Yòhánà 1

Ìwé-Ikɔ̀ ɖíɖɔ̃̀ ti Yòhánà

Afɔ̀-Ɔ̀ɖáyé wáa ɖi ɔ̀nyà, tsí gbé ńǹtalɛ̀ bí

Títí ńǹkpìnkpìlɛ̀-iŋɛ́ ŋa#á kpó, oŋù-kã̀ wà. Oŋù#ɛ́ wà bá Ɔ̀ɖáyé si, tsí oŋù#ɛ́ dzɛ́ Ɔ̀ɖáyé. 2 Ó ti wà bá Ɔ̀ɖáyé títí ńǹkpìnkpìlɛ̀-iŋɛ́ ŋa#á kpó. 3 Ńǹtá‐ɛ̀ ní Ɔ̀ɖáyé gbà, tsí ɖá iŋɛ́ ɔ̀kã̀lɔ́ɔ̀kã̀ kpó#ɛ́. Iŋɛ́-kã̀ kpókpó kò bɔ̀ yèé Ɔ̀ɖáyé kò ɖá gbà ńǹtá‐ɛ̀#ɛ́. 4 Òŋu ní dzɛ́ oláàyɛ̀#ɛ́. Tsí àyɛ̀#ɛ́ náa mú ɔ̀nyà ŋa si ńmímá. 5 Mímá#á wà má ńɖi-òkùkù, tsí òkùkù kò nyáa múu.^*

6 Ɔ̀nyà-kã̀ wà. À náa kpèé ní Yòhánà†, tsí Ɔ̀ɖáyé bɛ̀ɛ́ wá. 7 Ó wá, tsí kó wáa nya àyídzá ti nára-mímá#á, àtsùgbée ɔ̀nyà kpó kó gbɔ́ afɔ̀‐ɛ̀, tsí ká gbàá gbɔ́. 8 Òŋu ká‐ɛ̀ kò dzɛ́ mímá#á. Ó wá, tsí kó wáa nya àyídzá ti nára-mímá#á ni.

9 Oŋù#ɛ́, ó dzɛ́ mímá-òtítɔ́, tsí kíbí ó wà tó ńǹtalɛ̀ bí#ɛ́, ó wáa mú ɔ̀nyà ŋa si ńmímá. 10 Ó ti wà náyé#ɛ́ si. Ńǹtá‐ɛ̀ ní Ɔ̀ɖáyé gbà, tsí ɖá ayé#ɛ́, tsí ɔ̀nyà-ìtalɛ̀ bí ŋa kò si ríi mà. 11 Ó wá ńɖi-tɛ̀ɛ̀ ŋa, tsí tɛ̀ɛ̀ ŋa kò gbàá. 12 Ó ɖi, ɔ̀nyà kã̀ŋa òŋu gbàá. Kíbí ɛnɛ nyɛ̀ŋɛ̀ ŋa gbàá gbɔ́#ɛ́, ó fú àŋa kpó ńkpá ní ká ɖi ɔma-Ɔ̀ɖáyé. 13 À kò ɖi ɔma-Ɔ̀ɖáyé kíbí à náa dzɛ́ ɔma fú boba-nɛ ńǹtalɛ̀ bí#ɛ́ nàmí kíbí náa wu ɔ̀nyà, tsí náa bíma#á. Ó ɖi, Ɔ̀ɖáyé òŋu ká‐ɛ̀ tse tsí à dzɛ́ ɔma‐ɛ̀ ŋa ni.

