Jesús petëpaecujinae, icatsia baja asaë
24
Judíowi penacuera-ewetsimatacabi pewerewerecaecujinae, merawia pitsijawata, pepobajayacunua, bajarapapetiriawi icatsia ponalia petëpaenë Jesús pebuatsi-ibowajutsijawabelia. Caponalia papexaniatuxujuwijawa xaniawaeta, petëpaenë Jesús peperabë-exabinexa. Itsapetiriawi yajawa ponalia, peyanabinexatsi.
2 Itsa baja palia, bajarapapetiriawi tane pewecuatixitsijawa pa-ibotoxanetota José picani yawëpa-acatanuta petëpaenë Jesús pebuatsi-ibowajujawata.
3 Jesús pebuatsi-ibowajutsijawalia pejonecujinae, apocaxitajarababuatsi petëpaenë, pepopetuxanenë Jesús.
4 Nexata, bajarapapetiriawi bitso jamatabëcuenenajunawiaca. Apoyapëtae pacuenia exanaejitsia. Bajarajota, jemata tsitanaitajëtanucatsibeje anija-ángel-nëbeje. Bajaraponëbeje penaxatatsijawabeje niweniwena bitso.
5 Bajarapapetiriawi bitso pecajunawi, pematabacabëta irataeya bobenajunua bajarapa-ángel-nëbeje pitabarata.
Nexata, bajarapaponëbeje jumaitsi bajarapapetiriawijawabelia:
—¿Detsa xuajitsia pajaitame petëpaewituatuajëta ponë piasaëtsaponaponaenë?
6 Jesús rabaja majotaje ajibi tsarucae, tsipaji Dioso rabaja icatsia asaëya-exanatsi. ¡Panajamatabënapire pacuenia pacatsipaeba Galilea nacuata, pamatacabi abaxë asaë tsaponaponae!
7 Tajëwelia pacajumaitsi: «Xanë, Daxitajiwi Pematapijinënë, necanajetsiana pibisiajamatabëcuenewi pecobeyabelia. Nexata, cruzajawabelia necobematabiabarutsiana, tanebeyaxuabinexa. Itsiata baitsi jane, tanebeyaxuabicujinae, acueyabimatacabita, icatsia asaënë tsane», pacajai baja cajena —jai ángel-nëbeje petiriawijawabelia.
8 Bajarapapetiriawi jumenajamatabënapita Jesús pejumaitsijawami.
9 Nexata baja, nawiabarena petëpaenë Jesús pebuatsi-ibowajutsijawawerena, petsipaebinexa daxita bajarapacuene yabara once ponëbeje, Jesús pija-apóstolewijawabelia, daxita itsamonae Jesús pijajiwijawabelia-ata.
10 Bajarapapetiriawiyajuwënëwi itsawa María, Magdala tomarapijiwa, itsawa pijinia Juana, itsawa pijinia María, Santiago pena. Bajarapowaxi, itsapetiriawi yajawa, tsipaeba bajarapacuene yabara apóstolewijawabelia.
11 Bajarapacuenia tsipaebi-ata, apóstolewi apojumexaniataetsi. Bajarapaliwaisi yabara jamatabëjumaitsi: «Saya meta bajarapapetiriawi pijacuata exana bajarapaliwaisi», jamatabëjai apóstolewi.
12 Itsiata baitsi jane, Pedro cujinaepitsapalia bowecua, Jesús petëpaenë pebuatsi-ibowajutsijawabelia. Bajarapa-ibowajualia itsa naëcolia, taeyejeba pebobenaejawa Jesús mataquionaeya pematacacëbipanamitsireca. Nexata baja, Pedro jamatabëcuenenabenajacaeya nawiarena boyaberena. Canaëjëbanajetaruca bajarapacuene yabara.
Jesús piasaëcujinae, pëcaxitajarabaxuaba pijajiwitonëbeje, Emaús tomarabelia peponaenëbeje
13 Pamatacabi petiriawi wajunupaeba Jesús penamatacotsijawa apóstolewijawabelia, bajarapamatacabi Jesús pijajiwitonëbeje naropotabeje Jerusalén tomarawelia, Emaús tomarabelia. Bajarapatomara eca once pakilómetrobeje Jerusalén-wecua.
