Mákò 11

Yèésù wɔ̀ ńǹlú-Yèrúsàlɛ́mì kíbí ólú bɛ́

(Màtéwò 21:1-11, Lúkà 19:28-40, Yòhánà 12:12-19)

Yèésù òŋu ɔmatsɛ́‐ɛ̀ ŋa sɔ́má-Yèrúsàlɛ́mì làkóò, tsí tó sɔ́má-ìlú-oko méèdzì kã̀ŋa. À náa kpe ɔ̀kã̀ ní Bètìfàgé, tsí à náa kpe èkéèdzì‐ɛ̀ ní Bètàní. À wà nára-òkè-Òlífì†. Tsí Yèésù tsã ɔmatsɛ́‐ɛ̀ méèdzì, tsí bɛ̀ ŋá, 2 tsí ó wí fú ŋa ní: Ká ǹɖe, tsí ká lɔ ńǹlú-oko yèé à wà rí ńǹwádzú-ŋa#á, tsí bí à tó ńǹlú#ɛ́, à nákó rí kɛ́tɛ́kɛ́tɛ́-ɛɖã-kã̀, tsí à soó si, tsí ɔ̀nyà-kã̀ kpókpó gbo kò dzì ńǹtá‐ɛ̀ wòrí. Ká túu, tsí ká fàá wá fú òŋu. 3 Ó ɖi, bí ɔ̀nyà-kã̀ wà bèrè ŋá ní: Kí tse tsí à wà tse bɛ́ɛ̀, ni ká wí fúu ní: Ɔ̀gá ní wà wo kó lòó#ɛ́, nákó sɛ̃̀ɛ̃́ wá fúu ńǹsɛ̃̀ɛ̃́.

4 Ńbɛ̀ɛ́, ɔmatsɛ́ ŋa#á lɔ. Kíbí à káà tó#ɛ́, à rí kɛ́tɛ́kɛ́tɛ́-ɛɖã-kã̀ nárũ-kpàtá-kã̀. À soó si nára-èkũ̀-kpàtá#á, tsí ó ɖóro nɔ́ɔ̀nà si. Tsí à káà túu. 5 Tsí ɔ̀nyà kã̀ŋa wà bɛ̀, tsí wà bèrè ŋá ní: Kí à wà tse ńnɛ̀ɛ́? Kí tse tsí à wà tú kɛ́tɛ́kɛ́tɛ́#ɛ́?

6 Tsí ɔmatsɛ́ ŋa#á dzɔ́ŋù fú ŋa kíbí Yèésù fɔ̀ gbà#á, tsí à dzɔ̀ɔ́ ŋa. 7 Tsí à fa kɛ́tɛ́kɛ́tɛ́-ɛɖã#á wá fú Yèésù. Kíbí à tó#ɛ́, à bɔ́ àwù-ŋà ŋa, tsí ń lé ńǹtá‐ɛ̀, tsí Yèésù dzokó ńǹtá-àwù ŋa#á, tsí à dzì nɔ́ɔ̀nà. 8 Tsí ɔ̀nyà kpíkpɔ̀ wà mú àwù-ŋà ŋa tɛ́ nɔ́ɔ̀nà fúu, tsí ɔ̀nyà kùbɔ̀ ŋa wà tsɛ́wé ńkóko wáa tɛ́ fúu. 9 Ɛnɛ-iwádzú ŋa gbo, ɛnɛ-ànyì ŋa gbo, àŋa kpó, à wà ɖúgbe ní: Ényìì! Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́! 10 Kùsɛ̀ɛ̀ fú ɛnɛ yèé bàa, tsí kó wáa dzoyè si ńǹtá-wa, kíbí gbágbóǹgbàgbò-wa Ɖàfíɖì† dzoyè wáa lɔ#ɛ́. Ényìì! Kùsɛ̀ɛ̀ fú Ɔ̀ɖáyé nɔ́ɔ̀rɔ̃!^*

11 Tsí à káà tó ńǹlú-Yèrúsàlɛ́mì. Tsí Yèésù lɔ nɔ́gbà-ilé-Ɔ̀ɖáyé†, tsí ó rí iŋɛ́ yèé wà bɛ̀ ŋa kpó#ɛ́. Ńbɛ̀ɛ́, alɛ́lɛ́ lɛ́, tsí òŋu ɔmatsɛ́‐ɛ̀ máàméèdzì ŋa#á sɛ̃̀ lɔ ńǹlú-oko-kã̀, tsí káà sũ̀ bɛ̀. À náa kpe ìlú#ɛ́ ní Bètàní.

