Iyyerusaalemeema Illa Hole
15
Koro tookko tookko piyye Yihuta nnu karo katama Antʼokiya kula oodhdhipa “Hikkesi Muusenu teexamti kula huni karrazamonku payni dhinko huni alkasinte” na payonkippa korossi dhukkaysadhaasi kollise payyonki.
2 Olissa maallay Pawloosepa Parnapaase korussa illakki paxakkopa ille tamaakkadhe paayye.
Xaysa tupettay Pawloosepa Parnapaase korossi katama Antʼokiyanna dhukkaysadhana kittatte tookke tookke illay qhamu kodhineppa karo katama Iyyerusaaleme kula ashshonkippa rakkusaasi erkampawhepa xaadhighghenu itʼtʼosonkinuki qhutʼadhe.
3 Toʼokunko koro dhukkaysadhanakka qhamu piyye Finkʼeppa piyye Semmariyattay lighineppa ashshonkinukki usundhe erake.
Usundhekka koro piyyisanu koro ye koro Ayhutatte kodhdhu qhamu Haallikko kula holipa dhukkaysadhusa nu torruyonki.
Koro dhukkaysadha kaasakka olissattay uuma hxasoodhoy.
4 Iʼiyyerusaalematte hxafenna manne kirstaanappa erkampawhe pana xaadhighghekka iʼusundhe akkadhe,
usundhekka olhosi Haallikko naqale kodhdhipa kodhu kaasaasi nu torruyonki.
5 Naqharray Ferisawaadhesi dhukkaysadhana kittatte tookke tookke haqeppa iʼiyyana:
“Koro ye koro Ayhutatte kodhdhu qhamu karazamnipa Hikke Muuseesikka tiqitadhonkiki gheeqasa.”
6 Erkampawhepa xaadhighghe qhoota rakkusa kaaʼita illena laaghadhenukki illeema hole.
7 Iʼuuma ille tmaakkadhe tupettay Petʼiroose ihaqipa hasa payu:
“Koro haayyu,
koro ye koro Ayhutatte kodhdhunu qhama ote xeesa torruynipa dhukkaysadhonkinu Haallikko xayna qharaʼitta qhamu hunena kittatte ye qholladhisa aʼaranku.
8 Waakosi saqko qhawhitoosi ara,
qhamu ineesi Nasso Kʼulkʼullo teexi kula usundheesikka nu teexettay qhamu usundhe akkadhisa innu arasi.
9 Saqqe huusundhiisi dhukkaysadhetakki na alheesi maallay inepa usundheesi ye illena ghulasukka.
10 Lammi kʼamparasi appaadhdhe haanipa ine dhooqhe ini alkasooniisi moonuka kolladhanpawheema hadhdhasettay Hallikkoosi teemmite?
11 Inekka han dhinni qhamo huusundhi kula teexakko Pogholho Iyyesusettay qhamu kodhdhisa andhukkaysadhaani.”
12 Xinkisana korossi illeematte holi kaasay ikkʼampayipa olhossi Haallikko Parnapaasepa Pawloosettay korossi ye koro Ayhutatte kodhdhu kittaʼita kodhi milikitaadhepa dhahxhxotaadhe kaasaasi ittorruyankina isi apaqhasa.
13 Usundhe iʼttoruyeppa dhikkisonki tupettay,
Ya’ikʼoope hasi payipa nu holasu:
“Koro haani,
into yela apaqhasindha!
14 Haallikko koro ye koro Ayhutatte kodhdhunna kittatte waarsho Usoosi kodhdhina qhamu malaala intoosipa emmusa Simoone iʼine torruyi.
15 Kʼaalesi hxumampawhatte hasa payamtipa tooxamoy husi qale ighgharay:
16 ‹Xay tupettay an hollapa,
mannessi dhaawite pullameesi ghupadha,
usundhissa pullameesikka
an hollapa shikkaarasha.
17 Hussakka koro haqhi pogholhoossi qhamu gheeqeninu,
korossi ye koro Ayhutatte kodhdhu makaxko Hayyuttay ooqamikka qhamu ye gheeqninu.›a
Pogholhossi hussaasi kodhi hasi payi;
18 olisakka kedhdhanu payyati ho arama.
19 “Hussa maallay dhihathoote tayyu korossi ye koro Ayhutatte kodhdhu karo Hallikkito holi qhamu ini rakkisnenu.
20 ‹Hussana kanta yiʼosi killankonu aʼohxadhipa lokmadho,
paalakunkitopa qholte olo saqhuppa kʼeeqhte yena elunna he siipistipa farina sakanko olo yiʼe,
kʼeqhteesikka olo quke!›
paynipa nu ttooxni.