14 Oŋù#ɛ́, ó ɖi ɔ̀nyà, tsí ó wáa gbé bá wa, tsí àa rí iyì‐ɛ̀. Iyì‐ɛ̀#ɛ́, ó gbàá nɔ́wɔ́-Boba‐ɛ̀ kíbí ó dzɛ́ Ɔma bíbí‐ɛ̀ ɔ̀kã̀ntso#ɛ́ ni. Náa tse ore-ɔ̀fɛ́ fúnɛ, tsí náa wà tse òtítɔ́ gbo gé ni. 15 Yòhánà nya àyídzá‐ɛ̀, tsí ó wí nódzú-ɔ̀nyà kpó ní: Ɛnɛ yèé, òŋu ní òŋu wà bá fɔ̀ dzɔ̀ɔ́ dzɔ̀ɔ́ kíbí òŋu fɔ̀ ní: Ɔ̀nyà-kã̀ nákó wáa wá náànyì-òŋu, tsí ó tsúwádzú-òŋu, iŋɛ́ yèé tse#ɛ́, ó ti wà tã́ná ká bí òŋu#ɛ́, ɛnɛ nyɛ̀ŋɛ̀ ní.

16 Oŋù#ɛ́, olóore-ɔ̀fɛ́ ɔ̀kã̀lɔ́ɔ̀kã̀ ní ó dzɛ́#ɛ́, tsí náa wà tse ore-ɔ̀fɛ́ fú wa tɛ̀má tɛ̀má. 17 Ɔ̀ɖáyé ɖá ɛkpa fú wa gbà ńǹtá-Mɔ̀ɔ́sè†. Ó ɖi, ó mú ore-ɔ̀fɛ́ òŋu òtítɔ́, tsí ń ŋà wá gbà ńǹtá-Yèésù Kírísítò. 18 Ɔ̀ɖáyé#ɛ́, ɔ̀nyà-kã̀ kpókpó kò ríi wòrí. Ó ɖi, Ɔma bíbí‐ɛ̀ ɔ̀kã̀ntso#ɛ́, Ɔ̀ɖáyé ní ó dzɛ́#ɛ́. Tsí náa dzokó ńtã-Boba‐ɛ̀. Òŋu ní mú Ɔ̀ɖáyé, tsí ń ɖíre fú wa#á.

Yòhánà Awɛ̀fúnɛ wà nya àyídzá ti nára-Yèésù

(Màtéwò 3:1-12, Mákò 1:1-8, Lúkà 3:1-3)

19 Ó ɖi nɔ́dzɔ́-kã̀, tsí onùgbó-ɔma-Ìyúɖà† ŋa yèé wà ńǹlú-Yèrúsàlɛ́mì#ɛ́, à bɛ atsɛbɔ-Ɔ̀ɖáyé† ŋa òŋu àtsìtsɛ́-ilé-Ɔ̀ɖáyé† ŋa lɔ fú Yòhánà†, tsí ká lɔ káà bèrèé ní ɔ̀nyà-ìrɔ́ mɛ̀ɛ́ ó dzɛ́. Afɔ̀ yèé ó fɔ̀ fú ŋa#á ní: 20 Ó wí fú ŋa gãgã nódzú-ɔ̀nyà kpó ní òŋu kò dzɛ́ Kírísítò† Agbanɛlà yèé Ɔ̀ɖáyé tsã̀, tsí bɛ̀ wá#á.

21 Tsí à wà bèrèé ní: Nɛ̀ɛ́ ó dzɛ́ ńǹkɛ̀ɛ́? Ó dzɛ́ Èlíyàà?

Tsí ó ní: Òò, òŋu kò dzɛ́ Èlíyà†.

Tsí à sɛ̃̀, tsí wà bèrèé ní: Òŋu ní dzɛ́ agbáfɔ̀-Ɔ̀ɖáyé fɔ̀† yèé àŋa wà ɖóro wò#ɛ́ɛ̀?

Tsí ó ní: Òò.

22 Tsí à tɔ́ sɛ̃̀, tsí wà bèrèé ró ní: Nɛ̀ɛ́ ó dzɛ́ ná? Ó ɖi, ó wà ní àŋa kó káà wíìnyɛ̀-kã̀ fú ɛnɛ yèé ŋa bɛ àŋa wá#á. Ó ɖi, bí òŋu ká‐ɛ̀ wà wí ti nára-ara‐ɛ̀ gbà fáà?

