Petʼiroose Koro Ayhutatte Ye Kodhdhu Kula Moonu Qhamu Ashshiki Torruyi
11
Erkkampawhepa korossi dhukkaysadha piyye Yihutanna qagha koro Ayhutatte ye kodhdhu qhamu kʼaale Haallikkitoosi akkadhessa iʼapaqhe.
2 Hussa maallay Petʼiroose ihholipa karo katama Iyyerusaaleme kula holunna korossi dhukkaysadha karrazame piyye Ayhutattena inna dheehadhe.
3 Hasakka na payonki:
“Moʼonukka ashshitipa mannadhdhe koro ye karazamunna yiʼo yiʼoy?”
4 Petʼiroose kapay hasi payipa olho kaasaasi ille kaleema ghadheesoppa nu qalle paayyu:
5 “An katama Iyyoppena ghissotatte qaghanakki an qhamo qhawho ulsinke hiʼa kula kodhdhipa raee hiʼa.
Olissa an hiʼikka laalle ghandhaqay te karo salaxttay aghapipa moonto ghutu xayto ano qaghisa isi oodhdhasiki an hiʼi.
6 Olissakka an tomoomatte eemana laallissanna saappeete aaghe luhhe salaxtappa aaghe mandhittopa uumata eerottay kuqama pana aaghe moontoʼita hoolottay haqaasikki an hiʼi.
7 Xinkissana ikkitto hasa yela payisiki an apaqhi:
‹Petʼiroose,
haqpa saqhqhoppa yiʼoy!›
8 Ano kapay anna payina:
‹Pogholho hayyu hasa ye kodhdhinti!
Olho lokmadhi taakkinti olho ye alheesamuusi anu yiʼuppa aro.›
9 Naqharray lankakka ikkitto moontonu hasa payisiki an apaqhi:
‹Olho Haallikko alheesiisi ho lokmadhi paye ye ho gheeqasti.›
10 Olissakka izzextakki hasa payi tupettay olhossi kaasay ihholipa moonto kula akkamu.
11 “Saatissanna qhawhossi izzex akatama Kʼisariyanu ye kula erakikki mannessi ano na qaghina ghintatti hxafeppa isi shikkaara.
12 Nasso Kʼulkʼullokka olho toʼokkokka anu he ghadhunna qhamu anna qale ashshininu ye qallu.
Qhawho tappikka ye qale ashshoppa qhawhossi anna payina Kʼornelewoosena manne huususa xullaani.
13 Usokka qhamu erkampatte manne huususa okkayti shikkaarippa hasa na payisiki ine qalli:
‹Karo katama Iyyoppe kula qhawho erakpa Pʼetiroosessi ana payi Simioonesi ooqasay.
14 Usokka kʼaalessi athopa ahxke haahu kaasay adhdhintetakki ihho qalliniye qhamu ina paytiisika ine qalli.›
15 Anokka an hannay qalladhe payina Nasso Kʼulkʼullo qhamosi qharro ine sappeema odhdhi kula usundhe sappemakka odhdhu.
16 Xinkissana kʼaalessi Pogholho payna:
‹Hantu Yohannise qandhetaakki koro shoxima hune kapay Nasso Kʼulkʼullotakki ashoxadhinteki› yela taayami.
17 Ine xinkesi Pogholho Iyyesus Kristoosettay dhukkaysanina texakkosi Haallikko ineesi teexisi usundheesika innu teexi payni emma Haallikkito dhawrase iyye alkasamnay?”
18 Usundhdhekka iqallithisaasi apaqhenna olhu qallinekki dhapeppa hasa payonkippa Haallikko kaanasonki:
“Lammi hasi kodhdhiti payni koro Ayhutatte ye kodhdhukka qhamu c’uppito karo Haallikko hollinu Haallikko onke innu gharisi.”
Toʼokunko Koro Dhukkaysadha Katama Antʼokiyana Qagha
19 Hessi ghoratho Istʼifanosema haqittay pullame kaasay kʼaale Haallikkitoosi koro Ayhutattenu patta inni torruyana haka piyye Finkʼeppa piyye Kʼopʼirooseppa haka katama Antʼokiya saasa ihxhxafe.
20 Tookke tookkesi piyye Kʼopʼiroseppa piyye Kʼerenanu okaye karo katama Antʼokiya kulakki ashsheppa koro piyye Krikatenukka otessi xeesa Pogholho Iyyesussesi torruyonki.
21 Pogholhokka humna huusuttay usundhe qalli kodhdhi,
koro uuma kishakka dhukkaysadhuppa Pogholho kula holu.
22 Otisakka toʼokunko koro dhukkaysadha katama Iyyerusaalemenna qaghanakki qhaskati;
usundhekka Parnapasesi karo katama Antʼokiya kula erakkonki.
23 Usokka iʼashshipa haaha hxafinna teexakkosi Haallikko korussanu teexisi ihhiʼipa hxasoodhoy,
holuppa usundhe kaasay qhamu saqakko dhukkatettay Pogholhoosi dhukkaysaneppa dhikitonkinu usundhe dhihamu.
24 Parnapasekka qhawho xeesa ho Nasso Kʼulkʼullopa dhukkaysadhettay hoqhqhi qhooti kodhi maallay koro kisha Pogholho kula holi.
25 Xaysa tupettay Parnapaase Saoole gheeqenuki karo katama T’eresese kula ashshi.
26 Ittayinakka karo katama Antʼokiya kulakki okayittay;
usundhe lakki perkko tookko toʼokunko koro dhukkaysadha qale kodhonkippa koro kishaasi kollisonkki.
Paayyooteema katama Antʼokiyanakka kolladhampawhatte “kristanadhe” ana payipa makaxu.
27 Xinkissana hxumampawhe tookke tookke katama Iyyerusaalemenu karo katama Antʼokiya kulakki ashshi.
28 Usundhisana kittatte qhawho ana payina Akapoose haqipa piyye qhaatʼe kaasassa qhamu laaqe lighintisa Nasso Kʼulkʼullottay hxuuma qalladhu.
Olissakka perre nikusa piyye Roome Kʼelawtewoose piyyadhe kisha rafisinaki dhikkadhi.
29 Hussa maallay koro dhukkaysadhe katama Antʼokiyana qaagha korossi dhukkaysadha piyye Yihutanna qaakkasi kʼarkʼarenuki olho alkasnesi pukkaqate pukkaqateema pohenu qhaqhadhe.
30 Hossi illeema holasekka Parnapasepa Saoolettay xaadhighghe toʼokunko koro dhukkaysadhana kula erakkonki.