Saoole Iyyesusessiki Dhukkaysadhi
9
Xinkissana Saoole ihaqipa kolladhanpawhe Pogholhitoosi poghghenu isi nyarapa karo kʼeesito ghula kula ashshoy.
2 He Onke Pogholhitona ashsha tʼiirepa xiskema ihxafi payni qhamu ghappinipa shappopa karo katama Iyyerusaaleme kula dhanasunnuki mannadhdhessi ghissote koro Ayhutatte katama Temaaskʼonna kittatte qagha kula ashshenu kʼeesito ghulana taptaape kasqadhi.
3 Iʼashshapa katama Temaaskʼonna iʼtʼtʼuyunna uso kapaʼita hammakko moontonu tutuppe bhaqhi.
4 Xinkissana haattay piyyeemi rani,
ikkitto hasa iyyaasikka apaqhu:
“Saoole,
Saoole moʼo ayyela ghoghorti?”
5 Saoolekka ina payi:
“Pogholho!
Ata atho yaxa qhari?”
Usokka ina payina:
“Ano kulay hossi atho Ye ghoghorti Iyyesuse,
[qharo sipilhito aʼdhuukti payni ihhodhonna.]
6 Naqharray hantu haqpa katamissa kula xullamma olho akkontiisi haahakka aho qalliniye.”
7 Korossi na qale ashshakka qhawho ye qaghima ikkitto pattakki apaqhe maallay olho qallineesiki dhapeppa hela kʼapayoonkkippa shikkaronki.
8 Saoolekka xaytossi ranina ihaqipa emmadhunna xaytossi hiʼe ye alkasukka,
hussa maallay korossi na qale qaghakki na xarghghe ghapipa karo katamassi Temaaskʼo kula ashshottay;
9 kuyyaqakko izzxa saasa taafakko kodhdhu,
yiitopa qandheesikka ye lokodhdhunna hasa gheyyoy.
10 Kolladhampakko tookko ho ana payi Hananiya katama Temaaskʼonna qagha,
Pogholhokka raeetakki:
“Hananiya!”
na payipa ooqu.
Usokka ina payina:
“Pogholo haayyu,
hasakki an qaghi.”
11 Pogholhokka hasi na payi:
“Haqpa onkisay ana pay te Gheteattay karo qhawho ana payi Yihutana manne kula ashshoy,
hahakka qhawho ana payi Saoole ho katama T’ersesena;
uso hantu ghissotati qaghiye gheeqay.
12 Hussa mallay qhawho ana payi Hananiya qhamu xayto uso qaghi kula okaynipa xarghghe huusuusi na sappa ghapadhuppa ehxhxe huusukka nu qhashusa innu armadhi.”
13 Hananiyakka ihholi hasa na payu:
“Pogholho hayyu,
qhawhu kulay k’ulk’ullawhe Haahusi katama Iyyerusaalemenna qaakasa qhamu maghno dhamma haqisisa koro kishana an apaqhi.
14 Hassa kulakka olhunnu okaayi hessi makaxko Haahu ooqa piyyina qaghaasi shappenukki intawampawhe kʼesadheetena humna rafisatte akkadhi.”
15 Naqharray Pogholho Hananiyana hasina payi:
“Nakula ashshama Uso koro ye koro Ayhutatte kodhdhuppa nikkuusaadhepa waarsho Israʼeelatte kaasanna minttatte ho makaxko hayu arasna mahxatho qhollamiye,
16 Ano qhoota makaxko hayu mallay qhamu rakko mala ghaqiti akkadhe uso gheeqastisi anu hiʼasnaye.”
17 Hussa maallay Hananiyakka ina kula ashshipa mannesi uso na qaghi kaleema xullu,
xarghosikka nasapeema ghapadhuppa “Qhawho hayyu Saoole!
Ahassa kula okaayanna olisa onkate ho armadhi Pogholho Iyyesuse,
holuppa qhama xayto hiʼe alkastipa Nasso Kʼulkʼullotakka hoqhanukki hokula ye eraki.”
18 Hattay olho qhoqhe liqaki ehxhxe Saoolena hayyipa xayto hiʼe alkasu;
haqppa shoxatte shoxadhu.
19 Yiitokka yiʼoppa dhikitu,
kolladhampawhessi katama Temaaskʼonna qagha kapeema kuyyaqqe takkassa oladhu.
Saoole Qhoota Iyyesuseki Katama Temaaskʼonna Kollisi
20 Hattay Iyyesuse qhamu Miʼaye Hallikkito kodhdhisa manne ghissote koro Ayhutatena koronu torruye paayyu.
21 Koro usoosi apaqhi kaasay idhdhhxhxipa hasa payu:
“Qhawhu hossi katama Iyyerusaalemenna koro makaxko Iyyesusessi ooqa kaasaasi patisa qandhi?
Holuppa hassa kula olhunnu okayikka usundheesi shappepa intawampawhe kʼesadheete kula dhaanenu qaandhi?”
22 Saoole kapay uumi kokkisadhipa Iyyesuse qhamu Kristoose kodhdhisa torruyettay korossi Ayhutatte katama Temaaskʼonna qaakkanna tupe dhappisu.
