Mákò i

Ìwé-Ikɔ̀ ɖíɖɔ̃̀ ti Mákò

Ìwé-ikɔ̀ ɖíɖɔ̃̀ ti Mákò nyínyà ɖíre

Mákò kò dzɛ́ ɔmatsɛ́-Yèésù. Náàtsɛ̃̀tsɛ̃̀#ɛ́, òŋu Kpɔ́lù méèdzì à rɛ̃ ɔ̀nà. Tsí náànyì-bɛ́ɛ̀#ɛ́, ó wáa ɖi akɔ̀wé fú Òkúta adzítsɛ́-Yèésù. Tsí Òkúta kpɛ̀rɔ́-iŋɛ́ yèé Yèésù tse#ɛ́ òŋu iŋɛ́ yèé Yèésù fɔ̀#ɛ́, tsí ó gbɔ́. Bɛ́ɛ̀ ní iŋɛ́ ŋa#á lɔ gbà tã́ná ó nyáa kɔ ìwé‐ɛ̀#ɛ́ ńnɛ̀ɛ́.

Ńnɔ́-ìwé#ɛ́, Mákò nya iŋɛ́ yèé Yèésù tse ŋa#á ɖíre láre afɔ̀ yèé Yèésù fɔ̀ ŋa#á. Ó wà wò ní òŋu kó nyà ɖíre ní Yèésù dzɛ́ Ɔma bíbí-Ɔ̀ɖáyé. Ɔ̀ɖáyé fú Yèésù ńkpá ní kó mú àbi-ɔ̀nyà ŋa tɔrɛ fú ŋa, tsí kó bɔ àkɔ̃̀rɔ̃̀ ŋa gbo, tsí kó lé edzò yèé ŋa wà ɖɔ́kpɔ fú ɔ̀nyà ŋa#á sɛ̃̀ náànyì-ŋa gbo, tsí kó tse iŋɛ́ àwùsì-òmírɛ̃̀ ŋa gbo.

Nákpálà-èkéèdzì-ìwé#ɛ́, ó fɔ̀ ní Yèésù ǹɖe, tsí dzì nɔ́ɔ̀nà làkóò títí ńYèrúsàlɛ́mì. Ńbɛ̀ ní nákó réré títí kú si ńǹtá-egi-ìɖáàgàlàdzà#á, tsí Ɔ̀ɖáyé nákó dzíi ti náàŋírĩ-òkú ŋa wá náyé#ɛ́. Ńbɛ̀ɛ́, ɔ̀nyà ŋa nákó nyáa ma ɛnɛ yèé dzɛ́ Yèésù#ɛ́ ńǹkɛ̀ɛ́. Fee, Yèésù dzɛ́ Ɔma bíbí-Ɔ̀ɖáyé, tsí ó dzɛ́ ɛnɛ yèé Ɔ̀ɖáyé tsã̀, tsí bɛ̀ wá ní kó wáa gba ɔ̀nyà ŋa là#á gbo.