Kristu aanenaaw atoolaal
2
Kûñumooy, înje iŋiiculuum wahaw uwe ma aatuba mbi jibaj kûbajumiñ. Be anaw abaj jaa hûbajumiñahu, nubajaale agamunenaaw atoolaal alhegenumaayaw, aanenewolaam aamom Jesus Kristu, di Ampawolaal. 2 Mata hurim eketay yatawool, momakiimom ma kûbajumiñaku katoolaal kupasumim; be ntuwa katoolaal keb, be, be di kata âmbasuk peh.3 Moo, ugawaa'jaa non ma kûboñaku kata yo kuloom, non kama malhegen nûmiraa'yo. 4 Be anaw âanuu'jaa nâmii'yo, ban âgaworiit non ma kûboñaku kata yo kuloom, anaw umu, anaw acalem, mata âloboriit malhegen. 5 Mata ugawaa'jaa non ma elobay yata Emitay eloom, nûmiraal kaan malhegen nûkinaale Emitay di malhegenumaayamu. Nûmiraal poop kaan ulaal ma usohooraam di yo. 6 Mata anaw ammi koku ma kusohoorum di Emitay, mbi ya aga non ma Kristu agam.
7 Kutiyom ka iboolaatum, kûboña'uku kata Emitay ka iŋiiculuum umu, ntuwa kûboñ kunkul, be kapiyaaku ka miwuul jiyaam kata kaŋ niŋanu. Mata kûboña'uku kapiyaaku, kokaamom ka miwuul jijammi ban kata kaŋ niŋanu. 8 Be kûboña'uke ka îŋiicewuum di miwuul, kûboñaku kunkulaku, mata malhegenumaayamu mata ko, mujuki di Kristu, di mujuki poop di miwuul; mata emuucenay yoyu ma ebawem, ma majaaŋaamu malhegenumaayamu muhikiten.
9 Be anaw âanuu'jaa omu di ehikitenuma'uyu, ban nâbirikikoor di atiyool, anaw umu naroŋe di emuucenay be jaat. 10 Anaw âkimmi atiyool, anaw umu omu di majaaŋaamu; moo, makeel mulet ma mbi mugawool alo di kûbajumiñ. 11 Be anaw âbirikikoorum di atiyool, anaw umu omu di emuucenay, ban ya arees di yo, ban poop âmiroriit ba areesem be, mata emuucena'uyu yoyu ma egawoom âpuum.
12 Kûñumooy, înje iŋiiculuul kayta'uku mata kûbajumiñaku katawuul kupasi ban, mata kañaaŋaku kata Jesus. 13 Simpawaayase, miwuul înje iŋiiculuum, mata jîmire ban anaw âamiyaalitom kata kaŋ di hûcukumahu bala etaamay ecookoori. Ejaajuway, di ûjuraw, miwuul poop înje iŋiiculuul, mata jihaate ban Esatanaay.
14 Kûñumooy, miwuul înje iŋiiculuum, mata jîmire ban Emitay yaamom Ampawolaal. Simpawaayase, miwuul înje iŋiiculuum, mata jîmire ban anaw âamiyaalitom kata kaŋ niŋanu na etaamay ecookoorim. Ejaajuway, di ûjuraw, miwuul înje iŋiiculuum, mata miwuul bukanaku kata sembaasu, ban elobay yata Emitay yoyu di miwuul, ban poop jihaate ban Esatanaay.
15 Moo, aatuba jîkin etaama'uye, di poop wahaw wândom, mata anaw âkimmi etaama'uye, jâkinaju jata ampawolaal jilee'd'oo. 16 Mata wahaw peh wajakutaaw wammi di etaama'uye wa eniil ajamaat êkinem, di waawu wa kûkilaku katoolaal kujukem di kûkin, di poop jagawooruwaaju, wahaw uwu peh, ntuwa wata Ampawolaal, be wata di etaama'uye. 17 Mata etaama'uye, mbi êbuyo di wahaw peh wajakutaaw wândom wa bukanaku kûsiibuwem. Be bukanaku kagawem non ma Emitay êkimmi, mbi kulako to be nanoonan.
Bûsuumutaabu bata Jesus Kristu
18 Kûñumooy, kukaku kûbanumaku kûriiŋe ban. Non ma jijammi kaan âsuumutaaw ata Kristu ômareesewuum, jaat bukan kameeŋe kûcalho ban kagam bûsuumutaabu bata Kristu. Moo, ute nooliyaale ûmiraal kaan, kukaku kûbanumaku kûriiŋe ban. 19 Malhegen bukana'uku d'ulaal kûcaalhumulom, be kugawut katoolaal, mata kugaween jaa katoolaal, di kulakuween d'ulaal. Be ma kûcaam, ma mbi keeli kumanji jak kaan, buko peh ntuwa kata d'ulaal.
20 Be miwuul Emitay ewuluum Buynum Bunapaabu, momakiimom miwuul peh jibaje ban kanamulenaku.
21 Ntuwa ma jîmirutum malhegenumaayamu, momakiimom ma iŋiicumuluum, be mata ma jîmiimom. Ban poop jîmire kaan mûcal âcaalhumoriitul di malhegenumaayamu. 22 Kama aymoom agam acalaaw? Ntuwa anaw alatum kaan Jesus oo Kristu? Anaw umu oo âsuumutaaw ata Kristu, mata nalate Emitay yagam Ampawolaal, di poop Añool yo. 23 Moo, anaw alatum kaan Jesus oo Aŋilaw ata Emitay, nalate poop Emitay yagam Ampawolaal. Be anaw âanul jaa aawo Jesus, ña nabaje Ampawool aamom Emitay.
24 Moo, jisoh hurima'uhu ha jijammi bûtiyaar, jiga ho di ûyegetaw watawuul. Mata jisoo'ho jaa, mbi jisohoor di Aŋilaw, di poop Ampawool. 25 Mata wahaw wa Kristu ammi mbi awulolaal: eroŋay yâbaworiitaay.
26 Înje, înje iŋiiculuum hurim bukanaku kâkimmi kubuntenuul. 27 Moo, Buynum Bunapaabu ba Emitay ewuluum, mbi bulako di miwuul. Joonut ma an akeel alhikitenuul, mata boo mbi bulhikitenuul wahaw peh; mata boo malhegenumaayamu, bûlhikitenooriit wah wata mûcal. Moo, jenken ma jisohoor di Kristu non ma bulhikitenuum.