23 Tsí ó wà wí fú ŋa ní: Yèsáyà† agbáfɔ̀-Ɔ̀ɖáyé fɔ̀, ó fɔ̀ ní: “Oŋù-ɔ̀nyà-kã̀ wà ɖɔ̃́ nɔ́ɔ̀ɖã̀, tsí wà ɖúgbe ní: È rɛ̃́ ɔ̀nà-Ɔlɔ́dzɔ́ ɖí.”^* Ó ɖi, òŋu ní ó wà bá fɔ̀#ɛ́.

24 Ɛnɛ yèé à bɛ̀ wá ŋa#á, à dzɛ́ ɔma-ɛgbɛ́-Fàrísì† ŋa ni. 25 Tsí à sɛ̃̀, tsí wà bèrèé ní: Bí kò dzɛ́ Kírísítò, tsí kò dzɛ́ Èlíyà gbo, tsí kò dzɛ́ agbáfɔ̀-Ɔ̀ɖáyé fɔ̀ yèé àŋa wà ɖóro wò#ɛ́ gbo fee, kí tse tsí ó wà wɛ̀† fú ɔ̀nyà ŋa ńǹkɛ̀ɛ́?

26 Ńbɛ̀ɛ́, Yòhánà wà wí fú ŋa ní: Òŋu, òŋu wà wɛ̀ fú ŋa òŋu omi ni. Ó ɖi, ɔ̀nyà-kã̀ wà náàŋírĩ-ŋa, tsí à kò màá. 27 Ɛnɛ nyɛ̀ŋɛ̀ nákó wáa wá náànyì-òŋu, tsí òŋu kò dzɔ òŋu kó tú okù-kpákò‐ɛ̀ gìɖì.

28 Ńǹwèrè yèé à wà bèrèé bɛ́ɛ̀#ɛ́, Yòhánà wà ńǹlú-Bètàní ni. Ìlú#ɛ́ wà náànyì-oɖò-Yòɖánì, ńbí Yòhánà náa wɛ̀ fú ɔ̀nyà ŋa#á.

29 Ńlɛ̀ má‐ɛ̀, Yòhánà rí Yèésù†, tsí ó rɛ̃̀ bàa ńɖɔ̀‐ɛ̀. Tsí ó ní: È rí gé! Ɔma-àgbò-Ɔ̀ɖáyé† ńnɛ̀ɛ́. Òŋu ní wà gba àbi-ɔ̀nyà ŋa lɔ#ɛ́. 30 Ó ɖi, òŋu ní òŋu wà bá fɔ̀, tsí òŋu fɔ̀ ní: Ɔ̀nyà-kã̀ nákó wáa wá náànyì-òŋu, tsí ó tsúwádzú-òŋu, iŋɛ́ yèé tse#ɛ́, ó ti wà tã́ná ká bí òŋu#ɛ́. 31 Ó ɖi, dzɔ̀ɔ́ dzɔ̀ɔ́#ɛ́, òŋu gbo, òŋu kò ma ɔ̀nyà-ìrɔ́ mɛ̀ɛ́ ó dzɛ́. Ó ɖi, òŋu wá, tsí òŋu kó wáa wɛ̀ fúnɛ òŋu omi, àtsùgbée ɔma-Ìsàràyɛ́lì† ŋa kó màá ni.

