Petʼiroosepa Kʼornelewoose
10
Qhawho ana payi Kʼornelewoose ho katama Kʼisariyanna qaaka qagha.
Usokka qhawho qhipampawhe piyye Roomenna kaalla “Qhoota kko qhipampawhe Tʼaliyanna” kittatte waannitto qhipampawhe dhippanna.
2 Usokka qhawho ahxke huusu illay Haallikko ghaapapa isi kaanasa,
xiyyawhenukka qhawho olho gheeqasasi teexapa Haallikkoosikka kuyyaqqe kaasay isi ghissadha.
3 Kuyyaqako tookko issaate kollan hxafnanaki erkampatte Haallikkito raeetay toomoom nu armattipa Kʼornelewoos na paytinna hiʼu,
hasakka na payippa ooqi:
“Kʼornelewoose!”
4 Usokka muruketakki toomoomatte xaytossi erkampatte na qaghti kula emmadhipa hasa na payu:
“Pogholho ata moʼo?”
Erkampatekka hasinna payti:
“Ghissoote taahupa kodhmo haahu xeesa axiyawhenu kotti,
taayho ikodhdhipa Haallikkito kaanta hxafoy.
5 Hantu koroosi karo katama Iyyoppe kula erakpa qhawho ana payi Petʼiroose Simoonessi ooqasay.
6 Hantu uso qhawhossi qullidhdhe hxasha pasito kaanta qaakana ho Simioonenna manneti hayhunkottay qaghiye.”
7 Erkampattisay uso qallateesti illaghamiti tupettay Kʼornelewoose kodhampawhe lakkipa qhipampawhesi huusuna kittatte qhawho tookko ho Haallikko ghaapasi ooqu.
8 Olho kodhdhamadhi kaasaasi innu torruyi tupettay karo katama Iyyoppe kula usundhe eraku.
9 Haqhayna sinkkatho usundhe iʼashsheppa katamana kanta itʼtʼuyonkinna saate tappi hxafnana Petʼiroosekka ghissotenuki mannesi manneete sappeete qagha saappeema hadhdhi.
10 Xinkissana Petʼiroose qhooti uuma puffi maallay yiito iwwoʼi,
anu piife ghaqana kalla qhamo qhawho ulsinke hiʼa kulaki kodhdhipa oloku hiu.
11 Olissa nu armadhikka moonto qhashamipa oloku ho laalle dhammay ligha karo salaxttay aghapipa isi piyye kula odhdhasiki hiʼi.
12 Lallisanakka aaghe luhe salaxattay he qawni qawnippa he piyyaʼita erottay kuqama pana aaghe moontaʼita hoolottay haqakki na qagha.
13 Xinkissanakka Petʼiroose ikkitto hasa payisiki apaqhi:
“Petʼiroose,
haqpa saqhqhoppa yi’oy!”
14 Petʼiroose kapay ippayina:
“Pogholho hayyu,
ye kodhdhintikka!
Ano apar olho ye alheesamuppa olho lokmadhisi anu yiʼukka.”
15 Ikkittossi lanka ihholipa hasa payu:
“Ho Haallikko alheesiisi atho ho lokmadhi olo payi.”
16 Ikkitussakka izzextakki hasa payi tupettay laallesi nu armati hattakki moonto kula akkamti.
17 Petʼiroosekka olhossi nu armadhina ishighe tuusuusi;
ihela ghadheete qaghana korossi Kʼornelewoose erakikka manne Simoonessi ikkasqadheppa tayonki tupettay okayppa ghinteema shikkaronki.
18 Ikkitto dhammattay hasa payonkippa kasqadhonki:
“Manne Petʼirooseessi ana payi Simioone hayhunkottay na qaghi hisi?”
19 Petʼiroose irraeessi nu armati hannay hela ghadhana Nasso Kʼulkʼulo hasa na payi:
“Haadhi,
qhawho izzexki ho gheeqa.
20 Hussa maallay haqpa odhdhay,
Ano usundhe erakiye atu he ghadhunna na qale ashsha.”
21 Petʼiroosekka ioodhdhipa korossina hasa payu:
“Haadhi kulay qhawhossi aghgheeqte anona olhannu okayte moʼo?”
22 Usundhekka ina payenna:
“Qhawho ana payi Kʼornelewoose ho qhipampawhe dhippanna waannitto kodhdhi ine eraki,
usokka qhawho pare qagha ho waarsho Ayhutatte kaasay qhoota huusu kaʼitta olho xeesa torruyi,
usokka ho Haallikko ghaapa,
qhamu manne huusu kula ho okkasnipa olho aqqallitiisi hola apaqhunnukki erkampatte k’ulk’ullitte nu qalliti.”
23 Pet’iroosekka hayhunkotakki usundhe akkadhipa rafisu.
Haqhayna sinkatho haquppa usundhe qale ashshoy,
koro dhukkaysadha piyye Iyyoppenna qaghana kittatte tookke tookkekka na qali ashshe.
24 Kuyyaqako lankanna katama Kʼissariyannakki hxafe,
Kʼornelewoosekka ahxke huusu manneetepa dhalitto huususiki ooqipa isi usundhe tiqadha.
