Petʼirosepa Yohannise Qhaqhittenukki Iitʼuye
4
Petʼirosepa Yohannise iʼhaannay koronu toruyatte qaghana kʼeesaadhepa intawampakko tiqitampawhe Manne Kʼulkʼullawhattenapa koro ana Setukʼawaadhea payi usundhe kula okayi.
2 Erkampawhe lakkisi qhoota haqamakko Iyyesuse koro kollisapa onkisattay koro farika qhamu fartatte haqamakko sheeghisa nu toruyonki maallay Setukʼaawadhe immiroodhe.
3 Xaytokka qhooti awnuyi maallay haki qhayti saasa ighapeppa manne shappeete kiteema xulleesonki.
4 Emma kapay korossi ikʼaale torruyana apaqhe na kittatte koro kisha dhukkaysadhi;
koro dhukkaysadhana dhihakko huusu tʼiire qhawho kuma hxupin kula qaghiti hxafoy.
5 Haqhayna sinkatto intawampawhe koro Ayhuttattenapa xaadhighghe pana kollisampawhe tamppate katama Iyyerusaalemesa iʼilla hole.
6 Korusa illa hollina kittatte kʼeesadhdhe kʼeesadhete ghula Haanapa Kʼeyafapa Yohannisepa Iskintirose pana ahxke kʼeesito kʼeesadheete ghulana kaasakki na qale qagha.
7 Usundhekka erkampawhe lakisisikki he kitta shikkaarasheppa hasa na payonkippa kasqadhonki:
“Olisi humna hunkattay taakkinti makaxko haxatakki akkote?”
8 Xinkissana Petʼiroose Nasso Kʼulkʼullotakki hoqhqhipa hasa payuppa nu holasu:
“Hune he intawampawhe waarshittopa xaadhighghe piyate kodhdhite!
9 Kuyyu qhoota qhawho tonakunu olho xeesa kodhdhamipa malala qhamu dhinni mallaki aʼine kasqate payni,
10 qhawhu dhinipa miinte tahundhisa shikkaaru,
Iyyesus Kristoosesi Naazrate hune maskʼalakkoma dhisstepa Haallikko kapay fartatte haqisunna makaxko huusuttay qhamu kodhdhisa hunepa warshu Israʼeelatte kaasay iʼari.
11 ‹Awrukosi hune koro manne ghupadha dhafte,
Uso awrukko dhikita ho manne ghapa kodhdhi.›b
12 Dhinko Uso male sano pilettay yaxana kantakka ye qaghi moʼo maallay payni qhama dhina ninu makaxko moontonu kathoy koronu teexami pilakko ye qaghi.”
13 Petʼiroosepa Yohannisekka ye ghaaponkina qhamu qaladhesa koro qhaqhitatte qhooti hiʼepa holu qhamu koro ye kollinko sheeghipa koro hasa kodhonkissa iʼarenna idhdhahxhxe,
qhamu kolladhampawhe Iyyesuse kodhdhesamaka upadhonki.
14 Qhawhosi dhinikka iʼusundhe qale shikkaaranaki hiʼeppa olhu qalline dhaponki.
15 Hussa maallay korossi qhaqhittatena kaanta illi haseppa hasa payonkippa illena laaghadhonki.
16 “Hantu koruusi malala passinaani?
Dhahxhxootaadhe kaanoomaki xarghghe huusundhittay kodhamadhaye,
waarsho katama Iyyerusaalemenna qaaka kaasanna miinatteka iʼarami,
hussa maallay marmadheesi ini alkasne.
17 Naqharray oli waarshoma qhamu ye naqinipa ghandhaqunu makaxko Iyyesusessi xaynu koru qhamu yaxanuka ye toruynenu,
anna kohxinaani.”
18 Xaysa tupettay iʼooqeppa makaxko Iyyesusessi lanka qhamu koronu ye toruyneppa koro kolisokinu na dhawrasonki.
19 Petʼiroosepa Yohannise kapay hasi payeppa nu holasonki:
“Haallikkonu eeʼe payeete kaanta huneesi eeʼe paye miinte Haallikkitona pare inta?
Into hune pukkaqate tahundhina hela qalla.
