Màtéwò 23

Yèésù wà fɔ̀ ní ká máa wére akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa

(Mákò 12:37-40, Lúkà 11:39-52, 20:45-47)

Náànyì-bɛ́ɛ̀#ɛ́, Yèésù wà wíìnyɛ̀ fú ɔmatsɛ́‐ɛ̀ ŋa òŋu èrò#ɛ́. 2 Ó ní: Akɔ́nɛ nɛ́kpa-Ɔ̀ɖáyé† ŋa òŋu ɔma-ɛgbɛ́-Fàrísì† ŋa kparɔ arũ-Mɔ̀ɔ́sè†, tsí wà nya òkpì-ɛkpa-Ɔ̀ɖáyé† ŋa fú ɔ̀nyà ŋa. 3 Ńnɛ̀ ní ó wà ní ká tse si ńǹtá-afɔ̀-ŋa, tsí tse iŋɛ́ kpó yèé à wà fɔ̀ fú ŋa#á ńnɛ̀ɛ́. Ó ɖi, ká máa wérè ŋá. Iŋɛ́ yèé tse#ɛ́, à kà wà tse si ńǹtá-ɛ̀kɔ́ yèé àŋa ká-ŋa wà tse fúnɛ#ɛ́. 4 À náa ɖi arù wíwówo ŋa fú ɔ̀nyà ŋa ní ká rù. Ó ɖi, àŋa ká-ŋa, à kà wò ní ɔmalɔ́wɔ́-àŋa gìɖì bɛ́ kó kã arù#ɛ́, tsí ń mɔ́wɔ́ gbè fú ɔ̀nyà ŋa.

5 Tsí iŋɛ́ ɔ̀kã̀lɔ́ɔ̀kã̀ yèé à náa tse#ɛ́, à náa wà tseé ní ɔ̀nyà ŋa kó wà rí àŋa. Agolo yèé à náa kɔ afɔ̀-Ɔ̀ɖáyé si ńnɛ̀#ɛ́, tiŋa òŋu náa lákṹ láre ti ɔ̀nyà ŋa. Tsí à náa sɔ etí-àwù-ŋa gbo ɖi gúgù máa. 6 Bí à wà nóòkpì-dzídzɛ-ɔɖɔ̃́, à náa wo ìɖì-onùgbó, tsí bí à lɔ ńlé-ìkpàɖé-ɔma-Ìyúɖà ŋa†, à náa wo ká dzokó ńwádzú. 7 À náa wò gbo ní ɔ̀nyà ŋa kó wà rɔlɛ̀ kí àŋa náàbɔ̀ɔ́mɛ̀ ŋa, tsí ká wà kpè ŋá ní akɔ́nɛ gbo! 8 Ó ɖi, àŋa òŋu ká máa dzɛ́, tsí ká kpè ŋá ní Akɔ́nɛ! Iŋɛ́ yèé tse#ɛ́, ìnàbí ní àŋa kpó à dzɛ́#ɛ́. Tsí akɔ́nɛ ɔ̀kã̀ntso gé ní wà fú ŋa#á. 9 Ká máa kpe ɔ̀nyà-kã̀ kpókpó ńǹtalɛ̀ bí ní Boba-àŋa. Iŋɛ́ yèé tse#ɛ́, Boba ɔ̀kã̀ntso gé ní wà fú ŋa#á, tsí òŋu ní wà nɔ́ɔ̀rɔ̃#ɛ́. 10 Ká máa dzɛ́, tsí ká kpè ŋá gbo ní Ɔ̀gá! Iŋɛ́ yèé tse#ɛ́, Ɔ̀gá ɔ̀kã̀ntso gé ní wà fú ŋa#á, Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á ni. 11 Tsí ɛnɛ yèé dzɛ́ Ɔ̀gá náàŋírĩ-ŋa#á, ó wà ní kó sɔ ara‐ɛ̀ ɖi àtsìtsɛ́ fú ɛnɛ-àtíbɔ̀ ŋa. 12 Tsí ɔ̀nyà kpó yèé wà kɛ́ ara‐ɛ̀#ɛ́, à nákó ɖɛ̀ɛ́, tsí ɛnɛ yèé wà tɛ ara‐ɛ̀ bɔlɛ̀#ɛ́, à nákó nyɛ̀ɛ́.