21 Kedhdhanu paayyatti matʼaafadhesi Hikke Muusena kuyyaqako hxaysinko koro Ayhutatte kaasakki amanne ghissootattena kaalla napapi,
kʼaalisaka katamaadhe kaasanaka torruyi.”
Erko Korossi Ye koro Ayhutatte Kodhdhu Dhukkaysadhinu Aʼeraki
22 Xaysa tupettay erkampawhepa xaadhighghesi toʼokunko koro dhukkaysadha kaasay illaki kodhdhepa korossi illeema holina kittatte koro qhacʼaasi qholonkippa Pawloosepa Parnapaase qale karo Antʼokiya kula erakenu puqasonki,
hussa maallay korossi dhukkaysadhana kittatte ho intawte xeesa sheegha Yihutassi ana payi Parsapaasepa Sillasesi qholonki.
23 Taptapessi athooxikka usundhettay erakkonki,
taptappisaka te hasa iyyay,
“Ine hessi erkampawhepa xaadhighghe kodhdhini koro hahundhi,
Hunessi koro ye koro Ayhutatte kodhdhunna kittatte dhukkaysatteppa katama Antʼokiyappa piyye Soriyappa piyye Kilkʼiyanna isa qaghanku koro haani,
Nakayho haani ihune dhaghgha.
24 Inena kittatte koro tookko tookko ho ini erakonina hune kula okayipa kʼaale hune torruyunna paayyatti qhama rakkateppa hunena tupe dhappisonkisa an apaqhni.
25 Hussa maallay illeematte anhollipa torrudhanni tupettay koro hune kula erkamnaasi qholaanippa dhele haani cʼikatame Parnapaasepa Pawloose illay erakenu ine kaasay ille xulaani.
26 Parnapaasepa Pawloose qhoota Pogholho haani Iyyesus Kristoosse maallayi qagho huusundhi likkaseppa hela teexonki.
27 Yihutapa Sillaase erkusa an huneesi tooxinisi qhamu pakotakka padhawneppa hune qalonkinu an erakni.
28 Olhu kodhe gheeqasti malettay dhooqhqho pileesi qhamu ini huneema dhoqhasnenu Nasso Kʼulkʼullopa ine an illa gharri.
29 Yiʼo killankonu aʼoohxadhipa kʼeqhtepa qholte olo saqhuppa kʼeeqhte yena elunna he siipisti pana palakuntate kaallakka sikaapuya!
Olissa kaasanna kaallakka hetiqtate payni olho xeesa koteye.
Nakayho ghayindha.”
30 Korossi erkamiisikka illaghgheppa karo katama Antʼokiya kula ashshonki,
korossi dhukkaysdhaasi illeema holasonkippa taptapesiisi nu teexonki.
31 Usundhekka ittaptapesisi napapena erko usundheesi dhiktisna qhooti na taye maallay uumi hxasoodhe.
32 Yihutapa Sillaasekka qhooti hxuumampawhe kodhdhe maallay korossi dhukkaysadhaasi kʼaale kishatakki dhihameppa qhamu kokisanenukka dhiktisonki.
33 Yihutapa Sillaase kuyyaqqe qhacʼaki haama oladhe tupettay korossi dhukkaysadha illay nakayhotakki ille laghgheppa hessi usundhe erake kula holonki.
34 [Sillaase kapay haamatte haqhe woʼi.]
35 Pawloosepa Parnapasepa koro pile ho kisha illakki kodhdheppa kʼaale Pogholhitoosi isi koro kollisapa isi torruyapa kuyyaqqe qhacʼasi katama Antʼokiyasa oladhonki.
36 Kuyyaqqe qhacʼa tupettay Pawloose Parnapaasena inna payi:
“Waadhdhipa piyyaadhesi xayna qharaʼita anna kʼaale Pogholhitoosi torruyni kaasay kula ashshinipa korossi dhukkaysadhi kasqanni,
qhamu immoyto qaghesa eemni”.
37 Parnapaasekka Yohannisesi ana Markʼoose payi qhamu usundhe qale ashshininukki woʼi.
38 Pawloose kapay qhawhusa qhamu usundhe qale ashshininu ye woukka,
olhuna maallay iishikka xayna qharaʼita piyye Pinfiliyanu qhooti nakalla holipa kodhmonukka ye usundhe qale ashshunu.
39 Lammi Pawloosepa Parnapaase kitta tiyye dhammaki dhaladhipa qawni qawni reehamonki.
Parnapaase kapay Markʼoosesikki akkipa markapettay karo piyye Kʼopʼiroose kula ashshoy.
40 Pawloose kapay Sillaasesikki qholladhi,
koro dhukkaysadhakka Pawloosesi tiqte teexakko Pogholhitonu teexokippa ashshoy.
41 Usokka toʼokunko koro dhukkaysadha piyye Sooriyappa piyye Kilkʼiyanna qaghaasi isi dhiktisapa lighghu.