Tʼimothoose Pawloosepa Siilaase Qalli Ashshi
16
Pawloose karo katama Tarpepa katama Listʼira kulakki ashshi.
Katama Listʼiranakka kolladhampakko ana payi Tʼimothoose qagha,
yaye tuusukka Ayhudhtite te dhukkaysadhay,
paappo huusu kapay Krikito.
2 Koro katama Listʼirappa koro katama Ik’oniyoone qhoota Tʼimothoose olho xeesi torruye.
3 Pawloose Timothooseesi qhamu akkinipa he qale ashshotannu qhooti woʼi maallay korossi Ayhutatte piyyisana qaaka mallaki karazi,
olhunna maalla hasa kodhikka paappo Tʼimothoose qhamu sanynye koro ye koro Ayhutatte kodhdhunna kodhdhisa qhooti are maallay.
4 Pawloosepa Sillaase katamanu karo katama tookko kula ilighghana olhossi erkampawhepa xaadhighghe katama Iyyerusalemessa torruyadheppa puqasonkiisi koro dhukkaysadha qhamu tiqtanipa kodhmotakka hiʼaasunukki nutorruye.
5 Hussa maallay toʼokunkosi koro dhukkaysadhana dhukkaysadhettay isi kokkisadhapa korokka kuyyaqako kuyyaqakooma isinna padhawama.
Pawloosesi Karo Piyye Mekʼtoniya Kulaka Ooqi
6 Pawloosepa hessi naqale qagha piyye Isiyanna kittatte kʼaale qhamu ye torruynenu Nasso Kʼulkʼullo qhootina dhawrasi maallay piyye Firkiyappa piyye Kelatiyatakki lighghe;
7 issapankosi piyye isiyanna hxafenna karo piyye Piththaniya kulakki ashshenu dhihadhe,
naqharray Nasso Iyyesuse karussa kula qhamu ashshinennu yenu payukka.
8 Hussa maallay piyye Isiyatakki lighgheppa karo katama Tʼiro’atta kula odhdhonki.
9 Pawloosekka kalapkusana qhawho piyye Mekʼtoniyanakki rayettay hiʼi,
usokka ishshikkaaripa hasa payuppa isi watatama “Piyye Mekʼetooniya kula tahxhxipa ine kʼarkʼaaray!”
10 Pawloose rayisaasi hiinittay qhamu Haallikko Ote Xeesa kollisenu ine ooqisa iʼine xulti,
hussa maallay inekka hattay karo piyye Mekʼetooniya kula an ashshankonu gharri.
Litiya Kristoosesikki Dhukkaysati
11 Katama Tʼiro’atanukki ammarkapeema hadhdhinipa toomaʼita karo piyye Samotiraakʼe kula ashshooni,
haqhayna sinkatho karo katama Napule kula ashshanko tiyyisaani.
12 Nakala katamassi piyye Mekʼetoniyanna kittatte qaghapa isi ahxase Roomenna kalla rafa katama Filipʼisyusenna hxafoonippa haamatte oladhaani.
13 Kuyyaqako hxaysinko koro Ayhutattena katamana setottay lighghaanippa kollatte hinaase kula ashshooni,
xaytusasakka qakkadhaanippa xiske haama illa holennu kʼaale Haallikkitoosi torruyaani.
14 Xiskesi apaqhasana kittatte xiskatakko tootte te ana payi Litiya te Haallikko kaanasaki qagha,
isisakka te lallaadhe iidhdhooma lassa te katama Thiyatʼiroonenu okayti,
qhamu kʼaalessi Pawloose torruyiisi pareema apaqhqhasintinu Pogholho saqaku na qhaashi.
15 Isepa ahxke hiisi kaasay ishshoxatte shoxadhe tupeettay manne hiisi kulaki ine ooqti;
“Lammi qhama Pogholho dhukkaysadhi ihune xulti payni manne haayyu kula okaayapa ye kapa ghayyonku” kipaytipa uuma ine waatadhi.
Pawloosepa Sillaase Ishshappame
16 Kuyyaqako tookko an xayto ghissootatte kula ashshaanina kodhampate tootte te nasso soʼounkitottay hxuuma qalladhy onkate ina lighghi,
shettisakka kodhmo hiisi soʼonkitottay he ise rafisa kaasannu kodhatte dhamaasiki nutayasti.
17 Isekka Pawloosepa ine kaleemi ashshitipa isi riirettay hasa payay:
“Haadhi koru onke dhinghitoosi hune torruya Haallikkoosi Dhammana kodhanpawhe huusu!”
18 Olissasika kuyyaqqe kishaki na hoholtipa isi hasa inena kodhdhay,
Pawloose kapay qhooti riirisa uuma na maghti maallay ighghitipa na kula laghammuppa nassosi maghana napayu “Makaxko Iyyesus Kristoosettay qhamanna kittatte lighintinu an ho qheeri!”
