Màtéwò 21

Yèésù wɔ̀ ńǹlú-Yèrúsàlɛ́mì kíbí ólú bɛ́

(Mákò 11:1-11, Lúkà 19:28-40, Yòhánà 12:12-19)

Yèésù òŋu ɔmatsɛ́‐ɛ̀ ŋa sɔ́má-Yèrúsàlɛ́mì làkóò, tsí à káà tó sɔ́má-ìlú-oko-kã̀ ńǹtá-òkè-Òlífì†. À náa kpe ìlú#ɛ́ ní Bètìfàgé. Tsí Yèésù bɛ ɔmatsɛ́‐ɛ̀ méèdzì, 2 tsí fɔ̀ fú ŋa ní: Ká ǹɖe, tsí ká lɔ ńǹlú-oko yèé à wà rí ńǹwádzú-ŋa#á, tsí ká wɔ̀ ńnɛ̀, à nákó rí à so kɛ́tɛ́kɛ́tɛ́-kã̀ si, tsí ɔma‐ɛ̀ gbo ɖóro gbèé si. Ká tú ŋa, tsí ká fà ŋá wá fú òŋu. 3 Ó ɖi, bí ɔ̀nyà-kã̀ bèrè ŋá náfɔ̀-kã̀, ká dzɔ́ŋù fúu ní: Ɔ̀gá ní wà wo kó lò ŋá#á. Tsí nákó kɔ̀ ŋá dzɔ̀ɔ́ gbòkã́, tsí ká fà ŋá wá fú òŋu.

4 Iŋɛ́ ŋa#á wáa lɔ bɛ́ɛ̀ náàtsùgbé-iŋɛ́ yèé agbáfɔ̀-Ɔ̀ɖáyé fɔ̀†-kã̀ fɔ̀ si ńǸwé-Ɔ̀ɖáyé†#ɛ́ kó tsɛ ni. Ó kɔ si ní:

5 “Ká dzɛ́ fú ɔma-Sìyɔ́nì† ŋa ní: È rí gé! Ólú-ŋɛ́ bàa ńɖɔ-ŋɛ́.

Ó tɛ ara‐ɛ̀ bɔlɛ̀, tsí gu kɛ́tɛ́kɛ́tɛ́ abo-kã̀ si,

ɔma-kɛ́tɛ́kɛ́tɛ́-kã̀ ni, ó dzɛ́ tsígíɖí-kɛ́tɛ́kɛ́tɛ́ ŋa.”^*

6 Tsí ɔmatsɛ́-Yèésù† ŋa#á lɔ, tsí tse si ńǹtá-afɔ̀ yèé ó fɔ̀ fú ŋa#á, 7 tsí fa kɛ́tɛ́kɛ́tɛ́#ɛ́ òŋu ɔma‐ɛ̀ wá. Tsí à mú àwù-ŋà ŋa, tsí ń tɛ́ ńǹtá-ŋa, tsí Yèésù dzokó ńǹtá-àwù ŋa#á, tsí à dzì nɔ́ɔ̀nà. 8 Tsí ɔ̀nyà ɛ̀gbɛ̀lɛ́ɛ̀gbɛ̀-kã̀ wà mú àwù-ŋà ŋa tɛ́ nɔ́ɔ̀nà fúu. Tsí ɔ̀nyà kã̀ŋa òŋu wà ɖá ɔ̀kpɛ̀ ŋa, tsí wà ń tɛ́ nɔ́ɔ̀nà#á.

9 Ɛnɛ-iwádzú ŋa gbo, ɛnɛ-ànyì ŋa gbo, àŋa kpó, à wà ɖúgbe ní:

Ényìì! Kùsɛ̀ɛ̀ fú ɔmalɔ́ma-ólú Ɖàfíɖì†!

Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́!

Ényìì! Kùsɛ̀ɛ̀ fú Ɔ̀ɖáyé nɔ́ɔ̀rɔ̃!^*

10 Tsí Yèésù káà tó ńYèrúsàlɛ́mì. Kíbí ó wɔ̀ ńǹlú#ɛ́, ìlú#ɛ́ wà rò kpó gòrògòrògòrò títí ɔ̀nyà ŋa wà bèrè ní: Nɛ̀ɛ́ ni ɔlá‐ɛ̀? 11 Tsí èrò#ɛ́ wà dzɔ́ŋù ní: Yèésù, agbáfɔ̀-Ɔ̀ɖáyé fɔ̀ ti Nàsàrɛ́tì ńGàlìlé ni.

