23
Pawloose koro qhaqhitte qhaqhasi pareemi emmipa na payunna:
“Hune he qharumaadhdhe taakki qassawhe haayyu kodhdhite ano haka kuyyu saasa Haallikkito miinatte kʼalpe xeesatakki qaaki”
2 Kʼeesittossi kʼeesadhdheete ghula Hananiya ana payi kapay korussa Pawloose kaaqila shikkaara qhamunna pako shoqhnenuki hayi.
3 Xinkissana Pawloose Hananiyana ina payi:
“Ato ho piyyaatessi piqa apokkolettay saali ligha!
Hoosikka Haallikko ho shoqhna!
Hikketakki aqhoota rakko hayyu kaaʼita qhaqhitte qhaqhenu qakkatipa olho an dhappi ye qaghi male qhama ye shoqhninu isa usundhe hayay?”
4 Korossi usona kaanta qagha inna payi:
“Kʼeesittossi kʼeesadhdheete ghula Haallikkitoosikki adhaghghisinti?”
5 Pawloosekka inna payi:
“Koro haayyu,
kʼeesitto kʼeesadhdheete ghula qhamu kodhdhisa anu arukka,
momaalla payni Kʼaalle hasa payamtipa tooxamo qhooti qaghti maallay ‹waannitto waarshitosa olho magha olo qalladhi.›”
6 Pawloosekka waarshosina kittatte tooke sedhukʼawaadhepa hibhakka ferisawadhe qhamu kodhdhesa iʼupadhina hasi payipa korossi qhaqhitte qhaqha miinteema ikkitto dhammattay riiru:
“Koro haayyu,
anokka ho ferisawittito dhaladhi feresawito,
haadhi!
Hantu olho ana maallay qhaqhitte miinteema itʼtʼuyi qhootan haqmakko koro farrina kippadhi maallay.”
7 Pawloose hassa qallanittay feresawaadhdhepa sedhukʼawadhdhe kitteema poghghatho dhaladhipa korossi qhaqhitte qhaqha lakkisa ille qhootu.
8 Sedhukʼawaadhdhe iʼiyana:
“Fartatte haqamakko ye qaghi,
erkampatadhdhepa nassokka ye qaghe” ferisawadhe kapay hissa kaasay qhamu qaaghesi idhdhukkaysadha.
9 Xaysa tupettay parpe dhammaki haqipa hesi ferisawadheete kodhdhenna kittatte tookke tookke kollisampawhe hikkate ihaqeppa hasa payonki:
“Ine qhawhunna olho magha toʼokokka inina tayooni.
Yaxaaray nasso taakkinti erkampatte nu qalliki kodhindhintina ine manna arri?”
ki payeppa tamakadhonki.
10 Parpesi uumi naqati maallay Pawlooseessi qhamu ye yuyutnenu hayampakossi qhipampawhatte ighghaapipa qhipampawhesiisi hasa payuppa hayu:
“Oodhdhapa Pawlooseesi nakittatte simidhankuppa okaayyankuttay!
Karo ghodhdhesi qhipampawhatte kulakka ashshonkuttay!”
11 Haqhayna kaallapo Pogholho Pawloose kaaqila ishshikkaaripa na payu:
“Kokisadhma qhama katama Iyyerusaalemenna kittatte qhoota haayyu qalliti kula piyye Roomennakka qhoota haayyu qalle ho gheeqasa.”
Qhama Pawloose Poghenu Suladhi
12 Xayto iqhqhayina korossi Ayhutatte illeemi holipa hasa payuppa akutadhu:
“Pawlooseesi ini poghoninna yiʼo ini yiine qandhekka ini qukne.”
13 Korussa Pawlooseesi poghenu gharsadhi qhawho hudhanko salaxna ghutay.
14 Usundhisakka karo intawampawhe kʼeesadheetepa xaadhighghe kulakki ashsheppa hassa payoonkippa nu qallonki:
“Ine Pawlooseesi ini poghooni male qhamu ini yiʼo lokonenu akutte xaxaki an xulli,
15 Hussa maallay hune tanynyadhe qalle gharrapa olho attoomooma na qhotosante qhamu qaghisa kodhankuppa qhamu Pawlooseesi hune lihasnenu hayampako qhipampawhattenu qallanku;
ine ihaanna onkate qaghana qhamu an poghnaninu an gharsanniye.”
