Parnapaasepa Saooleesikka Eraki
13
Toʼokunkossi koro dhukkaysadha katama Antʼokiyanna qaghana kittatte hxumampawhepa kollisampawhe qagha;
usundhisakka:
Parnapaasepa Simoonesi ana Nekera payipa Lukiyoosesi katama Kʼerenanapa qhawhossi Herodhise salxay koro rafisa qale ghohi ana payi Miinahe pana Saoole qagha.
2 Usundhisakka Pogholhonukki kodhadheppa isi yiʼo male ghisiadhanna Nasso Kʼulkʼullo ina payi:
“Parnapaasepa Saooleesi kodhmossi anna maallay usundhe ooqinu ye reehindha!”
3 Usundhekka iyiʼo male ghissadhe tupettay xarghghe huusundhi na saappa ghapadhonkippa laaghghonki.
Kollise Parnapaaseppa Te Saoole Piyye Kʼoproosenna
4 Parnapaasepa Saooleesi Nasso Kʼulkʼullo karo katama Selewkʼiya kulaki usundhe eraki,
hahanukka konkottay karo piyye Kʼoproose kula ashshonki.
5 Katama Salamiisenna hxafonkippa mannaadhe koro Ayhutatte na ghissadhe kaleema xullonkippa kʼaale Haallikkito koro kollisonki.
Yohannisesi Markʼoose ana payikka usundhe qali qaghipa isi usundheesi kʼarkʼara.
6 Piyyesi Kʼopiroose kitaʼita illighgheppa katama Pafuna hxafonkina qhawho ana payi Pariyesus Ayhutawitto soʼakkopa hxuumampakko ayyasa hxafonki.
7 Usokka qhawhossi piyye rafisa Serkiyoosessi anna payi Pawloose qhawho tayhottay hoqhqhi qali qaghi,
qhawhusa piyye rafisakka Kʼaale Haallikitoosi apaqhi woʼipa Parnapasepa Saoolesi hekula ooqu.
8 Naqharray soʼakkossi pako Krikattettay Elmaase ana payi Pariyyesus,
qhawhossi piyye rafisa qhamu ye dhukkaysaninu qhooti woʼi maallay Parnapaasepa Saooleema torrakko inna haqisi.
9 Saoolessi ana payi Pawloose kapay Nasso Kʼulkʼullotakki hoqhqhipa qhawhosiisi uuma emmuppa hasa na payu:
10 “Ato miʼaye Orittito,
ho pare aghunko kaasanna parakara kodhdhiti,
ho dhohumuntepa maghnottay hoqhqhiti,
onkessi Pogholhito gheteaasi qonkoloolisatte kalla atu holinti?
11 Haadhi hantu xargho Pogholhito ho shoqhnapa,
taafakko kodhdhay,
lammi te takkasasa hammakko oqhaayyatteesi atu hiinti.”
Haattakka qhayanqhayhopa tukkanko nasappa oodhdhipa qhawho usona xargho ghapnapa situsikka gheeqe paayyu.
12 Qhawhosi piyye rafisakka olhossi kodhamadhiisi hiinittay kollinko Pogholhitotakki dhahxhxipa dhukkaysadhu.
Kollise Parnapaasepa Te Pawloose Piyye Pisidhiyanna
13 Xaysa tupettay Pawloose korossi na qale qagha illay markapettakki katama Pafunu haqeppa katamassi piyye Pinfiliyanna kittatte qagha karo Perke kula ashshonki.
Markʼoosesi ana Yohannise payi kapay usundhena kalla holipa karo katama Iyyerusaaleme kula ashshoy.
14 Usundhe kapay katama Perkenukki haqeppa karo katamassi Antʼokiya piyye Pisidhiyanna kittatte qagha kula ashshonki.
Kuyyaqako hxaysinkitona mannessi koro Ayhutatte na ghissadhi kula xullonkippa qakkadhoki.
15 Matʼafaadhdhessi Hikkattepa he Hxumampawhatte anapapi tupettay waannadhdhessi manne ghissotattena hasi payeppa na kula qhawho tookko erakkonki:
“Koro haani,
kʼaale waarsho dhihamnappa dhightiisi asheghanku payni into ine torruya.”
