Qallite Istʼifanoose
7
Kʼeesito kʼesadheete ghula Istʼifanoosena ina payina:
“Kissi ahooma itʼtʼoosi dhuke?”
2 Usokka ina payina:
“Qharumaadhdhe takkinti qassawhepa appaadhdhe haayyu,
into ye apaqhasindha!
Paapo haani Aprihaame hannay piyye Karaane kula ye okayunna qharaʼita ippiyye Mespetʼomiyanna ghayyana Hallikko kanastetakkie usoosi armadhipa na payu
3 ‹Piyyepa dhalito haahuna kittatte reehammipa piyye Ano hohiʼaasi kula ashshoya.›
4 Usokka piyye Keletawattena kittatte illighipa piyye Karaane kula okayuppa haama qakkadhu,
holuppa paappo huusu iffari tupettay piyyisa hantu hune na qaghte kula okaasu.
5 Ikkodhdhitama kapay piyyisana pasho tarro tookko kulaghaqitikkaki ye sheeghi,
naqharray xinkisana miʼaye ye sheeghina usopa sanynye Uso kaleema okaynanu piyyisaasi qhamunu teexninu katape innu xuli.
6 Holuppa Haallikko hasi na pay:
‹Sanynye taahu piyye koronna okaayo ikkodhdhintipa qaakkoy,
perkko dhippa salax ayllunkottay aʼusundhe pirtawsadhu.
7 Naqharray warshusa aylunkottay usundhe rafisaasa qhaqhitte anna qhaqhni,
xaysa tupettay piyyisanna illighnapa xaysa ye sakathonki›
8 Katape karrazateb inuteexi,
hussa maallay Aprehaame Yisaak’eesiki dhalipa kuyyaqako settinttonna karrazu,
Yisaakʼekka Yaykʼoopesikki dhali,
Yaykʼoopekka apadhesi kafko hudhdhanpa lakkinaki dhali.
9 “Dhelle Yaykʼoopekka qaso huusundhi Yooseffeemi yokkuntettayttay haqeppa piyye Kiptʼattesa aylukonu lasonkki,
naqharray Haallikko qhooti uso qale qaghi maallay,
10 rakko qagha kaasanna iʼuso lihasipa nukusasi piyye Kiptʼatte Fereoone miinteemakka kaanastepa arnane nu tteexuppa piyye Kiptʼattepa manne huusu kaasassa uso xawwadhu.
11 Xinkissana piyye Kiptʼattepa piyye Keneane kaasassa laaqe rakko dhamma kora okaastiki lighi,
appaadhdhe haanikka olho yiine dhaponki.
12 Yaykʼoopekka piyye Kiptʼattena maangho qhamu qaghi apaqhipa payootema appaadhdhe haanisi hakula eraku.
13 Lankka iholleppa piyye Kiptʼatte kula ashshonkina Yooseffe qharumadhe huusunu ihe arasi,
Fereoonekka ahxke huusuusi kolladhu.
14 Xaysa tupettay Yooseffe Paappo huusu Ya’ikʼoopepa ahxke huusu kaasaasi he kula ooqu,
usundhekka qhawho hudhanko taxxanpa hxupin.
15 Hussa maallay Ya’ikʼoope piyye Kiptʼatte kulakki oodhi,
usopa appaadhe haanikka haama farronki.
16 Meqhqhe huusundhdhikka piyye Sekeeme kula adhooqhoppa hawlessi Aprehaame piyye Sekemesa dhelle Emorena kodhattettay pitamisa amaayoy.
17 “Kipposi Haallikko Aprihaamenu xulina dhikkate qhooti itʼtʼuyti maallay dhihakko waarshossi haani piyye Kiptʼattena qaghana uumi padhawamipa isi naqa.
18 Xaysa tupettay nukusa pile ho Yoosefeesi ye arikki piyye Kiptʼattesa poghlumi.
19 Pogholhusakka waarsho haanisa maghnottakki na haqipa appaadhe haanisi pirtawsadhe paayyu,
miʼaadhe haanna dhaladhekka qhamu ghintekkata ayaknipa farronkinu usundhe kittessu.
20 “Xinkisanaki Muuse dhaladhi,
usokka miinte Hallikkitona miʼaye mala xeesa,
manne paappo huususa leeqo izzex ghohu.
