Pawloose Iyyerusaleme Kulaki Ashshi
21
An usundhena kaanta reehamni tupettay markapeema an hadhdhinippa karo piyyessi pasito kittatte qagha ana Kʼoose payi kula ashshooni,
haqhayna sinkathokka haqaanippa karo piyyessi qandheete kittatte qaghay Rutoonena hxafooni,
hahanukka karo katama Petʼira kula ashshooni.
2 Xaytusanakka markape te karo piyye Finkʼe kula ashshasikki an tayanni,
na hadhdhaanippa,
ashshanko haanisikka tiyyisaani.
3 Piyyessi Kʼopiroose pasito kittatte qaghaasi xargho pixxate kula hxuraanippa karo piyye Sooriya kula ashshonippa xaytossi konkadhdhe na shikkare katama Tʼiroosena hxafooni,
markapesikka qhooti haama maahxhxessi feʼadheesi oodhdhasinti maallay inekka haama odhdhaani.
4 Kolladhampawhessi piyysanna qaghaasi gheaqaanippa usundhema hxafoonipa na qale kuyyaqako taxxan oladhaani.
Usundhdhekka Nasso Kʼulkʼullotakki kodhdheppa Pawloosena na payonki:
“Karo katama Iyyerusaaleme kula olo ashshi.”
5 Kuyyaqessi haama ghayye inne gheeqase iʼdhikadhe tupettay anna kanta reehamnippa ashshanko haaniisi tiyysaani,
usundhe kaasay xiskepa miʼaadhe huusundhi illakki kodhdheppa katamana kittatte hagha lighnaani saasa ine qale ashshonkippa pasito hinaseemate ghuladhanippa ghissadhaani tupettay ille nakaysadhaani.
6 Xaysa tupettay ine markapeema an hadhdhini,
naqharray usundhe karo mannaadhdhe huusundhi kulakki hole.
7 Katama Tʼiroosennu haqaanippa katama Petʼelemaysenna hxafooni,
hahaka koro dhukkaysadha tayaanippa an illaa xasni tupettay usundhe qale kuyyaqako tookko nakaayyaani.
8 Haqhayna sinkatho an haqnippa karo katama Kʼisariya kula ashshoni,
xaytusanakka hessi taxxanna kittattea tookko kodhdha ho wenghellawitto Filpoosenna manne kula ashshoonippa uso kapeema oladhaani.
9 Usokka ihaadhdhe heye a’akadhonki he hxuuma qalladha salaxki sheeghi.
10 Kuyyaqqe kisha an haama olannina hxuumampakko qhawho ana payi Aghapoose piyye Yihutannu okayi.
11 Hxuumampakussa ine kulakki okayipa,
sakʼkʼe Pawlooseesi akkuppa xarghghepa luhhe huusuusi illeema hela shapuppa hasa payu:
“Nasso Kʼulkʼullo iʼiyyana qhawho sakʼkʼina koro Ayhutatte katama Iyyerusaalemenna qagha hasi uso shapnippa koro ye koro Ayhutatte kodhdhunnu uso likkasuppa teexu.”
12 An hussaasi apaqhninna inepa korossi haaha qagha Pawloose qhamu katama Iyyerusaaleme kula ye ashshininukki an uso waatanni.
13 Pawloose kapay ippayina:
“Ata moonukki ahasa ooyteppa isa yela saqako hayyu azanisanku?
Ano kulay qhoota makaxiko Pogholho Iyyesuse maallay katama Iyyerusaalemesa shapame patta ye kodhdhunna farttenukka an ghari.”
14 Dhihamte taaniisi ye inena akkadhu maallay:
“Lammi wo’oko Pogholhito ikkodhdha” kampaynippa hela hxuraani.
15 Kuyyaqqe takkaayya an haama salli tupettay maahxhxe haaniisikki an gharsannippa karo katama Iyyerusaaleme kula ashshooni.
16 Kolladhampawhe tookke tookke katama Kʼisariyanna ine qali okaye,
qhamu an hxaysanaaninukka ho Minasoonenna manne kula inettay ashshonki,
qhawsakka ho qharro dhukkaysadhi,
qhawho piyye Kʼopiroosenna.
Pawloose Katama Iyyerusaalemenaki Hxfi
17 An katama Iyyerusaalemenna hxafnina koro dhukkaysadha hxaso dhammattakki ine akkadhi.
18 Haqhayna sinkatto Pawloose ine qali Yayikʼoope kapeema ashshi,
xaadhighghe toʼokunko koro dhukkaysadhana toʼotteema haahakki qaghe.
19 Pawloose iʼusundhe kaasasa xasi tupettay kodhmossi Haallikko usottay koro ye koro Ayhutatte kodhdhuna kittatte kodhadhiisi usundheesi torruyu.
20 Ihhussaasi apaqhenna usundhe kaasakki Haallikkoosi kalataysadhi,
Pawloosenakka hasa na payonki:
“Miaye haani,
koro dhukkaysadha ho kumadhdhe kisha hxafna qhamu piyye Ayhutattena kittatte qaghipa korussa kaasay isi Hikke Muusenu yookasa aʼaray.
21 Korossi Ayhudhatte koro ye koro Ayhutatte kodhdhu kittaʼita qaaka kaasay qhamu shambhidhdhe huusundhi ye karrasneppa kollinko haani oladhitakka qhamu ye qaaknenu Hikke Muuse pulenu akkollistisa iʼapaqhe.
