Jesús paebanajetarubenaenexatsi, icatsia asaë
28
Judíowi baja penacuera-ewetsimatacabi itsa werewereca, merawia pitsijawata, bajayacunua copiayapijimatacabi semana petaxuxuabijawa, ajena matacabi tsarucaponae, María, Magdala tomarapijiwa, itsaMaría yajawa, taeyajopaliabeje Jesús pebuatsi-ibowajutsijawabelia.
2 Jemata ira ayaicuenia najëaba, tsipaji Dioso pija-ángel runaica athëbëwetsica. Nexata bajaraponë pepatsicujinae Jesús pebuatsi-ibowajutsijawata, tixita peyawëpa-acatsi-ibopanaxanetomi. Bajaraxuacujinae, eca bajarapa-ibopanajumata.
3 Bajarapa-ángelnë, naitayota beyamaxëcotia. Penaxatatsijawa bitso niojai daxita peniojaijawa matatoxenetsia.
4 Pawajabitsaë ewetanubena Jesús pebuatsi-ibowajutsiwëpa, itsa tane ángelnë, pecajunawi neconecojai. Bobenajunua bepetëpaewi.
5 Nexata, ángelnë jumaitsi petiriwabejejawabelia:
—¡Pëtsa pajunawamebeje! Yapëtaniji xua yabara paponamebeje. Jesús pecobematabiabarutsinëmitsi cruzajawabelia, pajaitamebeje.
6 Ajibi raja tsarucae majotaje. Asaë rabaja icatsia pacuenia baja cajena tajëwelia jumaitsi. ¡Parenamërebeje panetaenexabeje itsajota picani buatatsi!
7 ¡Bajaraxuacujinae, bepijia paliamërebeje pijajiwijawabelia! Patsipaebianamebeje mapaliwaisije: «Petëpaenëmi rabaja icatsia asaë. Jesús raja pewajënaeyabelia pona Galilea nacuayabelia. Bajarajotalia pacacaxitajarabiana», pajamëbeje tsane bajarapamonaejawabelia. Bajarapaliwaisiyo xainajë patacatsipaebinexabeje —jai ángelnë bajarapowabejejawabelia.
8 Nexata, bajarapowabeje nawiatabajirawabeje Jesús pebuatsi-ibowajutsiwecua. Junawabeje picani. Itsiata, barëyabeje bitso. Cujinaetabajirawabeje petsipaebinexabeje Jesús pijajiwijawabelia.
9 Namutualia pecujinaejinaenajetarucaejawatabeje, Jesús jemata tsitanaitajëtatsibeje. Bajacobatsibeje. Nexata, bajarapowabeje cujitabaliabeje bajaraponëjawabelia. Pematabacabëta nucajunuabeje pitabarata. Yaiyataeya siwaetabaliabeje.
10 Nexata, Jesús jumaitsi bajarapowabejejawabelia:
—¡Pëtsa pajunawamebeje! ¡Paponarebeje, panetsipaebinexabeje tajajiwijawabelia, bajarapamonae peponaenexalia Galilea nacuayabelia, bajarajotalia tanecaxitajarabinexa! —jai Jesús.
Wajabitsaëwi pacuenia najumetsënëtsiaya wajunupaeba, Jesús piasaëjawa yabara
11 Paepatota ëMaríabeje nawiatabeje Jesús pebuatsi-ibowajutsijawawelia, bajarapaepatota pijinia wajabitsaëwiyajuwënëwi, Jesús pemëthë pewetsiwi, pona tomarabelia. Bajarapamonae tsipaeba sacerdotewi penamatacaitorobiwijawabelia daxita pacuenia tane.
12 Nexata sacerdotewi penamatacaitorobiwi pona judíowi pija-ancianowijawabelia, penabarëcuaicuaijainexa, penajamatabëjëpaenexa pacuenia exanaejitsia. Nexata jane baja, bajarapamonae najamatabëcuenejëpa, pematamotsinexa ayaijawa palata wajabitsaëwijawabelia, pepaebiyaniwa xua pepacuene tane.
13 Nexata, jumaitsi wajabitsaëwijawabelia:
—Jiwijawabelia pajumaitsimë tsane: «Merawi pata-itamajitsita, pata Jesús pijajiwi. Nexata, bajarapamonae juta petëpaenë Jesús», pajamë tsane.
14 ¡Pëtsa pabëjamë bajaraxua yabara! Nacua-ewetsinë Pilato itsa jumetaena bajarapajume, paxanë itsiata, pacayawenonaenatsi itsacuene papeca-exanaeyaniwa —jai bajarapamonae wajabitsaëwijawabelia.
15 Nexata, wajabitsaëwi jejai. Nota bajarapapalata. Nexata jane baja, naropoba najumetsënëtsiaya jiwijawabelia pepaebanajetarubenaenexa pacuenia itorobatsi. Bajarapacuenia wajabitsaëwi pepaebixae, judíowi juya bajarapacuenia natsipaebapona. Bajaraxuata, mapamatacabijawaberena-ataje judíowi tsiteca jumaitsi tsabiabi: «Jesús pijajiwi petëpaenë jutatsi», jai tsabiabi.
Jesús itoroba pijajiwi pejumeliwaisi paebanajetarubenaenexatsi, daxitanacuanëjawa pejinawanapaewijawabelia
16 Jesús pijajiwi, once ponëbeje, pona Galilea nacuayabelia, pecaxitajarabinexatsi petsutojumabelia, itsabelia tocapaebatsi pewetsinexatsi.
17 Nexata, bajarapamonae itsa taenuta Jesús petsutojumata penucaejawa, yaiyataeya pitabarata pematabacabëta tonubenajunua. Itsiata, bajarapamonaeyajuwënëwi aeba pepacuene Jesús-cuene. Nexata, jamatabëjumaitsi: «ApoJesús meta», jamatabëjai.
18 Nexata, Jesús pijajiwi cujirena. Jumaitsi:
—Dioso baja cajena ne-ewetsia-exana daxitacuene athëbëtatsia, mapanacuata-ataje.
19 Nexata, daxitacuene tane-ewetsia-exanaexae, paca-itorobatsi mapacueniaje. ¡Paponare daxitanacuanëpijiwijawa, tajumeliwaisi panetsipaebinexa! Bajarapamonae tajacuene pacuenecujarubianamenua, panecuenecujarubicuenia pexanawanapaenexa. Pabautizabaponaenamenua taxa pewënëta, xanë pexënatonë tawënëta, Espíritu Santo-ata pewënëta.
20 Pacujarubaponaenamenua pexanawanapaenexa daxita pacuenia paca-itorobatsi. ¡Pëtsa pajunawame paneponaejawa, tsipaji raja xanë pacayajawaponaponaenatsi daxitamatacabi, nacua pewerewerecaejawabelia! —jai Jesús pijajiwijawabelia.