Mákò 12

Yèésù mú àtsìtsɛ́ yíyàábàɖí kã̀ŋa kpòwe

Tsí Yèésù tɔ́ wà kpòwe, tsí wà ń wíìnyɛ̀ fú ŋa ró. Tsí ó ní: Olóko-kã̀ wà, tsí ó tsoko-egi-ɔtí† si, tsí ma oɖi wérí‐ɛ̀ kpó, tsí tɔ́tse ìɖì-kã̀ si, tsí ká wà gú síso-egi ŋa#á bɛ́, tsí wà ń tse ɔtí. Tsí ó malé gíga-kã̀ gbo fú ɛnɛ yèé ŋa nákó wà ɖe oko#ɛ́. Tsí ó mú oko#ɛ́, tsí ń fú àtsìtsɛ́ kã̀ŋa, ní ká wà tseé, tsí wà fú òŋu nákpálà tòŋu wá, tsí òŋu ká‐ɛ̀ ǹɖe, tsí fa ɔ̀nà lɔ ńǹɖì dzídzɛ̃̀-kã̀.

2 Kíbí ɔɖɔ̃́ ɖɔ̃#ɛ́, ó bɛ arú‐ɛ̀-kã̀ wá fú àtsìtsɛ́ ŋa#á ní ká gba akpálà tòŋu wá fú òŋu. 3 Tsí kíbí arú#ɛ́ káà tó#ɛ́, àtsìtsɛ́ ŋa#á múu, tsí kpaá, tsí lée lɔ nɔ́wɔ́ nákpo. 4 Tsí olóko#ɛ́ sɛ̃̀ bɛ arú‐ɛ̀-kã̀ wá ró. Tsí à kpa òŋu néwo, tsí búu máa. 5 Tsí ó tɔ́ bɛ ɛnɛ-ɛ̀kɛ́ɛta wá ró. Òŋu#ɛ́, à kpaá nóòkú. Bɛ́ɛ̀ ní ó bɛ arú kpíkpɔ̀ wá fú ŋa#á. Tsí à náa kpa ŋá títí ɔ̀kã̀ ŋa náa kú#ɛ́.

6 Báàyí#ɛ́, ɔ̀nyà ɔ̀kã̀ntso gé ni bɔ fú olóko#ɛ́, tsí kó bɛ̀ lɔ fú ŋa#á. Ɛnɛ nyɛ̀ŋɛ̀ ní dzɛ́ ɔma bíbí‐ɛ̀, àrínódzú‐ɛ̀#ɛ́. Tsí ó bɛ̀ɛ́ wáa lɔ fú ŋa, tsí wà fɔ̀ ní: À nákó nɛ́ àrísá fú ɔma-òŋu òŋu. 7 Ó ɖi, kíbí ɔma-olóko#ɛ́ tó, tsí à ríi#ɛ́, à wà wí fú ara-ŋa ní: Ɛ̀hɛ̃́ɛ̃̀ɛ̃̀, ɔma-olóko#ɛ́ gìɖì ní. Òŋu ní bàkó wáa dzogú-oko#ɛ́. Ó ɖi, àŋa kó kpaá nóòkú gbòkã́, tsí oko#ɛ́ kó kí fú àŋa. 8 Tsí à ǹɖe gé, tsí káà múu, tsí kpaá, tsí wɔ́ òkú‐ɛ̀ fùɖá nóko-egi-ɔtí#ɛ́.

9 Tsí Yèésù ní: Báàyí fee, à ma bí olóko-egi-ɔtí#ɛ́ nákó tse fáà#áà? Nákó wáa mú àtsìtsɛ́ ŋa#á, tsí kpa ŋá nóòkú kpó, tsí nákó mú oko-egi-ɔtí#ɛ́, tsí ń bɔwɔ́-olòmírɛ̃̀ ŋa.

10 Nàmí à kò kã afɔ̀ yèé bɛ́ ńǸwé-Ɔ̀ɖáyé† niì? Afɔ̀#ɛ́ fɔ̀ ní:

“Òkúta yèé amalé ŋa kɛ́ taánù#ɛ́,

òŋu ní wáa kpã́dzú lárè, tsí gbé négo-ilé#ɛ́,

àtsùgbée ilé#ɛ́ kó máa ɖíwó#ɛ́.