14 Bajaraponëbeje namutua penajetarucaejawata, natsipaebanajetarucabeje daxita xuanë copiapata.
15 Bajaraxua yabara pecuaicuaijai tsanucaponaejawatabeje, Jesús pëcaxitajarabatsibeje. Nexata, muxunenia najetarucatsibeje.
16 Bajaraponëbeje tae-atabeje, itsiata apoyapëtaebeje Jesús-cuene.
17 Nexata, Jesús yanijoba bajaraponëbejejawabelia. Jumaitsi:
—¿Detsa pitsicuene yabara panaliwaisita najetarucamebeje namutua? —jai Jesús.
Bajaraponëbeje nucajopabeje. Penaëcotsijawataliabeje Jesús-jawabelia itabarayapëtanetsibeje penajamatabëxainaejawabeje.
18 Nexata, bajaraponëbeje yajuwënënë, Cleofas, jumecanawiatsiaya jumaitsi Jesús-jawabelia:
—¿Xamë tsaja caenëmë aponijanayapëtae bajarapacuene, nasiwaxainae-atamë bajarapatomarata? Daxitajiwi baja cajena, yapëtane pacuene copiapata Jerusalén tomarata mapamatacabitaje —jai caranata Cleofas.
19 Nexata, Jesús jumaitsi bajaraponëbejejawabelia:
—¿Detsa pitsicuene pija copiapatsi? —jai.
Nexata, icatsia jumaitsibeje Jesús-jawabelia:
—Panaliwaisita najetarucajëbeje raja profeta Jesús-pijinë yabara, Nazaret tomarapijinë. Bajaraponëmi pinijicuene pexanaponaponaenë Dioso pesaëta. Bitso xaniawaetsia jiwi pexanialiwaisi petsipaebinëmi. Nexata, daxitajiwi, Dioso-ata siwajamatabëcuenebarëyatsi bajaraponëmi.
20 Bajaraponëmi canajetatsi sacerdotewi penamatacaitorobiwi, wajanaca-ewetsiwi yajawa, pijawajabitsaë pecobeyabelia, cruzajawabelia pecobematabiabarutsinexatsi, bajarapacuenia pebeyaxuabinexatsi.
21 Paxanë picani bajaraponëmi yabara pajamatabëjumaitsinë, waxaitsi judíowitsi, wajanacacapanepaenexa wajanacayanacua-ewetsijawawecua pamonae apojudíowi. Itsiata baja, ajena xaina acueyabi pamatacabibeje Jesús-pijinë pebeyaxuabicujinaetsi.
22 Piayapëbejecuene patae-atanë wajanacacapanepaejawanexa, ajena paxanëyajuwënëwi, petiriawi, bajayacunua panenabenajacaeya-exana. Bajarapamonae pepobajayacunua, ponalia petëpaenë Jesús pebuatsi-ibowajutsijawabelia.
23 Itsiata, apocaxitajarababuatsi bajarajota. Nexata, bajarapapetiriawi nawiabarena. Panetsipaeba pacuenia bemajitsinaebota tane ángel-nëbeje. Bajaraponëbeje pina jumaitsibeje petiriawijawabelia: «Jesús rabaja asaë tsaponaponae icatsia», jai pina.
24 Nexata, itsamonae paxanëyajuwënëwi pona petëpaenë Jesús pebuatsi-ibowajutsijawabelia. Pacuenia baja petiriawi panetsipaeba, bajarapamonae-ata apotaeyabuatsi petëpaenë Jesús —jaibeje Jesús-jawabelia.
25 Nexata, Jesús jumaitsi bajaraponëbejejawabelia:
—¡Paxamëbeje saya pane-ajamatabëcuenecowëbinëbeje! Apopajumexaniataemëbeje daxita profetawi peyaquinaeliwaisianë Cristo yabara.
26 Bajarapaliwaisianë nacayapëtaeya-exana pacuenia Cristo, Dioso athëbëwetsica pitorobinëtsitsica, jiwi pecapanepaenënexa. Nacayapëtaeya-exana copiaya pebejiobia-exanaejawanexatsi, bajaraxuacujinae peponaejawanexa paxa Diosojawabetsia, athëbëtatsia pemuxuneneta pe-ecaenexa —nayabarajai Jesús.
