22
“Qharumaadhdhe taakki qassawhepa appaadhdhe haayyu,
haadhi qalliite an huneesi itʼtʼosniisi yela apaqha!”
2 Usundheekka ippako Ipraysitʼatettay qalladhana iʼapaqheppa uuma kʼampayonki;
Pawloosekka hasina payi:
3 “Ano katamassi piyye Kilkʼiyanna kittatte qagha katama Tʼersesenna dhaladhi qhawho piyye Ayhutattena,
xayto anna ghohi kapay hassa katama Iyyerusaalemenna,
qhawho yeesi kollisikka Kemaliyaale ana payi,
ano qhawho hikke appaadhdheetesi tomooma kolladhipa qhamu kuyyu hune kodhatte kula ano qhawho yokkuntettay Haallikkonu kodhadha.
4 Holuppa ano ho koro Onki kala ashsha kaasaasi poghghenu xaytu qaghe kaasay ghoghora,
tʼiirepa xiskeesikka isan ghappapa manne shappetesa isan yakka.
5 Olissakka qhamu dhuke kodhdhisa kʼeesito ghulapa xaadhighghe kaasakka iyye masakaranki,
laadhdhi korossi piyye Temaaskʼonna qaghaasi qhama ghappinipa karo katama Iyyerusaaleme kula okaasappa kʼatʼaisanu ho yeesi taptape tooxipa ye teexonki usundhe.
6 “An ashshaanippa katama Temaaskʼo kula itʼtʼuyaaninna kuyyaqate saate tappi kula ghaqittina tutuppe hammakko moontonu ye kaaʼita xayto haahisi.
7 Xinkissana piyyeema arranipa ikkitto:
‹Saoole,
Saoole,
ata monukka aye ghoghorti?›
payaasi apaqha.
8 Anokka anna payi:
‹Pogholho haayyu,
ata Ato yaxa qhari?›
usokka iyyela payi:
‹Ano kulay hossi atho Ye ghoghorti Iyyesuse Naazrate.›
9 Korossi ye qale qaghakka hammakkossiki hiʼi dhiishay hossi yeema qalladhana ikkitto huusuusi ye apaqhonki.
10 Anokka:
‹Pogholho hayu,
moʼo an konni?›
kanna payi.
Pogholhokka iyyela payi:
‹Haqpa karo katama Temaaskʼo kula ashshoy,
haaha olho kodhe ho gheeqasi kaasaay iho qallinaye.›
11 Hammakkussa yela ehxhxeete bhaqhina payatti xayto hiʼe anu alkasu,
hussa maallay korossi ye qale qaghaki yela xarghgho ghapipa yetta ashshonppa katama Temaask’osa ye dhaghghapoosu.
12 “Hahakka qhawho Hananiya ana pay qagha,
usokka korossi Ayhutatte piyye Temaaskʼonna qaaka kaasanna miinatte qhawho kaanasamipa qhawho Haallikko ghaapa.
13 Uso ye kula okayipa ye kapeema shikkaaruppa yela payunna:
‹Ato Saoole,
ehxhxe haahu ixayto hiʼe!›
Anokka miinakalte an emmadhipa uso hiʼa.
14 Usokka iyyela payina:
‹Woʼosi Waako appaadhdhe haanina qhama arintipa ho Pare Qaghakka hʼiappa ikkitto huususikka naʼapaqhannukki iqharitteema ho qholladhi.
15 Hussa mallay olisa hiitipa aʼapaqhtiisi ho koro kaasannu qalla kodhdhinti.
16 Emma hantu mo’o atiqatiighe?
Haqpa makaxko huusuusi ooqappa shoxatte shoxadhay,
cʼuppo haahunakka hxurakko tayadhay.›
17 “Xaysa tupetty an karo Iyyerusaaleme kula holipa Manne Kʼulkʼullawatte kalla isan ghissadhana qhamo qhawho ulsinke eema kulki an kodhdhipa
18 Pogholhokka hasa payuppa isi yeema qalladhana hiʼa:
‹Misikirunkussa aqhoota haayyu maallay teexintiisi qhooti ye akkanne maallay olo ghayyipa minakalte katama Iyyerusaalemenna kittatte lighay!›
19 Anokka hasanna payi:
‹Pogholho haayyu,
kulay mannaadhdhessi ghissoote koro Ayhutatte kaasay qhama ashshipa koro hottay dhukkaysadhiisi isan ghoghorapa isan tubhbhaasi usundhe pukkaqate tuusundhina iʼaranki.
20 Istifanoosesi qhoota haahu qalla apoghana anokka na qale an qaghi,
olissaasi kodhenu anna qale ghari,
hesi uso poghenna laallaadhe huusundhiisikka isannu tiqadha.›
21 Pogholhokka iyyela payina:
‹Korossi ye koro Ayhutatte kodhdhu xayto sikaapana qagha kulakki an ho erakniye haqpa ashshoy!›”
Pawloose Qhamu Roomawitto Kodhdhisi Qalli
22 Waarshokka haka xaysaasa ittorre Pawlooseesi apaqhasi,
xaysa tupettay irriirepa hasa payoonki:
“Qhawhu hasa lighaasi apiyyate patisa!
Qhawho hasa ligha qaghottay qaghe ye uso gheeqasi!”
23 Usundhekka irriirankippa lallaadhe huusundhisikka isi yakapa piyyatteesikka isi moonto qilla pupuraxanki.
24 Waanittossi iʼolissaasi hiʼi tupettay foolisaadhdhe Pawlooseesi qhamu akkineppa xayto usundhe qaghe kula ashshonkitanuki usundhe hayi,
waarsho olhunna maallay hasa ghaqqiti usooma riirisi arenu qhama atubhbhinipa aqhottusadhunu hayu.
25 Naqharray qhamu surottay shapneppa tubhbhonkinukki gharsadhenna Pawloose waannittossi foolisadhdhe dhippa haya uso kaaqila shikkaarana ina payi:
“Inta qhawho Roomawitto dhappitte male tubhbhe ihune payamti?”
26 Waanittosi foolisadhdhe dhippanna iʼolissaasi apaqhina qhawhossi qhipampawhe haya kulakki ashshipa na payu:
“Qhawuhu kulay Roomawittona,
mala passinti hantu?”
27 Hussa maallay qhawhosi qhipampawhe haya Pawloose kulakki okayipa na payu:
“Into ye qalli,
dhukkeema atho Roomawitto?”
Usokka ina payi:
“Ee.”
28 Hayampakosi qhipampawhatte:
“Ano han Roomawitto kodhdhe alkasi kodhatte dhammattay.”
Pawloosekka ina payina:
“Ano kapay han Roomawitto kodhdhe alkasi dhaladhettay.”
29 Hussa maallay korossi uso qhottusadha haattakki usona kaanta ghoradhi;
hayampakosi qhipampawhatte Pawloose qhamu Roomawitto kodhdhisa arina qhooti siplettay shapi mallay ighghaapi.
Pawloose Koro Qhaqhitte Qhaqha Miinteemi Itʼtʼuyi
30 Haqhayna sinkatho hayampakosi qhipampawhatte,
koro Ayhutatte olhuna maallay Pawloose kasase arenu waannadhdhe kʼeesadhdheetepa koro qhaqhitte qhaqha kaasay qhamu illeema hollinukki hayi.
Pawlooseesikka manne shappeetena ishighuppa na miinta itʼtʼoosu.