11 Ɔlɔ́dzɔ́ ní tse iŋɛ́ nyɛ̀ŋɛ̀#ɛ́, tsí ó tse àbáàrí fú wa héŋú.”^*

12 Kíbí Yèésù fɔ̀ bɛ́ɛ̀ tã́#á, onùgbó-ɔma-Ìyúɖà† ŋa wo ní àŋa kó múu. Iŋɛ́ yèé tse#ɛ́, à mà rere ní àŋa ní ó kpòwe nyɛ̀ŋɛ̀ fú#ɛ́. Ó ɖi, à sì wà sá fú èrò#ɛ́, tsí à kɔ̀ɔ́ dzɔ̀ɔ́, tsí ǹɖe lɔ.

À wà mú afɔ̀-owó-lómbà sísã, tsí wà ń sɔ ɔ̀kpákù fú Yèésù

(Màtéwò 22:15-22, Lúkà 20:20-26)

13 Náànyì-bɛ́ɛ̀, à tsã ɔma-ɛgbɛ́-Fàrísì† kã̀ŋa òŋu ɔma-ɛgbɛ́-Èróɖì† kã̀ŋa, tsí bɛ̀ ŋá wá fú Yèésù ní ká wáa bèrèé náfɔ̀, tsí ń sɔ ɔ̀kpákù múu. 14 Tsí à wá, tsí wà fɔ̀ fúu ní: Akɔ́nɛ, àŋa mà ní náa fɔ òtítɔ́, tsí kà rí odzú-nɛ gbo sá. Tsí ɔ̀nyà-kã̀ kpókpó gbo kà nyáa kpa omi si nódzú fúu. Ó ɖi, kíbí ká tse fáà gbo, tsí dzɔdzú-Ɔ̀ɖáyé#ɛ́, náa wà ɖíreé fúnɛ òŋu òtítɔ́. Báàyí fee, ɛkpa-Ɔ̀ɖáyé† wà fú ɔ̀nà ní ká sã owó-lómbà fú ɔ̀gã́-ìdzɔba ńlɛ̀-Rómà† nàmí kò fú ɔ̀nà bɛ́ɛ̀? Àŋa kó sãã́ã̀ nàmí àŋa kó máa sãã́?

15 Ó ɖi, Yèésù òŋu ti mà ní à wà ɖɔ̃ arũ fú òŋu ni. Tsí ó wà bèrè ŋá ní: Kí tse tsí à wà sɔ ɔ̀kpákù fú òŋu ná? Ó ɖi, ká kɛ́ owó-ɛyɔ-kã̀ wá káyí!

16 Tsí à kɛ́ɛ fúu. Tsí Yèésù wà bèrè ŋá ní: Éwo-nɛ̀ɛ́ à yɔ, tsí kɔ ɛ́kɔ‐ɛ̀ gbo si ńǹtá-owó#ɛ́ ná?

Tsí à dzɔ́ŋù fúu ní: Ti ɔ̀gã́-ìdzɔba ni. 17 Tsí Yèésù fɔ̀ fú ŋa ní: Ká kɛ́ iŋɛ́ yèé dzɛ́ ti ɔ̀gã́-ìdzɔba#á, tsí ń fú ɔ̀gã́-ìdzɔba, tsí yèé dzɛ́ ti Ɔ̀ɖáyé#ɛ́, ká ń fú Ɔ̀ɖáyé.

Kíbí ó dzɔ́ŋù fú ŋa bɛ́ɛ̀#ɛ́, à kí dzã̀maa.

À wà mú afɔ̀-òkú ŋa kó sɛ̃̀ dzí wá náyé, tsí wà ń sɔ ɔ̀kpákù fú Yèésù

(Màtéwò 22:23-33, Lúkà 20:27-40)

18 Ńbɛ̀ɛ́, ɛgbɛ́-kã̀ gbo wà, tsí à náa kpèé ní ɛgbɛ́-Sàɖùké† ŋa. Ɔma-ɛgbɛ́ ŋa#á ní náa wà fɔ̀ ní òkú ŋa kàkó sɛ̃̀ dzí wá náyé ró#ɛ́. Tsí ɔ̀nyà kã̀ŋa náàŋírĩ-ŋa ǹɖe, tsí wá ńɖi-Yèésù, tsí wà bèrèé ní:

19 Akɔ́nɛ! Ó ɖi, Mɔ̀ɔ́sè† kɔ ɛkpa-Ɔ̀ɖáyé† si fú àŋa ní: Bí ɔ̀nyà-kã̀ wà, tsí aya‐ɛ̀ kò bíma fúu tã́ná ó kú kɔ̀ aya#á dzɔ̀ɔ́, bí ɛnɛ nyɛ̀ŋɛ̀ nɛ́ ìnàbí, ó wà ní ìnàbí‐ɛ̀-kã̀ kó tsókpó-aya#á, tsí kó bíma fúu. Ńbɛ̀ɛ́, ɔma#á nákó dzɛ́ ti òkú#ɛ́.^* 20 Báàyí#ɛ́, ká fɔ̀ ní ìnàbí méedze kã̀ŋa wà, tsí ɛnɛ-onùgbó#ɛ́ náya, tsí kú náàrì kparɔ ara‐ɛ̀ si ńlɛ̀. 21 Tsí ɔmàná‐ɛ̀ yèé à ń tɛ̀ɛ́#ɛ́ ǹɖe, tsí tsókpó-aya#á. Tsí òŋu gbo wáa kú kɔ aya#á dzɔ̀ɔ́ náàrì bíma. Ɛnɛ-ɛ̀kɛ́ɛta gbo bɛ́ɛ̀. 22 Tsí àŋa méedze#ɛ́ kpó náya#á, tsí kú kɔ̀ɔ́ dzɔ̀ɔ́ náàrì kparɔ ara-ŋa si ńlɛ̀. Náànyì-bɛ́ɛ̀#ɛ́, ɔnɔbɛ̃̀ɛ̃#ɛ́ gbo wáa kú. 23 Báàyí fee, nɔ́dzɔ́ yèé òkú ŋa nákó sɛ̃̀ dzí wá náyé#ɛ́, bí àŋa kpó, à sɛ̃̀ dzí wá fee, ti nɛ̀ɛ́ aya#á nákó dzɛ́ náàŋírĩ-ŋa, kíbí ó dzɛ́ ní àŋa méedze#ɛ́ kpó, à náya#á wòrí#ɛ́?

24 Tsí Yèésù wà wí fú ŋa ní: À nɔ̀! Iŋɛ́ yèé tse#ɛ́, à kò ma ikpá-Ɔ̀ɖáyé, tsí à kò gbɔ́ òkpì-Ìwé-Ɔ̀ɖáyé† gbo. 25 Ó ɖi fee, ńǹwèrè yèé òkú ŋa nákó sɛ̃̀ dzí wá náyé#ɛ́, afɔ̀-ká náya òŋu ká nɔ́kɔ kàkó tsɛdzɔ́-ŋa ró. À nákó gbé kíbí adzítsɛ́-ɔ̀rɔ̃† ŋa náa gbé gbà#á ni.

26 Ó ɖi, ti nára-afɔ̀-òkú ŋa kó sɛ̃̀ dzí wá náyé#ɛ́ fee, à kò kã ìwé-Mɔ̀ɔ́sè niì? Ńnɔ́-ìwé#ɛ́, ńbí à kɔ si ní Ɔ̀ɖáyé mú ara‐ɛ̀ ŋa Mɔ̀ɔ́sè ńsùyɛ̀-kã̀ yèé wà gbã̀ bìlàbìlà#á, à kɔ si bɛ̀ ró ní Ɔ̀ɖáyé wí fúu ní: “Èmi ní dzɛ́ Ɔ̀ɖáyé-Àbàràhámì†, tsí dzɛ́ Ɔ̀ɖáyé-Ìsákà† gbo, tsí dzɛ́ Ɔ̀ɖáyé-Yàkúbù† gbo#ɛ́.”^*

27 Tsí Yèésù fɔ̀ máa ní: Ɔ̀ɖáyé kò dzɛ́ Ɔ̀ɖáyé-òkú ŋa. Ɔ̀ɖáyé-ɔ̀nyà-àwáàyɛ̀ ŋa ní ó dzɛ́#ɛ́. Ó ɖi, à nɔ̀ gìɖì héŋú.

Ɛkpa yèésí kpã́dzú lárè náàŋírĩ-ɛkpa-Ɔ̀ɖáyé ŋa?

(Màtéwò 22:34-40, Lúkà 10:25-28)

28 Ńǹwèrè nyɛ̀ŋɛ̀#ɛ́, akɔ́nɛ nɛ́kpa-Ɔ̀ɖáyé†-kã̀ gbo wà bɛ̀, tsí ó gbɔ́ kíbí Yèésù òŋu ɔma-ɛgbɛ́-Sàɖùké† ŋa#á wíìnyɛ̀#ɛ́ gbà#á, tsí ó rí ní Yèésù dzɔ́ŋù fú ŋa rere. Ńbɛ̀ɛ́, òŋu gbo sɔ́má‐ɛ̀, tsí wà bèrèé ní: Náàŋírĩ-ɛkpa yèé ŋa kpó Ɔ̀ɖáyé ɖá fú àŋa#á fee, náàŋírĩ-ŋa, yèésí kpeéwo fú ŋa?

