Qallite Pawloose Akripa Minta Qalladhi
26
Akripakka Pawloosena inna payi:
“Qhoota haahu kaʼitta qhama qalladhintinu anho teexi.”
Xinkisana Pawloosekka xarghghe huusuusikki gheteʼisipa hasa payuppa malse hela holasu:
2 “Atho nukusa Akripa,
olhossi koro Ayhutatte nu ye kasasi kaasay maallay malse holasenu kuyyu ho miinteema shikkaare tayyuttay uuma an he poghadhi.
3 Ato tampepa dheeko koro Ayhutattena uuma aʼaray,
hussa maallay dhupayitettay qhama ye apaqhqhasintinu an ho waatadha.
4 Perre haayyu miʼayunkitonu payyatti piyye tayyunakka ikkodhdhita katama Iyyerusaalemenna kittattekka qhama malala qaakiisi koro Ayhutatte kaasay iʼara.
5 Holuppa laadhdhi usundhe qalle woʼa payni,
korossi tampe amante taanina uuma tiqadhana kittatte qhama ferisawitto kodhdhipa isan qaakasa iyye ara.
6 Hantu olho ana maallay ye kasasipa xaysa itʼtʼuya kʼaalessi Haallikko appaadhdhe haaninu xuliisa qhoota an kippo kodhi maallay.
7 Kaffessi haani hudhdhampa lakki kippusasa xafenu awnepa kuyyaqate Haallikkonu kodhadhetakki tiqitadhe,
nukusa hayyu,
koro Ayhutattekka olohu na mallay ye kasasi haadhi kipusa maallay!
8 Emma Haallikko koro farriisi haqise qhamu ye alkasisa moonuka kottepa isa dhihadhanku?
9 “Anokka pukkaqate tayyuna makaxkko Iyyesuse Nazireteesi haki ye alkasamni saasa toore ye gheqasa kan payipa isan dhihadha ahxay.
10 Katama Iyyerusaalemenna kittattekka olho hasa lighaasiki an kodhi;
hayo intawampawhe kʼeesadhdheetenaki an akkadhipa k’ulk’ullawhe kishaasi manne shappeetesa yaka,
qhama usundhe paxninukka naqale ghara.
11 Kuyyaqqe kishana usundhe kʼatʼasisenu karo manne ghissoote koro Ayhutatte tookkenu tookke kula isan aʼashshapa Pogholhosi qhamu dhaghisnenuka isan usundhe kittesa,
miirattakka kodhdhapa katamaadhdhessi piyyaadhe pileete qagha saasa isan na kalla ashshapa isan usundhe ghoghora.
12 “Qhamussa kula kuyyaqko tookko wannadhdhe kʼeesadhdheetenakka hayo akkadhapa isan karo katama Temaaskʼo kula ashshana,
13 nukusa haayyu,
kuyyaqate kitte an onkatte qaghana hammakko ho oqhqhayenu ghulaasikki an hiʼi,
hammakussakka anopa korossi ye qale ashsha kaaʼitakki moontikki hxusi.
14 Ine kaasay piyyematte rannoonina ikkitto hasa payiisikki an pako Ipraysit’atettay apaqhi ‹Saoole,
Saoole!
Ata moonukki aye ghoghorti?
Sipilho lutʼuqa sappeema ashikkariti payni pukkaqte tahuusikki akkotati.›
15 Anokka ana payi ‹Pogholho hayyu!
Ato yaxa?›
Pogholhokka hasa iyyela payi:
‹Ano hossi atho ye ghoghorti Iyyesuse.
16 Hantu kapay haqpa lughghe haahuuttay shikkaar!
Olho qhota hayyu hantu ahiitipa olho karo mintaʼitakka anho hiʼasenenu kodhampako pana qhama ye torruyitinu ho xawwatadhenu anho armadhi.
17 Warshossi haahuppa korossi ye koro Ayhutatte kodhdhu anna kula ho erakninakka anho pinnisna.
18 Atokka ehxhxe huusundhiisiki anu qhashinti,
tukankito karo hammako kula,
humna Seetʼanana kalla karo Haallikkito ausundhe holasinti,
usundhekka cʼuppo huusundhina hxurakko ittayane,
yetta dhukkaysadhe tusundhittay hessi kʼulkʼullawwe kodhdhe qalekki xayto tayanne.›
19 “Lammi nukusito Akirpa,
raayessi moontonu ye armatisi anu iishukka!
20 Naqharray qharitteema koro kathama Temaskʼonna qaaka,
nakalakka koro kathama Iyyerusaalemeppa koro piyye Yihutanna qagha kaasay holuppa korossi ye koro Ayhutatte kodhdhukka qhamu cʼuppito karo Haallikkito holleppa kodhmo hole huusundhi hi’aasa kodhonkinnu pareema an usundhe kollisi.
21 Koro Ayhutattekka hussa maallakki Manne Kuʼlkʼullawhatte kittatte ye ghapeppa isi ye poghe woʼa.
22 Kʼarkʼarsunte Haallikkito haka kuyyu saasa ye yela kanta reehammukka,
hussa maallay haadhi hantu ashikkaaripa ho qhacʼapa ho dhamma kaasannu isan torruya,
olhossi hxuumampawhepa Muuse qharaʼita payenna ikkodhdhamannapa torruyonki malettay olho pille toʼokoka anu qalladhu.
23 Hussakka ‹Kristoose qhamu rakko akkanipa,
he farrena payyooteema haqettay waarsho haanipa waarsho ye koro Ayhutatte kodhdhunu hammakkokka saluyusikkia› qalle.”
24 Pawloose ihhaana olissasi qalladhatte gheyyana Fistʼoose ikkitto dhammattakki hasa paypa riiru:
“Ato Pawloose,
ata keeni assarootti,
kollinko dhamma kolladhe taahuttay pukkaqate ihola kilamti!”
25 Pawloose kapay hasi payipa nu holasu “Ato ho kanasamti Fistʼoose,
olhan qalladhi ho dhukkattepa ho ghara dhiishay anu saroodhukka.
26 Ato nukusa,
oli hantu an qalladhiisi aʼaray,
hussa maallay ho miinteema saqakottay an qallana,
holuppa olho abhadhdhamtettay kodhi qhooti ye qaghi maallay olho nabhadhamna toʼokoka qhamu yena qaghisa an ara.
27 Nukusa Akirpa,
matʼafaadhe hxumampawhatteesi adhukkaysadha qandhi?
Holuppa qhama dhukkaysatisa anho ara.”
28 Akripakka Pawloosena ina payina:
“Xaysa kata akristaanito ye kodhe wooti?”
29 Pawloosekka ina payina:
“Xaysa katakka ikkodhita kuyyaqqe karo mintaʼitanakka,
atho patta ye kodhdhunna koru xayna qaghapa qalliite tayyuusi apaqhu kaasay shappi hayyu malettay qhamo hayyu kula qhamu kodhdhinenu Haallikkoosi awwatadha!”
30 Xaysa tupettayi nukusittopa qhawhossi piyye rafisapa Pernikʼe pana korossi naqale qakkadha kaasay ihhaqi.
31 Hahanu lighonkippa isi ashshana hasi illena papaye:
“Qhawhu kulay dhappitte farteema taakkinti shappema uso hxafasnaasi ye kodhukka.”
32 Akripakka Fistʼoosena ina payi:
“Qhawhu kulay karo Kʼesaresi piyye Roome rafisa kulakki ye likkasa ye payu payni hasa hela ishighni ahxay.”