Yèésù wà ɖáàbi fú akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa

13 Yèésù fɔ̀ fú ŋa ní: Akɔ́nɛ nɛ́kpa-Ɔ̀ɖáyé† ŋa òŋu ɔma-ɛgbɛ́-Fàrísì† ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è wà ɖí ɔ̀nà-kíbí Ɔ̀ɖáyé nákó dzoyè gbà#á fú ɔ̀nyà ŋa. Ɛ̀ŋɛ ká-ŋɛ́, è kè wà wɔ̀ lɔ nóyè-Ɔ̀ɖáyé†#ɛ́, tsí è kò sì wà kɔ ɛnɛ yèé ŋa wà wo ká wɔ̀ lɔ ńnɛ̀#ɛ́ gbo dzɔ̀ɔ́. [ 14 Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa kpàkpàtì iŋɛ́ yèé ŋa wà nɔ́wɔ́-okpó ŋa#á kpó nɔ́wɔ́-ŋa, tsí è náa wà wúùre kpíkpɛ̃́, àtsùgbée ɔ̀nyà ŋa kó rí ní è dzɛ́ atsòtítɔ́ ŋa. Ńnɛ̀ ní Ɔ̀ɖáyé nákó fɛtí fú ŋɛ́ líle líle lárè#ɛ́].

15 Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa lɔ ńǹɖìkíìɖì kpó náàdzàkáyé#ɛ́, àtsùgbée e fa ɔ̀nyà ɔ̀kã̀ntso gé, tsí kó sɛ̃ Ɔ̀ɖáyé ńǹrɔ́-kíbí ɛ̀ŋɛ gbo è wà sɛ̃̀ɛ̃́#ɛ́, tsí bí è fàá wɔ̀ ńnɛ̀ ńǹkɛ̀ɛ́ ná, ɛ̀ŋɛ ká-ŋɛ́ ké náa sɔ́ ɛnɛ nyɛ̀ŋɛ̀, tsí ńǹrɔ́-kíbí Ɔ̀ɖáyé nákó wáa fɛtí fú ŋɛ́ ńná-àrìtã́ gbà#á, ti ɛnɛ nyɛ̀ŋɛ̀ nákó wáa láre tiŋɛ́ ɔ̀nà méèdzì. 16 Ɛ̀rá rá ŋɛ́! Agbɛ̃́nɛ yèé fɔ́ odzú si ŋa#á. È náa wà fɔ̀ ní: Bí ɔ̀nyà-kã̀ ta ilé-Ɔ̀ɖáyé† si ńǹtá-iŋɛ́-kã̀ ni, kò sí ńnɛ̀. Ó ɖi, bí ɔ̀nyà-kã̀ ta siká yèé wà ńlé-Ɔ̀ɖáyé#ɛ́ si ńǹtá-iŋɛ́-kã̀ ni, ó wà ní kó tse si ńǹtá‐ɛ̀. 17 È rí àɖàlɛ̀ òŋu afɔ́dzú yèé ŋa nyí gé! Náàŋírĩ-siká#á òŋu ilé-Ɔ̀ɖáyé yèé wà sɔ siká#á ɖi mímá#á fe, yèésí kpã́dzú lárè? 18 È náa wà fɔ̀ gbo ní: Bí ɔ̀nyà-kã̀ ta ìdzɛ̀bɔ si ńǹtá-iŋɛ́-kã̀ ni, kò sí ńnɛ̀. Ó ɖi, bí ɔ̀nyà-kã̀ ta iŋɛ́ yèé à wà ń tsɛbɔ, tsí wà ńǹtá-ìdzɛ̀bɔ#ɛ́ si ńǹtá-iŋɛ́-kã̀ ni, ó wà ní kó tse si ńǹtá‐ɛ̀. 19 È rí afɔ́dzú yèé ŋa nyí gé! Náàŋírĩ-iŋɛ́ yèé à wà ń tsɛbɔ#ɛ́ òŋu ìdzɛ̀bɔ yèé wà sɔ ɛbɔ#ɛ́ ɖi mímá#á fe, yèésí kpã́dzú lárè?

