Petëpaecujinae, Jesús icatsia asaë
16
Judíowi baja penacuera-ewetsimatacabi itsa werewereca,a María, Magdala tomarapijiwa, Salomé, itsaMaría pijinia, Santiago pena, nacobenacomuata petuxujuwira, peperabë-exabinexa picani Jesús petëpaenë.
2 Nexata, merawia pitsijawata, semana petaxuxuabimatacabita, pepobajayacunua, bajarapamonae ponalia Jesús pebuatsi-ibowajutsijawabelia.
3 Namutualia najumaitsi tsanajetarubenae:
—¿Jipatsa meta nacatotixitsiana Jesús peyawëpa-acatabuatsi-ibopanaxanetotsi? —najai tsanajetarubenae bajarapapetiriawi.
4 Nexata, bajarapamonae itsa imoxoyotabuatapona, itsa naëcobalia, ibowajujawabelia, taenuta petoyororocae-ibopanaxanetomi petixitanutsijawalia ibowajuwëpawecua, bitso piniji-ibopanaxaneto-ata.
5 Nexata, petiriawi itsa joneya Jesús pebuatsi-ibowajutsijawalia, taeyeta pecujuanenia pe-ecaejawa pewëjëato. Bajaraponë naxatateca piapiajawa penioponaejawa. Bajarapapetiriawi petaejawata, najunawiaca.
6 Nexata, pewëjëato jumaitsi petiriawijawabelia:
—¡Pëtsa panajunawiacame! Paxamë picani pajaitame Jesús, Nazaret tomarapijinë, ponë cobematabiabarutatsi cruzajawabelia. Bajaraponë rabaja icatsia asaë petëpaecujinae. Ajibi rabaja tsarucae majotaje. ¡Pataema jane itsajota picani buatatsi!
7 ¡Paponare baja, panetsipaebinexa pijajiwijawabelia, Pedrojawabelia-ata! Pajumaitsimë tsane bajarapamonaejawabelia: «Jesús raja panewajënaeyabelia pona Galilea nacuayabelia. Bajarajotalia pacaxitajarabianame pacuenia baja pacajumaitsi», pajamë tsane pijajiwijawabelia —jai pewëjëato petiriawijawabelia.
8 Nexata saya, bajarapapetiriawi rëcëpeca Jesús pebuatsi-ibowajutsiwecua. Neconecojai pecajunawi. Namuto-epatualia-ata apotsipaebi itsajiwijawabelia, tsipaji bitso junawa.
Jesús itsa asaë petëpaecujinae, tsitanaitajëta María, Magdala tomarapijiwajawabelia
9 Jesús itsa asaë petëpaecujinae, semana petaxuxuabimatacabita, bajayacunua tsitanaitajëta María, Magdala tomarapijiwajawabelia. Bajarapowa cajena copiaya Jesús wecuacapitsapa siete padowathibeje, itsa abaxë Jesús apobeyaxuabitsi.
10 Nexata, bajarapowa, Jesús petsitanaitajëtsicujinaetsi, pona Jesús pijajiwijawabelia. Itsa pata, caxitajaraba pewajënae pijajiwi abaxë pewënueyenaejawa Jesús.
11 Nexata, jumaitsi Jesús pijajiwijawabelia:
—Jesús rabaja icatsia asaë petëpaecujinae. Taniji rabaja tajacuata —jai María. Itsiata, Jesús pijajiwi apojumexaniataetsi.
Jesús petëpaecujinae itsa asaë, tsitanaitajëta pijajiwitonëbejejawabelia
12 Jesús pijajiwitonëbeje namutua penajetarucaejawatabeje, tsitanaitajëta be-itsanëcuenia.
13 Nexata, bajaraponëbeje itsa tanebeje Jesús, nawiatecabeje, petsipaebinexabeje itsamonae Jesús pijajiwijawabelia. Itsiata, apojumexaniataetsibeje.
Jesús pijajiwi itoroba, pexanialiwaisi pepaebanajetarubenaenexa daxitanacuanëjawa pejinawanapaewijawabelia
14 Bexëajawabelia, icatsia Jesús tsitanaitajëta pijajiwi once ponëbejejawabelia, pexaeyenaejawata mesata. Nexata, pinijicuenia muxujioba pijajiwi apopejumexaniataexae petsipaebiliwaisitsi piajamatabëcuenetajaxae, icatsia piasaëjawa petëpaecujinae, itsamonae petaewitsi tsipaebi-atatsi.
15 Nexata, Jesús jumaitsi pijajiwijawabelia:
—¡Paponare daxitanacuanëjawa, panetsipaebanajetarubenaenexa daxitajiwi pexanialiwaisi, pecapanepaeliwaisinexatsi, Diosojawabelia!
16 Pajiwi jumexaniataena panetsipaebiliwaisi, pabautizabianame. Bajarapajiwi Dioso capanepaenatsi. Pajiwi pijinia jume-aebiana panetsipaebiliwaisi, bajarapajiwi Dioso naneconitsia-exanaena daxitamatacabijawabelianexa.
17 Pamonae peneta jumexaniatane bajarapaliwaisi, mapacuenia exanawanapaenaje. Tawënëta jiwiwecua capitsapaponaena dowathi. Itsawiriajumeta, apopenatsipaebijumemi-ata, jemata natsipaebiana.
18 Jomo pecobeta pitsi-ata tsane, apo-itsacueniabitsi tsane. Apae-atanua tsane peyarujitsiratsi petëpaenexa, itsiata apotëpae tsane. Itsa nacobebuatsiana piawitanejiwijawabelia, jamatejema tsane piawitanejawawecua —jai Jesús pijajiwijawabelia.
Jesús jane baja pona athëbëabetsia
19 Wajatuxanenë Jesús liwaisi petsipaebicujinae pijajiwijawabelia, Dioso baja pesaëta catsiatsi athëbëabetsia. Bajarajotatsia eca Dioso pecujuanenia, penajua-ewetsinexabeje daxitacuene.
20 Nexata jane baja, Jesús pijajiwi daxitanacuanëjawa jiwi tsipaebanajetarubena bajarapapexanialiwaisi. Nexata, daxita pamonae, pejumetaeyabiabiwitsi, jumexaniataeyabiabatsi pexaniajailiwaisi petsipaebicuene, tsipaji Jesús pijajiwi jamatabëcueneyawenonabiaba, pinijicuene pexanaenexa jiwijawabelia, liwaisi petsipaebabiabijawata.