Pawloose Filkise Minteemi Itʼtʼuyi
24
Kuyyaqako hxupin tupettay kʼessito ghula Hananiya xaadhighghe tookke tookkepa qhawho tapakʼito ana payi Tʼertʼeluse illakki karo katama Kʼisariya kula ashshi,
usundhekka karo qhawhossi piyye rafisa Filkise kulakki ashsheppa Pawlooseesi kasasonki
2 Pawlooseesi a’ooqipa okayunna Tʼertʼeluse hasi payipa kasaso huususi paayyu:
“Ato Filkise ho kanasamti,
hottay nakayho dhamasiki an tayyani,
rafise taahu xeesana payatti waarsho haaninu uuma inu ghartti.
3 Kodhmo haahu xeesasi xayto kaasappa kuyyaqako kaasay kalata dhammattakki an akkani.
4 Naqharray hantu anu torrema naqunna onke mahxnaʼattay olho an hosi qalliniisi xorxutettay qhama yela apaqhintinu an ho waatadha.
5 Qhawhitakku koro Ayhutatte piyye qhaatʼeete qagha kaasanu udhanko maghakko kodhdhipa parrpe haqisu;
uso korossi Nazirawadhe ana payina wannito intawa.
6 Immanne Kʼulkʼullawhe loke woʼanaki an ghapni,
[qhamo Hikke piyye taanina kula usooma qhaqhite anna qhaqhe wooni.
7 Naqharray wannittossi orxampawhe haya Lusiyoose kapay humnattakki xargheete inena simidhipa akku.
8 Holuppa ho kula qhama okkaynaninu inne hayu,]
hantu kisse anna itʼtʼoosni kaasakka qhamu dhuke kodhdhisa atho pukaqate taahuna qhotusadhepa are aʼalkasnay.”
9 Korossi Ayhutatte kaasay “Olissa dhuke” ippayeppa kissesisa gharonki.
Pawloose Malsi Filkise Minteema Holasi
10 Qhawhosi piyye rafisa Filkise Pawloose qhamu qallanninu xarrghotakki tukkipa “Qaladh!”
na payu.
Pawloosekka hasi payipa nu holasu:
“Perre kishana atho ho waarshusa qhaqhitte qhaqha qhoota kodhdhiti maallay kisisa yeema itʼtʼuyinu malseesi ho miinteema holasenu uuma an hxasoodhi.
11 Kuyyaqako hudhdhanpa lakkina qharaʼita sakatenu qhama katama Iyyerusaaleme kula okayisa korrito kasqadhe aʼalkasnay.
12 Manne Kʼulkʼullawhekka ikkodhdhe manne ghissoote koro Ayhutattena taakkinti katamana kittatte qhawho an tamaakadhi holuppa an korooma parrpe haqisina ye yetayonki.
13 Hantu kisisa iyyeema itʼtʼoose kaasannu misikire ho itʼtʼoosesi ye alkasne.
14 Naqharray olho tookko anho qalle woʼi,
hussakka hossi usundhe payenna amante pile,
onke pogholhitottay Waakoossi appaadhdhe haanina usosiki an kaanasi,
kʼaalessi matʼaafa hikkatepa matʼaafa hxuumampawhatesa tooxamti kaasaasiki andhukkaysadhi.
15 Qhamu usundhe kippadhe kula anokka hepare qaghapa cʼippolawuhe qhamu fartatte haqanessa Haallikkooma kippo kodhi.
16 Hussa maallakki Haallikkopa korito miinatte kʼalpe xeesa sheeghenu an kuyyaqako kaasay kokisadhi.
17 “Perre kisha illighghe tupettakki an dhallito hayyu xiyyawhenu kʼarkʼartapa Haallikkonu teexako dhoqhadhipa Iyerusaleme kula okaya.
18 Usundhdhekka An Manne Kʼulkʼullawhatte kalla tampe alheesatte kodhanakki ye taye,
xinkisana waarsho dhammakka ye qale ye qaghi,
parpekka ye haqu.
19 Naqharray koro Ayhutatte ho piyye Isiyannu okayikki haaha qagha,
apayni usundhe olhu ye kasasnettay sheegha payni iʼokayeppa ho minteema hela qaallonki.
20 Xayna qharaʼita an koro qhaqhitate minteema itʼtʼuyina dhappitte iyyela taye qagha payni into koru xaysa itʼtʼuyi iqalla.
21 Dhuke karay usundhe miinteema an shikkaaripa ikkito dhammattay ‹fartate haqmakko qagha an payi maallay haadhi kuyyu qhaqhittenuki an hune miinteema itʼtʼuyi› hussa malettay olho pille an dhappi ye qaghikka.”
22 Filkise kapay onke Pogholhitoosi qhooti pareema arri maallay “Hayampakkossi orxankito Lusiyoose okayi payni,
rakko hahudhiisi an dhikkisna” kina payipa usundhe laaghghu.
23 Holuppa wannittossi dhippanna hasa na payu:
“Uuma atu uso rakkisunna tiqadhapa dhalitto huusukka kalqetakki nu okayi payni olo dhawrasi.”
24 Kuyyaqqe qhacʼa tupettay Filkise naxayeesi tuusu Ayhutite Trusilla ana pay illakki okayi Pawlooseesi ooqasuppa qhoota Iyyesus Kristoose dhukkaysadhe kaaʼita ittorruyana na apaqhasoy.
25 Pawloose qhoota pare qagheetepa qhoota he pankadhatte pana qhoota qhaqhitte okayna kaaʼita ittorruyana Filkise ighaapipa na payu:
“Hantu ashshama kuyyaqako iyyeesi ghartinaki an ho oqiniye.”
26 Filkise ippayina Pawloose yeesi tuukka teexnapa isi kippadha,
hussa maallay kuyyaqako kaasakki oqassayyipa isi qallatessayya.
27 Perkko lakki illighi tupettay xayto Filkise kapeema qhawho ana payina Porkʼiyose Fistʼoosesikki axawwadhi,
Filkise koro Ayihutatteesi hxaseese qhooti woʼi maallay Pawlooseesi manne shappetesa ihhela hxuri.