20 Ńbɛ̀ɛ́, ɛnɛ yèé wà ta ìdzɛ̀bɔ si ńǹtá-iŋɛ́-kã̀#á, ó ta ìdzɛ̀bɔ#ɛ́ òŋu ká‐ɛ̀, tsí ta iŋɛ́ ɔ̀kã̀lɔ́ɔ̀kã̀ kpó yèé wà ńǹtá‐ɛ̀, tsí à wà ń tsɛbɔ#ɛ́ gbo ni. 21 Tsí ɛnɛ yèé gbo wà ta ilé-Ɔ̀ɖáyé si ńǹtá-iŋɛ́-kã̀#á, ó ta ilé-Ɔ̀ɖáyé#ɛ́ òŋu ká‐ɛ̀, tsí ta Ɔ̀ɖáyé yèé wà ńnɔ́-ilé#ɛ́ gbo ni. 22 Tsí ɛnɛ yèé gbo wà ta ɔ̀rɔ̃ si ńǹtá-iŋɛ́-kã̀#á, ó ta àntã̀-oyè-Ɔ̀ɖáyé òŋu ká‐ɛ̀, tsí ta Ɔ̀ɖáyé yèé dzokó si ńǹtá‐ɛ̀#ɛ́ gbo ni.

23 Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa fú Ɔ̀ɖáyé nákpálà-ɛ̀kɛ́ɛwá-iŋɛ́ rṹrũ̀ ŋa, tsí è náa gbàgbé iŋɛ́ yèé gìɖì kpã́dzú lárè nɛ́kpa-Ɔ̀ɖáyé ŋa#á. È kà wà tse òtítɔ́, tsí è kà wà rí ànyínɔ́ fúnɛ gbo. È kà wà tse iŋɛ́ yèé Ɔ̀ɖáyé wà bèrè#ɛ́ gbo. Iŋɛ́ yèé ŋa nyí ní sì kpã́dzú ní ká wà tse#ɛ́. Ó ɖi, kò tsi ǹ ní ká máa tse àtíbɔ̀ ŋa ni. 24 Agbɛ̃́nɛ yèé fɔ́ odzú si ŋa#á! È náa sɛ̃́ ɔtí, tsí nya etsĩtsĩ ǹɖe tã́ná mɔɔ́. Tsí è náa sì mi atsĩ-kã̀ lɔ.

25 Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa wɛ ànyì-kɔ̃́ŋúkɔ̃́ŋú ŋa òŋu ànyì-àwò ŋa si, tsí kɔ inɔ́-ŋa dzɔ̀ɔ́. Ó ɖi, iŋɛ́ yèé è tsolè ŋa#á òŋu iŋɛ́-íbàɖí yèé náa wù ŋɛ́ ŋa#á ní sì kɔ̃́ inɔ́-ŋa si#ɛ́. 26 Ɔma-ɛgbɛ́-Fàrísì ŋa, afɔ́dzú ŋa! È wɛ inɔ́-kɔ̃́ŋúkɔ̃́ŋú òŋu inɔ́-àwò ŋa tã́ná, àtsùgbée ànyì-ŋa gbo kó ɖi mímá.

27 Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è wà kíbí érì yèé ŋa à kũ̀ ń fũfũ si kpó#ɛ́. À ɖíirí nódzú. Ó ɖi, tsàwó-ɔ̀nyà òŋu iŋɛ́ tsítsìíra ɔ̀kã̀lɔ́ɔ̀kã̀ kpó kɔ̃́ inɔ́-ŋa si. 28 Bɛ́ɛ̀ ké ní ɛ̀ŋɛ gbo è náa tse tsí ɔ̀nyà kpó kó rí ní è dzɛ́ atsòtítɔ́ ŋa#á ńnɛ̀ɛ́. Ó ɖi, e dzɔdzú-ɔ̀nyà ŋa òŋu e tse íbàɖí gbo ní kɔ̃́ ìsérè si fú ŋɛ́#ɛ́.

