Kollise Pawlooseppa Parnapaase Katama Ikʼoniyoonena
14
Pawloosepa Parnapaase mannessi ghissote koro Ayhutatte piyye Ikʼoniyonena qagha kulakki xulleppa uuma kolisonki maallay koro Ayhutattepa koro Kirikattena kittatte koro uuma kisha dhukkaysadhi.
2 Ayhudhawaadhessi ye dhukkaysadhonki kapay koro ye koro Ayhutatte kodhdhuusiki haqiseppa hessi dhukkaysadheesi qhamu shikkinenu kodhonki.
3 Pawloosepa Parnapaase qhoota Pogholhitoosi shahxuntettay inni torruyanakinaki kuyyaqqe kisha haama oladhe,
Pogholhokka kʼaalessi teexakito ittorruyeesi milikitaadhepa dhahxhxotaadhetakki nu arasi.
4 Korossi katamisana qaaka xayto lakkisi ille qhootipa koro tooko Ayhudhawaadhe qale tookkeka Erkampawhe qali kodhdhe.
5 Xinkisana he ye koro Ayhutatte kodhdhonkippa he koro Ayhutatte kodhdhe wannaadhdhe huusundhi illakki kodhdheppa Pawloosepa Parnapaasesi awurughettay hatapepa naxikke isi woʼa.
6 Usundhe iʼolissaasi apaqhenna karo katamaadhessi piyye Likʼaoniyanna qagha karo Listʼirapa Tarpe pana piyyadhesi nakaaʼita qagha kulakki ghoradhe.
7 Piyyisanakka ote xeesa torruye thiyyisonki.
Kollise Pawlooseppa Parnapaase Katama Listʼirappa Ho Tarpenna
8 Piyye Listʼiranna qhawho tookko ho luhhe na qoopekki qagha,
qhawhusakka haki dhaladhinu paayyatti qoopakko qhooti kodhdhi maallay ashshanko ye arikka.
9 Qhawsakka iʼqakkadhipa Pawloose iqalladhana isi apaqhasa.
Pawloosekka qhawhossi kulakki laaghami pareema eemonna dhukkaysadhe uso dhinisnay qhamu na qaghtiisa inna hi’ina,
10 ikkitto dhammatakki napayina:
“Ghete’epa luhhettay shikkaaray!”
Qhawhossikka miinakali shikkaaripa ashankoka paayyu.
11 Korossika olhossi Pawloose kodhiisi ihiʼina,
ikkitto dhammatakki riiripa pako Likʼaonatettay hasa payonki:
“Ata korunka kuyyu waakidhdhe koro kula kodhdhipa inekula odhdhonki!”
12 Parnapaasena “Tiya” inna paye,
Pawloose qhooti uuma qalladhi maallay “Hermene” inna paye.
13 K’esittosi manne kʼulkʼullawhea Tiya katamana setottay qaghana kodhadha qardhawepa marne pisitosikki sixipa katamana harreema okasuppa waarsho illay kodhdhuppa Pawloosepa Parnapaasenu isi teexakko itʼoose woʼa.
14 Erkampawhesi Pawloosepa Parnapaase kapay iʼolissaasi apaqhenna laalladhi hela kakaqeppa isi riirapa xaytossi waarsho qaghi kula heronkippa hasa na payoonki:
15 “Hune koru,
momaallaka olisi kotte?
Inekka kulay qhamo haahundhi koro,
holuppa olhanna maallay hune kula okayni qhama oli latu hela hxurteppa Haallikkosi qaghito moontopa,
piyyepa,
paso pana olho nakittatte qaaka kaasaasi uumi kula holankunukki an ote xeesaasi hune torruyni.
16 Haallikko perre xayna qharaʼita lighghenna kittatte waarsho kaasay onki woʼina qhamu ashshininukki hela hxuri.
17 Ikkodhdhitama kapay kodhmo huusu xeesa Uso qhamu xorxito kodhdhisa hiʼaasesi ye hela hxurukka,
moontonuka irrawoosi ihune dhipasi,
kuyyaqqe anmangho ghimintekka ihune teexi,
saqqe haahundhisi yiʼopa hxasotakki hunena hxaysisi.”
18 Kodhampawhesi ihasa qalaldhekka payni waarsho qhamu yenu teexakko itʼtʼosninu kittetakki na dhawrase.
19 Koro piyye Ayhutattena kapay katama Antʼokiyapa piyye Ikʼoniyoonenukki okayeppa waarshoosi nyarisoonki.
Pawlooseesikka iʼawrughghettay hattape tupettay ho farikki nulighipa piyyeʼita sitonkippa katamana seetottay lihasoonki.
20 Naqharray kolladhampawhe iokayeppa nakapa shikkaronkina Pawloose ihaqipa shikkaaruppa karo katama xullu,
haqhayna sinkatho Parnapaase illi karo piyye Tarpe kula ashshonki.
21 Pawloosepa Parnapaase ote xeesasikki piyye Tarpenna koro kolliseppa koro kishaasi ikkolladhampawhe kodhonki tupettay piyye Listʼirappa piyye Ikʼoniyoonena kittaʼita illigheppa karo katama Antʼokiya kula holonki.
22 Kolladhampawhessi piyyadhissana qagha kaasay dhukkaysadhe tuusundhittay qhamu kokisannenu dhihamtettay usundhe dhiktisoonki tupettay:
“Karo Ahxase Haallikkito kula xullenu rakko kisha akkadhe ine gheeqasa” kina payeppa usundhe kollisonki.
23 Toʼokunko koro dhukkaysadha qagha kaasanna xaadhighgheesi nu xawwadhonkipa yiʼo malettay ghisadhonki tupettay Pogholhossi dhukkaysadhe Uso ara payoonkippa hela hxuronki.
24 Piyye Pistiyanna kittatte lighghonkippa karo piyye Pinfiliya kula ashshonki.
25 Katama Perkennaka kʼaale Haallikkitoosi kollisonki tupettay karo katama Atʼaliya kula ashshonghi.
26 Haahanu hessi kodhmusa qhamu ikkonenu teexakko Haallikkitottay usundhe erake karo katama Antʼokiya kula markapeema hadhdhonkipa ashshonki.
27 Ihaaha hxafenna toʼokunkossi koro dhukkayadhna illeemi holaseppa kodhmosi Haallikko usundhe qale kodhdhipa kodhadhu kaasay pa koro ye koro Ayhutatte kodhdhukka dhukkaysadhenu mankaxxe qhamu inu qhashisi usundheesi toruyonki.
28 Xaytusasakka kolladhampawhe illi kuyyaqqe kisha oladhonki.