Yèésù lé àtàdzà ŋa fùɖá nɔ́gbà-ilé-Ɔ̀ɖáyé

(Mákò 11:15-19, Lúkà 19:45-48, Yòhánà 2:13-22)

12 Yèésù ǹɖe, tsí lɔ nɔ́gbà-ilé-Ɔ̀ɖáyé†, tsí lé àtàdzà ŋa òŋu àràdzà ŋa kpó fùɖá nɔ́gbà-ilé-Ɔ̀ɖáyé#ɛ́. Akparɔ-owó ŋa gbo wà bɛ̀, tsí ó rí kpɔ̃rɔ̃-ŋà ŋa kpalɛ̀. Tsí ɔ̀nyà kã̀ŋa gbo wà ta àlúǹkùkù, tsí ó rí àntã̀ tiŋà ŋa gbo kpalɛ̀.

13 Tsí ó wà fɔ̀ fú ŋa ní: Ɔ̀ɖáyé fɔ̀ si ńǹwé‐ɛ̀ ní: “Ilé-mi, à nákó kpèé ní ilé-ìre wúwú ni.”^* Tsí àŋa òŋu à kɛ́ɛ, tsí ń tse ìɖìgbé-olè ŋa si.

14 Afɔ́dzú kã̀ŋa òŋu arɔ kã̀ŋa tìmá Yèésù ńlé-Ɔ̀ɖáyé#ɛ́, tsí ó bɔ ŋá. 15 Tsí kíbí onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa wà rí iŋɛ́-àwùsì yèé Yèésù wà tse ŋa#á, òŋu kíbí maɖé ŋa gbo wà ɖúgbe ńlé-Ɔ̀ɖáyé ní: Kùsɛ̀ɛ̀ fú ɔmalɔ́ma-ólú Ɖàfíɖì†#ɛ́, ó dzà ŋá nára, 16 tsí à wà fɔ̀ fúu ńǹkɛ̀ɛ́ ní: Ó wà gbɔ́ iŋɛ́ yèé à wà fɔ̀#ɛ́ yáà?

Tsí Yèésù gbo wà fɔ̀ fú ŋa ní: Ɛ̃ɛ̃! Òŋu gbɔ́, tsí kò tsi à kã afɔ̀ yèé bɛ́ ńǸwé-Ɔ̀ɖáyé† wòrí ní: “Ó tse tsí maɖé ŋa òŋu ɔma nɔ́wɔ́ ŋa gìɖì gbo tsí arũ, tsí wà nyɛ̀ɛ́ɛ̀?”^*

17 Tsí Yèésù ǹɖe kɔ̀ ŋá dzɔ̀ɔ́ bɛ̀, tsí lɔ ńǹlú-Bètàní. Tsí ó lɔ káà kí sũ̀ bɛ̀.

Yèésù ré fú egi-òrì-kã̀

(Mákò 11:12-14, 20-25)

18 Ó ɖi ńlɛ̀má‐ɛ̀ náàwúrɔ̀, tsí Yèésù sɛ̃̀ wáa lɔ ńYèrúsàlɛ́mì. Kíbí ó sɛ̃̀ wáa làkóò#ɛ́, ebi wà kpaá. 19 Tsí ó rí egi-òrì-kã̀ sɔ́má-ɔ̀nà#á, tsí ó lɔ nóòkpì‐ɛ̀, tsí kò rí iŋɛ́-kã̀ kpókpó ńǹtá‐ɛ̀ náànyì-ewé ŋa. Tsí ó ré fú egi#ɛ́ ní: Kàkó so láyé ró. Tsí egi#ɛ́ sì gbɛ̃ ńǹɖì-ibɛ̀ gbòkã́.