Yèésù ré fú egi-òrì-kã̀

(Màtéwò 21:18-19)

12 Kíbí ilɛ̀ má#á, à ǹɖe ńBètàní, tsí wáa làkóò ńYèrúsàlɛ́mì#ɛ́, tsí ebi wà kpa Yèésù. 13 Ńbɛ̀ɛ́, ó rí egi-òrì-kã̀ nóòtèrè, tsí ó rú si kíbí bí ó so si ni náa rú gbà#á. Tsí ó lɔ nóòkpì‐ɛ̀ ní òŋu nákó rí síso kã̀ŋa ńnɛ̀ɛ̀? Kíbí ó tó nóòkpì‐ɛ̀#ɛ́, ewé sɔ̃́ŋú gé ní ó rí#ɛ́. Kò tsi ìwèrè yèé náa so#ɛ́ ni. 14 Ńbɛ̀ɛ́, ó ré fúu ní: Ɔ̀nyà-kã̀ kpókpó kàkó dzɛ èso‐ɛ̀ láyé ró!

Tsí ɔmatsɛ́‐ɛ̀ ŋa gbo gbɔ́.

Yèésù lé àtàdzà ŋa fùɖá nɔ́gbà-ilé-Ɔ̀ɖáyé

(Màtéwò 21:12-17, Lúkà 19:45-48, Yòhánà 2:13-22)

15 Tsí à káà tó ńYèrúsàlɛ́mì, tsí Yèésù lɔ nɔ́gbà-ilé-Ɔ̀ɖáyé†, tsí kpé àtàdzà ŋa òŋu àràdzà ŋa lílé fùɖá nɔ́gbà-ilé-Ɔ̀ɖáyé#ɛ́. Akparɔ-owó ŋa gbo wà bɛ̀, tsí ó rí kpɔ̃rɔ̃-ŋà ŋa kpalɛ̀. Tsí ɔ̀nyà kã̀ŋa gbo wà ta àlúǹkùkù, tsí ó rí àntã̀ tiŋà ŋa gbo kpalɛ̀. 16 Kò dzɛ́ gìɖì ní ɔ̀nyà-kã̀ kpókpó kó ru iŋɛ́-kã̀ gbà nɔ́gbà#á wáa lɔ. 17 Tsí ó tsɛ̀kɔ́ fú ɔ̀nyà ŋa, tsí wà fɔ̀ fú ŋa ní: Ɔ̀ɖáyé fɔ̀ si ńǹwé‐ɛ̀ ní: “Ilé-mi, à nákó kpèé ní ilé-ìre wúwú fú àledzò ŋa kpó náyé gbaŋgba#á ni.”^* Tsí àŋa òŋu, à kɛ́ɛ, tsí ń tse ìɖìgbé-olè ŋa si.

18 Ńbɛ̀ɛ́, onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa, à gbɔ́ iŋɛ́ yèé ó tse nyɛ̀ŋɛ̀#ɛ́, tsí wà wo ká ɖɔ́gbɔ̃́-kã̀, tsí kpaá nóòkú. À wà sá fúu ni, iŋɛ́ yèé tse#ɛ́, ɛ̀kɔ́‐ɛ̀ yèé ó wà tse#ɛ́, ó wà dzɔdzú-èrò#ɛ́ tó bɛ́ɛ̀.

19 Kíbí alɛ́lɛ́ lɛ́#ɛ́, òŋu ɔmatsɛ́‐ɛ̀ ŋa fùɖá ńnɔ́-ìlú#ɛ́, tsí káà sũ̀ ńbòmírɛ̃̀.

À rí egi-òrì yèé Yèésù ré fúu#ɛ́

(Màtéwò 21:20-22)

20 Ńlɛ̀ má‐ɛ̀, náàwúrɔ̀, kíbí à sɛ̃̀ wáa làkóò#ɛ́, à rí egi yèé ó ré fú nɔná#á, tsí ó gbɛ̃ káà kpa nógùgù‐ɛ̀ ŋa kpó. 21 Ńbɛ̀ɛ́, Òkúta tédzú iŋɛ́ yèé tse wáa lɔ nɔná#á, tsí ó wà wí fú Yèésù ní: Akɔ́nɛ, ó ɖi, kó rí gé! Egi yèé ó ré fú#ɛ́, egi#ɛ́ gbɛ̃ kpó.