25 Petʼiroose immanne kaleema xullina Kʼornelewoose uso kulaki okayipa na kaleema ghulladhdhuppa nu sakatu.
26 Petʼiroose kapay:
“Anokka qhamo haahu qhawho ye haq!”
kina payipa haqisu.
27 Petʼiroosekka inni torroosadhana manne kaleematte xullunna,
koro kisha ho illa holiisiki hiʼu.
28 Korossinakka hasa payu:
“Qhawho sanynye Ayhutattena kodhdhi koro pile qale toʼokunko qhamu ye sheeghipa manne huusundhi kaleemakka qhamu ye xullininnu tampe dhukkaysadhe taanina qhamu dhawrastiisi hune pukkaqate taahudhina aʼaranku;
naqharray yaxanakka husi ye alheesamu taakkinti ho lokmadhi qhamu anu payninnu Haallikko iyye hiʼaasi.
29 Hussa maallakki ayye kaleema erkasamtenna anu iishunna an okayi.
Lammi hantu olhossi anna maallay ye ooqasteesi apaqhe awoʼi.”
30 Kʼornelewoosekka hasi payi:
“Kuyyaqako salxanna qharaʼita saati kollanna an manne hayyuna ghissadhana qhawho tookko ho laalle piqay urkuyiki tutuppe okayipa yela miinteema shikkaaruppa
31 hasa yela payu:
‹Kʼornelewoose,
Haallikko ghissoote taahuusi iʼapaqhi,
teexakkossi haahu axiyawhenu teextikka iqhqhaskadhi.
32 Korossi katama Iyyoppe kula erakpa Simoonessi ana payi Petʼirooseessi ooqasay;
usokka qhawhossi pasito kaanta qaakapa isi qullidhdhe hxashana ho Simioonenna manneeti ihhayhunkottay qaakiye.›
33 Anokka hussa mallaki an koroosi ho kula eraki,
athokka okaye taahuttay olho xeesa akkotti;
lammi ine kaasay olho Haallikko ine qalle woʼiisi qhama ine qallintinu haadhi Haallikko miinteema an illa holli.”
34 Petʼiroosekka hasi payipa qalladhe paayyu:
“Dhukkeemate Haallikko qhamu ye koro maadhanissa pareema ye hxulti.
35 Naqharray Haallikko he usoosi ghaapapa isi pare qaghunkko kodha qhawho piyye thinkannakka payni iʼuso akkadha.
36 Haallikkossi olho kaasanna Pogholho kodhdhi otessi xeesay nakayhito Iyyesus Kristoose kaakkoru waarsho Israʼeelattenu eraki tiisi.
37 Yohannise qhoota shoxatatte ittorruyi tupettay piyye Kalilannu paayyati haka piyye Yihuta saasa olho kodhdhamadhiisi aʼaranku.
38 Haallikko Iyyesusessi Nazrateesi humnapa Nasso K’ulk’ullottakki shiini,
Usokka Haallikko qhooti na qale qaghi maallay xaytu ashshi kaasanna olho xeesa innu kodhi,
he Oritottay ghappame kaasaasikka dhinnisoy.
39 “Olhu Uso Piyye Ayhutattepa katama Iyyerusaalemenna kittatte kodhi kaasannu ine misikiradhe huusu;
naqharray koro ususassiki kaarkkoma dhisipa poghu.
40 Ikkodhitama kapay Haallikko kuyyaqako izzxanna fartatte iʼuso haqisipa koronu qhamu armani kodhu.
41 Hinnu armadhikka koro kaasannu qandhimma,
iffartatte haqi tupettay inessi na qale yiʼo yiinippa na qale qukaani pana hessi Haallikko qharriteema ine qholadhi misikiraadhdhe huusunu patta.
42 Olissa kodhdhamadhiisi waarshonu qhamu an torruynaanippa Uso koro qaghapa ho farrisa qhamu qhaqhitte qhaqhninu ho Haallikko xawwadhi qhamu kodhdhisa qallaaninnuki ine hayi.
43 Qhawho uso dhukkaysadha kaasay makaxko huusuttay cʼuppito hxurakko qhamu tayanisa hxuumampawhe kaasakki torruyi.”
44 Petʼiroose ihhanny olissaasi torruyana korossi kʼaale apaqhqhasisa Nasso Kʼulkʼullo na odhdhi.
45 Korossi Ayhutatte karrazami dhukkaysadhana kittatte hessi Petʼiroose qale okaye Haallikko koroye koro Ayhutatte kodhdhunnukakki qhamu Nasso Kʼulkʼullo teexisi ihhiʼena idhdhahxhxe.
46 Usundhekka qhooti pakke pile pilettay qalladheppa isi Haallikko kaanasana apaqhe maallay.
Xinkissana Petʼiroose hasi payi:
47 “Koru qhamo haani kula Nasso Kʼulkʼullo qhooti akkadhi maallay,
shoxatte qandheete shoxadhe yaxa na dhawrasna?”
48 Lammi makaxko Iyyesus Kristoosettay qhamu shoxatte shoxadhenuki usundhe hayi.
Xaysa tupettay Petʼiroose kuyyaqqe qhacʼa qhamu usundhe qale ghayyininu waatadhonki.