Hananiyapa Sappira
5
Qhawho tookko hanapay Hananiya naxaye tuusu Sappira illay pasho lasi,
2 naxaye tuusuka inni arana kodhattesi pashitona na haqhsadhuppa te haqhtiisi ashshotappa erkampawheema teexu.
3 Petʼiroose kapay hasi payipa kasqadhu:
“Ato Hananiya,
qhama Nasso Kʼulkʼullooma ayya qalladhintipa kodhattesi pashitona qhootannu Seetʼana moonukki saqako haahu kitta xulli?
4 Atu lasunna qharaʼita pashussa haahu qandhi?
Holuppa allasti tupetakka kodhatisay taahu qandhi?
Emma momaalakka olissaasi saqakko haahuna dhihatti?
Haallikkoosikka tatakti dhiishay qhawhoosi qandhikka.”
5 Hananiyaka kʼaalisaasi apaqhnittay irranipa faru,
koro olissaasi apaqhi kaasay ighghaapi.
6 Ponkorekka ihaqepa pukaqosiisi qhattʼonki,
dhoqhonkippa maayonki.
7 Saate izzex tupettay naxaye tuusu olho tʼirakko hiisisa kodhdhamadhiisi ye arunakki okayti xulli.
8 Petʼiroosekka ina payina:
“Into ye qalli!
Kodhatesi anna pasho laste tiisi?”
Isekka ina payti:
“Ee,
tisaasa lasni.”
9 Xinkissana Petʼiroose ina payi:
“Qhama Nasso Pogholhito temmiintenu mala hasa illa xulte?
Haadhi,
koro tʼirakko haahi maayi ghintati qaghi,
heesikka ihhe akkinapa he maayoonki”
10 Iseka hattakki lughghe kaalla na rantipa fari,
ponkorekka iʼokayena iffarti,
dhooqhonkippa ashshonki tʼiirakkosi hiisi kapeema maayonki.
11 Toʼokunko koro dhukkaysadhanapa koro olissa apaqhi kaasay uumi ghaapi.
Erkampawhe Milikitaadhdhepa Dhahxhxotaadhdhe Kodhi
12 Erkampawhekka milikitaadhdhepa dhahxhxootaadhdhe kishaki waarsho kitaʼita kodhe;
usundhe kaasakka saqakko toʼokottay kodhdhonkippa xaytossi ana kaasito Selemone payisa isi illa hollayyankki.
13 Koro usundhe qale lahxamenu shahxumi ye qaghikka,
ikkodhdhitama kapay koro kaasakki usundhe kaanasa.
14 Tʼiir pa xiske Pogholho dhukkaysadhakka he kishakki kuyyaqako kuyyaqakooma na padhawama.
15 Hussa maallay korokka he udhdhamaasi onkadhdheemi lihhaseppa hooradhepa tʼarfadhe saappeema rafisonkki,
olhu namaallay ihhasa kodhekka Petʼiroose ina kaaʼita lighghana kasse tuusu tookke tookkesi qhamu kohxintinu.
16 Korossi ghodhadhe katama Iyyerusaalemenna kaaʼita qaaka koro udhdhamapa koro nassidhdhe maghattay qootʼoodhattay okayikka uumi naqi,
hessi aʼokaasi kaasakka isi dhina.
Ghorame Erkampawhatte
17 Hussana payyatti kʼeesito ghulapa korossi Setukʼawate uso qale qagha kaasay yokuntakki hoqhqheppa,
18 erkampawheesikka ghapponkippa manne shappeetesa xullesonkti.
19 Ikkodhdhitama kapay erkampatte Pogholhito awne okayipa mankaxxe manne shappeetena qhaashippa usundhei lihasippa
20 hasa na payi:
“Ashshindhapa ghinte Manne Kʼulkʼullawhattesa shikkarankuppa kʼaalli qaghito kaasaasi koronu torruyanku!”
21 Erkampawhe hayosiisi iʼakkadheppa sinkatho awnettay karo Manne Kʼulkʼullawhe kula ashshonkippa koroosi kollise payyonkki.
Xinkissana kʼeesitossi ghulapa korossi uso qale qagha iʼokayipa koro Ayhutatte qhaqhitte qhaqhapa xaadhighe Israʼeelatte kaasaasi illa holasonkippa erkampawhe okasenu manne shappeete kula koro erakkonkki.
22 Hessi aʼerakikka karo manne shappeete kulaki ashsheppa erkampawhesiisi dhaponkippa holonkippa hasa na payonkki:
23 “Mankaxxe manne shappeetena toomomatekki akʼullufipa he manne tiqadhakka he mankaxxeete shikkaarasa hxafooni,
naqharray mankaxxe an qhashnina qhawho toʼokkokka mannete kaalla ini tayooni.”
