Pawloose Qhamu Fistʼoose Minteema Itʼtʼuyi
25
Fistʼoose karo piyyessi rafisi karo Kʼisariya kulakki ashshipa kuyyaqako izzax oladhu tupettay karo Iyyerusaalemeki ashshi.
2 Hahatikka wanadhessi kʼeesadheetepa intawampawhessi koro Ayhutattena tookke tookke na miinteemi itʼtʼuyeppa Pawloosesi kasasonki.
3 Fistʼoosesi hasa payonkipa waatadhonki:
“Pawloosesi karo katama Iyyerusaaleme kula ine okasas.”
Olhunnu hasa payekka qhamu Pawloosenu onkeema ribhneppa poghonkinu qhooti woʼe maallay.
4 Fistʼoose kapay ippayina:
“Pawloose hantu katama Kʼisariyanna manne shappeetenakki qaghi,
anokka hantu te itʼtʼanna hakulaki an ashshini.
5 Rafisampawhe haahundhi karo katama Kʼisariya kula iʼyye qale ashsheppa Pawloose olhu dhappi qagha payni haamatte kasasonki.”
6 Fistʼoose kuyyaqako setten taakkinti hudhdhanna ye ghullikki usundhe qale oladhi tupettay karo Kʼisariya kulakki ashshi.
Ihhaha hxafi tupettay haqhayna sinkatho qakkatessi qhaqhitatesi qakkadhipa qhama Pawloose itʼtʼosninu hayu.
7 Pawloose iʼokayina korossi Ayhutatte katama Iyyerusaalemennu okayi iqhqhorrepa kisse haxa teye misikire sheeghtiisi isi na itʼtʼoosa.
8 Pawloosekka hasi payipa hela holasu:
“Ano hikke Ayhutattepa te Manne Kʼulkʼullawhatte taakkinti te nikusassi nikusadheete piyye Romenakka olho an dhappi ye qaghi.”
9 Fistʼoose kapay qhooti koro Ayihutattesi hxasese woʼi maallay Pawloosena ina payi:
“Karo Iyyerusaaleme kulakka ashshintipa qhaqhittenu ye miinteema itʼtʼuyanna awoʼay?”
10 Naqharay Pawloose hasi payi:
“Haadhi ano hantu qakkattako nukusito na qakkadhipa isi qhaqhitte qhaqha na miinate an shikkaari;
qhamo atho arti kula koro Ayudhattena olho an dhappi toʼokokka ye qaghi.
11 Ikkodhitama kapay dhappitte farteema ye hxafasnaki yela tayami payni olo ye poghi anu payni,
naqharray kisse tuusundhiki te tayte kodhdhi payni qhawho yeesi akkinapa usundheesi ye teexu ye qaghikka.
Hussana kanta Kʼesaaresi piyye Roome rafisa kula ye likkasa.”
12 Kuyaqakusana Fistʼoose dhihamampawhesi huusu qale ittorruyadhi tupettay ippayina:
“Apayini aʼiyyanna Kʼesaaresi piyye Roome rafisa kulakki allighini payni Uso kulakka aʼashshinti.”
Pawloose Akrippapa Pernikʼe Minteemi Itʼtʼuyi
13 Kuyyaqqe takkayya tupettay nukusa Akrippapa Pernikʼe Fistʼoosena dhikkika nakayhottay okayti payenukki karo K’isariya kula oodhdhe.
14 Haamatekka kuyyaqqe kisha oladhonki Fistʼoosekka rakko Pawlooseesi nukusasinu hasa payuppa qallu:
“Qhawho tookko ho Filkise hassa manne shappeetesa hxurikki qagha.
15 Xinkessi an katama Iyyerusaalemenna qaghina,
wannadhe kʼeesadheetepa xaadhighghe koro Ayhutattena qhama anna qhaqhitte qhaqhininuki uso kasase.
16 Naqharray ano hasa payipa nu holasa:
‹Qhawho akasasiisi korossi kasasi minteema ye itʼtʼuyuppa hela malse holasunna likkasepa teexe tammpe koro Roomenna qandhikka.›
17 Hussa maallay kuyyaqakussana hessi uso kasase iyye kula okayenna rakkusaasi anu oltisunakki haqhayna sinkatho xayto qhaqhitatesa aqakkadhipa qhawhosiisi qhamu okasnenu haya.
18 Hessi uso kasasekka ishshikaareppa isi qallana qhamossi ano hela ghadhi kula dhappitte kisha ye na itʼtʼosonki.
19 Naqharray usundhe qhoota amante tuusundhipa Iyyesusessi faripa Pawloose isi iyyana ho qagha kaaʼiti iʼuso tamaakkadhe.
20 Anokka olho hasa lighaasi qhamu ammalala ishighni qhooti ana tupe dhapi maallay karo katama Iyyerusaaleme kula qhamu ashshinipa qhoota rakkusa kaaʼita na qhaqhitte qhaqhunu woʼoko huusu anna kasqadhi.
21 Naqharrayi Pawloose kisse tusuu Kʼesaresi piyye Roome rafisattay iyye emamita qhooti payi maallay anokka hakan uso kula erakni saasa qhamu manne shappeetesa ghayininuki an hayi.”
22 Akrippakka Fistʼoosena ina payi:
“Anokka kulay qalliite qhawhussana apaqhe awwoʼi” Fistʼoosekka ina payi:
“Qhaynakka apaqhinti.”
23 Haqhayna sinkatho Akrippapa Pernikʼe kaanaste dhamatakki kodhdheppa waannadhdhessi orxankitopa kanoomossi katamakki usundhe qale kodhdhipa mannessi qhaqhittatte kaleema xulloonki,
xaysa tupettay Fistʼoose qhamu a Pawloose itʼtʼosninukki hayi.
24 Fistʼoosekka hasi payi:
“Ato nukusa Akrippapa hune koru xayna ine qale qagha kaasay,
qhawhuusi ahiʼanku?
Lammi koro Iyyerusaalematepa korossi Ayhutatte haaha katama Kʼisariyanna qaaka kaasay hasi payippa ye waatadhu:
‹Xay tupettay qhawhu qaghoottay qaghe ye uso qheeqasi.›
25 Naqharray ano dhappite farteema uso hxafasnaasi anu na tayukka,
ikkodhdhitama kapay uso qhooti karo Kʼesaresi piyye Roome rafisa iyye emma payi maallay anokka hakulaki an eraki.
26 Ikkodhdhitama kapay qhoota huusu kaaʼita olho pogholho hayyunu an tooxni olho ye xula toʼokoka ye qaghi,
hussa maallay aqhotosadhi tupettay olho anna hxafiisi qhaman tooxninu hune pana saqi atho nukusa Akripa ho miinteema an itʼtʼoosi.
27 Hussakka qhawho shapamiisi karo tanynya ghula kula alikkasana olhuna maallay kasasami olo qallu payni pare qhamu ye kodhdhuki ye lighghti mallay.”