1 Joŋ 1

KAYTAKU KÛTIYAARAKU KA

JOŊ

AŊIICUM

Hurimahu hata eroŋay

Ma uŋiiculuul mata Hurimahu hata eroŋay, hâamiyaalitom kata kaŋ niŋanu di hûcukumahu. Ûli nujan ho, ban nujuu'ho di kûkilaku kâtooli, nulaso ho, nugoo'ho poop di uŋenaw wâtooli. 2 Mata na eroŋay ekaylom, ûli nijuu'yo di kûkilaku kâtooli; momakiimom ma uñaaŋenumuum mata yo, nusallhenuul poop mata yo, yaamom yâbaworiitaay, yâamiyemmi di Ampawolaal ya âyiisolaam. 3 Wahaw wa ujammi, nujuk, wo wa uñaaŋenem di miwuul, ma mbi jeeli jêemmi d'ûli di kasohooraku kâtooli di Ampawolaal, di Añoolool aamom Jesus Kristu. 4 Moo, ma uŋiicumuluum wahaw uwu, ma êsuumaay yâtooli mbi yeeli êrir.

Emitay yoo ehikitenumay

5 Ûde elobay ya ujammi d'oo, yo ya uñaaŋenuum kaan: Emitay yoo ehikitenumay, emuucen elee'di yo. 6 Moo, oonaa'jaa ulaal omu ma usohooraam di yo, ban nureesaal di emuucenay, non ulaal macalaalem, mata uletaal nureesaal di malhegenumaayamu. 7 Be ureesaa'jaa di majaaŋaamu non ma yoo yemmi di majaaŋaamu, non ulaal ma usohooraam di yo, ña hûsimahu hata Jesus, aamom Añool yo, di hupas kûbajumiñaku peh katoolaal.

8 Be oonaa'jaa ubajutaal kûbajumiñ, nubuntenooruwaale, mata malhegen mulet d'ulaal. 9 Be urejaa'jaa kûbajumiñaku katoolaal, non ma oo acolum, ban naga anaw âynenaayaw, mbi apas kûbajumiñaku katoolaal, ma âcaalhen wahaw peh wajakutaaw wammi d'ulaal. 10 Be oonaa'jaa ugawutaal kûbajumiñ, non ulaal ma oonaalem di mo Emitay ecale, ban elobay yata yo, elet d'ulaal.