Ashshanko Pawloose Karo Roome Kula
27
Xinkesi karo piyye Tʼaliya kula markapettay qhama ashshinaninu apayina Pawloosepa korossi uso qale shapamaasikka qhawhossi qhipampawhe qhootatte Awkistʼoosenna kittatte waannitto kodhdhi ana payi Yuliyoosemi teexe.
2 Markapesi katama Atiramitʼisennu haqatipa isi xayto markabhaadhe na shikkaare piyye Isiyanna kaanta qagha kula ashshasa hadhdhaanippa qandhe sapaʼita ashshankosi payyaani.
Qhawhossi piyye Mekʼdhoniyanu ashshipa isi katama Teselonikʼena qaaka ana Arstʼirokoose payikka ine qaleli qaghi.
3 Haqhayina sinkatho katama Sidhonanna hxafooni,
qhawhossi Yuliyoose ana payika qhooti Pawloosenu xesno dhihadhi maallay qhamu koro uso cʼikadha kula ashshinipa olho uso gheqasaasi akkadhunu innu payi.
4 Hahanukka ahaqanipa isan ashshanina uruure qhooti inena miinatte ururuyti maallay piyyessi pasito kittatte qaghay Kʼopiroose ana payttay he ghapanippa markapettay ashshanko haaniisi tiyyisaani.
5 Pasosi piyye Kilkʼiyappa piyye Pinfiliyanna kanta qagha kula an tahxhxini tupettayi katamassi piyye Lukʼiya na kittatte qagha katama Muranna hxafooni.
6 Haahakka wannittossi qhipampawhe dhippanna markape te katama Iskintiriyanu piyye Tʼaliya kula ashshaasikki tayipa na ine hadhdhasu.
7 Lokko isan ashshaanippa kuyyaqqe kishana kittatte rakko dhammattay katama Kʼentosenna kanta hxafooni.
Mintaʼita qhamu ini ashineeninu urure qhooti ine mitti maallay katama Selmonanna kaaʼita lighghanippa piyyessi Kʼertʼese pasito kittatte qaghattay he ghapanippa ashshoni.
8 Rakko dhamma an hiini tupettay hinaase kaaʼita lighanippa katamassi Laasiya xayto markabhadhdhe na shikkare Xayto Xeesa ana payina kaanta hxafooni.
9 Ashshanko ine olitisina payyatti kuyyaqqe kishakki lighghipa Kuyyaqakosi Ghisso Hxurakitokkaa saarppu maallay xay tupettay paso sapaʼita ashshanko uumi haxi,
hussa maallay Pawloose hasi payipa dhihamu:
10 “Hune koru,
tannu ashanku haani xay tupettay qhamu uuma haxnipa mahxepa markape patta ye kodhdhunna ineemakka qhamu rakko dhamma hxafasinisa ye armadhi.”
11 Naqharray wannittossi qhipampawhe dhippay dhihamte Pawloosenna kaanta qalliite qhawhossi markape dhaana pana appa markapatenakki apaqhqhasi.
12 Katankoosi xaytusasa likkase qhooti ye ghari maallay koro kisha karo Finkʼe kula qhamu ashshinepa haama oladhukinukki kippo kodheppa ashshanko haani qhaman tiyyisnaaninu asappo teexonki,
katama Finkʼe markapadhe na shikkaarekka piyye Kʼertʼese karo Kalleete oqhaye xullanna pana karo ameete oqhayye xullanna mintaʼita qaghti.
13 Uruure qhacʼaki karo kalleete ururuyina he qhamossi dhihadhe kula nu kodhdhitikki nu lightipa siplessi amarkapettay shikkarashiisi roponkippa piyye Kʼertʼesena hinaseʼita ashshonkkii
14 Naqharray okoto ye oladhunna uruuressi haxa Karo kutu Oqhqhaye Lighanna an payikki piyyesi pasito kittatte qaghannu haqipa hakatakko usundheema oodhdhi.
15 Markapesikka qhooti uruure dhuukti maallay mintaʼita ashshe ye alkasu,
hussa maallay onkessi anna ashshine an hela xurrippa uruure xayto pile kula ine dhaani.
16 Piyyessi pasito kittatte qaghay Kʼedha ana payttakka he ghapanippa isan ashshaaninna tardhinko dhamma tupettay konkossi markapatteesi pehisaani.
17 Konkosiisi ikkiikeppa hadhdhasonki tupettay markape qhamu ye ghoghodhamintinu surrettakki mareppa shaponki;
luutessi taxakkito anna payina Sirtiisesi qhamu ye woqhntinukki ghaapeppa sharassi odhdhasonkippa na sappaʼita qhamu ashshintinu kodhonki.
18 Uruuresikka qhooti uuma ine rakkisti maallay ha qhayna sinkatho mahxhxaadhisi amarkapeema feiisi paso kitteemi yake paayye.
19 Kuyyaqako isxanna mahxadhdhesi asharattay hadhdhasipa isa odhdhasasi xarghghe huusundhittaki shagheppa pasosisa yakonki.
20 Kuyyaqqe kisha oqhqhayepa xuske moontito qhooti ye armadhonkippa uruurekka ineema naqi maallay xaynu koru ini pehene kampaynippa kippo qhaqhaani.
