Màtéwò 24

Yèésù wà fɔ̀ ní ilé-Ɔ̀ɖáyé nákó wáa fɔ́ kpó

Yèésù fùɖá nɔ́gbà-ilé-Ɔ̀ɖáyé#ɛ́, tsí làkóò. Kíbí ó làkóò#ɛ́, ɔmatsɛ́‐ɛ̀ ŋa tìmá‐ɛ̀, tsí wà mú kíbí à malé-Ɔ̀ɖáyé†#ɛ́ tó gbà#á kpó ɖíre fúu. 2 Tsí Yèésù tsí arũ, tsí wà fɔ̀ fú ŋa ní: Kò tsi à wà rí iŋɛ́ nyɛ̀ŋɛ̀ ŋa kpóò? Ó ɖi, òŋu wà wí fú ŋa ní fee, à nákó wáa fɔ́ ŋa kpó títí kàkó bɔ élè-kã̀ gìɖì bí ró.

Yèésù wà fɔ iŋɛ́ yèé ŋa nákó wáa tse ńǹtã̀ntã́-ayé#ɛ́

(Mákò 13:3-13, Lúkà 21:8-19)

3 Yèésù káà dzokó ńǹtá-òkè-Òlífì† si. Kíbí ó dzokó si#ɛ́, ɔmatsɛ́‐ɛ̀ ŋa sɔ̃́ŋú gé tìmá‐ɛ̀, tsí wà bèrèé ní: Ńǹwèrè yèésí iŋɛ́ nyɛ̀ŋɛ̀ ŋa nákó wáa tse? Tsí kí àŋa nákó rí, tsí nákó nyà ɖíre fú àŋa ní wíwá‐ɛ̀ òŋu ìtã̀ntã́-ayé#ɛ́ tó? Kó fɔ̀ɔ́ fú àŋa.

4 Tsí Yèésù dzɔ́ŋù fú ŋa ní: Ká tsɔ́ éwo-ara-ŋa rere, tsí ɔ̀nyà-kã̀ kpókpó kó máa rú ŋa. 5 Iŋɛ́ yèé tse#ɛ́, ɔ̀nyà kpíkpɔ̀ nákó wáa wá, tsí ɛnɛ kṹnukṹ nákó kɛ́ ɛ́kɔ-òŋu, tsí wà fɔ̀ ní òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á. Tsí à nákó rú ɔ̀nyà kpíkpɔ̀. 6 À nákó wà gbɔ́ ìdzã̀mà-ogu nàmí à nákó wà gbɔ́ ní à bàkó dzogu. Ó ɖi, odzo kó máa tse ŋá. Iŋɛ́ yèé tse#ɛ́, ó wà ní iŋɛ́ nyɛ̀ŋɛ̀ ŋa kó tse. Ó ɖi, ìtã̀ntã́-ayé#ɛ́ kò sì tó wòná. 7 Ìlú ŋa nákó ǹɖe, tsí wà dzà bá ara-ŋa, tsí ìdzɔba ŋa gbo nákó ǹɖe, tsí wà dzà bá ara-ŋa.^* Tsí ebi nákó wà dzà, tsí ilɛ̀ gbo nákó wà mì ńǹɖì ńǹɖì ŋa. 8 Tsí iŋɛ́ nyɛ̀ŋɛ̀ ŋa kpó wà kíbí, bí ɔnɔbɛ̃̀ɛ̃ bàkó bíma ni inɔ́ náa tseé náàtsɛ̃̀tsɛ̃̀ tã́ná kó mú ɔma#á ɖà#á ni.