16 Pawloose ihhaqipa waarshossi kula xargho ghapuppa,
na payu:
“Hune he waarsho Israʼeelatte kodhdhite,
holuppa hunissa Haallikko ghaapa into apaqhqhasindha!
17 Waako waarshu Israʼeelattena appaadhdhe haanisikki qholadhi,
ippiyye Kiptʼattena kittatte qakankinakka waarsho dhamma usundhe kodhu,
humna huusu dhammatakka piyyisana usundhe lihasu.
18 Perkko hudhanko salax kula ghaqitti piyye mandhitona kittatte usundheesi dhuupadhu.
19 Xaysa tupettay piyye Keneʼanenna kittatte ahxasadhesi taxassi patisuppa piyisasi qhamu tayinenu usundhe kodhu.
20 Hussa kaasay perko 450 kula ghaqitinaki dhikkadhi.
Xaysa tupettay hakka hxumampakko Samueele saasa tanynyaadhi nu tteexu.
21 Nakaleema nukusa qhamunu teexninu Haallikkoosi kasqadhonki,
Haallikkokka qhawho sanynye Piniyamena kodhdhi miʼaye Kʼiise ho ana payi Saooleessi nu teexhu,
usokka perko 40 usundhe rafisu.
22 Saooleessi iʼoodhdhasi tupeettay dhaawiteesiki usundheesi nukusumisi,
Haallikko qhoota Thawithe ittoruyana,
hasi payi:
‹Qhawho woʼoko saqako hayyunapa olha woʼi kaasay dhikkisna miʼaye Isseyye Tawtheesiki antayi›.b
23 Haallikko kippossi ixulittay sanynye qhawhunna hossi dhinisampakko kodhdhi Iyyesusesikki Israeelenu eraki.
24 Iyyesuse hannay ye okayunna qharaʼita Yohannise koro Israeelatte kaasay qhamu c’uppito karo Haallikkito hollipa shoxatte shoxadhunukki nu torruy.
25 Yohannise ikkodhmo dhikkisatte qaghana ina payi:
‹Ano yaxa an hune lighi qhari?
Ano kulay Kristoose qandhikka,
naqharray ho suro hxope huusuna ishighe anu alkasnikki ye kaleema okayna.›c
26 “Koro haani:
hune hessi sanynye Aprihaamenna dhalateppa hunisana kittatte Haallikkoosi isa ghaapanku,
kʼaalli dhinkito hune kaasannukki aʼeraki.
27 Koro katama Iyyerusaalemenna qaakapa waannaadhe huusundhi Iyyesuse qhamu ho koro dhinisa kodhdhisa ye aronki;
ikkodhitama kapay kʼaalessi matʼaafaadhe hxumpawhattena kuyaqako hxaysinko koro Ayhutattena kaasay anapapi Usooma dhikkadhe gheeqasa maallay qhaqhitte inna qhaqhe.
28 Dhappite farteema Uso hxafasnaasi ina dhape kaki payni Pilatʼoose qhamu Uso poghninu uumi waatadhe.
29 Hxuumassi aqhoota huusu tooxi kaasaasi ikodheppa dhikkisoonki tupettay karkito iʼodhdhaseppa hawleema maayoonki.
30 Naqharray Haallikko fartatte Iʼuso haqisi.
31 Piyye Kalilannu paayyatti haaka Iyyerusaaleme saasa hessi qharaʼita Uso qale qaghanu kuyyaqqe kishana nu armadhu,
usundhisa hantu koro kaasannu misikiraadhe.
