò, ɔmalɔ́ma-Ɖàfíɖì dzɛ́ Ɔlá-Ɖàfíɖì gbo

(Màtéwò 22:41-46, Mákò 12:35-37)

41 Tsí Yèésù wà bèrè ŋá ní: Kí tse tsí à náa fɔ̀ ní Kírísítò Agbanɛlà yèé Ɔ̀ɖáyé nákó tsã̀, tsí bɛ̀ wá#á ni ɔmalɔ́ma-Ɖàfíɖì† ní ó dzɛ́#ɛ́ ná? 42 Ó ɖi, Ɖàfíɖì òŋu ká‐ɛ̀ fɔ̀ si ńnɔ́-Ìwé-Orĩ ŋa ní:

“Ɔlɔ́dzɔ́ wí fú Ɔlá-mi ní:

Wáa dzokó náàwóòtã́-mi,

43 tsí n mú ɔ̀tɛ̀-ɛ̀ɛ ŋa tsã́lɛ̀,

tsí o mú ɛsɛ̀ lé ńǹtá-ŋa.”^*

44 Ńbɛ̀ɛ́, Ɖàfíɖì wà kpe Kírísítò ní Ɔlá-òŋu. Báàyí#ɛ́ fe, kíbí Kírísítò dzɛ́ Ɔlá‐ɛ̀#ɛ́ fe, nákó nyáa dzɛ́ ɔmalɔ́ma‐ɛ̀ róò? È fɔ̀ɔ́ káyí!

Yèésù wà fɔ̀ ní ká máa wére akɔ́nɛ nɛ́kpa-Ɔ̀ɖáyé ŋa

(Màtéwò 23:1-12, Mákò 12:37-40)

45 Ɛnɛ yèé wà bɛ̀ ŋa#á wà rɛ̃tígbè-Yèésù, tsí ó wà wí fú ɔmatsɛ́‐ɛ̀ ŋa ní: 46 Ká tsɔ́ éwo-ara-ŋa rere ti nára-akɔ́nɛ nɛ́kpa-Ɔ̀ɖáyé† ŋa. Àŋa òŋu, à náa wɔ àwù gúgù ŋa si, tsí wà rɛ̃̀ wérí, tsí à náa wò gbo ní ɔ̀nyà ŋa kó wà rɔlɛ̀ kí àŋa náàbɔ̀ɔ́mɛ̀ ŋa. Bí à lɔ ńlé-ìkpàɖé-ɔma-Ìyúɖà ŋa†, à náa wo ká dzokó ńwádzú, tsí nóòkpì-dzídzɛ gbo, à náa wo ìɖì-onùgbó. 47 À náa gbó okpó ŋa gbo kpó ilé ilé, ɔ̀nà ɔ̀nà, tsí à náa wà wúùre kpíkpɛ̃́ gbo, tsí ká wà ń tsìké ní àŋa dzɛ́ atsòtítɔ́ ŋa. Ńnɛ̀ ní Ɔ̀ɖáyé nákó fɛtí fú ŋa líle líle lárè#ɛ́.