9 Náàsòkò nyɛ̀ŋɛ̀#ɛ́, à nákó mú ŋa fú, tsí ká tsoró bá ŋa, tsí kpa ŋá nóòkú. Ìlú kpó nákó nyà ŋá kãdzú náàtsùgbé-òŋu. 10 Àtsùgbée bɛ́ɛ̀ ní kpíkpɔ̀-ŋa kàkó karalé si ńǹtá-òŋu ró, tsí à nákó wà mú ara-ŋa fú, tsí nya ara-ŋa kãdzú gbo#ɛ́ ńnɛ̀ɛ́. 11 Atsìké-agbáfɔ̀-Ɔ̀ɖáyé fɔ̀ kpíkpɔ̀ nákó wáa wá, tsí mú ɔ̀nyà kpíkpɔ̀ nɔ̀. 12 Tsí kíbí íbàɖí tsítse nákó wà kpɔ̀ máa tó gbà#á, àmúɖɔ̃̀-ɔ̀nyà kpíkpɔ̀ nákó wà nyà bɔ̀. 13 Ó ɖi, ɛnɛ yèé nákó sì gbódzú títí lɔ ńǹtã̀ntã́#á, ɛnɛ nyɛ̀ŋɛ̀ nákó rí ɔlà. 14 À nákó dzíkɔ̀ ɖíɖɔ̃̀ yèé bɛ́ ti nára-kíbí Ɔ̀ɖáyé nákó dzoyè gbà náyé gbaŋgba#á kpó, àtsùgbée ká nya àyídzá‐ɛ̀ fú ìlú kpó. Tsí ayé yèé bɛ́ nákó tã́ ńǹkɛ̀ɛ́.

Yèésù wà fɔ̀ iŋɛ́ tsítsìíra yèé bàa ŋa#á

(Mákò 13:14-23, Lúkà 21:20-24)

15 À nákó rí iŋɛ́ tsítsìíra yèé láre arũ fúnɛ#ɛ́, tsí nákó káà gbé náàkpàtá-ilé-Ɔ̀ɖáyé† si.^* Iŋɛ́ nyɛ̀ŋɛ̀#ɛ́, Ɖànìyɛ́lì, agbáfɔ̀-Ɔ̀ɖáyé fɔ̀†, ti fɔ afɔ̀ kã̀ã́ si. Tsí ɛnɛ yèé wà kã ìwé yèé bɛ́#ɛ́, kó gbɔ́ òkpì‐ɛ̀ rere. Tsí bí à rí bɛ́ɛ̀ ná, 16 ɛnɛ yèé ŋa wà nérè-Yùɖéyà#á, ká sá gu òkè ŋa lɔ. 17 Tsí ɛnɛ yèé wà ńkpàtá si#ɛ́, kó máa wɔ̀ lɔ ńnɔ́-ilé‐ɛ̀ ní òŋu kó káà kɛ́ iŋɛ́-òŋu ŋa. 18 Tsí ɛnɛ yèé gbo wà nóko si#ɛ́, òŋu gbo kó máa bɔ̀ wá ńlé ró ní òŋu bàkó wáa kɛ́ àwù-otútù-òŋu. 19 Ó ɖi, nɔ́dzɔ́ nyɛ̀ŋɛ̀#ɛ́, abefũ̀ ŋa òŋu ìnà-olɔ́ma tsígíɖí ŋa, ɛ̀rá rá ŋa! 20 Ńbɛ̀ɛ́, ká wà wúùre, tsí kó máa dzɛ́ ńǹwèrè-òdzò òŋu otútù nàmí nɔ́dzɔ́-ìmíra† ní à wà sá wérí#ɛ́. 21 Nɔ́dzɔ́-ɔdzɔ́ nyɛ̀ŋɛ̀#ɛ́, ɔ̀nyà ŋa nákó tse òfò kpíkpɔ̀. Ti títí ńǹkpìnkpìlɛ̀-ayé#ɛ́ títí wáa fú òníbɛ́#ɛ́, à kò rí òfò-ìrɔ́ nyɛ̀ŋɛ̀ wòrí. Tsí ti nɔ́dzɔ́ nyɛ̀ŋɛ̀ gbo#ɛ́, à kàkó rí ìrɔ́-bɛ́ɛ̀ gbo láyé ró. 22 Ó má dzɛ́ ní Ɔlɔ́dzɔ́ kò ɖá ìwèrè-kã̀ si fú òfò#ɛ́ ní kó máa tse lárè bɛ́ɛ̀#ɛ́, ɔ̀nyà-kã̀ kpókpó kàá gbé náàyɛ̀. Ó ɖi, ó ɖá ìwèrè-kã̀ si fú òfò#ɛ́, àtsùgbée ɛnɛ yèé ó tsã̀ si ŋa#á ká máa tsɛ̀rá.