20 Ine olho an hiinippa an apaqhniisi qalleete kalla konankonnayye ini holle.”
21 Rafisampawhe warshitopa korossi qhaqhitte qhaqha Petʼiroosepa Yohannisena qhooti dhappitte na dhapeppa waarshoossi ghaaponki maallay te lankanna he tiqitadhindha kina payeppa hela hxuronki,
olhuna maallay hasa kodhekka,
koro kaasay olissa kodhamadhittay qhooti Haallikko kaanasinu.
22 Moʼo maalla payni qhawhu dhahxhxotita dhinikka perre huusu perko hudhanko salax na ghuttay qhooti kodhdhenu.
Ghissoote koro dhukkaysadhina
23 Petʼirosepa Yohannise aʼusundhe hxurri tupettay karo koro huusundhi kulaki holleppa olhossi intawamppawhe kʼeesadheetepa xaadhighghe Ayhutatte na paye kaasaasi nu toruyonki.
24 Usundhekka iʼolisaasi apaqhe tupettay ikkitto huusundhiisi ina qiseppa hasa payoonkippa Haallikko ghissadhonki,
“Haallikkoosi dhamma,
moontopa piyyepa paso pana olho na kittatte qagha kaasaasi uumti!
25 Ato hossi Nasso Kʼulkʼullottay pako kodhampako haahu paappo haani dhaawitena hasa paytipa qalladhay:
‹Koro Ayhutatte ye kodhdhu moʼonuki miiroodhi?
Waarshoka moonukki latu suladhi?
26 Nukusaadhdhe piyyate ihhaqe
Intawamppawhekka iʼilla hole
Pogholhopa
hossi Ashiiniisa haqonki.›c
27 “Karayka Herodiisepa Pentʼenawitosi anna payina Pilatʼoose waarsho koro Ayhutatte ye kodhdhu pana waarsho Israeelatte illakki kodhdhepa katamissa illa holonkippa kodhamppako haahu Kʼulkʼulitosi ashshiinti Iyyesuseema haqonki,
28 hussakka hunnu hasa kodhdhi,
olhossi qharriteema Ato humnapa woʼoko hahuttay akkodhe wooti dhikkadhe qhooti naagheqami maallay.
29 Pogholho haayyu,
hantuka nyarko husundhisi haama eema,
kodhaampawhe haahuka kʼaalle taahuusi ye ghaponkina qhamu torruye alkanenu kodh!
30 Koro udhamaka makaxko Miʼaye haahu Kʼulkʼullito Iyyesusettay qhamu dhinnisneppa dhahxhxootaadhepa milikitaadhe kodhonkinu xargho haahu haqis.”
31 Ighghissoote dhikkise tupettay xaytossi na qagheki lelehi,
usundhe kaasakka Nasso Kʼulkʼulottay hoqhqhonkipa kʼaale Haallikkitoosikka ghaapko malettay torruyoonki.
Toʼokunko Koro Kedhdhay Dhukkaysadhana
32 Koro dhukkaysadha kaasakka saqakko toʼokopa dhihathootte tootte ishsheeghe,
usundhena kittatte qhawho iyyana “Oli haayyu” toʼokokka ye qaghi,
olhu sheeghe kaasakka ho usundhe kaasanna.
33 Erkampawhe kaasa qale teexakko Haallikkito qhooti qaghi maallay humna dhammatakki fartatte haqe Pogholho Iyyesusessi masakkare.
34 Koro pashshe sheegha taakkinti ho manne sheegha kaasay qhooti lassipa pirradheesi isi illa holasa maallay usundhena kittatte qhawho toʼokkokka ho rakkadhdha ye qaghi.
35 Kodhateesikka iʼokaasapa erkampawheema isi teexanki,
qhawho kaasannu ho gheeqasa kula ghaqqi isi qhootanki.
36 Qhawho tookko hopiyye Kʼoprosenna dhaladhi hana payi Yoosefe ho sanynye Lewina kodhdhi qagha,
erkampawhekka Parnapaase ina payeppa makaxko nukodhdhonki,
aʼishigha payni “Miʼaye koro dhiktisa” payyo.
37 Usokka pasho huusuusi illasipa pirradhettay okayuppa erkampawheema teexu.