Kuñool Emitay
3
Miwuul jijuke non ma Emitay yagam Ampawolaal êyisolaam non ma êkinolaam noon, poopii nûwoolaali kuñool yo, ban di malhegen ûlaal kuñool yo. Momakiimom bukanaku kammi di etaama'uye kûmirutolaal, mata kûmirut yo poop. 2 Kutiyaay ka iboolaatum, ulaal nugawaale ban kuŋilaku kata Emitay, be maama mbi oonuwaal kajom, ûmirorutaa'mo jak jak. Be nûmiraale kaan, na mbi Kristu âlaañul, mbi oonuwaal non oo, mata mbi ujukaawool ma ûmiraal non ma aanom. 3 Moo, an peh akobem di wahaw uwu, jake ma aga anaw alhegenumaayaw non ma Kristu agam anaw alhegenumaayaw.4 Be ânoowan abaam kûbajumiñaku di Emitay, nahuusule kûboñaku, mata an ya abaj kûbajumiñ, na ahuusuum kûboñaku kata Emitay. 5 Mata jîmire kaan Kristu oo akaylom bi âcaalhen kûbajumiñaku katoolaal, be oo abajut kûbajumiñ. 6 Moo, an peh a kusohoorum di Kristu, âlakuworiit di kûbajumiñ, mata anaw ammi di kûbajumiñaku, ajukut Kristu, ban poop âmirutool.
7 Kûñumooy, aatuba an akeel abuntenuul, mata anaw agawem wahaw wajakaaw, anaw umu anaw alhegenumaayaw non ma Kristu agam anaw alhegenumaayaw. 8 Mata anaw alakuwem di kûbajumiñaku, anaw umu oo ata diyaabu, mata diyaabu êgawaaliye kûbajumiñaku kata kaŋ niŋanu di hûcukumahu. Momakiimom ma Añool Emit akayumulom bi âbuy wahaw wa yoo egawem. 9 Moo, an peh agam añool Emitay, âlakuworiit di kûbajumiñaku, mata esepeyay yata Emitay yoyu d'oo; momakiimom mumulet bi anken ma ya aga kûbajumiñaku, mata ma agam añool Emitay. 10 Moo, to ta ooliyaam umanjumaal kuñool Emitay, di poop kuñool diyaabu. Mata anaw âgaworiitum wahaw wajakaaw, ban âkint atiyool, anaw umu ntuwa añool Emitay.
Mbi ya jîkinoor
11 Mata kata kaŋ niŋanu di hûcukumahu elobay ya jijammi yeene: Mbi ya ûkinooraal. 12 Be ntuwa ma mbi ugawaal non Kâyiŋ, agam ata diyaabu abuum atiyool. Kama mata wa nabujumool? Mata Kâyiŋ ya aga wahaw wajakutaaw, be atiyool ya aga wahaw wajakaaw.
13 Moo, kutiyaay, aatuba jijaahali mata ma bukanaku kata di etaama'uye kuraayuum, 14 be jîmir kaan ûlaal numelhaale ban di eketay ma ukaayaal be di eroŋay, mata ma ûkinaam kutiyolaal. Be anaw âkintum atiyool, anaw umu naroŋ ma akeem. 15 Mata anaw araayum atiyool, anaw umu abujaaw nagam. Ban miwuul jîmire kaan anaw agam abujaaw aatubi abaj eroŋay yâbaworiit. 16 Mata Kristu oo awuum eroŋay yatawool matoolaal, momakiimom ma ûmirumaam mata jâkin an, moo ulaal poop nooliyaale uwulaal eroŋay yatoolaal be bata kutiyolaal. 17 Kama anaw abaam wahaw lhay di etaama'uye, ban najuk atiyool abajutum wah, be nalat kawulool makeel, bu mbi âanul jâkinaju jata Emitay joju d'oo? 18 Moo, kûñumooy, aatuba jâkinooraju jatoolaal jilako keb di utumaw, be mbi ya ûkinooraal di malhegen di wahaw wa mbi ugawaal.
Ûseekumaal Emitay
19 Mata di bagawera'ubu mbi ûmirumaal kaan ulaamaal di malhegenumaayamu mata Emitay, ña sîsigirasu satoolaal di sîwaayen kayooŋ di yo. 20 Moo, palimo ûyegetaw watoolaal weenolaam nubajaale kûbajumiñ, be Emitay ehaŋe ûyegetaw watoolaal, mata yoo êmire wahaw peh. 21 Kutiyaay ka iboolaatum, ga jaa non ûyegetaw watoolaal ulee'ma ûyisem d'ulaal kaan nubajaale kûbajumiñ, ña ûseekumaal Emitay; 22 ban wahaw poowo wa ulhawaayom, mbi ewulolaa'wo mata ma usohaam kûboñaku kata yo, ma ugawaal non ma yoo êkimmi. 23 Mata kûboñaku kata yo keene: Ûynenaal Añool yo aamom Jesus Kristu, nûkinooraa poop non ma alobolaam. 24 Moo, anaw asoom kûboñaku katawool, anaw umu, omu di Emitay, Emitay poop yoyu d'oo. Mata Buynum Bunapaabu ba yoo ewulolaam, bo ba ûmirumaam kaan malhegen yoo yoyu d'ulaal.