23 Ńbɛ̀ɛ́, bí ɔ̀nyà-kã̀ fɔ̀ fú ŋa ní: Ká rí gé! Kírísítò Agbanɛlà wà ńbíbɛ́ nàmí ó wà ńbɛ̀, ká máa gbàá gbɔ́. 24 Ó ɖi fee, ɔ̀nyà kã̀ŋa nákó wà wá, tsí wà tsòɖòbò ní àŋa ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, tsí ɔ̀nyà kã̀ŋa òŋu nákó dzɛ́ atsìké-agbáfɔ̀-Ɔ̀ɖáyé fɔ̀ ŋa. Àŋa kpó, à nákó wà tse iŋɛ́-àwùsì lákṹ lákṹ ŋa ńǹrɔ́ǹrɔ́, tsí wà ń rú ɔ̀nyà ŋa. À má bàkó nyáa rú ɛnɛ yèé Ɔ̀ɖáyé tsã̀ si ŋa#á gbo, à má rú ŋa. 25 Ká rɛ̃tígbè! Òŋu ti fɔ̀ɔ́ si fú ŋa tsúwádzú ná.

26 Ńbɛ̀ɛ́, bí à fɔ̀ fú ŋa ní: Ká rí gé! Ó wà nɔ́ɔ̀ɖã̀ si, ká máa lɔ. Nàmí bí à fɔ̀ fú ŋa ní: Ó ɖúkù si ńbí, ká máa gbàá gbɔ́. 27 Ó ɖi, ńǹrɔ́-kíbí màmà náa bù ńǹgbèrí, tsí náa má ti négo-kã̀ wáa lɔ káà kpa négo-èkéèdzì‐ɛ̀#ɛ́, bɛ́ɛ̀ ké ní òŋu, Ɛnɛ yèé ɔ̀nyà bí#ɛ́† gbo, òŋu nákó wá gbà#á. 28 Ńbí òkú-iŋɛ́-kã̀ wà gé#ɛ́, ńbɛ̀ ní igú ŋa gbo náa kpérí si#ɛ́.

Yèésù ní òŋu, Ɛnɛ yèé ɔ̀nyà bí#ɛ́, òŋu nákó wá

(Mákò 13:24-27, Lúkà 21:25-28)

29 Nɔ́dzɔ́ nyɛ̀ŋɛ̀ ŋa gbòkã́#á, bí ìwèrè-òfò#ɛ́ wáa lɔ tã́#á, òkùkù nákó mú odzúùrɔ̃̀ mì, tsí òtsùkpá gbo kàkó rã̀ ró. Tsí àrã̀wo ŋa gbo nákó tsubú ti ńǹgbèrí wá ńlɛ̀, tsí odzúùrɔ̃̀ gbo, òtsùkpá gbo, àrã̀wo ŋa gbo, àŋa kpó, à nákó mì kpó dzìgìdzìgì. 30 Tsí à nákó rí, tsí iŋɛ́-kã̀ nákó ɖíìsàmì fú ŋa ńǹgbèrí ti nára-òŋu, Ɛnɛ yèé ɔ̀nyà bí#ɛ́† ńǹkɛ̀ɛ́, tsí ìlú kpó ńǹtalɛ̀ bí nákó wà rã́ã̀bo, tsí à nákó rí òŋu, tsí òŋu nákó ti nɔ́ɔ̀rɔ̃ bàa ńnɔ́-irì. Òŋu nákó wá òŋu ikpá lákṹ-kã̀ òŋu iyì lákṹ-kã̀ gbo. 31 Ikpè lákṹ-kã̀ nákó ɖɔ̃́, tsí òŋu, Ɛnɛ yèé ɔ̀nyà bí#ɛ́, òŋu nákó bɛ adzítsɛ́-ɔ̀rɔ̃†-òŋu ŋa lɔ náàdzàkáyé#ɛ́ kpó, lɔ nóòtã́, lɔ nóòsì, lɔ ńwádzú, lɔ náànyì, tsí ɔ̀nyà yèé Ɔ̀ɖáyé tsã̀ si ŋa kpó#ɛ́, ká kpè ŋá kpàɖé kpó, ti négo-ayé#ɛ́-kã̀ káà kpa négo-èkéèdzì.