20 Kíbí ɔmatsɛ́‐ɛ̀ ŋa rí bɛ́ɛ̀#ɛ́, ó mù ŋá, tsí à bèrèé ní: Bí egi#ɛ́ nákó nyáa gbɛ̃ náàrìkã̀ntso bɛ́ɛ̀ fáà?

21 Tsí ó dzɔ́ŋù fú ŋa ní: Òŋu wà wí fú ŋa ní fee, bí à nɛ́ àkaralé si ńǹtá-Ɔ̀ɖáyé, tsí à kò dzèrèbe ná, kò tsi iŋɛ́ yèé òŋu tse fú egi yèé bɛ́#ɛ́ sɔ̃́ŋú gé ní à nákó nyáa tse#ɛ́. Ó ɖi, bí à wí fú òkè yèé bɛ́ gìɖì gbo ní kó wú ǹɖe bɛ̀, tsí kó lɔ káà dzì náàhũ, nákó tsɛ bɛ́ɛ̀. 22 Ó ɖi, bí ò nɛ́ àkaralé si ńǹtá-Ɔ̀ɖáyé iŋɛ́ ɔ̀kã̀lɔ́ɔ̀kã̀ kpó yèé ò wúùre, tsí bèrèé#ɛ́, nákó fɛ́ɛ ńnɛ̀.

À bere Yèésù ní nɛ̀ɛ́ fúu ńkpá‐ɛ̀?

(Mákò 11:27-33, Lúkà 20:1-18)

23 Yèésù sɛ̃̀ wá ńlé-Ɔ̀ɖáyé, tsí wà tsɛ̀kɔ́ fú ɔ̀nyà ŋa. Kíbí ó wà tsɛ̀kɔ́#ɛ́, onùgbó-atsɛbɔ-Ɔ̀ɖáyé† ŋa òŋu onùgbó-ɔma-Ìyúɖà† ŋa tìmá‐ɛ̀, tsí wà bèrèé ní: Ikpá mɛ̀ɛ́ wà fúu, tsí ó wà ń tse iŋɛ́ nyɛ̀ŋɛ̀ ŋa ná? Nɛ̀ɛ́ tútútú fúu ńkpá-ìrɔ́-bɛ́ɛ̀ ná?

24 Tsí Yèésù dzɔ́ŋù fú ŋa ní: Òŋu gbo, òŋu bàkó bèrè ŋá náfɔ̀ ɔ̀kã̀ntso bɛ́ gé, tsí bí à dzɔ́ŋù‐ɛ̀ fú òŋu ná, òŋu gbo, òŋu nákó ɖíre ɛnɛ yèé fú òŋu ńkpá, tsí òŋu wà ń tse iŋɛ́ nyɛ̀ŋɛ̀ ŋa#á. 25 Nɛ̀ɛ́ bɛ Yòhánà† Awɛ̀fúnɛ wá ní kó wáa wɛ̀† fú ɔ̀nyà ŋa? Ɔ̀ɖáyé nàmí ɔ̀nyà ni?

Tsí à nyí, tsí wà ɖìkpá fú ara-ŋa ní: Bí à náa fɔ̀ yèé fáà? Bí àŋa dzɛ́ fúu báàyí ní Ɔ̀ɖáyé ni, nákó bere àŋa ní, tsí kí tse tsí àŋa kò gba afɔ̀‐ɛ̀ gbɔ́? 26 Tsí bí àŋa sì fɔ̀ gbo ní ɔ̀nyà ŋa ni, ó wà ní àŋa kó sá fú èrò#ɛ́, iŋɛ́ yèé tse#ɛ́, ɔ̀nyà kpó kɛ́ si fú Yòhánà ní ó dzɛ́ agbáfɔ̀-Ɔ̀ɖáyé fɔ̀†.

27 Ńbɛ̀ɛ́, à tédzú fɔ̀ fú Yèésù ní: Àŋa kò mà.

Tsí Yèésù gbo ní: Ó sã̀! Ó ɖi, òŋu gbo, òŋu kàkó ɖíre ɛnɛ yèé fú òŋu ńkpá, tsí òŋu wà ń tse iŋɛ́ ŋa#á fú ŋa.

