Qholame Kodhampawhe Taxxana
6
Kuyyaqqe qhacʼa tupettay dhihakko kolladhampawhatte ippadhawamapa isnaqana korossi Ayhutatte pako Krikate qalladha koro piyye Ayhutattena dhaladhisa ina qhurumrume,
olhuna maallay qhurumrumekka:
yiʼosi kuyyakooma akkoronu qhootina kittatte xiskke Krikatte tʼiire na farritinu qhooti ye miinakalte teexe maallay.
2 Hussa maallay erkampawhessi hudhdhanpa lakki kolladhampawhessiki illeema holaseppa hasa na payonki:
“Yiito qhoote maallay kʼaale Hallikkito kollise hxure ye ine gheeqasti.
3 Lammi koro haani,
hunena kittatte koro kʼalpe xeesa sheeghapa Nasso Kʼulkʼullopa arnane na hoqhqhonki qhawho taxxan qholama kodhmusaama an usundhe xawwanaaniye.
4 Ine kapay ghissootepa kʼaale Hallikkito kollisettakki an kokisanneye.”
5 Qallitisakka koro kaasannakki gharti,
na kaleema korossiisi qholonki,
usundhisaka:
qhawho dhukkaysadhepa Nasso Kʼulkʼullo na hoghqhi Istʼifanoosepa Filpoosepa Pirokorosepa Nikʼaronapa Tʼimonapa Parmena pana qhawhossi dhukkaysadhe Ayhutatte dhukkaysadhi qhawho katama Antʼokiyanna Nikʼolawoose.
6 Usundhisasikka erkampawhe miinteema shikkarashonki,
nughissadhonkippa xarghghe huusundhiisikka usundhe sappeema ghapadhonki.
7 Onke hasa lighattay Kʼaale Hallikkito qhooti ghandhaqatipa isi ashsha maallay katama Iyyerusaalemenna dhihakko kolladhampawhatte uumi padhawamipa naqu,
kʼeesadheete kittattekka koro kisha dhukkaysadhi.
Ghapame Istʼifanoose
8 Istʼifanoosekka teexakko Hallikkitopa irretetakki hoqhqhipa dhahxhxootaadhepa milikitadhdhe kaanomaasi isi waarsho kittaʼita kodha.
9 Xinkissana manne ghissoote koro Ayhutatte ana payi Koro-Aylunkito-Hasa-Lighena kittate koro tookko tookko:
ho piyye Kʼerenapa ho piyye Iskindhiryapa ho piyye Kilikʼiya pana ho piyye Isiyanna Istʼifanooseemi torrakko haqisipa isi tamakkadha.
10 Ikkodhdhitama kapay qallite Istʼifanoose arnanepa Nassottay qalladhiisi pute ye alkasonki.
11 Xinkissana koro payna “Qhawhu kulay Muusepa Haallikko idhdhaghisana an apaqhniisiki” bhadhamtettay gharise.
12 Onke hasa lighattay waarshopa xaadhighghe piyyate pana kollisampawhe hikkate kaasakki usooma nyarisepa Istʼifanoosesi ghapasonkippa Korossi-Qhaqhitte-Qhaqha miinteema itʼoosonki.
13 Koro usooma ayyaadhe masakkarasikka okasonki,
usundhekka hasi payeppa msakkaronki:
“Qhawhu xaytossi kʼulkʼullawi Hikkateesi dhaghghise ye hxurukka.
14 Holuppa ‹Iyyesusi Naazrate xaytuusi qhamu patisnipa Hikkesi Muuse ine kollisiisikka oohusa› iqallanaki an apaqhini.”
15 Xinkissana korossi qhaqhitte qhaqha xaytusana qagha kaasay Istʼifanoose kulakki laaghameppa isi eemana miinte tuusu qhamo miinte erkampattatte kulakki na kkodhdhitipa hiʼonki.