32 Tsí ó fɔ̀ ró ní: Òŋu rí Mímí-Ɔ̀ɖáyé†, tsí ó tì ti nɔ́ɔ̀rɔ̃ wá ńǹwànwà-àlúǹkùkù bɛ́, tsí wáa gbé báa. 33 Òŋu kò mà dzɔ̀ɔ́ ní òŋu ni. Ó ɖi, Ɔ̀ɖáyé, ɛnɛ yèé bɛ òŋu wá ní òŋu kó wáa wɛ̀ fúnɛ òŋu omi#ɛ́, ó wí fú òŋu ní: Nàa rí Mímí-Ɔ̀ɖáyé, tsí nákó tì, tsí wáa wà ńǹtá-ɔ̀nyà-kã̀ si. Ɛnɛ nyɛ̀ŋɛ̀ ní nákó tse tsí Mímí-Ɔ̀ɖáyé nákó tì wɔ̀ ńǹtá-ɔ̀nyà ŋa#á. 34 Ó ɖi, òŋu rí bɛ́ɛ̀ ìɖéǹɖè, tsí òŋu wà mɔ́wɔ́ kpɛ̀ɖɔ̃̀ ní ɛnɛ yèé bɛ́#ɛ́, Ɔma bíbí-Ɔ̀ɖáyé ní ó dzɛ́#ɛ́.

Yèésù kpé ɔmatsɛ́‐ɛ̀ ŋa tsítsã̀

35 Ńlɛ̀ má‐ɛ̀ ró, Yòhánà† wà bɛ̀ si, tsí ɔmatsɛ́‐ɛ̀ méèdzì gbo wà ńɖɔ̀‐ɛ̀ si. 36 Ńbɛ̀ɛ́, Yèésù rɛ̃̀ wáa làkóò, tsí Yòhánà wòó kokoko, tsí fɔ̀ ní: È rí gé! Ɔma-àgbò-Ɔ̀ɖáyé ńnɛ̀ɛ́.

37 Kíbí ó wí bɛ́ɛ̀#ɛ́, ɔmatsɛ́‐ɛ̀ méèdzì ŋa#á gbɔ́, tsí à ǹɖe, tsí tɛ̀ náànyì-Yèésù làkóò. 38 Tsí Yèésù nyíwò, tsí ó rí ní à wà tɛ̀ náànyì-òŋu, tsí ó wà bèrè ŋá ní: Kí à wà wò?

Tsí à ní: Rábì, ńbisí ò wà? (Òkpì-Rábì ní dzɛ́ akɔ́nɛ#ɛ́.)

39 Tsí Yèésù wí fú ŋa ní: Ká wá, tsí ká wáa rí ńbí òŋu wà#á.

Ńbɛ̀ɛ́, à tɛ̀ náànyì‐ɛ̀ lɔ, tsí à rí ńbí ó wà#á. Tsí à tse àsòkò yèé bɔ̀ fú ɔdzɔ́ nyɛ̀ŋɛ̀#ɛ́ ńɖɔ̀‐ɛ̀. Nódzúùrɔ̃̀-alɛ́ bɛ́ ní à lɔ ńɖɔ̀‐ɛ̀#ɛ́.

40 Náàŋírĩ-àŋa méèdzì yèé gbɔ́ afɔ̀-Yòhánà nyɛ̀ŋɛ̀, tsí tɛ̀ náànyì-Yèésù#ɛ́, ɔ̀kã̀ dzɛ́ Ànɖérè. Ɔmànà-Sìmɔ́nì Òkúta ní ó dzɛ́#ɛ́. 41 Ànɖérè#ɛ́, ó tsɛ̃̀tsɛ̃̀ káà rí ìfó‐ɛ̀, Sìmɔ́nì, tsí wà wí fúu ní: Àŋa rí Mɛ̀síyà†, Agbanɛlà yèé Ɔ̀ɖáyé tsã̀ ní òŋu nákó bɛ̀ wá#á. (Òkpì-Mɛ̀síyà ní dzɛ́ Kírísítò ńgɛ̀rɛ́kì#ɛ́.)

42 Tsí ó gbɛ̃́ Sìmɔ́nì lɔ ńɖi-Yèésù. Tsí Yèésù wo Sìmɔ́nì títítí, tsí ó wà wí fúu ní: À náa kpèé ní Sìmɔ́nì, tsí ó dzɛ́ ɔma-Yòhánà. Ó ɖi báàyí, à nákó wà kpèé ní Kèfásì. (Òkpì-Kèfásì ní dzɛ́ Òkúta#á.)

