Pawloose Piyyesi Malta Qandhettay Qhorramitina
28
An nakayhottay piyyatte hxafni tupettay piyyisa qandhettay qhorramiti Malta qhamu kodhdhitisa an upanni.
2 Koro piyyisana qaakakka xeesno koro dhahxhxisatakki ine akkadhi,
qhoota irrawo dhipipa isi oshoona maallakka hattesikki ine hoghe.
3 Pawloosekka paaqesikki sooqipa isi hattesisa hoghana,
qhooti xayto tori maallay puute lighipa xarghooma na maramoy.
4 Korossi piyyisana qaaka tawwossi xarghooma na maramisi ihhiʼinna hasi payi:
“Qhawhu karayekka ho qhawho poghi!
Ipsito pinakka payni qhaqhitattea Haallikktokk qhamu qaghottay qaghninu ye payu.”
5 Pawloose kapay tawwosiisi hattesisa ihela muxi,
okotokkakki ye uso kottaukka.
6 Korossikka hasi payipa isi tiqadha:
“Dhakinte tuusu hama katakki na poohxinti taakkinti tutuppe irrannipa faru.”
Naqharray iʼuuma tiqadhana olho toʼokokka yena kodhdhamadhina assaapo huusundhiisi iooheppa hasa payoonki:
“Husi Haallikko!”
7 Xaytusana kaanta wannittossi piyisana ana Pupiliyose payina pasho huusu qagha,
qhawsakki manne huususa hayhunkonu ine akadhipa kuyyaqako izzax xasottay ine yiashoy.
8 Kuyaqakusana paapo Pupiliyosesiki tornopa yoqhonko ghapipa udhmuppa isi rafa;
Pawloosekka na kapeema xullipa xargho huusuusi na sappa ghapadhuppa nu ghissadhuppa dhinu.
9 Iʼolissa kodhamadhi tupettayi koro pile ho udhdhamapa isi piyyisanna qaaka kaasakki okayipa dhinnoy.
10 Olho kishtakki ine kaanase,
an markapettay ashshankoma haqaninakka olho ine gheeqasa kaasaasi markapeema ine feʼonki.
Pawloose Katama Roomennaki Hxafi
11 Piyye Maltasa an leeqo izzex olannippa katankokka lighghuppa irrawokka salunna markape totetakka haqnippa ashshanko haani payyaani,
markapisakka te piyye Iskintiriyanna,
markapisana milkite waakidhe salaxxissi ana payi Diyoskʼoroosekkib naqagha.
12 Katama Sirakusanna hxafoonippa kuyyaqako izzaxi hamatte ghayyooni.
13 Hahanukka markapettay ashshoonippa katama Rekiyuumenna hxafooni;
hamattekka kuyyaqako tookko poghghaani tupettay qhooti urure karo tupeetena uruurti maallay kuyyaqako lankanna katama Puttiyoluusenna hxafooni.
14 Hahatikka koro dhukkaysadhasa hxafoonippa qhama kuyyaqako taxxan usundhe qale ghayyinaaninu ine waatadhonki,
xaysa tupetakka karo katama Roome kula ashshooni.
15 Koro dhukkaysadha katama Roomenna qagha qhama okaaynisa iʼapaqhenna haaka katama ana payi Moore Afiyooseppa xaytto Raftatte Izzex ana payi saasakki ine righadhe,
Pawloosekka iʼusundhe hiʼina Haallikkoosiki kalataysadhipa dhikitu.
16 An katama Roomenna xullininna Pawloose qhipampakkosi uso tiqadha illay qhamu qawni ghayyininuki anu payi.
17 Kuyyaqako izzxana tupettay Pawloose korossi Ayhutatte katama Roomena qaakanna kittatte koro bhahxomesiki ooqasipa,
iʼuso kapemate illa holenna inna payi;
“Koro haayu,
Ano waarsho Israeelattepa tampe appadheetena olho an dhappi toʼokkokka ye qaghi,
ikkodhdhitama kapay katama Iyyerusaaleme saamatteki an shappamipa koro Roomenukka aye likkasuppa aye teexu.
18 Usundhekka iye qhotosadhe tupettay dhappitte farteema ye hxafasnaasi qhooti yela dhape maallay iyye ishighnapa hasa ye hxuronkiki woʼe ahxay.
19 Koro Ayhutatte kapay hasa ishighame thaayyu usi qhooti ye akkadhonki maallay karo Kʼesaresi katama Roome rafisa kulakki iyye emmama payenu an kituyami dhiishay olho anna maallay waarsho hayyu kasasni anu sheeghikka.
20 Hantu qhamu an huneesi hiinipa olisi hune qalanuki an hune ooqasi;
ano kippossi Israeelenu teexami mallaki siplettay an shapami.”
21 Usundhekka hasi payeppa nu holasonki:
“Piyye Yihutannu qhawho ineesi taptape eraki ye qaghikka,
koro hassa kula okayi kaasanna kittattekka qhawho qhoota haahu kaaʼita olho maghaasi ine qalli ye qaghikka.
22 Ikkodhitama kapay koro dhukkaysadhi taahu atho dhukkaysatiisi xayto kaasanna qhamu athoorisa an araani,
hussa maallay inekka dhihadhe taahu qhamu moʼo kodhdhitisa are awooni.”
23 Kuyyaqako pile hunna illa holle innu ghape tupettay he kishaki kodhdheppa mannessi inna qaaki kula okayonki,
usokka sinkathonu paayipa haakka awnne saasa qhoota Ahxase Haallikkito nu ishshighoy,
kʼaalessi qhoota Iyyesuse matʼaafe Hikke Muuseppa ho Hxumampawhatesa athooxikka isi nu torruya.
24 Koro tookko tookko kʼaalesi ittorruyiisi idhdhukkaysadhi,
koro tookko kapay ye dhukkaysadhukka.
25 Usundhekka pukkaqaatte pukkaqaattnu ye ille xulonkinnakki pullame,
ikkodhitama kapay ye pullamonkinna qharaʼitha Pawloose hasina payi:
“Nasso Kʼulkʼullo appadhdhe hahundhinu hxuumampakko Issayaasettayc hasi payipa qalladhu:
26 ‹Kʼaalesi innu qallikka haadhi tiisi:
«Warshusa kula ashshapa na paayyanna
apaqhesi aʼapaqakuma kapay hune hela taayte,
eemesi aʼeemankumma naqaray huni hitte;
27 moʼo maalla payni waarshunna saqqe huusundhi inna fafe,
qhaame husundhikka inna dhakkoodhe,
ehxhxe huusundhdhikka inna taafe,
ahxay ehxhxe huusundhittay qhamu hiineppa,
qhame husundhitakka apaqhonkippa,
saqqe husundhitakka hela taayonkippa,
ye kula holonki payni an usundhe dhinisna.»›”
28 “Lammi erko dhinko Haallikkitona qhamu koro ye koro Ayhutatte kodhdhunu erkamisa arindha,
usundhekka inna apaqhasanki.”
29 [Ihhasa qalladhi tupettayi koro Ayhutatte pukkaqate pukkaqatenu uuma ille tamaakadheppa ashshonki.]
30 Pawloosekka mannessi ihxhxayyansadhipa isina qaakasa perko lakki poghghi,
koro uso kapeema okaya kaasaasikka isi akkadha.
31 Yaxakka yena dhawrasu malettay Ahxase Haallikkitoosi isi torruyapa qhota Pogholho Iyyesuse Kristoose kaaʼitakka shahxuntettay isi kollisa.