21 Korossi yiʼo ye yiunna kuyyaqqe kisha iʼoladhi tupettay,
Pawloose usundhe kiteemi shikkaaripa hasa payu:
“Hune koru olho ano hune qallisikki ayyela apaqhteppa piyye Kʼertʼesena lighe hela hxuranku payni raku hasa ligha ye huneema hxafni ahxay.
22 Haay,
olo ghaape!
Hantukka kokkisadha kampaypa isan hune dhihama markape patta dhiishay hunena qhawho toʼokokkakki ye kohxanni.
23 Awni Haallikkosi an huusu kodhdhipa isannu kodhadha erkampatte tuususikki ye kula erakipa ye kaaqqila shikkaarippa hasa yela payi:
24 ‹Pawloose olo ghaapi!
Kʼesaare minteema shikkare ho gheeqasa!
Haadhi,
korussa ho qale ashshakka ho maallaki Haallikko hxurako huusuttay fartatte pehisi.›
25 Hussa maallay korunka,
haay,
olo ghaapi!
Haallikko olissa iyeesi qalli kaasaasi qhamu konisa ano an dhukkaysadhaye.
26 Ikkodhdhitama kapay uruurettay akkamepa piyye toʼon pasito kittatte qaghassa kʼurame ye inena haqhni.”
Markapessi Ghoghondhamti
27 Awne 14 pasosi Atiriyanna kittatte urure haʼitapa ha koru isi ine lallaaghanna awne parakitte kodhampawhessi markapatte he hinaase kula itʼtʼuyekki nu lighti.
28 Hussa maallay qandhi mala ghaqiti qhamu hakatakko sikapesa arenu suresi aʼaqandhettay bhatʼisikki na kittakata kʼureppa ibhbhatʼenna metire hudhanko salax kula ghaqqikki sikaape.
Iʼokoto saleppa lanka kʼuronkina metire hudhanko isex kula kaqiki hxafe.
29 Awrughessi pasito hinaseete qaghaasi qhamu ye woqhintti maallakki ghaapeppa siplessi amarkapettay shikkarashisi salax markapate konatho koray odhasonkippa hasa payonkippa ghissadhe payyonkki:
“Xayto tannu qhayni.”
30 Kodhampawhessi markapattekka he mintaʼita siplesi markapettay ashikkarashi kʼura kulaki ligheppa konkosi markapate qaghasi qandhe kitta oodhasonkippa isi ghoradhe woʼa.
31 Pawloose wannittossi qhipampawhe dhippannapa hessi uso qale qaghana ina payi:
“Kodhampawhi markapatekki markape saappeema ye gheyye payni hunekka pehe huni alkasinte.”
32 Xinkissana qhipampawhessi surre akkonkosittay shapisikki qhitʼeppa konkosi qandhe sappaʼita hela hxurronki.
33 Xayto iqhqhayeete qaghana Pawloose usundhe kaasay qhamu yiʼo yiinenukki hasa payipa usundhe watadhu:
“Kulay inna he ghadhankuppa yiito huni lokodhonkunakki akuyyaqako 14 hxafaste.
34 Qhooti hune dhiktisni maallay qhama yiito yiintenukki anhune waatadhi.
Hunena kittate qhawho kaso huusuna toʼokokka na panni ye qaghi.”
35 Ihhasa payi tupettay dhilantakosiki akkipa usundhe kaasay miinteema Haallikkoosi kalataysadhuppa,
ghodhdhuppa yiʼe paayyu.
36 Usundhe kaasakka he dhikitsonkippa yiʼosisi yiʼonki.
37 Ine he markapete kittate qagha qhawho 276.
38 Iyyiʼeppa dhalaxonghi tupettay kasposi markapate kittate qaghaasi paso kitteemi yakeppa markapatte dhooqho sholoʼisonki.
39 Xayto iqhqhayina piyyeema qhamu itʼtʼuyessa ye aronki,
naqharray taxakko paso hinaaseʼita qaghasikki hiʼe;
innu alkasamna payni markapesiisi qhamu dhukneppa hinaase kula lihasonkiki hela ghadhe.
40 Siplesi amarkapettay shikkarashiisi iqhqhitʼeppa pasoʼita hela yakonki,
xinghisana olhossi amarkapettay dhaanina surresikka ishshighonki.
Sharasi miinate qaghaasika uruurenu sape kula pasonkippa pasito hinaase kula ashshanko payyonki.
41 Naqharayi marikapesi luute taxakitoosiki woqhtipa piyye kohxi.
Miintekka piyyekkata na maayamippa isi yelehti,
konatho korakka qhooti uruurettay kotaʼamti maallay ghoghondhame paayyi.
42 Qhipampawhesikka korossi shappeetena qhawho toʼokokka qhamu ye sorinippa taaghetay patu maallay poghghenukki gharsadhe.
43 Wannittossi dhippanna kapay qhooti Pawloose pinnise woʼi maallay dhihadhe tuusundhisi ye akkadhu,
laadhdhi qhawho taaghe alkasa kaasay qhamu sorrinipa piyye kula lighunukki hayo teexi.
44 He haqhekka tʼawlaadhdhepa ghodhanawhesi markapatteesi qhamu ghapaneppa lighonkinukki hayi.
Usundhe kaasay onke hasa lighattay nakayhottay piyye kula lighonki.