Saoole Koro Toʼokunkottay Dhukkaysadhaasi Qhamu Ghoghori
8
Xinkissana toʼokunko koro dhukkaysadha katama Iyyerusaalemenna qaghasa ghoghorame dhammakki na haqi,
erkampawhe malettay koro kaasay waradhadhessi piyye Yihutapa piyye Semmariyanna qagha kulakki illena kalla pullami.
2 Koro Haallikko ghaapakka Istʼifanoosesi immaayipa uuma oyooy.
3 Saoole kaapay toʼokunko koro dhukkaysadhana patisenuki shapadhipa haqu,
manne tookkenu manne tookke kula isi aʼashshapa kristanaadhdhe tʼiirepa xiskkesi isi ghappapa isi illemate holasapa isi shappasha.
4 Hesi dhukkaysadha xayta xayta pullamekka xaytu ashshe kaasakki kʼaale Hallikkitoosi koro kollise.
5 Filpʼoosekka karo piyye Semmariya kulakki ashshipa qhoota Kristoosesi koronu torruyu.
6 Waarsho kishakka qalliitesi Filpʼooseesi iʼapaqhipa dhahxhxootaadhe kodhdhamadhaasi hiʼunna saqakko toʼokotakki kodhdhipa isi apaqhasa.
7 Nassidhdhe lokmadhekka ikkitto dhammattay riireppa isi koritto lighanki,
tonnawhepa he xokkolakka he kishaki dhinni.
8 Hussa maallay katamisana hxaso dhaqqamma kodhdhamadhi.
Soakkossi Simioone Anapayi
9 Naqharray xaysa qharaʼita piyyisana qhawho tookko ho ana payi Simioone soakko qagha,
usokka sokko huusutakki waarsho Semmariyaasi dhahxhxisipa isi qaaka,
usokka:
“Ano qhawho dhamma” ippayipa isi hedhiha.
10 He takkummapa he kaanoma kaasay:
“Qhawhu ‹hummnasi dhamma› hupaayyamipa isi arama ‹humna waakito› haxa uso!”
kipayeppa isi toomoma uso apaqhasa.
11 Olhunu tomooma uso apaqhasekka perre kisha sokkottay qhooti usundhe dhahxhxisi maallay.
12 Naqharray Filpʼoose qhoota Ahxase Hallikkitopa makkaxko Iyyesus Kristoose ote tuusu xeesaasi nu torruyipa dhukkaysadhonki maallay tʼiirepa xiskekka shoxatti shoxadhe.
13 Simoonekka idhukkaysadhipa shoxattekka shoxadhupa Filpʼoose qale kodhdhu,
milikkitaadhepa dhahxhxootadhe kaanooma kodhdhamadhaasi hiʼe huusuttay dhahxhxu.
14 Erkampawhe katama Iyyerusaalemenna qagha koro piyye Semmariyanna qhamu kʼaale Hallikkitoosi dhukkaysadhesa iʼapaqhena Petʼiroosepa Yohannisesikki nu erake.
15 Petʼiroosepa Yohannisesikka ippiyye Semmariyana hxafenna qhamu Nasso Kʼulkʼullo akkanenukki nu ghissadhe.
16 Moʼo maalla payni xayna qharaʼita makaxko Pogholho Iyyesusettaakki shoxatte shoxadhe dhiishay usundhena kittatte qhawho toʼokoomakkaki Nasso Kʼulkʼullo ye oodhdhu.
17 Hussa maallay Petʼiroosepa Yohannise korossi saapeematti xarghghe huusundhi ghapadhena usundhekka Nasso Kʼulkʼullosiki akkadhe.
18 Erkampawhe xarghghe huusundhiisi ina ghapadhena korossi Nasso Kʼulkʼullosi qhamu akkadhisa Simoone ihiʼina kodhattettaakki okayipa hasa payu:
19 “Anokka qhawho ana saappa xarghghe ghapadhi kaasay qhamu Nasso Kʼulkʼullo akkaninu yeesikka humnisaasi ye tteexa.”
20 Petʼiroose kapay hasi na payi:
“Teexakko Hallikkitoosi tayadhenu qhoota kodhattettay pitamenu dhihatti maallay kodhatte taahu illa pata!