22 Hussa maallay man konaanikki woyya?
Karaykka okaye taahuusi apaqhe ye hxurreye,
23 olho ine hola payniisi kodh,
inena kittatte koro silatto na qaghi qhawho salaxki qagha.
24 Usundheesi ooqpa na qale kodhdhappa tanpessi alheesatte dhikkisay,
kodhatte ihhela kasottay ghunasnekka na qharreete teexay.
Olissaasikki akkotti payni olissa ahola torruyi kaasay aayya qhamu kodhdhipa athokka pukkaqate taahuna qhawho hikke tiqitadha kodhdhassa koro kaasakki arraye.
25 Korosi ye koro Ayhutatte kodhdhu dhukkaysadhinu hasa paynipa nu toxooni ‹yiʼo aʼoohxtenu teexipa kʼeeqhtepa qholte he siipistipa farina sakankoosi qhamu ye yiineppa paalakunkito kallakka he tiqtadhonkinu›.”
26 Haqhayna sinkatho Pawloose korosiisi iʼooqipa ashshottay,
tampesi he alheesattesi usundhe qale dhikkisu;
xaysa tupettay tampesi he alheesatte paray qhamu dhikadhintipa texxakkossi ikkorossina sappeete texni paray qhamu itʼtʼoosnisa arasenu karo Manne Kʼulkʼullawhe kula xullu.
Pawloose Manne Kʼulkʼullawheemi Ghapami
27 Kuyyaqako taxxanto idhdhikkadhana korossi Ayhutatte piyye Isiyannu okayi Pawlooseesi Manne Kʼulkʼullawhattena kittati tayeppa koro kaasasi na nyarisonkippa ghaponki,
28 hasakka payonkippa riironki:
“Hune koro Israʼeelatte,
okayapa ine kʼarkʼarankumma!
Qhawhossi waarsho haanipa hikke taani pana xaytuusikka dhaghghisapa xayto kaasa isi aʼashshapa isi koro kaasaasi kollisa husi uso;
holuppa hussa patta ye kodhdhunna koro ye koro Ayhutatte kodhdhuusikka Manne Kʼulkʼullawhe kula isi xulleesapa xaytu kʼulkʼulawisikka isi loka uso.”
29 Olhu namaallay hasa payekka xayna qharaʼita qhawho piyye Efesoonena dhaladhi ho ana payina Tʼirofimoseesi qhooti katamana uso qale hiʼe maallay,
hantukka Pawloose ho qhawhusattay Manne Kʼulkʼullawhe kula okayipa xullu qhooti nu lighi maallay.
30 Katamakka iʼoraqhami,
waarshokka xaytu qaghi kaasannu keamuppa okayu,
Pawlooseesikka ghapuppa Manne Kʼulkʼullawhatte seeto kula situppa mankaxaadhekka miinakale akʼupoy.
31 Isi uso poghe woʼana otte iyya:
“Katama Iyyerusaaleme kaasakki oraqhami” ki waannittossi qhipampawhe piyye Roomenna kaanta dhaghghapi.
32 Hussa maallay usokka qhipampawhepa waannadhessi qhipampawhe dhippannakki he kala ooqipa waarshossi kula ashshoy,
korossikka wannittopa qhipampawhesiisi hiinittay Pawloosesi tubhbhe ihela hxure.
33 Wannitossikka iʼokaypa Pawlooseesi ghapuppa siple lakkittay qhamu shapnenu hayu,
xaysa tupettay qhamu yaxa kodhdhipa qhamu moosi dhappi arenu usoosi kasqadhu.
34 Waarshokka lakkisi ille qhootipa koro tookko iʼolho tookko qalladhana,
koro tookko kapay olho pileesikki qalladhi,
qhoota wacʼaruye waarshitona paayyatti wannittossi olho dhukateesi apaqhe ye alkasu maallay foolisadhdhe qhamu xaytossi usundhe qaghe kula dhanenukki hayi.
35 Pawloose ihhannay harratte ligheete qaghana waarsho kaasay qhamu ighghitipa isinna oloku kodhe woʼaasi foolisadhdhe iʼupadheppa Pawloose saappeema dhooqhonkippa ashshonkittay.
36 Waarshokka “Apogha!”
kippayipa isinna kaleema ashsha.
Malse Pawloose Hela Holasi
37 Foolisadhessi Pawloosettay karo xaytossi usundhe naqaghe kula itʼtʼuyetanna Pawloose wannittossi folissadhdheetena ina payi:
“Olho tooko anho qallinina ayyela akkannay?”
Wannittossika ina payi:
“Pako Krikatteesi aʼaray?
38 Kenni,
atho Kiptʼawitosi kuyyaqako toʼonna parpe haqistipa qhawho kuma salaxi he napsadhe paaxiisi sixappa karo mandhito ghoradhattay qandhi?”
39 Pawloosekka ina payi:
“Ano qhawho katamassi Tʼersese uuma arama piyye Kilkʼiyanna kittatte qaghana dhaladhi,
holuppa ano qhawho piyye Ayhutattenaye akko ma’ala qhamu an korunu olho toʼoko qallininu ye eeʼe pay.”
40 Qalladhenu innu eeʼe payi tupettay Pawloose xayto koro kaasannu armadha sappeemi shikkaarippa waarsho qhamu kʼampayninu xarghottay nu hiʼaasu,
waarshokka ikʼkʼampay tupettay pako Ipraystʼatetaakki hasa payipa qalladhe paayyu.