Ata Emit mbi âlaañul
3
Kutiyom ka iboolaatum, ûde kaytaku kugabutaku ka iŋiiculuum. Be di woo poowo, nîkine ma iwollhenuul ma jiga ûyegetaw watawuul jak ma aatuba jîwuken. 2 Mata nîkine ma jiwolho elobay ya buñaaŋenaabu bunapaabu bata kûboñaku kata Emitay kuloom napiyaanu, di poop yaayu ya Ata Emit aamom Apakenaaw, añaaŋemmi kumakaaku katawool, ban di kuñaaŋenuu'yo. 3 Moo, jake ma jîmir kaan, di kukaku kûbanumaku, mbi baj bukanaku kâgawikoorem, kagawem non ma siniilasu satayiil sîkimmi, ban mbi ya kurinenuul, 4 ma ya kurink kêenul: “Kama ntuwa Jesus aanolaam mbi âlaañul? Moo, ôomey? Inja noo kaŋ noo na simpawolaal kukeem be jaat, wahaw peh wowu to jak non ma Emitay êwwewom kâtiyaar.”5 Bukana'uku, kûkint kuwolho kaan noo napiyaanu, na Emitay eloom keb, hatiya di emitay, di poop etaamay, di êcaalhul di mumelamu, ma muŋoomen yo. Moo, kûwukene kaan na etaamay êwwenim, mumelamu moo ma muŋoomenyom. 6 Moomu poop kaŋ ma etaama'uyu yata noo napiyaanu, êbuyumim mumelamu. 7 Be hatiya di emitay, di poop etaamay yata jaat, hurima'uhu hanorahu hata Emitay, hohu ma huwaayotom jak ma mbi sambunasu sibol yo nata hukahu hata batalenabu, naamom na mbi bukanaku kalatum Emitay kûbuyi.
8 Kutiyom ka iboolaatum, aatuba jîwuken kaan, huk hanor be bata Ata Emit, huga poop non ujaañaw ênjunni, ujaañaw ênjunni, di uga non huk hanor. 9 Moo, wahaw wa Ata Emit ammi mbi aga ûpiyuworiit, non ma bukan kaaku kunongem di mo kaan upiyuwe; be oo aga anaw aalim humunten momakiimom. Mata âkint ma an akeel anep, be oo akobem ma bukanaku peh keeli kuwatatenooro.
10 Be hukahu hata Ata Emit, mbi huga wûb non ma âkuuta âwubem bukan. Di huka'uhu na mbi hatiya di emitay bûyo, mbi lhoo'no palabab lhînŋa, wahaw peh wândom, di poop waawu wammi di etaamay, mbi ureemeni. 11 Magam wahaw peh mbi ûbuyi, bukan bu mbi jiga? Mbi jiga bukanaku kanapum kagewem jak non ma Emitay êkimmi, 12 ma jikob huka'uhu hata Emitay na mbi hûriiŋul, haamom na mbi hatiya di emitay di reemenumi sambunasu, ma wahaw peh wândom uyel. Be na mbi jilako di jikob huka'uhu, di jiga di sembe ma hûriiŋ cab. 13 Be ulaal non ma elobolaam, mbi ukobaal hatiya di emitay yaayu yunkulay, di poop etaamay yaayu yunkulay, dâ ûmiim kaan mbi gawi keb wahaw wa yoo êkimmi.
14 Moo, kutiyom ka iboolaatum, magam miwuul makobem di wahaw uwu, jiga di sembe ma jiga bukanaku ka mbi kubaj kâsuumaayaku di Emitay, kaakutum masema, di poop kûbajumiñ. 15 Moo, jake ma jîmir kaan, Ata Emit ya amunten, ma mbi ooliyaal upakaal; momakiimom poop ma atiyolaal Pawlu aŋiicumuluum di majaalhaamu ma Emitay ewuloom, ma alobuul mata wahaw uwu. 16 Moomu poop kaŋ ma aŋiicum mata wahaw uwu di uyit waawu peh wa aŋiicum, be waawu di ûgiiti kanamulen; momakiimom bukanaku kaaku kanamulentum, di kaaku ka kâynenaku katayiil kûlhiŋutum, ya kulaw eloba'uyu, non ma kulawem poop Baŋiicer baabu Bâñoyyaabu, ma kunepenooro.
17 Moo, kutiyom ka iboolaatum, non ma jijammi ban ume hurima'uhe, jiga to ûyegetaw watawuul ma aatuba jîlandeel di kâynenaku katawuul, ma bûkanikooraku keetubi kûcaalhenuul di buruŋabu da jemmi. 18 Momakiimom haŋ majak ma jikooben di kañankiitaku, di poop kanamulenaku kata Ata Emit, aamom Jesus Kristu, a mbi asali jaat, be nanoonan! Amiin.