21 Xinkesi ahela kʼurina shette Fereoone iʼakkitipa miʼaye hiisi kodhdhippa ghohadhi.
22 Muusekka arnane koro piyye Kiptʼattena kaasakki kolladhi,
qalliitepa kodhmottakka ho dhikita kodhdhu.
23 “Muuse ipperko hudhanko salax hxafasina dhellesi Israʼeelatte dhalitto huusu kodhdheesi eemmenukki dhihadhi.
24 Usokka qhawho tookko Kiptʼawito idhalitto huusuna kittatte qhawho tokkoosi susughurapa isi tubhbhanakki hiʼipa nu lighadhu,
haalo na akkenukka qhawho Kiptʼawittosiisi shoqhuppa poghu.
25 Haallikko qhamu xargho huusuttay aylunkkito usundhe lihasnisa koro huusu hoara innu lighi,
naqharray usundheesi yenu xulu.
26 “Kuyyaqakko lankkanna sinkkatho dhelle Isiraeelattena kittatte qhawho lakki he ille paaxakki hiʼipa usundhe ararsenu hasa na payu:
‹Ata korunkka,
hune qharunkopa qasona moonukka ille paaxtte?›
27 Qhawhosi dhalitto huusuusi tupbha Muuseesi issughuripa hasa na payu:
‹Yaxa rafisamppakkopa qhawho qhaqhite qhaqhana ho kodhi?
28 Kati qhamosi keeray aʼqhqhawho piyye Kiptʼattena poghti kulakki ayye poghe wootti?›
29 Muuse iʼolissaasi apaqhi tupettay piyye Mitiyaame kulakki ghoradhipa okaayo kodhdhuppa isi haaha qaakka;
piyyisasa shambho lakki dhalu.
30 “Perkko hudhankko salax tupettay piyye mandhitona ghupo Sinana kantta erkampatte Haallikkito hatte sipinattay miiseete kittatte nu armadhi.
31 Muusekka olissa ihhiʼittay idhdhahxhxi,
ubhadhenukka na kapa xighunna ikkitto Pogholhito ho iyyana:
32 ‹Ano Haallkko appaadhdhe haahuna,
Haallikko Aprihaameppa ho Yisihaakʼe pana ho Yayk’oope› payasiki apaqhi.
Muuseka immurukipa xotoladhu,
eemenuka ye shaxumu.
33 Pogholhokka hasi na payi:
‹Xaytusa an ashikkaarti ho kʼulkʼullawwi maallay hxope haahuusi hela shagha,
34 qootʼo waarsho haayyu piyye Kiptʼattena qaakkana qhamu haxisa dhukeema an hiʼi,
riire qootʼo huusundhinakka an apaqhi,
hussa maallay usundhe pinnisenu oodhdha.
Hantu lammi wadhdhima karo piyye Kiptʼatte kulakki anho erakniye.›
35 “Muusessi waarsho Isiraelate na payi:
‹Qhama ine rafistipa qhaqhitte ina qhaqhanu yaxa ho xawwadhi?›
pa dhafonki,
Haallikko erkampattessi hatte miiseete kittatte sipina nu armatittay rafisanpakkopa ho aylunkito usundhe lihasna ikkodhipa usundhe kula erakku.
36 Hossi piyye Kiptʼattepa paso Idhdhanapa piyye mandhitona perko hudhankko salax dhahxhxootaadhepa milikitaadhe kodhettay waarshossi lihasipa nu intawu Muusisa uso.
37 ‹Haallikko haahundhi qhamu yeesi haqisi kula koro hahundhina kittatte hxumampakkosi ihune haqisnac› hossi payipa Israeelenu qallu Muusisa uso.
38 Usokka erkkampattessi ghupo Sinaana saappeete qallatipa appaadhdhe haani illakki waarshossi mandhomatte illaholi qali qaghi,
kʼaalessi Hallikkito qaghitoosi ho ine akki uso.
39 “Appaadhe haani kapay iʼuso iisheppa ye eeʼe payoonki maallay saqqe huusundhitakka karo Giptʼati hole.
40 Aroonenakka inna payenna:
‹Muuseesi piyye Kiptʼattena kittatte ine lihasi olho tayi ini arrikka,
hussa maallay waakidhdhe miinte taani qharaʼita ashshinaasi ine kodhdhi.›
41 Xinkissana olho laqhitakko lighaasikki killankonu kodhdheppa teexakkoosi nu itʼoosonkki;
kodhmo xarghghe huusundhitakka hxaasodhonki. d
42 Haallikko kapay iʼusundhe hxuri,
xuske moontitonu qhamu sakkatnenu likkasuppa teexu,
hussakka mat’aafa hxumampakkitosa qhamu hasa paayyamtipa tooxamo kula:
‹Hune koro Israʼeelatte!