21 Saqako haahu Hallikkito miinatte qhooti pare ye kodhdhu maallay atho olina ine qale qhotadhe atu na sheeghtikka.
22 Lammi maghnu haahuna kalla Haallikko kula hol,
yaxaray maghnusa saqakko haahuna iho hxurramnaye,
Haallikkoosi ghisadhay.
23 Ato qhama dharraʼo raqattay hoqhqhitipa qhawho cʼuppottay shapami kodhsa anho eema.”
24 Simiooneka ina payna:
“Oli aʼqallitena toʼokkokka qhamu ye ye kohxninu hune pukkaqate tahundhina Pogholhossi ye ghissadha.”
25 Petʼiroosepa Yohannise immasakkarepa K’aalessi Pogholhitokka torruyonki tupettay ghodhadhe Semmariyana kitaʼita ote xeesasi isi torruyapa karo katama Iyyerusaaleme kula holonki.
Filpʼoosepa Qhawho Piyye Ityopiyanna
26 Erkkampatte Pogholhitokka Filpʼoosena ina payti:
“Haqpa onke mandhito te katama Iyyerusaalemenu karo piyye Kaaza kula ashshana hakatakko ashshoy.”
27 Usokka ihaqipa ashshoy.
Haytusanakka qhawho toʼon ho pogholte piyye Ityopiyana te ana payi Hintiknu kodhadhappa kodhatte tiisi kaasanna rafisampakko kodhdhu qhawho kundheema hxafoy.
Qhawhusakka Haallikkonu sakatenukki katama Iyyerusaaleme kula okayi.
28 Uso ippiyye tuusu kula holana karreete kanke sitti saappeemi qakkadhipa isi Matʼaafa Hxumampakko Issayaasesi napapa.
29 Nasso Kʼulkʼullokka Filpoosena ina payina:
“Ashshapa karreetisa kapa itʼuyay.”
30 Filpʼoosekka minakkalti waadhipa karretessi kula itʼtʼuyu.
Qhawhosi piyye Ityopiyana Matʼaafasi Hxumampako Isaayyaasesi inapapanakki apaqhipa na payu:
“Olissa an napapti ihhoxula?”
31 Qhawhossikka ina payi:
“Qhawho yeesi ishighna ye qaghina mallala iye xulle alkasni?”
Holuppa qhamu karreete sapeema hadhdhinippa na qale ashonukka Filpʼoosesi waatadhu.
32 Qhawhusakka Matʼaafa Kʼulkʼullito kittatte xaytu na napapi husi:
“Uso Orposi asaqhenu dhaani kulaki asiti,
Okitakkosi qeemtate koro na ufurkko qhitʼanu kʼanpayi kula
pako ye pulukka.
33 Uso qhooti he takkoosi maallay,
qhaqhitte xeesa ye tayadhu,
qagho huusu piyyate apatiisi;
Qhoota dhalata huusuusi yaxa torruye alkasnaa?”
34 Qhawho kundhesikka Filpoosena ina payina:
“Hxumampaku ata qhoota haxasiki torruyi?
Ata qhoota huusum qhoota qhawho pilakkito,
maʼala taahu into ye qalli.”
35 Filpoosekka Matʼaafisanukki payyipa qhoota Iyyesusessi ote xeesa nu torruyu.
36 Iʼonkatte ashankina qandheemi hxafe,
qhawho kundhesika ina payina:
“Haadhi qandhe hassa qaghana,
moʼo yela shoxatte shoxadhe dhawrasna?”
37 [Filpoosekka ina payi:
“Saqako haahu kaasatakki adhukkaysati payni shoxate shoxadhe aʼalkasnay” Qhawho kundhesikka ina payina:
“Iyyesus Kristoose qhamu Miʼaye Hallikkito kodhdhisa an dhukkaysadha.”]
38 Qhawho kundhesikka karretesisi iʼshshikkarashipa,
lakkintoy qandhe kula odhonkippa Filpʼoose usoosi shoxatte shoxu.
39 Qandheete kittatte illighe tupettay Nasso Pogholhito Filpoosesi ina kanta simidhi,
qhawho kundhesikka lankka Filpʼoosesi ye hiʼukka,
ikkodhdhitama kapay ini hxasoodhanakki ashshanko huusu tiyyisi.
40 Filʼoose kapay piyye Asatʼonenakki taayyami,
haki piyye Kʼisariyanna hxafni saasa katamaadhe ina lighi kaasakka ote xeesa torruyu.