Nassosikka haattakki na lighi.
19 Korossi ise rafisa kiposi nu kodhatte tayasa na haqhi mallay Pawloosepa Sillaasesiki ghapeppa moorite kula ashonkitappa tanynyadhe miinteema itʼtʼosonki.
20 Tanynydhesi piyye Rome kulakka okasonkippa hasa na payonki:
“Koru haadhi koro piyye Ayhutattenapa okayonki piyye taanisa parpe haqisonki.
21 Holuppa ine koro piyye Roomenna aata ho kodhe ye ine gheeqasipa olho olo inenna payuusi isi kollisa.”
22 Waarsho kaasakka illeemi holipa Pawloosepa Sillaaseema haqu,
tanynyadhekka qhamana lallaadhe shaghnipa tolameettay tubhbhonukki hayo teexe.
23 Iʼuuma tubhbhe tupettay manne shappeetesa yakonkki,
tiqitampakko manne shappeetena qhamu kokisnipa tiqadhonkinu hayonki.
24 Tiqitampakosikka hayusaasi iʼakkadhi tupettay,
mannessi shappeetena kompo kitteemi xulleesipa,
lughghe huusundhiisikka kaare kitta na ghapasonkippa shaponki.
25 Pawloosepa Sillaase awne parakitte ighghissootepa koladhettay Haallikko kaltaysadhana koro pile ho shappamakka iʼusundhe apaqhasa.
26 Tutuppe kirito manne shappeetena haki leehni saasa piyye leehe dhaqqammaki kodhdhamadhi,
mankaxadhekka toʼomaleki qhaashame,
korossi shappama kaasannaka siplesi ashappittay inna ishshighame.
27 Tiqtampakosikka iʼppiatatte tayripa mankaxaadhesi qhashame hiunna korossi shappama kaasay iye patiki payipa he poghenu koraate tuusu yukadhu.
28 Naqharray Pawloose hasi payipa uuma riiru:
“Ine kaasay hasakka an qaghniye!
Pukkaqate taahuna inna olho magha hela kodhu!”
29 Tiqtampakosi haatakki hammakko kasqadhipa soruppa kitte kula xullu,
inni xotoladhana Pawloosepa Silaasena lughghe kaleema ranu.
30 Ghinte kula usundhe lihasuppa na payu:
“Koro haayyu,
dhinko tayadhenu moʼo kodhe ye gheeqasa?”
31 Usundhekka ina payenna:
“Pogholho Iyyesus Kristoose dhukkaysadhma adhinayye,
holuppa ahxke haahuka idhinnaye.”
32 Kʼaale Pogholhitoosikka usopa koro manne huusuna qagha kaasannu torruyonki.
33 Qhawhossi manne shappeete tiqadha awne satisana iʼusundhe ooqipa payshessi huusundhiisi na shoxuppa haattay usopa ahxke huusu manneete kaasay shoxatte shoxadhonki.
34 Xaysa tupettay Pawloosepa Silaasesi manne huusu kulakki ashshitappa nu yiito itʼtʼoosu,
qhooti ahxke huusu manneete kaasa illay Haallikko dhukkaysadhi maallay hxasoodhoy.
35 Iqhqhaytina tanynyadhessi:
“Korusaasi ishighapa hxurray” kipayeppa intawampako foolisadhdheteesi nakula erakkonki.
36 Qhawhosi manne shappeete tiqadha Pawloosena hasi na payi:
“Qhama hxurramtenu tanynyadhessi koru erakeye lammi hela lighapa nakayhottay ashshonku.”
37 Pawloose kapay hasi payipa nu holasu:
“Ine koro piyye Roomennakka kodhdhinipa olho an dhappini ye qaghina ine tubhbhonkippa ine shapponki,
holuppa hantu bhadhdhamtettay isi manne shappeetena ine lihasna?
Ye kodhintikka!
Usundhe okayeppa ine lihasonki!”
38 Folisaadhesikka iʼashsheppa olissasi tanynyadhenu qallonki,
Pawloosepa Sillaase qhamu koro piyye Roomenna kodhdheesi iʼapaqhenna iʼghaape.
39 Hussa maallay iʼokayeppa na hxurakko kasqadhonkippa mannessi shappeetena kittattekka lihasonkippa qhamu katamisana kittatte lighnenu waatadhonki.
40 Pʼawuloosepa Silaase mannessi shappeetena illigheppa manne Litiya kula ashshonki,
hahatikka koro dhukkaysadhasa hxafonkippa,
usundheesi dhiktisonki tupettay piyisasi hela hxuronkippa ashshonki.