16 Naqharray ashinko Pawloosey olissasi qhooti apaqhi maallay karo ghodhe foolisaadhdheete kulakki ashshi xulluppa Pawloosenu qallu.
17 Pawloosekka waannadhesi qhipampawhattena kittatte qhawho tokkoosiki ooqipa na payu:
“Miʼayisa haayyanpakosi orxankitonuki oloku qalliniye uso kula itʼtʼoosa.”
18 Waanittosi qhipampawhe dhippanna mi’ayeesisi ighapipa haayyanpakosi kapeema xullutappa na payu:
“Pawlooseesi shapama ye ooqipa hasa yela paayyupa ye waatadhu mi’ayisasi haayyanpako kula ashatama olhunu qallini qaghaye.”
19 Hayampakosi qhipampawhatte miʼayeesina xargho inna ghapipa ghinaqkooma ashotappa hasa na payuppa kasaqadhu “Olissa mayye qallinti?”
20 Mi’ayeesika hasi payipa nu holasu:
“Korossi Ayhutatte hasi payipa ille xulu qhayna he rakko Pawlooseesi tomooma qhotosana kulakki an kodhdhineppa qhamu koro qhaqhite qhaqha miinteema ine itʼtʼosninu hayampakko qhipampawhatte waatadhaani.
21 Naqharray eeʼe e olo nu payima,
ini uso poghooni male yiʼo ini lokonne,
qandhekka ini qukune ki payeppa uso poghenu akutte xulonki usundhisakka qhawho hudhanko salax na ghutakki uso poghenu ribhi,
hantu lammi usundhe olho atho nu holasti pattakki tiqitadhe.”
22 Hayampakosikka mi’ayesina:
“Oli aye qallitiisi yaxanuka inna qalu” kinna payipa laaghghu.
Pawloose Katama Kʼesariya Kulaki Aʼeraki
23 Xaysa tupettay hayampakkosi qhipampawhatte waannadhdhessi dhippanna kittatte qhawho lakkisiki ooqipa na payu:
“Awnate saate izzaxna koro katama Kʼesariya kula ashshina folisaadhdhe dhippa lakkipa he oolladheettay ashshinakka qhawho hudhanko taxxan holuppa he orxanko qhipanana kittatte qhawho dhippa lakki gharisanku!
24 Pawloosenuka oollo gharisankuppa karo qhawhossi piyye rafisa Filkise kula qhamu nakayhottay dhaghapninu kodhanku.”
25 Taptape hassa iyyasikka nu tooxoy:
26 “Ano Kʼelawtoose Lusiyoose:
atho ho kanasamtipa isa piyye rafisay Filkise,
nakayho ihho kodhdha!
27 Koro Ayhutatte qhawhusi ighghapipa isi pogha ahxay,
ano naqharray Roomawito qhamu kodhdhisa an aripa folisadhe illay na xafopa pinnisa.
28 Moonu qhamu kasase woʼe arenukka koro huusundhi qhaqhite qhaqha miinteema itʼtʼoosa.
29 Olhunu kasasekka qhoota hikke tuusundhi kaaʼita dhishoy olho farteema taakkinti shappenu uso xafasna qhamu ye kodhdhusa an ari.
30 Naqharray qhawhuusi poghenu qhamu suladheesi an apaqhina haattakki an ho kula eraki,
korussa usoosi kasasikka olhuna maallay uso kasasiisi homiinteema qhamu itʼtʼosnenuki annu qalli.”
31 Hussa maallay folisaadhesi qhamosi aʼusundhe hayi kulaki Pawlooseesi awnisana ashshettappa piyye Antipatʼrisena hxafasonki.
32 Haqhayna sinkatho korossi oollaadhe saappeema hadhdhi patta qhamu Pawloosesi dhaghaposnenu kodhonkippa hibhay nakalla xaytosi qhipampawhe naqaake kula holonki.
33 Korossi ollaadhdhe saappeematte hadhdhikka ikkatama Kʼesariyanna hxafina taptapesisi rafisampakkosinuki teexepa Pawlooseesikka na minteema itʼtʼoosonki.
34 Rafisampakosikka taptapesisi innapapi tupettay Pawloosena hasinna payi “Ato qhawho piyye tinkana?”
Qhamu qhawho piyye Kilkʼiyana kodhdhsa iʼarrina inna payi:
35 “rakko hahuusi korosi ho kasasi okayi payni an apaqhna.”
Xaysa tupettay manne ahxase Herotiise kaleema qhama uso tiqaninukka hayi.