Yèésù mú ɔma ɔnɔkɛ̃̀ɛ̃ méèdzì kã̀ŋa kpòwe fú ɔ̀nyà ŋa

28 Yèésù fɔ̀ fú ŋa ró ní: Ká sére afɔ̀ yèé káyí! Ɔ̀nyà-kã̀ nɛ́ ɔma ɔnɔkɛ̃̀ɛ̃ méèdzì. Tsí ó wáa lɔ ńɖi-àtsɛ̀rɛ̀bí#ɛ́, tsí fɔ̀ fúu ní: Ɔma-mi! Lɔ káà tsitsɛ́ nóko-mi nɔ́mbɛ́.

29 Tsí ɔma#á dzɔ́ŋù fúu ní: Òŋu kò làkóò. Tsí náànyìwà#á, ɔma#á wáa kparɔ ìsérè, tsí lɔ nóko#ɛ́.

30 Boba#á lɔ ńɖi-ɔmàná‐ɛ̀, tsí fɔ̀ fú òŋu gbo ní kó lɔ nóko fú òŋu. Tsí ɔma#á dzɛ́ fúu ní: Bɛ́ɛ̀ ni Boba, òŋu nákó lɔ. Tsí kò sì lɔ.

31 Tsí Yèésù wà bèrè ní: Náàŋírĩ-ɔma méèdzì ŋa#á fe, nɛ̀ɛ́ tse awù-boba‐ɛ̀?

Tsí à dzɔ́ŋù fúu ní: Àtsɛ̀rɛ̀bí#ɛ́ ni.

Tsí ó fɔ̀ fú ŋa ní: Òŋu wà wí fú ŋa ní fee, Ɔ̀ɖáyé nákó wáa dzoyè si ńǹtá-agbalómbà ŋa òŋu ɔnɔbɛ̃̀ɛ̃ àlòwá ŋa bɔ̀ fú ŋa. 32 Iŋɛ́ yèé tse#ɛ́, Yòhánà Awɛ̀fúnɛ wáa ɖíre ɔ̀nà-òtítɔ́ tsítse fú ŋa, tsí à kò gbàá gbɔ́, tsí agbalómbà ŋa òŋu ɔnɔbɛ̃̀ɛ̃ àlòwá ŋa òŋu sì gbàá gbɔ́. Tsí kíbí à sì wà rí bɛ́ɛ̀#ɛ́, à kò kparɔ ìsérè, tsí gba afɔ̀‐ɛ̀ gbɔ́.

Yèésù mú àtsìtsɛ́ yíyàábàɖí kã̀ŋa kpòwe

(Mákò 12:1-12, Lúkà 20:9-19)

33 Tsí Yèésù wà wí fú ŋa ní ká rɛ̃tígbè-òwe-òmírɛ̃̀ ró. Tsí ó ní: Onùgbó-kpàtá-kã̀ wà, tsí ó tsoko-egi-ɔtí† si, tsí ma oɖi wérí‐ɛ̀ kpó, tsí tɔ́tse ìɖì-kã̀ si, tsí ká wà gú síso-egi ŋa#á bɛ̀, tsí wà ń tse ɔtí. Tsí ó malé gíga-kã̀ gbo fú ɛnɛ yèé nákó wà ɖe oko#ɛ́. Tsí ó mú oko#ɛ́, tsí ń fú àtsìtsɛ́ kã̀ŋa ní ká wà tseé, tsí wà fú òŋu nákpálà tòŋu wá, tsí òŋu ká‐ɛ̀ ǹɖe, tsí lɔ nɔ́ɔ̀nà.

