KAYTAKU KÛTIYAARAKU KA
JOŊ
AŊIICUM
Hûcukumahu hata kayta'uke
Joŋ oo arebooraaw ata Jesus a Jesus âkimmi noon, oo aŋiicum kayta'uke na ujaañaw ûrimmi kîyyaku kubakiir di kunŋen 90, nownu oo ma aŋiicum ban kaytaku kata Elobay Yâsuumaay yata Jesus. Nownu di baano balhikitenerabu bagawutum balhegenumaayabu, baloom kaan wahaw peh wata di etaama'uye wowu ma usemmi, ña ya kulhikiten êsukay di kaan, Jesus mumulet bi abajeeni non ajamaat. Be Joŋ nâyis kaan oo najanjammi hurimahu hata Jesus, najukool, nagorool, nâyis poop kaan oo koku ma kusohoorum di Emitay hurim Añool yo aamom Jesus Kristu. Joŋ nâkine ma bukanaku ka mbi kupisen kayta'uke kusohoor di Emitay non ma oo kusohoorum di yo. Nâyis poop kaan kasohoora'uke di Emitay, ya kugawolaal ma usohooraal di kutiyolaal, di kenenolaal poop ma ureesaal di majaaŋaamu mata Emitay.
Nâyis poop kaan aatuba, ûlandeelaal mata eroŋay yâbaworiitum (1 Joŋ 5:11-13). Mata nûmiraale di kaan nupakaale ban di eketay ma ôomiyaal di eroŋay mata ma ûkinaam kutiyolaal (1 Joŋ 3:14). Nâyis poop kaan jake ma ûmiraal kaan ulaamaal di Emitay, yoo poop yoyu d'ulaal, mata ma ewulolaam Buynum Bunapaabu (1 Joŋ 4:13). Mata nûmiraale poop di kaan, Emitay yoyu ma êkinolaam noon (1 Joŋ 4:16). Moo, anaw a mbi apisen kayta'uke, mbi ajuk wahaw lhay wa mbi aali apisen nanamulen.