Bukanaku kâynemmi kaan Jesus oo Kristu
5
An peh âynemmi kaan Jesus oo Kristu, anaw umu oo añool Emitay; anaw poop âkimmi ampawaay, mbi âkin poop kuñoolool. 2 Mata ûkinaa'jaa Emitay, ban nugawaal non ma kûboñaku kata yo kuloom, nûmiraal poop kaan ulaal ma ûkinaam kuñool yo. 3 Mata anaw âkimmi Emitay, anaw agawem non ma kûboñaku kata yo kuloom. Ban kûboñaku kata yo, kûgiitiit; 4 mata anoowan agam añool Emitay, nahaate ban etaama'uye. Mata, hurim kâynenaku katoolaal, koka uhaatumaam etaama'uye. 5 Kama yaymoom kahaatum etaama'uye? Ntuwa bukanaku kâynemmi kaan Jesus oo Añool Emitay?Elobay yaloom salh mata Kristu
6 Mata Jesus Kristu oo anaw akaylom di mumelamu, di poop hûsimahu. Ntuwa âkayil di mumelamu keb, be be di hûsimahu. Buynum Bunapaabu, bôbayiisum kaan wahaw uwu malhegen, mata boo anaw alhegenumaayaw. 7 Moo, baje wahaw ûhaaji waloom salh mata Jesus hatiya di emitay: Ampawool, di elobay, di Buynum Bunapaabu, be wahaw uwu peh, woo wah wanor. 8 Wahaw uwu poop ûhaajiyaaw uloom salh matawool ute di etaamay: Buynum Bunapaabu, di mumelamu, di poop hûsimahu, be wahaw uwe poop peh ujamoorujamoorum. 9 Inja ulaal ya ûynenaal kurimaku kata ejamaatay, be hurimahu ha Emitay eloom, huhaŋe mabaj sembe. Moo, hurima'uhu hata yo, ho ha eloom mata Añool yo. 10 Mata anaw âynemmi Añool Emitay, hurima'uhu hata yo haloom mata Jesus hohu d'oo. Be anaw âynentum Emitay, omaanem di mo, Emitay ya ecal, mata âynent hurimahu hata yo ha eloom mata Añool yo. 11 Hurimahu hoohe haloom kaan: Emitay ewulolaal eroŋay yâbaworiitaay; be eroŋa'uyu, di Añool yo yemmi. 12 Moo, anaw aakum Añool yo, nabaje eroŋay, be anaw aakutum Añool yo, anaw umu aakut poop eroŋ.
13 Înje iŋiiculom wahaw uwe be bata miwuul jâynemmi di kañaaŋaku kata Añool Emit, ma jîmir kaan jibaje eroŋ yâbaworiit.
Sembaasu sata kalhawaku kata Emitay
14 Kâynenaku ka ûynenaam Emitay, kokagawolaam ma ûmiraal kaan ulhawaa'yo jaa wahaw wakeel wa yoo êkimmi, manooman mbi ejamolaal. 15 Moo, ûmiraa'jaa kaan ejame wahaw peh wa ulhawaayom, ña nûmiraal poop kaan nuyabaale ban wahaw uwu wa ulhawaayom.
16 Anaw ajuu'jaa atiyool ma agawem di kûbajumiñaku kagawutum kata be eket, anaw umu nalhaw Emitay ma ewulool eroŋay. Be ntuwa kata be eketay. Mata baje kûbajumiñaku kata be eketay, moo, eenutuul jilhaw Emitay mata kûbajumiña'uku. 17 Malhegen wahaw peh wajakutaaw wa anaw agam, ûdu kûbajumiñaku, be baje kûbajumiñaku kaaku kagawutum be bata eketay.
18 Mata nûmiraale kaan bukanaku peh kagam kuñool Emitay, kûlakuworiit di kûbajumiñaku, mata Añool Emit ya apooyiil ma Esatanaay yetuba egoriil, 19 mata nûmiraale kaan ulaal jata Emitay. Be âmbasuk peh, Esatanaay yoyu ma elhopeniim. 20 Malhegen poop nûmiraale kaan Añool Emit nakaylo ban, ma awulolaal kanamulenaku ma ûmiraal Emitay, yaamom yalhegenumaayay; moo jaat ulaamaal di malhegenumaayamu magam Añool yo, aamom Jesus Kristu. Mata oo Emitay yalhegenumaayay, oo eroŋay yâbaworiitaay.
21 Moo, kûñumooy, jijaamo ûkiinaw.