32 Inekka Kʼaalesi ote xeesanna kedhdhiti Haallikko appaadhdhe haaninu xulisikki an hune qallini.
33 Haallikko Iyyesusesi fartatte haqise tuusuttay kʼaalessi usundheesi xuli ine dhelle husundhinuki dhikkisi,
hussakka matʼaafa Koleete qhottate lakkinnna hasi payamipa tooxamoy:
‹Ato miʼaye hayyu,
ano kuyyu ho dhali.›d
34 Holuppa Uso qhamu ye kʼapuppa Haallikko fartatte haqisusa arasenu hasi payi:
‹Kipposi dhaawite kʼulkʼullawipa dhukkaysamaasikki anhune teexni›.e
35 Holuppa xayto pileete matʼaafa Koleetena ippayina:
‹Kʼulkʼullito haayyu qhamu ye kʼapninu atu kodhinti.›f
36 “Naqharray dhaawite perre huusu qaghitona kodhmo Haallikkitoosi ikodhadhipa dhikkisu tupettay iffaripa appaadhe huusu kapeema amaayuppa kʼapu.
37 Ho Haallikko fartatte haqisi kapay yekʼapukka.
38 Lammi koro haani,
cʼuppito hxurakko Iyyesusettay qhamu tayamisa an hune torruyiye hela sheeghindha,
39 qhawho Uso dhukkaysadha kaasay pare qakunkossi Hikke Muusettay tayadhe ye nu alkasamuusi Usottay ittayanna.
40 Hussa maallay olhossi hxumampawhe hasa payeppa torruyonki qhamu ye huneema okayninu he tiqitadhindha!
41 ‹Hune dhaashalaqqe eemindha,
dhahxhxa,
patankukka!
Kodhmo yaxakka ihune qalla payni
hunena dhukkaysadhinteki
an perre hahundhina konni.›g”
42 Pawloosepa Parnapaasekka imannessi ghisotatena kalla lighana korossi qhota olissa kaaʼita qhamu kuyyaqako hxaysikitona holleppa nu ttorruyonkinukki usundhe waatadhi.
43 Korossi ghissootenu okayi kaasay ippulami tupettay koro Ayhutattepa koro dhukkaysadhe Ayhutattesa holipa isi Haallikkoosi kaanasa Pawloosepa Parnapaase kaleemi ashshi.
Pawloosepa Parnapaasekka iʼusundhe kolliseppa teexakko Haallikkitottay qhamu kokisaneppa qaakonkinnu dhihamonki.
44 Kuyyaqako hxaysinkito na kala qaghana korossi katamissana kittatte qaakana koro ghula kʼaale Haallikkito apaqhasenukki illeema holi.
45 Koro Ayhutatte waarsho kisha hiinittay yokkuntetakki hoqhqhipa,
qalliite Pawlooseesi dhafoppa isi uso dhaghisa.
46 Pawloosepa Parnapaase kapay shahxuntetakki hasa na paye:
“Kʼaale Haallikkitoosi qhariteema huneesikki qalle gheqasti,
hune kapay adhdhafte.
Husittay qagho perre ye hume sheeghena qhamu ye hune gheeqasisa hune pukkaqate tahundhisa qhaqhitte qhaqhi,
lammi ine koro ye koro Ayhutatte kodhdhu kulakka laaghghaminanippa ashshooni.
47 Holuppa Pogholho hasi payipa ine hayu:
‹Dhinko Haallikkitoosi haka piyye qhaatʼe saasa qhama dhaghapoosintinu
koro ye koro Ayhutatte kodhdhunu hammakko anho kodhi.›” h
48 Koro ye koro Ayhutatte kodhdhuka iʼolissaasi apaqhina ihxhxasoodhi,
kʼaale Pogholhitoosikka kaanasu,
korossi qagho perre ye hume sheghinu gharsami kaasakka dhukkaysadhu.
49 Kʼaale Pogholhitoka piyyisa kaasay ghandhaqi.
50 Korossi Ayhutatte kapay koro dhukkaysadhe tuusundhittay kokkisadhapa xiske piyyisana aramapa tʼiiressi katamissana kittatte koro rafisa kaasakki haqiseppa Pawloosepa Parnapaasesi ghoghore payyonkippa piyye tuusundhina lihasonki.
51 Pawloosepa Parnapaasekka tulupakko luhhe husundhina qaghaasikki piyyisasa hela hayyiseppa karo piyye Ikʼkʼoniyoone kula ashshonki.
52 Kolladhampawhekka hxasopa Nasso Kʼulkʼullotakki hoqhqhe.