23 Kuyyaqqe kisha tupettay korossi Ayhutatte Saoolesi poghenuki suladhe.
24 Saoole kapay sulo huusundhiisi ina upadhi;
usundhekka uso poghenukki onkesi ina lighghayisa awnepa kuyyaqate tiqadhe.
25 Kolladhampawhe huusu kapay Saʼoolesi awne koochcho kitteemi qadhdheppa bhaaqhe ohintatettay lihasonkippa piyyeema odhdhasonkki.
Saʼoole Katama Iyyerusaalemenna
26 Saʼoole karo katama Iyyerusaaleme kula iʼokayina kolladhampawhe qalli kodhdhe woʼi,
naqharray usundhe kolladhampakko qhamu kodhdhisa ye dhukkaysadhonki maallay toʼotteemi uso ghaape.
27 Ikkodhitama kapay Parnapaase Saʼoolesi erkampawhe kulakki okayittay,
Saʼoole iʼonkaaʼita ashshankito qaghana qhamu malaala Pogholhossi hiʼipa Pogholho nu qaladhu pana katama Temaaskʼonnakka makaxko Pogholhitoosi shahxuntettay koro kollisusa inu torruyi.
28 Xaysannu koru Saoole usundhe qalli kodhdhipa katama Iyyerusaalemenna kittatte isi lalaaghamapa shahxuntettay makaxko Pogholhitoosi koronu isi torruya.
29 Korossi Ayhutatte piyye Krikatenu okkayi qalekka isi qaladhapa isi ille tamaakadha,
usundhe kapay poghenuki nu gharsadhe.
30 Koro dhukkaysadha iʼolissa apaqhina katama Kʼisariya kulakki ashshettay,
hahanukka karo katama T’ersese kula erakonkki.
31 Xinkissana toʼokunko koro dhukkaysadhana piyye Yihutapa piyye Kalila pana piyye Semmariyanna qaaka kaasay nakayhottakki qaake paayyeppa dhikitonki,
Haallikkoosi isi ghaapapa Nasso Kʼulkʼullotakka isi dhikitapa dhihakko huusundhdhikka isinna padhaawama.
Petʼiroose Katama Littapa Iyyoppena
32 Petʼiroosekka piyye toottenu tootte kula iʼaʼashshana kuyyaqakko tookko karo kʼulkʼullaawhe katama Littana qaakka kulakki ashshi.
33 Piyyisanakka qhawho tonnakko ho Eeniya ana payi ho perko setten udhamapa isi hooratte rafasa hxafoy.
34 Petʼiroosekka ina payina:
“Isha Eeniya,
Iyyesus Kristoose iho dhinisnaye haqapa qillo haahu qhattʼay!”
Usokka hattakki haqi.
35 Korossi katama Littappa katama Saaronena qaakka kaasay iʼuso hiʼipa Pogholho kula holu.
36 Katama Iyyopemenna kolladhampatte tana Tʼapita payi qagha,
makkaxkusasi pako Krikatettay aʼishigha payni Torkʼa payyo;
isekka te kuyyaqqe kaasay kodhmo xeesa kodhappa te tekolawhe kʼarkʼarettay arama.
37 Kuyyaqisana kittatte iʼudhamtipa fari.
Korokka pukkaqoosi ishshoxi tupettay mannessi mannete saappeete qagha kaleema rafisu.
38 Katama Littay katama Iyyopʼemenna kaanta qhooti iitʼi maallay kollahdhampawhesi katama Iyyopʼeemnna qagha Petʼiroose qhamu katama Littanna qaghisa iʼapaqhena qhawho lakki inna kula erakepa hasa na payonkippa watadhonki:
“Akko maʼala taahu,
waadhpa ine dhaghapay.”
39 Petʼiroosekka ihhaqipa na qale ashshoy;
ihhaaha hxafina mannessi pukkaqo na kalla qaghi kulakki xulleese,
xiske tʼiire na farriti,
kaasay laalladhessi qharro Torkʼa iʼusundhe qale qaghana urkuytiisiki sixeppa uso qhorronkippa isina miinta ooya.
40 Petʼiroose kapay koro kaasaasi ghinte kulakki lihasipa ghulladhuppa ghissadhu,
pukaqo kulakka laghghamuppa hasa na payu:
“Tʼapita,
haq!”
Isekka ehxhxi pulti,
Ippetʼiroose emmitina ihaqatipa qakkadhdhi.
41 Usokka ishshokkipa xarghottay ghapuppa ise haqisu;
xiskesi tʼiire na farritipa kʼulkʼullawhe tookkesikka iʼooqipa shettesiisi te qaghaasi miinte tuusunndhisa itʼtʼoosu.
42 Olissakka katama Iyyoppe kaasakki aramipa koro kishakka Pogholhossi dhukkaysadhu.
43 Petʼiroosekka kuyyaqqe kishaki katama Iyyoppenna qhawho qullidhe hxasha ho Simioonenna manneeti kuyaqqe kisha qaaki.