Intaa xinkesi aperko hudhanko salax kaasay
appiyye mandhitona qakkankuna qholeesi assaqhitena
teexakko haahundhiisi Ayye itʼtʼooste?
43 Waakidhesi nu sakkatenu akkodhdhite usundhekka xayto Molokin naqaakipa
hossi ana pay Refan xuskitte ligha waakko hahudhisikka kaanaste,
hussa maallay anokka piyye Papiloone korakki anhune ghorri.› e
44 “Appadhdhe haani mandhito kittatte tunkaana misikiratte ishsheeghe,
tunkaanisakkaf qhamossi Haallikko Muusenu hiʼaasipa na payu kulakki aghupadhi.
45 Appadhe haanikka tunkaanaasi iʼakkadhe tupettay Haallikko koro Ayhutatte ye kodhdhu usundhena miinatte ighghoripa piyye tuusundhisi tayonki;
Iyyaasu illay piyyisa kula xullonkittay haka perre Tawwite saasa naqali ghayyi.
46 Dhaawite Hallikkito miinatte kaanaste tayadhipa manne Haallikko Yaykʼoope na qaakniisi ghupadhenu ghissadhu.
47 Emma naqharray ho Haallikkonu Manne ghupadhi Selemoone.
48 “Ikkodhdhitama kapay Haallikko Olho Kaasa Alkasa Manne he xarghe qhawhitottay ghuptamena kalla y eqaakika,
qhamosi hxumampakko hasa payipa tooxo kula:
49 ‹Moonto qakkate tayyu
piyye oghghadhe lughghe hayuna,
emma laadhdhi manne mala lighasiki ayeesi ghupadhinte?
kippayi Haallikko.
Xayto mala ligha saama an hxaysani?
50 Hussa kaasaasi Ano qaandhiki xarghghe Hayyuttay kodhdhi?›g
51 “Hune he lulte!
Saqqe hahundhikka hunena kʼupamonki qhaame hahundhikka isi ye apaqhe!
Hunekka qhamosi appaadhdhe haahundhi kulakki Anasso Kʼulkʼulloosi kuyyaqakko kaasay toorte.
52 Appaadhdhe haahundhi hxumampawhatte kittatte yaxasikki ye ghoghoronki?
Usundhisa hossi Pare Qaghana hessi okaaye tuusuusi torruyeesi kaki paaxe,
hunekka hantu hosi pare Qaghaasi allikkasteppa teexankuppa poghanku.
53 Hune erkampatadhdhe kaakkorukki Ahikke akkatte,
naqharray huni tiqitadhonku.”
Hattapame Ist’ifanoose
54 Korossi qhaqhitte qhaqha iʼolissaasi apaqhina immiroodhipa Istʼifanoose kapeema miirattay isi ilghe illa qhuma.
55 Naqharray Uso Nasso Kʼulkʼullottakki hoqhqhipa moonta qila pareema emmadhunna kaanaste Hallikkitopa Iyyesuse ho Hallikkito miskitto kaaqila shikkaarasiki hiʼipa
56 hasa payu:
“Haadhi,
moonto qhashamipa Miʼaye Qhawhitokka Hallikkito miskkitto kaaqila isi shikkarana hiʼa.”
57 Xinkisana ikkitto dhaqqamatakki kʼiiqeppa qhaame hela qhadhdhumonkippa toʼoteema uso kula keʼamonki.
58 Katamana seeto koray lihasonkippa awrughettay hattape payyonkki,
koro olissa kaasay ikodhdhamadhana ehxhxeta hiʼakka lalladhe huusundhiisi qhawho an payina Saoolena lughghe kaleematte xawwadhe.
59 Istʼifanoosesi awrughettay auso hattapana hasi payipa ooqamu:
“Pogholho hayyu,
Iyyesuse!
Haadhi napse tayyusi yela akki!”
60 Ghulladhuppa ikkitto dhammattay hasa payuppa kʼiiqu:
“Pogholho haayyu,
c’uppuusi usundheema olo dhihi!”
Ihhasa pay tupettay iffari.
Saoole Istʼefanosessi apoghana usokka ina qale ghari.