22 Tsí Yèésù wà wí fú ŋa ní: Ká karalé si ńǹtá-Ɔ̀ɖáyé! 23 Ó ɖi, ìɖéǹɖè, òŋu wà wí fú ŋa ní fee, bí ɔ̀nyà-kã̀ wí fú òkè yèé bɛ́ ní kó wú ǹɖe bɛ̀, tsí kó lɔ káà dzì náàhũ, tsí ó nɛ́ àkaralé ní afɔ̀ yèé ó fɔ̀#ɛ́ nákó tsɛ, tsí kò dzèrèbe ńnɔ́-ara‐ɛ̀#ɛ́, nákó tsɛ fúu bɛ́ɛ̀ ìɖéǹɖè. 24 Ńnɛ̀ ní òŋu wà wí fú ŋa ní, iŋɛ́ ɔ̀kã̀lɔ́ɔ̀kã̀ kpó yèé ò wà wúùre, tsí wà bere Ɔ̀ɖáyé#ɛ́, nɛ́ àkaralé ní ó ti tɔwɔ́-òŋu ná, tsí nákó fɛ́ɛ gbo ìɖéǹɖè. 25 Tsí bí ò ǹɖe, tsí wà wúùre#ɛ́, bí afɔ̀-kã̀ wà náàŋírĩ-ìwɔ ɔ̀nyà-kã̀, nà ń tɔrɛ fúu, àtóoríi Boba-ɛ̀ɛ yèé wà nɔ́ɔ̀rɔ̃#ɛ́, òŋu gbo kó mú íbàɖí tɛ̀ɛ ŋa gbo tɔrɛ fɛ́ɛ. [ 26 Ó ɖi, bí ò kò wa mú tɔrɛ fúnɛ#ɛ́, Boba-ɛ̀ɛ yèé wà nɔ́ɔ̀rɔ̃#ɛ́, òŋu gbo kàkó mú íbàɖí tɛ̀ɛ ŋa gbo tɔrɛ fɛ́ɛ.]

À bere Yèésù ní nɛ̀ɛ́ fúu ńkpá‐ɛ̀?

(Màtéwò 21:23-27, Lúkà 20:1-8)

27 Tsí à sɛ̃̀ wáa tó ńYèrúsàlɛ́mì ró. Tsí Yèésù wà lɔ ńlé-Ɔ̀ɖáyé, tsí wà bɔ̀, tsí onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa má nára-onùgbó-ìlú ŋa, à wáa báa. 28 Tsí à wà bèrèé ní: Ikpá mɛ̀ɛ́ wà fúu, tsí ó wà ń tse iŋɛ́ nyɛ̀ŋɛ̀ ŋa ná? Nɛ̀ɛ́ tútútú fúu ńkpá-ìrɔ́-bɛ́ɛ̀ ná?

29 Tsí Yèésù wà wí fú ŋa ní: Òŋu bàkó bèrè ŋá náfɔ̀ ɔ̀kã̀ntso bɛ́ gé, bí à dzɔ́ŋù‐ɛ̀ fú òŋu, òŋu gbo, òŋu nákó ɖíre ɛnɛ yèé fú òŋu ńkpá, tsí òŋu wà ń tse iŋɛ́ nyɛ̀ŋɛ̀ ŋa#á fú ŋa. 30 Nɛ̀ɛ́ bɛ Yòhánà† Awɛ̀fúnɛ wá ní kó wáa wɛ̀† fú ɔ̀nyà ŋa? Ɔ̀ɖáyé nàmí ɔ̀nyà ni? Ká fɔ̀ɔ́ káyí.

31 Tsí à nyí, tsí wà ɖìkpá fú ara-ŋa ní: Bí à náa fɔ̀ yèé fáà? Bí àŋa dzɛ́ fúu ní Ɔ̀ɖáyé ni, nákó bere àŋa ní, tsí kí tse tsí àŋa kò gba afɔ̀‐ɛ̀ gbɔ́? 32 Tsí báàyí fee, àŋa nákó nyáa fɔ̀ ní ɔ̀nyà ŋa ní bɛ̀ɛ́ wá#áà?

À wà sá fú èrò#ɛ́, iŋɛ́ yèé tse#ɛ́, ɔ̀nyà kpó wà fɔ̀ ní Yòhánà ni agbáfɔ̀-Ɔ̀ɖáyé fɔ̀† ìɖéǹɖè ni. 33 Ńbɛ̀ɛ́, à tédzú fɔ̀ fú Yèésù ní: Àŋa kò mà.

Tsí Yèésù ní: Ó sã̀! Ó ɖi, òŋu gbo, òŋu kàkó ɖíre ɛnɛ yèé fú òŋu ńkpá, tsí òŋu wà ń tse iŋɛ́ nyɛ̀ŋɛ̀ ŋa#á fú ŋa.