27 Nexata, xaniawaetsia peyapëtaenexabeje, Jesús nawajunupaeba bajaraponëbejejawabelia daxita pacuenia Dioso pejumeliwaisibaxutota tajëwelia jumaitsi Cristo yabara. Taxuxuaba jane baja, penawajunupaebijawa pacuenia Moisés-pijinë peyaquinaebaxutota tajëwelia jumaitsi, daxita itsaprofetawimi-ata peyaquinaebaxutonëta pejumaitsijawa.
28 Itsa baja imoxoyotanajetarubena patomarata bajaraponëbeje patsijitsiabeje, Jesús itajara rowia pewajënaeyabelia bepeponaejitsia bajaraponëbejewecua.
29 Itsiata, bajaraponëbeje bitso asiwabeje Jesús penajuamajitsinexa bajarapatomarata. Jumaitsibeje Jesús-jawabelia:
—¡Namajire abaxë mapatomarataje! Caniwiyo rabaja bitso. Merawijitsia rabaja —jaibeje.
Nexata baja, Jesús najoneya penajuanacopabinexa picani, pabota bajaraponëbeje patabeje.
30 Bajaraxuacujinae, itsa yajawa-ecabeje mesa muxuneneta pexaenexa, Jesús pita panbë. Pexaniajamatabëcuene rajuta Diosojawabelia pan yabara. Epatsënëca bajarapapanbë. Rajuta bajaraponëbejejawabelia.
31 Bajarapaepatota, matapania yapëtanebeje Jesús-cuene. Itsiata baitsi jane, bajarapaepatota jemata wecua-ajibitsarucaetsibeje. Apotaebeje baja matawëjëa.
32 Nexata, bajaraponëbeje najumaitsibeje:
—Namutua wajanacanawajunupaeba nucaponaejawatabeje, bitso nacajamatabëcuenebarëyaya-exanabeje, wajajumetaejawatabeje, pacuenia nacatsipaebabeje paliwaisi ruca Diosojumeliwaisibaxutota, wajapaebinexabeje bajarapaliwaisi itsamonaejawabelia —najaibeje.
33 Nexata, bepijia naropotabeje Emaús tomarawecua, penawiatsinexabeje Jerusalén tomarabelia. Itsa patajopabeje, caxitajarababeje penacaetuatsijawata once ponëbeje apóstolewi, itsamonae yajawa Jesús pijajiwi.
34 Pecopiapitsijawatatsibeje penacaetuatsiwi, mataenetsia tsipaebatsibeje. Jumaitsi:
—Xaniajai tsaena baja, wajatuxanenë icatsia asaë tsaponaponae, tsipaji Simón baja tsitanaitajëtatsi —jai bajarapamonae.
35 Bajaraxuacujinae, ponëbeje Emaús tomarawerena patabeje, juya tsipaebabeje bajarapamonaejawabelia pacuenia Jesús namuto-epatualia pëcaxinatsibeje. Pacuenia-ata yapëtanebeje matapania Jesús-cuene, panbë pe-epatsënëcaejawata.
Jesús petëpaecujinae, tsitanaitajëta pijajiwijawabelia
36 Itsa abaxë paepatota bajaraponëbeje tsipaebabeje pacuenia tanebeje, bajarapaepatota, Jesús tsitanaitajëta pijajiwi tuatuajëta. Pebajacobijawata, pijajiwijawabelia jumaitsi:
—Pacatojitsipatsi Dioso papecajamatabëcuenexanepanaeya- exanaejawa —jai.
37 Nexata, Jesús pijajiwi bitso nabenajaca petaejawata, tsipaji saya jamatabëcuene-itsi: «Petëpaenëmi raeta pejumape maje», jamatabëjai Jesús yabara.
38 Nexata, Jesús jumaitsi bajarapamonaejawabelia:
—¿Detsa xuajitsia pajunawame? ¿Detsa xuajitsia panejamatabë-ëthëtowetsina panejume-aebame icatsia tasaëjawa?
39 ¡Pataema tacobewajënë, tataxuwajënëbeje-ata! Xanë rabaja maje. ¡Xaniawaetsia paneyapëtaenexa taxaniajaicuene, panejayabare! ¡Paneyorobarenua! Petëpaenë raja pejumape peneta awijibi. Asijibi. Peperabëto-ata apoxainae, pacuenia xanë perabë-itsinë —jai Jesús pijajiwijawabelia.
