Yòhánà 2

Yèésù sɔ omi ɖi ɔtí

Ó ɖi nɔ́dzɔ́‐ɛ̀kɛ́ɛta‐ɛ̀, tsí à wà gbɛ̃́ ɔnɔbɛ̃̀ɛ̃-kã̀ náàbitɔ̃, tsí à wà dzɛ ɔɖɔ̃́. Ńǹlú-Kánà ní à wà dzɛ ɔɖɔ̃́#ɛ́. Ìlú#ɛ́ wà nérè-Gàlìlé. Ńbɛ̀ɛ́, ìnà-Yèésù gbo lɔ nɔ́ɖɔ̃́#ɛ́. 2 Tsí à kpe Yèésù òŋu ɔmatsɛ́‐ɛ̀ ŋa gbo ní ká wáa dzɛ́ ɔɖɔ̃́#ɛ́ bá àŋa, tsí à lɔ. 3 Kíbí à wà nɔ́ɖɔ̃́#ɛ́ si#ɛ́, ɔtí wáa tã́ ɖí ŋa. Tsí ìnà-Yèésù nyí, tsí wà wí fú Yèésù ní: Ɔtí tã́ ɖí ɛnɛ ŋa#á.

4 Tsí Yèésù kpe ìná‐ɛ̀ ní: Ínà, kí tse tsí ò wà mú afɔ̀ nyɛ̀ŋɛ̀ sũ̀ mí? Ìwèrè-mi kò tó wòná.

5 Tsí ìná‐ɛ̀ wà wí fú àtsɔ̀tí ŋa ní: Iŋɛ́ ɔ̀kã̀lɔ́ɔ̀kã̀ yèé nákó wí fú ŋa ní ká tse#ɛ́, ká tseé.

6 Ńbí à wà dzɛ ɔɖɔ̃́#ɛ́, kɔ̀rɔ̀ lákṹ lákṹ mɛ́ɛfà wà bɛ̀. Òkúta ní à bɛ, tsí sɔɔ́ ɖi kɔ̀rɔ̀ bɛ́ɛ̀#ɛ́. Ɔma-Ìyúɖà† ŋa náa kpɔ̃mi ɖà ńŋa, tsí wà tseé, tsí wà ń fú àfárá ni. Kɔ̀rɔ̀ kã̀kã̀ nákó gbà kíbí àwò-oɖò méèdzì nàmí mɛ́ɛta bɛ́ɛ̀.

7 Tsí Yèésù wí fú àtsɔ̀tí ŋa#á ní: Ká kpɔ̃mi kɔ̃́ kɔ̀rɔ̀ ŋa#á.

Tsí à kpɔ̃mi kɔ̃́ ŋa tɛ́tɛ́tɛ́. 8 Tsí ó wí fú ŋa ní: Báàyí#ɛ́, ká tseé oɖé, tsí ká ń lɔ fú ɛnɛ yèé wà nárũ-ɔɖɔ̃́#ɛ́.

Tsí àŋa gbo, à tseé lɔ fú ɛnɛ nyɛ̀ŋɛ̀. 9 Kíbí ɛnɛ yèé wà nárũ-ɔɖɔ̃́#ɛ́ tɔ́rí‐ɛ̀#ɛ́, kò dzɛ́ omi ró, ó ɖi ɔtí. Kò ma ńbí ɔtí#ɛ́ ti#ɛ́. Ó ɖi, àtsɔ̀tí ŋa#á, àŋa òŋu, à ma ìɖì‐ɛ̀. Gbòkã́#á, ó ní ká kpe ɔkɔláya#á fú òŋu. 10 Tsí ɔkɔláya#á wáa tó. Tsí ó wà wí fúu ní: Ɔ̀nyà kpó náa tsɛ̃̀tsɛ̃̀ fú ɔ̀nyà ŋa nɔ́tí rere tã́ná ni, tsí ńǹwèrè yèé ɔtí wà ŋɔ́ ŋa ńǹkɛ̀ɛ́#ɛ́, náa kpɔ yèé kò sã̀#á fùɖá. Ó ɖi, òŋu, ó kɛ́ ɔtí yèé sã̀#á ɖúkù si, tsí wáa kɛ́ɛ fùɖá ńǹkã́ã̀nyìì?

11 Iŋɛ́-àwùsì yèé Yèésù tsɛ̃̀tsɛ̃̀ tse kélékélé#ɛ́ ńnɛ̀ɛ́. ŃKánà nérè-Gàlìlé ní ó tse iŋɛ́-àwùsì#ɛ́. Iŋɛ́-àwùsì nyɛ̀ŋɛ̀#ɛ́ nya lílákṹ‐ɛ̀ ɖíre, tsí ɔmatsɛ́‐ɛ̀ ŋa nɛ́ àkaralé si ńǹtá‐ɛ̀.

12 Náànyì-bɛ́ɛ̀#ɛ́, Yèésù wáa lɔ ńǹlú-Kàfànàwú, tsí ìná‐ɛ̀ òŋu ɔmàná‐ɛ̀ ŋa má nára-ɔmatsɛ́‐ɛ̀ ŋa gbo, à lɔ báa. Tsí à gbé bɛ̀ fú ɔdzɔ́ mɛ́ɛlóle kã̀ŋa gé ni.