34 Àsòkò-ká ká èso-egi-ɔtí ŋa tó, tsí olóko#ɛ́ bɛ arú‐ɛ̀ kã̀ŋa lɔ fú àtsìtsɛ́ ŋa#á ní ká gba akpálà tòŋu wá. 35 Tsí kíbí arú ŋa#á lɔ káà tó#ɛ́, àtsìtsɛ́ ŋa#á mú ŋa, tsí kpa ɔ̀kã̀ rere, tsí kpa ɔ̀kã̀ gbo nóòkú, tsí ta ɔ̀kã̀ gbo nóòkúta kpa. 36 Tsí onùgbó#ɛ́ tɔ́ bɛ arú-òmírɛ̃̀ ŋa lɔ ró. Ɛnɛ-báàyí ŋa kpɔ̀ láre ɛnɛ-àtsɛ̃̀tsɛ̃̀ ŋa. Ó ɖi, bɛ́ɛ̀ ké ní àtsìtsɛ́ ŋa#á tse bá àŋa gbo#ɛ́. 37 Ńǹtã̀ntã́‐ɛ̀#ɛ́, ó bɛ ɔma bíbí‐ɛ̀ lɔ fú ŋa, tsí wà fɔ̀ ńnɔ́-ara‐ɛ̀ ní: À nákó nɛ́ àrísá fú ɔma-òŋu òŋu. 38 Tsí kíbí ɔma#á káà tó#ɛ́, ɛnɛ ŋa#á ríi, tsí à wà wí fú ara-ŋa ní: Ɛ̀hɛ̃́ɛ̃̀ɛ̃̀, ɔma-olóko#ɛ́ gìɖì ní. Òŋu ní bàkó wáa dzogú-oko#ɛ́. Ó ɖi, àŋa kó kpaá nóòkú gbòkã́, tsí oko#ɛ́ kó ɖi tàŋa. 39 Tsí à múu, tsí fàá fùɖá nóko-egi-ɔtí#ɛ́, tsí kpaá nóòkú.

40 Ńbɛ̀ɛ́, Yèésù wà bèrè ŋá ní: Bí olóko-egi-ɔtí#ɛ́ sɛ̃̀ wá fe, bí nákó tse fú àtsìtsɛ́ ŋa#á fáà? 41 Tsí à dzɔ́ŋù fúu ní: Nákó kpa akpanɛ nyɛ̀ŋɛ̀ ŋa nóòkú náàrì nyíwo ànyì, tsí kɛ́ oko-egi-ɔtí#ɛ́ fú àtsìtsɛ́-òmírɛ̃̀ ŋa. Tsí bí ìwèrè-ká ká èso-egi-ɔtí ŋa tó ná, à nákó fúu nákpálà tɛ̀ɛ̀ wá.

42 Tsí Yèésù wà fɔ̀ fú ŋa ní: À kò kã afɔ̀ yèé wà ńǸwé-Ɔ̀ɖáyé†#ɛ́ niì? Afɔ̀#ɛ́ fɔ̀ ní:

“Òkúta yèé amalé ŋa kɛ́ taánù#ɛ́,

òŋu ní wáa kpã́dzú lárè, tsí gbé négo-ilé#ɛ́,

àtsùgbée ilé#ɛ́ kó máa ɖíwó#ɛ́.

Ɔlɔ́dzɔ́ ní tse iŋɛ́ nyɛ̀ŋɛ̀#ɛ́, tsí ó tse àbáàrí fú wa héŋú.”^*

43 Ó ɖi, ɛnɛ yèé nákó tsubú dzì ńǹtá-òkúta#á, ɛnɛ nyɛ̀ŋɛ̀ nákó tsɛ́ kpó wíríwírí, tsí bí òkúta#á sì dzì ńǹtá-ɔ̀nyà-kã̀, nákó tɛ̀ ɛnɛ nyɛ̀ŋɛ̀ má kpó kpɛ̀nlɛ̀ɛ̀. [ 44 Ńnɛ̀ ní òŋu wà wí fú ŋa ní Ɔ̀ɖáyé nákó gba oyè‐ɛ̀ nɔ́wɔ́-ŋa, tsí ń fú ìlú yèé nákó tse awù‐ɛ̀#ɛ́.]

45 Tsí kíbí onùgbó-atsɛbɔ-Ɔ̀ɖáyé† ŋa òŋu ɔma-ɛgbɛ́-Fàrísì† ŋa gbɔ́ òwe-Yèésù ŋa bɛ́ɛ̀#ɛ́, à mà ní afɔ̀-àŋa ní ó wà fɔ̀#ɛ́. 46 Tsí à wò ní àŋa kó múu. Ó ɖi, à sì wà sá fú èrò#ɛ́. Iŋɛ́ yèé tse#ɛ́, ɔ̀nyà kpó kɛ́ si fú Yèésù ní ó dzɛ́ agbáfɔ̀-Ɔ̀ɖáyé fɔ̀†.