Yèésù ní ɛ̀kɔ́ yèé egi-òrì ŋa wà tse fú ŋa#á, kó wà yé ŋa rere

(Mákò 13:28-31, Lúkà 21:29-33)

32 Ɛ̀kɔ́ yèé egi-òrì ŋa wà tse fú ŋa#á, kó yé ŋa rere. Bí egi-òrì ŋa kpé rúrú#ɛ́, à náa mà ní ìwèrè-òdzò ní sɔ́má#á. 33 Bɛ́ɛ̀ ké ní bí à wà rí iŋɛ́ nyɛ̀ŋɛ̀ ŋa kpó#ɛ́, àŋa gbo ká mà ní ìwèrè sɔ́má, tsí òŋu, Ɛnɛ yèé ɔ̀nyà bí#ɛ́†, òŋu kó dzoyè. Òŋu ti tó náànkpã̀nàkũ̀ ná. 34 Òŋu wà wí òtítɔ́ fú ŋa ní fee, ɔma-ìsɛ̃̀ɛ̃́ ŋa kàkó kú tã́ kpó tã́ná iŋɛ́ nyɛ̀ŋɛ̀ ŋa kpó nákó tse. 35 Ilɛ̀ gbo, ìgbèrí gbo, àŋa kpó, à nákó wáa nɔ̀ ǹɖe. Ó ɖi, afɔ̀ tòŋu ŋa nákó wà si títí lɔ.

Ɔ̀ɖáyé òŋu níìkã̀ntso gé ní ma ɔdzɔ́-ìtã̀ntã́-ayé#ɛ́

(Mákò 13:32-37, Lúkà 21:34-38)

36 Ó ɖi, ɔ̀nyà-kã̀ kpókpó kò ma ɔdzɔ́-wíwá-òŋu nàmí ńǹwèrè yèé òŋu nákó wá#á. Adzítsɛ́-ɔ̀rɔ̃† ŋa gìɖì gbo kò màá, tsí Ɔma bíbí-Ɔ̀ɖáyé gìɖì gbo kò màá. Ó ɖi, Ɔ̀ɖáyé Boba, òŋu níìkã̀ntso gé ní màá#á. 37 Ó ɖi òŋu, Ɛnɛ yèé ɔ̀nyà bí#ɛ́†, nɔ́dzɔ́ yèé òŋu nákó wá#á, ɔdzɔ́ nyɛ̀ŋɛ̀ nákó wà kíbí ìwèrè-Nòwá† gbo bɛ́ ni. 38 Ńǹwèrè-Nòwá#á, ɔ̀nyà ŋa wà dzɛ, tsí wà mɔ. Tsí olí-aya wà nɛ́, tsí à wà mú ɔma gbo fú ɔkɔ títí fú ɔdzɔ́ yèé Nòwá ǹɖe, tsí wɔ̀ nɔ́kɔ̃̀-odzómi#ɛ́. Tsí òdzò lákṹ-kã̀ rɔ̀ títí omi kɔ̃́ ìtalɛ̀#ɛ́ kpó rɔ̃gbɔ̃gbɔ̃ɔ̃, tsí gbɔ̃́ ɛnɛ yèé bɔ̀ ńǹtalɛ̀ ŋa#á kpó lɔ. 39 Tã́ná omi kó wáa gbɔ̃́ ŋa lɔ kpó#ɛ́, à kò tì mà ní iŋɛ́-kã̀ wà tse títí káà fú ìwèrè nyɛ̀ŋɛ̀. Ó ɖi, ńǹwèrè yèé òŋu, Ɛnɛ yèé ɔ̀nyà bí#ɛ́ gbo nákó wá#á, bɛ́ɛ̀ ké ní ɔ̀nyà ŋa nákó wà tse#ɛ́ ńnɛ̀ɛ́. 40 Nɔ́dzɔ́ nyɛ̀ŋɛ̀#ɛ́, bí ɔ̀nyà méèdzì dzɔ́ wà nóko si, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́. 41 Tsí bí ɔnɔbɛ̃̀ɛ̃ méèdzì gbo wà lɔ ɔkà nɔ́lɔ, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́. 42 Ńbɛ̀ɛ́, ká wà nódzúfò si. Iŋɛ́ yèé tse#ɛ́, à kò ma nɔ́dzɔ́ yèé ɔ̀gá-ŋa nákó wá#á.