Yèésù lé àtàdzà ŋa fùɖá nɔ́gbà-ilé-Ɔ̀ɖáyé

(Màtéwò 21:12-17, Mákò 11:15-19, Lúkà 19:45-48)

13 Ńbɛ̀ɛ́, ìwèrè sɔ́má, tsí ɔma-Ìyúɖà† ŋa kó dzɛ ɔɖɔ̃́-ŋa-kã̀. Ɔɖɔ̃́#ɛ́, à náa kpèé ní ɔɖɔ̃́-Àɖádzɔ̀ɔ́†. Tsí Yèésù gbo lɔ ńYèrúsàlɛ́mì fú ɔɖɔ̃́#ɛ́. 14 Tsí ó lɔ nɔ́gbà-ilé-Ɔ̀ɖáyé†. Kíbí ó tó#ɛ́, ó rí ɔ̀nyà ŋa, tsí à wà ta lalá ŋa, tsí wà ta àgùɖã̀ ŋa, tsí wà ta àlúǹkùkù ŋa gbo. Tsí ɔ̀nyà kã̀ŋa gbo dzokó si nára-kpɔ̃rɔ̃, tsí wà kparɔ owó. 15 Tsí Yèésù wo okù kã̀ŋa, tsí ŋɔɔ́ kíbí àtàmì bɛ́, tsí ń lé ŋa fùɖá nɔ́gbà#á, àgùɖã̀-ŋa gbo, lalá-ŋa gbo kpó. Akparɔ-owó ŋa gbo, ó téle owó-ŋa ɖà ńlɛ̀, tsí rí kpɔ̃rɔ̃-ŋà ŋa gbo kpalɛ̀. 16 Tsí ó tó ńɖi-olí-àlúǹkùkù ŋa gbo, tsí ó wí fú ŋa ní: Ká kɛ́ àlúǹkùkù-ŋa ǹɖe bí. Ó ɖi, ká máa mú ilé-Boba-òŋu, tsí ń tse ilé-adzà.

17 Kíbí ó tse bɛ́ɛ̀#ɛ́, ɔmatsɛ́‐ɛ̀ ŋa tédzú afɔ̀ yèé à kɔ si ńǸwé-Ɔ̀ɖáyé†#ɛ́. À kɔ si ní: “Àmúɖɔ̃̀ yèé ǹ nɛ́ fú ilé-ɛ̀ɛ#ɛ́, óò Ɔ̀ɖáyé, nákó ɖi iná, tsí dzó mi kpa.”^*

18 Kíbí ó lé ŋa tã́#á, onùgbó-ɔma-Ìyúɖà ŋa wà bèrèé ní: Iŋɛ́-àwùsì yèésí nákó nyáa tse fú àŋa, tsí àŋa kó mà ní ɔ̀nà wà fúu ní kó tse iŋɛ́ yèé ó tse#ɛ́?

19 Tsí Yèésù wà wí fú ŋa ní: Ká fɔ́ ilé-Ɔ̀ɖáyé#ɛ́ kpó, òŋu nákó mú ɔdzɔ́ mɛ́ɛta, tsí ń maá si ńǹɖì‐ɛ̀.^*

20 Tsí à wà wí fúu ní: Ɔɖɔ̃́ mɛ́ɛfà lé nógóòdzì ní à mú, tsí ń malé#ɛ́, tsí òŋu wà fɔ̀ ní òŋu nákó mú ɔdzɔ́ mɛ́ɛta tsí ń maá si ńǹɖì-ɛ̀ɛ̀?

21 Ilé-Ɔ̀ɖáyé yèé Yèésù wà fɔ̀#ɛ́, ara tòŋu ká‐ɛ̀ ni. 22 Náànyìwà, kíbí Yèésù kú tã́, tsí dzí wá náyé#ɛ́, ɔmatsɛ́‐ɛ̀ ŋa tédzú ní ó wíìnyɛ̀-kã̀ bɛ́ɛ̀ wáa lɔ. Ńbɛ̀ɛ́, à nɛ́ àkaralé si ńǹtá-afɔ̀ yèé à kɔ si ńǸwé-Ɔ̀ɖáyé#ɛ́, tsí nɛ́ àkaralé si ńǹtá-afɔ̀-Yèésù ŋa gbo.

23 Kíbí Yèésù kí ńYèrúsàlɛ́mì si fú ɔɖɔ̃́-Àɖádzɔ̀ɔ́#ɛ́, ó tse iŋɛ́-àwùsì ŋa, tsí ɔ̀nyà kpíkpɔ̀ rí, tsí nɛ́ àkaralé si ńǹtá‐ɛ̀. 24 Ó ɖi, Yèésù òŋu kò mú ara‐ɛ̀ bɔwɔ́-ŋa. Iŋɛ́ yèé tse#ɛ́, ó ma iŋɛ́ yèé à dzɛ́#ɛ́ rere. 25 Kà wò ní ká tú òkpì-ɔ̀nyà-kã̀ kpókpó fú òŋu. Òŋu ká‐ɛ̀ ma iŋɛ́ yèé wà ńnɔ́-ɛnɛ kṹnukṹ kpó#ɛ́.