Bulhikitenaabe kagawutum kalhegenumaayaku
2
Mata non ma nownu napiyaanu, bajemmi di tutaru tata êsukay buñaaŋenaabu bata kûboñaku kata Emitay kagawutum kalhegenumaayaku, moomu poop kaŋ ma mbi baj di tutaru tatawuul bulhikitenaabu bata elobay yata Emitay, kagawutum kalhegenumaayaku, ka mbi ya kulikiten êsukay elobay yagawutum elhegenumaayay yakajenem bukan, ma kubet Ata Emit ahikuliim, ma too kaŋ cab di kunepenooro. 2 Be bukan kameeŋe mbi kusoolhen bagawerarabu batayiil bajakutaabu bata kâmooraaku. Moo, hurim bagawera'ubu batayiil, mbi kuga êsukay ma kûlobikoor mata buruŋabu balhegenumaayabu. 3 Mata, mata hunongahu hatayiil mata hubajahu hata bancaamabu, mbi ya kûhooloor ma kulob baloberabu bata mûcalamu ma kubuntenuul ma kubot wahaw watawuul, be batalenabu batayiil bupini ban niŋanu. Moo, hûjimenahu hatayiil hohu to ma hûraapuum kâw ma hukobiil.4 Mata Emitay ebonketut kumalaakaku kalom di kûbajumiñaku, be di eraac ko di sambun sâbaworiit di emuucenay, ban di êgenkum ko kuseelaku ma kukob hukahu hata batalenabu. 5 Emitay poop ebonketut bukanaku kata di etaamay yapiyaay, ma êgawul mumelamu mâamak ma muhoojen bukanaku kalatuyom, be di epaken Nowe a ya aloom êsukay mata jagawaju jata jak, di poop bukan kaaku keemo hutok di egaba. 6 Non ma êbuyum poop sîsukasu sata Sodooma, di Gomoora di sambunasu, ma aga so silaañ siga kâgumpaku, ma mbi siga êmanjumay be bata bukanaku ka laañutiim makeel jaat mata yo. 7 Be di emelhen Loo, aganom anaw acolum, a sûumutoonom maama bukanaku ya kûgawikoorunom. 8 Malhegen âynaaw umu acolaaw, di tutaru tatayiil nalakonom, be kukaku peh, bûyegetabu batawool bûsuumoriit kaŋ kuur mata wahaw wajakutaaw wa ya ajammi, najuk wa bukanaku kata dô ya kuganom. 9 Moo, wahaw uwu ûyiise kaan, Ata Emit ya amellhen bukanaku kajamem d'oo di majakutaamu, be ya awaa'to bukanaku kâlhapitaaku, be nata hukahu hata batalenabu na mbi alesiil.
10 Be mbi ehaŋ majooŋoor ma eles bukanaku ka sûumeyiim kaga wâhikooraw wa siniilasu satayiil sîkinem kuga, karembeelem bukan peh kagam yahaanay yatayiil. Bukana'uku, bukanaku kayiilim, ban ya kugawooro, kâkoliyeriitum kâlobikoor mata Emitay, di poop kumalaakaku kata yo. 11 Mata palimo kumalaakaku kahaŋiim sembe, be kûgeloriit kumalaku kayooŋ Ata Emit. 12 Be bukana'uku ya kûlobikoor mata wahaw wa kunamulentum, ma kuga non bânunkureŋabu bânongoororiitum, bâwuwenim ma mbi bulhuuñi ma bubuji. Moomu poop kaŋ ma mbi buko kubuji non boo. 13 Moo, mbi kuyab bugalabu bata hûlaamahu, non ma kugam bukaaku kûlaam. Mata ya sûumiil kaga tutulay way wahaw wâpuñunenim. Momakiimom na mbi kuleeho tanor di miwuul di sipeetasu satawuul, ya keeno non masema, be ban ya kûririgen di jâhoolooraju ja kûhooloorem.
14 Ya sûumiil kaga keb kûkilaku katayiil di yaaraay, ban kûcaalhoriit poop di kûbajumiñaku. Ban ya kubunten bukanaku kaakutum kanamulen, ya kunongoor poop keb mata hubajahu hata bancaamabu. Moo, kapaawaaku mbi kûlowumiil. 15 Mata koku ma kubeem buruŋabu balhebaabu, ma kunaaw ma kusoh buruŋabu bata Balawoŋ, aamom añool Bewoor, agawem wahaw wajakutaaw mata ma âkimmi bancaamabu. 16 Momakiimom ma âlhusumim mata kûbajumiñaku katawool, ma embaamay yâloboriitum, elob d'oo non ajamaat, ma ega añaaŋenaaw umu ata kûboñaku kata Emitay, agawut non ma âkimmi agaween mata bûnuutaabu batawool.
17 Bukana'uku, kuga poop non sinkoloŋ saakutum mumel. Di kuga poop non, uwiiñ wa buhentelaabu buŋarem ma emitay êetukalubul. Be emuucenay yâkoliyenim noon, yoyu ma ekobem di buko; 18 mata ya kulob elobay yata hâynaahu yagawutum elob yajake. Ban mata bagawera'ubu, di poop banongerabu batayiil bajakutaabu, ya kubuntenoor bukanaku kahuutum kâmelhul di uŋenaw wata bukanaku kâgawikoorem, 19 ma ya keeniil buko mbi kumelheniil, ban buko kumuumiil, koku ma kugam emiikeelay yata wahaw wajakutaaw wakajenem ajamaat. Mata anaw agenkoorom di wah wakeel, oo amiikeelaw ata wo. 20 Mata bukanaku kamellhum di makuuñaamu mata etaama'uye, mata ma kunamulemmi hurim Ata Emit, aamom Jesus Kristu, agam Apakenaaw, ban di kuwaa'bo joon ma mukokiil poopii di muhaatiil, hûbanumahu hata eroŋay yatayiil, mbi ehaŋ mâkoji. 21 Mata haŋ majak ma keetubi kûmireen buruŋabu bata malhegen. Be di kûmii'bo, ban di kulaañ kubet kûboñaku kanapaaku ka kulhikiteniim. 22 Ma kuga poop non ma lobeyim kaan: “Elhokaay ya elhac, ban di elaañ eri bo,” di kêenul poop: “Ekumbaay ekulheni jaa, mbi elaañ ki ehoonoor ekapay.”