43 Ká mà si ní fee, bí ó dzɛ́ ní olílé-kã̀ ma ńǹwèrè yèé olè nákó wáa tsolèé nóoru#ɛ́, nákó ɖe òɖe, kàkó dzɛ́ ní olè#ɛ́ kó wɔlé-òŋu gìɖì. 44 Náàtóoríi bɛ́ɛ̀#ɛ́, àŋa gbo, ká kpaɖí si, iŋɛ́ yèé tse#ɛ́, òŋu, Ɛnɛ yèé ɔ̀nyà bí#ɛ́, òŋu nákó wá ńǹwèrè yèé à kò módzúlé#ɛ́ ni.

Àtsìtsɛ́ yèé náa tse òtítɔ́#ɛ́ òŋu àtsìtsɛ́ yèé yàábàɖí#ɛ́

(Lúkà 12:42-48)

45 Ká fɔ̀ ní àtsìtsɛ́-kã̀ wà, tsí náa tse òtítɔ́, tsí ó nɛ́ ìrã̀ã́mà gbo, tsí ɔ̀gá‐ɛ̀ kɛ́ɛ si nárũ-àtsìtsɛ́‐ɛ̀ àtíbɔ̀ ŋa ní kó wà fú ŋa ńdzídzɛ si ńǹwèrè. 46 Àtsìtsɛ́ nyɛ̀ŋɛ̀#ɛ́, bí ɔ̀gá#á wáa báa, tsí ó wà tsitsɛ́#ɛ́ si ńǹɖì‐ɛ̀#ɛ́, ó wɛ éwo-ire. 47 Tsí òŋu wà wí fú ŋa ní fee, ɔ̀gá#á nákó mú àtsìtsɛ́ nyɛ̀ŋɛ̀#ɛ́, tsí ń si nárũ-iŋɛ́‐ɛ̀ ŋa kpó, tsí kó wà rí ìtá-ŋa. 48 Ó ɖi, bí àtsìtsɛ́#ɛ́ yàábàɖí, nákó wà fɔ̀ ńnɔ́-ara‐ɛ̀ ní ɔ̀gá-òŋu kò sɛ̃̀ bàa kóyá, 49 tsí nákó kpé enìkéèdzì‐ɛ̀ yèé à dzɔ́ wà tsitsɛ́ ŋa#á kpíkpa, tsí wà dzɛ, tsí wà mɔ gbo bá àmɔ̀tíŋɔ́ ŋa. 50 Bí ó dzɛ́ ní ó wà tse bɛ́ɛ̀, ɔ̀gá‐ɛ̀#ɛ́ nákó wáa wá nɔ́dzɔ́ yèé kàkó mà si#ɛ́. Náàsòkò yèé kàkó módzúlé si gìɖì#ɛ́ ní nákó wá#á. 51 Tsí nákó kĩ́rĩ iŋɛ́ báa, tsí nákó tse gbo, tsí nákó dzɛ èrè yèé wà ń ká tsendzɔdzú#ɛ́. Ńbɛ̀ ní nákó wà sɔkṹ, tsí bínɔ́ si tó bɛ́ɛ̀, tsí wà dzara kpàkpàkpà#á.