24 Intawampako Manne K’ulk’ullawhatte tiqitateesapa waanadhe kʼesadheetekka iʼolissa apaqhenna idhdhahxhxeppa isi hasa kodhdha:
“Ata oli moʼu kodhdhinti?”
25 Xinkissana qhawho tookko usundhe kula okayipa hasana payu:
“Kulay korossi amanne shappeetesa xulleste,
Manne Kʼulkʼullawhattena ghinttati koro kollise.”
26 Intawamapakosi Manne Kʼulkʼullawhatte tiqitateesa hattay tiqitampawhe illaki ashshipa ye kitesonkina usundhe okasonki,
olhunnu hasa kodhekka waarsho qhamu awrughettay yeusundhe hattapninukki ghaape maallay.
27 Iʼokaaseppa koro qhaqhitte qhaqha miinteema shikkarashonki,
kʼeesitosi ghulakka hasi payipa usundhe kasqadhu:
28 “Makkaxko Iyyesusessi koroosi olo kollisi kan paynipa hunena dhawrasaani,
naqharray hune kollise taahundhittay katama Iyerusalemateesi ahhoqhashte,
holuppa k’eeqhte qhawhu maallay qhama an kasqatamnaaninu isawoanku.”
29 Naqharray Petʼiroosepa erkampawhe tookkekka hasi payeppa nu holasonki:
“Qhawhonu eeʼe payeete kaanta Haallikkonu eeʼe paye ine gheeqasa.
30 Iyyesusessi hune karko saappeema dhisteppa poghankuusi Haallikko appaadhe haanina farttate ihhaqisi,
31 waarsho Israʼeelatte qhamu karo Haallkkito hollipa hxurakkoosikka nu teexenukki Iyyesusessi Inthawampakopa Dhinisampakko kodhipa miskitto Huusu kaaqila kaanastettay qakkateesu.
32 Inekka husasikka masakarri,
holuppa Nasso Kʼulkʼullosi Haallikko koro eeʼe paya kaasannu teexikka misikire.”
33 Korossi qhaqhitte qhaqha iʼolissa apaqhina uumi miirodhippa erkampawhesiisi isi paaxe woʼa.
34 Naqharray qhawho tookko ho waarshito miinatte kanasami kollisampakko Hikkate ho Kemaliyaale ana payi ferisawitto korossi qhaqhitte qhaqha kitteteemi shikkaaripa erkampawheesi qhamu ghinaqakko kula pasnenu hayu.
35 Xaysa tupettay korossi qhaqhitte qhaqhana hasa na payu:
“Hune koro piyye Israʼeelattena,
olha koruna kodhe wootenu he tiqitadhindha.
36 Xayna qharaʼita qhawho ana payi Tewotase haqipa isi iyyana ‹Ano qhawho dhamma› pa qhawho dhippa salax kula ghaqi isi uso kala ashsha,
naqharray usoosi ana kaalla poghipa hessi na kalla ashshakka pulamonki,
olhossi ikkodhe woʼikka na haqhu.
37 Xaysa tupettay perresi ana koro dhihina qhawho piyye Kalilana ho Yihuta ana payi qhamussa kula haqipa koro kishakka isi uso kala ashsha,
naqharray usoosikka apoghipa korossi na kala ashshakka pullamoy.
38 Hussa maallay hantu olho an hune qallini,
koruusi hxurapa olokohxi,
dhihadhi taakkinti kodhmu ho qhawhito kaanta okayi payni ippanna.
39 Ho Hallikkito payni kapay kohxhxe huni alkasinte,
laadhdhi koro Haallikko qale poghghamadha akkodhdhinte.”
40 Usundhekka olhossi innu qalliisi iʼapaqheppa erkampawhesiisi he kula ooqasonkippa tubhbhasonki,
lankka makkaxko Iyyesusessi qhamu ye qallinenu hayonkippa hela hxurronki.
41 Naqharray erkampawhesi qhoota makaxko Iyyesuse maallay palanko akkadhe qhooti na gheeqami maallay ihxhxasoodheppa korossi qhaqhitte qhaqhana kaanta lighonkippa ashshonki.
42 Kuyyaqako kuyyaqakooma Manne Kʼulkʼullawhattepa manne tokenu manne toke kula isi aʼashshapa Iyyesuse Uso Kristoose qhamu kodhdhi kollisepa ote xeesa torruyatte kaalla konnakkonaye ye holonki.