43 Ńlɛ̀ má‐ɛ̀, Yèésù ǹɖe ní òŋu kó lɔ nérè-Gàlìlé. Tsí ó làkóò, tsí ó kpàɖé Fìlíkpò, tsí ó wí fúu ní kó tɛ̀ náànyì-òŋu.

44 Fìlíkpò#ɛ́, ɔma-ìlú-Bètsàyìɖá ŋa ni. Ìlú-Ànɖérè òŋu Òkúta ké ńnɛ̀ɛ́. 45 Ńbɛ̀ɛ́, Fìlíkpò, òŋu gbo, ó lɔ káà rí Nàtànàyɛ́lì, tsí wà wí fúu ní: Ńǹwé-ɛkpa-Ɔ̀ɖáyé†#ɛ́, ó tédzú kíbí Mɔ̀ɔ́sè† kɔ iŋɛ́ ti nára-ɔ̀nyà-kã̀#áà? Tsí agbáfɔ̀-Ɔ̀ɖáyé fɔ̀† ŋa gbo wíìnyɛ̀ ti nára‐ɛ̀ nɔ̀. Ó ɖi, ɛnɛ nyɛ̀ŋɛ̀#ɛ́, àŋa ríi. À náa kpèé ní Yèésù, tsí ó dzɛ́ ɔma-Yòsɛ́fù† ńǹlú-Nàsàrɛ́tì.

46 Tsí Nàtànàyɛ́lì ní: Ńǹlú-Nàsàrɛ́tìì? Iŋɛ́-ire-kã̀ nákó nyáa ti ńǹlú-Nàsàrɛ́tìì?

Tsí Fìlíkpò wí fúu ní òŋu ká‐ɛ̀ kó wá, tsí kó wáa rí.

47 Ńbɛ̀ɛ́, à ǹɖe, tsí dzì nɔ́ɔ̀nà-ìɖì-Yèésù. Kíbí Yèésù rí Nàtànàyɛ́lì, tsí ó bàa ńɖɔ̀‐ɛ̀#ɛ́, ó wà fɔ̀ ti nára‐ɛ̀ ní: Ɛnɛ yèé bɛ́#ɛ́, ɔma-Ìsàràyɛ́lì gìɖì gìɖì ní. Ó ɖi, òtítɔ́ wà nárũ‐ɛ̀, kà rúnɛ.

48 Tsí Nàtànàyɛ́lì wà bèrèé ní: Bí ó tse fáà, tsí ma òŋu?

Tsí Yèésù wà wí fúu ní: Tã́ná Fìlíkpò kó wáa kpèé#ɛ́, òŋu ti ríi ńǹwèrè yèé ó wà nábɛ́-òrì#ɛ́ si#ɛ́.

49 Tsí Nàtànàyɛ́lì ní: Rábì, Ɔma bíbí-Ɔ̀ɖáyé ní ò dzɛ́#ɛ́, ìwɔ ní dzɛ́ ólú-ìlú-Ìsàràyɛ́lì#ɛ́.

50 Tsí Yèésù wà wí fúu ní: Kíbí òŋu wí fúu ní òŋu ríi nábɛ́-òrì#ɛ́ ní ó gba òŋu gbɔ́#ɛ́ nɔ̀? Ó ɖi, nákó rí iŋɛ́ yèé nákó lákṹ lárè bɛ́ɛ̀ ŋa ró#ɛ́.

51 Tsí ó ní: Òŋu wà wí fú ŋa ní fee, à nákó rí, tsí ɔ̀rɔ̃ nákó tsí, tsí adzítsɛ́-ɔ̀rɔ̃† ŋa nákó wà gu ìgbèrí lɔ, tsí wà tì nɔ́ɔ̀gbagba-éwo-òŋu, Ɛnɛ yèé ɔ̀nyà bí#ɛ́†.