Petʼroose Manne Shappeetena Dhahxhxootetaakki Lighi
12
Perrisana nukusa Herodiise toʼonkuko koro dhukkaysadhaana tookke tookkesiki ghoghoripa isi uuma rakkisa.
2 Qharunko Yohannise Yaykʼoopesika kooratettay poghasu.
3 Kodhmusa hasa ligha koro Ayihutateesi qhamu hxaseesi ihiʼina ihholipa Petʼirooseessikka ghapasu.
Olissakka hu kodhdhamadhi kuyyaqqesi koro Ayhutatte Paale Dhilankkito kaanasenu gharsaadhina.
4 Petʼirooseessi ighghapasipa manne shappeetesa xulleesu tupettay foolisadhdhe salax salax qhamu xayto salaxsa qhootamneppa tara tara tiqadhonkinu likasuppa teexu.
Olhunu hasa kodhikka Paalesi Faasikkay koro Ayhutatte kaanasia tupettay qhamu koro minta itʼtʼosnipa qhaqhitte na qhaqhasu maallay.
5 Petʼiroose onke hasa lighattakki manne shappeetesa xulli,
emma naqharray toʼokunko koro dhukkaysadhana qhoota huusu maallay karo Haallikkito uumi ghissadhe.
6 Haqhayna sinkkatho Herodiise Petʼirooseessi waarsho miinteema an itʼtʼosniki payipa dhihadhoy,
Petʼiroose kaallapkusana siple lakkitaakki ashapipa foolisadhdhe lakkina kitteqila rafu;
foolisadhdhe tokkesi manne shappeete tiqadhakka manne shappeetena mannkaxeeti shikkaare.
7 Xinkissana erkampatte Pogholhito tutuppe armadhi,
mannessi usona qaghina kittatekka hammakko hammasamu.
Erkampatessikka Petʼiroosena ghinaqqe inna shoqhtipa tayrisippa “Wadhpa haqay!”
na payina siplesi xarghghe huusuna ina hayye.
8 Erkampattessikka ina payti:
“Sakʼkʼe shappadhipa hxopeesikka qadhdhadhay.”
Petʼiroosekka qhamosi erkampatte na payti kulakki kodhi.
Nakalakka erkampattesi ina payti:
“Koote taahu ghutuusikka qadhdhadhapa ye kaleematte okayay.”
9 Petʼiroosekka illighipa na kaleema ashshoy,
kapay qhawho oloku hiʼiki nu lighi dhiishay olhossi erkampatte nu kotti kaasay dhuke ye nu lighikka.
10 Foolissadhessi paayyootatepa he lanka uso tiqadhanna illighgheppa mankkaxessi sippileete akʼupi karo katama kula ana lighina hxafonki.
Mankaxessikka olo kohxunakki hasa hela qhashameppa usundhekka lighonkkippa ashshonki;
iʼonke takkassa ille qale ashshe tupettay erkampatte tutuppe inna kalla reehhamitipa ashshoy.
11 Petʼiroosekka ihhe taayina hasi payi:
“Qhamu Pogholho erkampatte erakipa xarghghe Herotiiseppa olhossi waarsho Ayhutatte yeema dhihadi kaasanna kalla ye pinnisuusi dhukkeema haannakka upadhi!”
12 Iʼolissaasi upadhi tupettay xaytossi koro kisha illeema holipa isi ghissadhana Yohannisesi Markʼoose ana payina ho yaye tuusu Mariyaame kula ashshi.
13 Haahakka hxafoppa immankaxxe koxisana kodhampatte te ana payi Roodha qhawhusa upadhenukki mannkaxe kula ashshiti.
14 Ikkitto Petʼiroose qhamu kodhdhisi upatina qhooti uuma hxasootti maallay mankaxxessi ye qhashunaki korossi kula sortipa Petʼiroose qhamu mankaxxeete shikaarisa nu qalli.
15 Usundhekka inna payena:
“Ata saarotim!”
Ise kapay dhukkeema uso qhamu kodhdhisa ina hoholtipa nu qallina usundhekka tannu ippayenna:
“Yaxaaray kaasseb tuusu kodhdhinti.”
16 Petʼiroose kapay mankaxxe koxiseesi ye hxurukka;
usundhekka immankaxxe qhasheppa usoosi hiʼonkinna idhdhahxhxe.
17 Uso kapay qhamu kʼampaynenukki xarghottay nu pako shoqhqhadhipa Pogholho qhamu malala manne shappeetena kittatte uso lihasiisi nu qalluppa olissaasikka Ya’ikʼoopepa hesi dhukkaysadha tookkenukka qalla na payuppa na kanta xayto pile kula ashshoy.
18 Xayto iqhqhayi tupettay foolisadhdhe:
“Ata Petʼirooseessi ahaami pati?”
kippayeppa gheeqe paayyonki.
19 Herodhiisekka Petʼirooseesi ighgheeqasipa dhapu tupettay folissadhesi zape tiqadhaasikka kasqadhuppa tupe na dhapuna qhama poghninuki hayo teexi.
Xaysa tupettay Herodiise piyye Yihuta nnu ihhaqipa karo katama Kʼisariya kula ashshoppa haha isi qaaka.
Farte Herodiise
20 Heroodhisekka koro katama Tʼiroseppa Sidhona qale ye ghari.
Hussa maallay soropitosi nukusay Pilastʼoose ana payi qhamu usundhe qale kodhdhininu ikkasqadheppa nu eeʼe payu tupettay ille qalli kodhdheppa Herodiisena araranko kasqadhonki.
Olhu namaallay hasa kodhekka mangho yiʼitoosi qhooti piyye tuusuna tayadhe maallay.
21 Kuyyaqakosi ararankitona Herodiise lalladhesi nukusunkitoosiki qadhdhadhipa qakkatte qhaqhitatesa qakkadhuppa waarshonu qalliite qhaashu.
22 Waarshokka hasi payipa riiru:
“Husi ikkitto Haallikkito dhiishay ho qhawhito qandhikka!”
23 Herotiisekka qhooti ye Haallikkonu kaanaste teexu maallay erkampatte Pogholhito hattakki shoqhtipa soporqhoodhuppa faru.