40 Bajarapacuenia pejumaitsitsanucaejawata, nacobewajënë-itajëta. Nataxuwajënë-itajëtanua pijajiwijawabelia.
41 Jesús pijajiwi jamatabëcuenenajunawiacaeya jamatabëcuenebarëya. Itsiata baitsi jane, abaxë apojumexaniatae Jesús-cuene.
Nexata Jesús jumaitsi:
—¿Paxainame tsabaja itsacuenejawayo pexaejawa,a patanerajutsinexamë? —jai Jesús.
42 Nexata, pijajiwi rajutatsi pesebidujuainë-epatoyo, jabëperiyo yajawa.
43 Jesús pita baja. Nexata, pijajiwi pitabarata xane.
44 Nexata, Jesús jumaitsi pijajiwijawabelia:
—Xua baja netocopiapata, bajaraxua cajena tajëwelia pacanawajunupaebabiabatsi tanebeyaxuabiwajënaeya, itsa abaxë pacayajawaponaponatsi. Pacayapëtaeya-exanatsi tanetocopiapatsijawanexa daxita pacuenia bajayata tajëwelia peyaquinaebaxutonëta xanë yabara jumaitsi Moisés-pijinë, profetawi, Salmos-baxutota-ata. Daxita rabaja bajarapacuene netocopiapata —jai Jesús.
45 Nexata, Jesús pijajiwi tsipaeba, xaniawaetsia pejumeyapëtaenexa pacuenia Dioso pejumeliwaisibaxutota tajëwelia jumaitsi bajaraPonë yabara.
46 Jumaitsi mapacueniaje:
—Dioso pejumeliwaisibaxutota tajëwelia jumaitsi pacuenia xanë, Cristonë, athëbëwetsica Dioso tane-itorobinëtsica, jiwi tacapanepaenexa, ayaicuenia tanebejiobia-exanaecujinae tanebeyaxuabinexa. Tajëwelia jumaitsinua pacuenia tatëpaecujinae, acueyabimatacabita, icatsia Dioso niasaëya-exanaejitsia.b
47 Jumaitsinua patajajiwimë patatsipaebaponaejawanexa tajumeliwaisi daxitajiwijawabelia, bajarapamonae penajamatabëcuenepënëyorobinexa Diosojawabelia, Dioso pewecua-ajibia-exanaenexatsinua pibisiacuene pexanaeneconimi. Bajarapabaxutota jumaitsinua copiaya panetaxuxuabijawanexa tajumeliwaisi panetsipaebijawa Jerusalén tomarata. Xuacujinae, daxitanacuanëjawa panetsipaebanajetarubenaenexa.
48 Paxamë rabaja pataneme daxita pacuene netocopiapata. Bajaraxuanë jiwi pejumexaniataenexa, bepatsipaebanajetarubename.
49 Xanë pacato-itorobianicatsi Espíritu Santo papecatsijamatabëjonenexa, ponë taxa Dioso najumecapanepaeya pacarajutsiapaeba. Abaxë majotaje Jerusalén tomarata pajinawanapaename, Dioso pesaëtac athëbëwetsica papecajamatabëcuenecaëjëpaeya-exanaejawabelia. Matapania jane baja, paponaename, jiwi panetsipaebanajetarubenaenexa tajumeliwaisi daxitanacuanëjawa —jai Jesús pijajiwijawabelia.
Jesús jane baja nawiatsia athëbëabetsia
50 Jesús pijajiwi matacalia imoxoyo Betania tomarabelia. Bajarajota, nacobeyotsiaya pijajiwi towajëcanuca Diosojawabelia peyawenonaenexatsi.
51 Petowajëtanucaejawata, Jesús baja wecuapona pijajiwi athëbëabetsia. Dioso baja caponatsi athëbëabetsia.
52 Jesús pecaponaecujinaetsi, bajarapamonae wënëxaniata ayaijamatabëcuenenë yabara. Xuacujinae, barëyaya nawiabaponalia Jerusalén tomarabelia.
53 Bajarapatomarata, caematacabi canacujitsia Jesús pijajiwi ponabiaba templobojawabelia, pewënëxaniatabiabinexa, pexaniajamatabëcuenenua perajutabiabinexa Diosojawabelia.