29 Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa wà ma érì-agbáfɔ̀-Ɔ̀ɖáyé fɔ̀† ŋa, tsí wà ɖéèlè gbo fú érì-atsòtítɔ́ ŋa. 30 Tsí è náa wà fɔ̀ ní: Àŋa má gbé ńǹwèrè-gbágbóǹgbàgbò ŋa ni àŋa kàá mú arũ ɖé bá ŋa, tsí kpa agbáfɔ̀-Ɔ̀ɖáyé fɔ̀ ŋa nóòkú. 31 È wà ɖáàbi fú ara-ŋɛ́ ńnɛ̀ɛ́ ní ɔmalɔ́ma-ɛnɛ yèé kpa agbáfɔ̀-Ɔ̀ɖáyé fɔ̀ ŋa nóòkú#ɛ́ ní àŋa dzɛ́#ɛ́. 32 Ó ɖi fee, iŋɛ́ yèé gbágbóǹgbàgbò-ŋɛ́ ŋa tse gbè nɔ́ɔ̀nà si#ɛ́, è tseé dzá. 33 Edzò, ɔká lákṹ ŋa! Bí è nákó nyáa bɔ́ náfɔ̀-iná-àrìtã́ gbà fáà? 34 Àtsùgbée bɛ́ɛ̀, è rí gé! Ǹ wà bɛ agbáfɔ̀-Ɔ̀ɖáyé fɔ̀ ŋa òŋu olí-ifɛ̀ɛ́nɔ́ ŋa má nára-akɔ́nɛ nɛ́kpa-Ɔ̀ɖáyé ŋa bàa fú ŋɛ́. Tsí náàŋírĩ-ŋa#á, è nákó kpa ɔ̀kã̀ ŋa nóòkú, tsí kã ɔ̀kã̀ ŋa si ńǹtá-egi-ìɖáàgàlàdzà†, tsí tsɔ ɔ̀kã̀ ŋa gbo náàtàmì ńlé-ìkpàɖé-ɔma-Ìyúɖà ŋa, tsí wà lé ŋa ti ńǹlú-kã̀ lɔ káà bɔ́ ńǹlú-èkéèdzì. 35 Tsí ɛ̀ŋɛ ní Ɔ̀ɖáyé nákó fɛtí fú#ɛ́, àtsùgbée atsòtítɔ́ yèé ŋa à wà kpa nóòkú ti ńǹtá-Àbɛ́lì†, atsòtítɔ́#ɛ́, títí wáa tó ńǹtá-Sàkàríyà agbáfɔ̀-Ɔ̀ɖáyé fɔ̀, ɔma-Bàrákì yèé è kpa nóòkú ńkpàtá-ilé-Ɔ̀ɖáyé náàŋírĩ-ilé#ɛ́ òŋu ìdzɛ̀bɔ#ɛ́. 36 Ó ɖi, ǹ wà wí fú ŋɛ́ ní fee, Ɔ̀ɖáyé nákó wáa fɛtí fú ɔma-ìsɛ̃̀ɛ̃́ ŋa, àtsùgbée iŋɛ́ nyɛ̀ŋɛ̀ ŋa kpó.

Yèésù rã́ã̀bo fú ɛnɛ-Yèrúsàlɛ́mì ŋa

(Lúkà 13:34-35)

37 Tsí ó wà wí fú ŋa ró ní: Óò! Ɛnɛ-Yèrúsàlɛ́mì ŋa! È náa kpa agbáfɔ̀-Ɔ̀ɖáyé fɔ̀† ŋa nóòkú, tsí è náa ta ɛnɛ yèé ŋa Ɔ̀ɖáyé náa bɛ̀ wá fú ŋɛ́#ɛ́ gbo nóòkúta kpa. Ó ɖi, ǹ wò ní n kpè ŋɛ́ kpaɖí ńǹrɔ́-kíbí aɖɛ̀ɛ náa kpe ɔma‐ɛ̀ ŋa kpaɖí nábɛ́‐ɛ̀, tsí mú iká bò ŋá bɛ́#ɛ́ ni. Tsí è sì kɔ̀. 38 È rí gé! Ɔ̀ɖáyé nákó tsí kɔ ilé-ŋɛ́ dzɔ̀ɔ́ fú ŋɛ́, tsí nákó kí nákpo. 39 Ó ɖi, ǹ wà wí fú ŋɛ́ ní ti nɔ́mbɛ́#ɛ́, è kàkó rí mi ró títí fú àsòkò yèé ɛ̀ŋɛ ká-ŋɛ́ è nákó wà fɔ̀ ní: “Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́.”^*