Buynumabu bata Emitay, di bata Esatanaay
4
Kutiyom ka iboolaatum, aatuba jîynen bukan peh kaanuum Buynumabu bata Emitay bobu di buko. Be mbi jilasuwiil ma jîmir mante malhegen Buynumabu bammi di buko bata Emitay, mata buñaaŋenaabu bata kûboñaku kata Emitay kameeŋe kagawutum kalhegenumaayaku, koku ban ûde di etaamay. 2 Moo, wahaw waalim ûyis kaan, anaw Buynumabu bata Emitay bobu d'oo: An peh aloom salh di kaan, Jesus Kristu nakaaylokaylom di humuumahu non ajamaat, di jîmir kaan Buynumabu bata Emitay bobu d'oo. 3 Be an peh alatum kalob kaan Jesus Kristu nakaaylokaylom di humuumahu non ajamaat, di jîmir kaan Buynumabu ba aakum, untuwa bata Emitay; be bata âsuumutaaw ata Kristu, aamom a jijamemmi kaan ômakayewuum. Moo, omu ban di etaamay.4 Kûñumooy, miwuul bukanaku kata Emitay, moo jihaate ban buñaaŋenaa'ubu bata kûboñaku kata emitay kagawutum kalhegenumaayaku. Mata Buynumabu bata Emitay bammi di miwuul, buhaŋe baabu bammi di bukanaku kata di etaamay. 5 Mata ma kugam bukanaku kata ube di etaamay, momakiimom ma kulobumem mata wahaw wata ube di etaamay; momakiimom poop ma bukanaku kata ube di etaamay kujamumeyiim. 6 Moo, ulaal bukanaku kata Emitay; momakiimom poop ma bukanaku kâmiim Emitay kujamumewolaam. Be bukanaku kagawutum kata Emitay, kûjamumoriitolaam. Momakiimom poop ma ooliwumaam ûmiraal Buynumabu bagam bata malhegen, di poop baabu bagam bata mûcalamu.
Emitay yoo jâkinaju
7 Kutiyom ka iboolaatum, mbi ya ûkinooraal, mata jâkinaju Emitay ekiijom. Moo, an peh âkinem an, oo añool Emitay, mata nâmii'yo. 8 Be anaw âkintum an, âmirut Emitay, mata Emitay yoo jâkinaju. 9 Momakiimom ma Emitay êyisumolaam jâkinaju jata yo, ma êboñul Añool yo anoraw be ube di etaamay, ma mbi ooliyaal uroŋaal matawool. 10 Moo, ûdu deemom jâkinaju; ntuwa mata ma ulaal ûkinaayom, be yoo êkinolaam, momakiimom di êboñumul Añool yo ma mbi kûbajumiñaku katoolaal kupasi matawool. 11 Moo, kutiyom ka iboolaatum, Emitay êkinolaal jaa bâkinera'ube, ulaal poop jake ma ûkinooraal. 12 Malhegen an ajukorut nakeel Emitay; Be ûkinooraal jaa, nûmiraal kaan Emitay yoyu d'ulaal; ban bâkinorabu ba êkinolaam, mbi buhaŋ mabaj poop sembe d'ulaal.
13 Mata wahaw wagawolaam ma ûmiraal kaan ulaamaal di Emitay, ban yoo poop yoyu d'ulaal, mata ma ewulolaam Buynumabu bata yo. 14 Malhegen ûli nujuke, ban nuñaaŋen bukanaku kaan, Ampawolaal nabollobollom Añoolool ma âkayil bi aga Apakenaaw ata âmbasuk peh. 15 Moo, anaw aloom salh kaan Jesus Añool Emitay, non Emitay yoyu d'oo, ban oo poop omu di yo. 16 Ulaal nûmiraale kaan Emitay êkinolaal, ban nûynenaa'mo poop. Mata yoo egam jâkinaju; moo anaw âkinem ajamaat, nûmir kaan omu di Emitay, ban yoo poop yoyu d'oo.
17 Mata ma jâkinaju jalhegenumaayaju jemmi d'ulaal, momakiimom ma ûynenumaam kaan, mbi umelhaal di hukahu na mbi Emitay ega batalenabu an peh, mata non ma Jesus Kristu agam, moomu poop kaŋ ma ulaal mbi ya ugawaal ube di etaamay. 18 Malhegen di jâkinaju, bûkolaabu bûlee'dô. Mata jâkinaju jalhegenumaayaju, ya jîcaalhen bûkolaabu. Moo, anaw a bûkolaabu bemmi d'oo, jâkinaju jalhegenumaayaju poop jilee'd'oo, mata bûkolaabu, bobu ma busohoorum di kûnagulaku.
19 Ulaal ma ûkinooraam, mata Emitay yoo esingum êkinolaal. 20 Moo, anaw âanul jaa nâkine Emitay, ban naraay atiyool, oo anaw agugujoorem. Mata mumulet bi an âanul nâkine Emitay yâjukoriitim, ma araay ajamaataw a ajukem. 21 Mata kûboña'uke, Kristu awulolaakom, Naane: anaw âkin jaa Emitay, nâkin poop atiyool.