29 Tsí Yèésù ní: Ɛkpa yèé kpeéwo fú ŋa#á ní dzɛ́ ní: “Ɔma-Ìsàràyɛ́lì† ŋa, è rɛ̃tígbè! Ɔ̀ɖáyé Ɔlɔ́dzɔ́ ní dzɛ́ Ɔlá-wa#á. Òŋu níìkã̀ntso gé ní wà#á. 30 Nà nɛ́ àmúɖɔ̃̀ fú Ɔlɔ́dzɔ́ Ɔ̀ɖáyé-ɛ̀ɛ inɔ́ tã̀ã́, ànyì tã̀ã́, nà nɛ́ àmúɖɔ̃̀ fúu títí àmúɖɔ̃̀#ɛ́ kó lara-ɛ̀ɛ wɔ̀ dzálɛ̀, nà nɛ́ àmúɖɔ̃̀ fúu ńǹsérè-ɛ̀ɛ gbo kpó, tsí nà nɛ́ àmúɖɔ̃̀ fúu náàmí-ɛ̀ɛ gbo kpó.”^* 31 Tsí ɛkpa èkéèdzì‐ɛ̀ gbo ní dzɛ́ ní: “Nà nɛ́ àmúɖɔ̃̀ fú enìkéèdzì-ɛ̀ɛ kíbí nà nɛ́ fú ara-ɛ̀ɛ#ɛ́.”^* Ó ɖi, ɛkpa-kã̀ kpókpó kò wà, tsí kpã́dzú láre méèdzì nyɛ̀ŋɛ̀.

32 Ńbɛ̀ɛ́, akɔ́nɛ nɛ́kpa-Ɔ̀ɖáyé#ɛ́ wà wí fúu ní: Ɛ̀hɛ̃́ɛ̃̀ɛ̃̀, akɔ́nɛ, ó sã̀ héŋú! Afɔ̀ ìɖéǹɖè ní ò wà wí#ɛ́. Ɔ̀ɖáyé ɔ̀kã̀ntso gé ní wà#á. Ɔ̀kã̀ kpókpó kò wà ró. 33 Tsí ńǹɖéǹɖè#ɛ́, ó wà ní ɔ̀nyà kó nɛ́ àmúɖɔ̃̀ fú Ɔ̀ɖáyé inɔ́ tã̀ã́, ànyì tã̀ã́, tsí kó nɛ́ àmúɖɔ̃̀ fúu ńǹrã̀ã́mà‐ɛ̀ gbo kpó, tsí kó nɛ́ àmúɖɔ̃̀ fúu náàmí‐ɛ̀ gbo kpó, tsí kó nɛ́ àmúɖɔ̃̀ fú enìkéèdzì‐ɛ̀ kíbí náa nɛ́ fú ara‐ɛ̀#ɛ́. Àmúɖɔ̃̀ sã̀ láre ɛbɔ ɔ̀kã̀lɔ́ɔ̀kã̀ yèé à náa tse fú Ɔ̀ɖáyé#ɛ́.

34 Kíbí Yèésù rí ní ó dzɔ́ŋù òŋu ifɛ̀ɛ́nɔ́#ɛ́, ó wà wí fúu ní: Kò bɔ̀ kpíkpɔ̀ fúu ró, tã́ná Ɔ̀ɖáyé kó dzoyè si ńǹtá‐ɛ̀.

Náànyì-bɛ́ɛ̀#ɛ́, ɔ̀nyà-kã̀ kpókpó kò ɖɔ́ɔ̀rɔ̀-kó bere Yèésù náfɔ̀-kã̀ sɔ ró.

Kírísítò, ɔmalɔ́ma-Ɖàfíɖì dzɛ́ Ɔlá-Ɖàfíɖì gbo

(Màtéwò 22:41-46, Lúkà 20:41-44)

35 Yèésù wà tsɛ̀kɔ́ fú ɔ̀nyà ŋa ńlé-Ɔ̀ɖáyé, tsí ó tsí arũ, tsí wà bèrè ní: Kí tse tã́ná akɔ́nɛ nɛ́kpa-Ɔ̀ɖáyé† ŋa náa wà fɔ̀ ní, Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, ni ɔmalɔ́ma-Ɖàfíɖì† ni? 36 Ó ɖi, Mímí-Ɔ̀ɖáyé† gbɛ̃́ Ɖàfíɖì, tsí òŋu ká‐ɛ̀ fɔ̀ si ní:

“Ɔlɔ́dzɔ́ wí fú Ɔlá-mi ní:

Wáa dzokó náàwóòtã́-mi,

tsí n mú ɔ̀tɛ̀-ɛ̀ɛ ŋa tsã́lɛ̀,

tsí o mú ɛsɛ̀ lé ńǹtá-ŋa.”^*

37 Ɖàfíɖì òŋu ká‐ɛ̀ wà kpe Kírísítò ní Ɔlá-òŋu. Ńbɛ̀ɛ́, kíbí Kírísítò dzɛ́ Ɔlá‐ɛ̀#ɛ́ fe, nákó nyáa dzɛ́ ɔmalɔ́ma‐ɛ̀ róò? È fɔ̀ɔ́ káyí!

Yèésù wà fɔ̀ ní ká máa kɛ́ ɔwɔ́-akɔ́nɛ nɛ́kpa-Ɔ̀ɖáyé ŋa

(Màtéwò 23:1-12, Lúkà 20:45-47)

Ńbɛ̀ɛ́, èrò#ɛ́ kpó wà rɛ̃tígbè‐ɛ̀, tsí afɔ̀‐ɛ̀ wà ɖɔ̃̀ fú ŋa. 38 Tsí ó sɛ̃̀ wà tsɛ̀kɔ́ fú ŋa, tsí ó ní: Ká tsɔ́ éwo-ara-ŋa rere nára-akɔ́nɛ nɛ́kpa-Ɔ̀ɖáyé† ŋa. Àŋa òŋu, à náa wɔ àwù gúgù ŋa si, tsí wà rɛ̃̀ wérí, tsí à náa wò gbo ní ɔ̀nyà ŋa kó wà rɔlɛ̀ kí àŋa náàbɔ̀ɔ́mɛ̀ ŋa. 39 Tsí bí à lɔ ńlé-ìkpàɖé-ɔma-Ìyúɖà ŋa†, à náa wo ká dzokó ńwádzú, tsí nóòkpì-dzídzɛ gbo, à náa wo ìɖì-onùgbó. 40 Tsí à náa sɔ okpó ŋa ɖi adzìyàkú kpó. Tsí à náa wà wúùre kpíkpɛ̃́ gbo, tsí ká ń nyà ɖíre ní àŋa dzɛ́ ɔ̀nyà-atsòtítɔ́. Ńnɛ̀ ní Ɔ̀ɖáyé nákó fɛtí fú ŋa líle líle lárè#ɛ́.

Okpó-kã̀ fú owó láre olówó ŋa

(Lúkà 21:1-4)

41 Kíbí Yèésù wí bɛ́ɛ̀ tã́#á, ó káà dzokó gbe àɖákà-owó#ɛ́. Ńbɛ̀ ní à náa tsɔ̀yà ɖà ńlé-Ɔ̀ɖáyé#ɛ́. Tsí ó wà rí kíbí ɔ̀nyà ŋa waà mú owó ɖà ńnɔ́-àɖákà-owó#ɛ́. Olówó ŋa wà náàŋírĩ-ŋa kpíkpɔ̀, tsí à wà mú owó kpíkpɔ̀ kpíkpɔ̀ ɖà ńnɔ́-àɖákà#á. 42 Tsí okpó-kã̀ gbo wá. Okpó#ɛ́, adzìyàkú ní ó dzɛ́#ɛ́. Tsí òŋu gbo mú bìyéè wíríwírí méèdzì, tsí wáa ń ɖà ńnɔ́-àɖákà#á.

43 Ńbɛ̀ɛ́, Yèésù kpe ɔmatsɛ́‐ɛ̀ ŋa, tsí wà wí fú ŋa ní: Òŋu wí fú ŋa ní fee, okpó yèé bɛ́#ɛ́, adzìyàkú-kã̀ ni, tsí ó sì fú owó láre ɛnɛ yèé ŋa kpó fú owó ɖà ńnɔ́-àɖákà#á. 44 Iŋɛ́ yèé tse#ɛ́, owó yèé kpèlé ńǹtá-owó fú ɛnɛ-àtíbɔ̀ ŋa#á, òŋu ní à kɛ́ wáa fú#ɛ́. Ó ɖi, okpó#ɛ́ òŋu, owó yèé wà nɔ́wɔ́‐ɛ̀ kpó ilé ilé, ɔ̀nà ɔ̀nà#á ní ó kɛ́ wáa fú#ɛ́.