2 Pedru 1

KAYTAKU KUGABUTAKU KA

PEDRU

AŊIICUM

Pedru nasaap bûynenaabu

Înje Simoŋ Pedru jagam agorooraaw, di amakaaw ata Jesus Kristu, înje ibolluum kayta'uke be batawuul jayaam kâynenaku kalhegenumaayaku non ûli, hurim mâsuumamu mata Emitay yagam apakenaaw atoolaal, aamom Jesus Kristu. 2 Nîkine ma kañankiitaku, di kâsuumaayaku kata Emitay, kuhaŋ malako di miwuul, di jihaŋ poop mâmir mata Emitay, di Jesus Kristu agam Ata Emit atoolaal.

Bu âynenaaw mbi aano

3 Mata sembaasu sata Emitay siwulolaam wahaw peh ma mbi ooliyaal ugawaal non ma yoo êkimmi, mata ma ûmiraam anaw âwollolaam be di majaaŋaamu matawool, hurim mata mâsuumamu matawool. 4 Mata mo ma Emitay eenumolaam, mbi ewulolaal wahaw wâmakaaw wajakum noon, wa mbi ugawuul jêemi di hunoonahu hata yo, ma mbi jeeli jîcaalh di wahaw wajakutaaw wammi di etaamay, wâcaalhumewuum di kânongikooraku.

5 Momakiimom, ma mbi jîgawum sembe ma jiŋar mâsuumamu matawuul, jibaŋen di kâynenaku; di jiŋaa'mo poop jibaŋen di kanamulenaku. 6 Di kanamulenaku, di jibaŋen sembaasu sata jasohooruwaaju; di sembaasu sata jasohooruwaaju, di jibaŋen humuntenahu; di humuntenahu, di jibaŋen jâkinaju jata Emitay. 7 Di jâkinaju jata Emitay, di jibaŋen kasohooraku kata batiyaayabu; di kasohooraku kata batiyaayabu, di jibaŋen jâkinooraju.

8 Moo, non wahaw uwu wowu ma wemmi huc di ûyegetaw watawuul, ban wowu ma ubaŋenuwem hukoohuk di miwuul, mbi ugawuul ma jihaŋ masoh lit, ban mbi ugawuul jihaŋ magoroor, di jihaŋ poop mabaj kanamulenaku kata Ata Emit, aamom Jesus Kristu. 9 Be bukaaku kabajutum wahaw uwu, koku ma kugam non bukan kâpuume, mata kûjukoriit wahaw wammi râagi; mata koku ma kûwukemmi kaan kûbajumiñaku ka kugawemmi kupasi ban.

10 Moo, kutiyaay, jijaŋen ma jiga sembe ma ya jîyis kaan Emitay ejotuum, ban di êwooluul, mata jiga mo jaa, jeetubi jilowurer nakeel. 11 Jiga mo jaa, mbi jibaj buruŋ bawuŋe ma jinebej di kâyyaku kaatumbi kubawurer kata Ata Emit agam apakenaaw atoolaal, aamom Jesus Kristu.

12 Momakiimom ma etumbi iwalh kalob di miwuul nanoonan ma mbi jiwolho wahaw uwu, palimo ma jîmiim ban mata wo, ban miwumu ma jijummi di malhegenumaayamu ma jeekum. 13 Nijuke kaan ma emmi ma irommi para, jake ma iwollhenuul mata wahaw uwu. 14 Mata nîmire kaan non ma Ata Emit aamom Jesus Kristu âbaahulommi, leetubi piyo nibet humuuma'uhe hûmbaam haketem. 15 Moo, manooman mbi iga sembe ma eenenuul, ma mbi iga nikete, mbi jeeli jiwolho nanoonan mata wahaw uwu.

Sembaasu sata elobay yata Emitay

16 Mata na ugawuum ma jîmir mata sembaasu sata Ata Emit aamom Jesus Kristu, di poop maama akaylom dêeni be ube di etaamay, ulobutuul elob yata kûñaaŋenñaaŋen ka ejamaatay kûcukem, mata ûli nujuke di kûkilaku kâtooli sembaasu satawool. 17 Ûli nujuke na Emitay yagam Ampawool, âbinkenoom, ban di ewulool êriibiinaay; nujame poop hurimahu hâcaalhumulom hatiya di majaaŋaamu mâmakaamu mata yo ma hêenul: “Ume Añoolom a iboolaatum noon, ya îririgen noon d'oo.” 18 Malhegen ûli kaŋ nujame hurima'uhu hâcaalhumulom hatiya di emitay, noo ûli tanor d'oo di hurimbiliŋahu hanapaahu.

19 Momakiimom jaat nuhaŋaale mabaj sembe ma ûynenaal elobay ya buñaaŋenaabu bata kûboñaku kata Emitay kuloom. Moo, jake noon ma jitallhenyom, mata yoo egam ehikitenumay yahikitenem emuucenay poopii di tiga haa, ma yootay yata urabaw ehikiten sîsigirasu satawuul. 20 Jake ma jîmir kâtiyaar kaan, an aaliit anamulen mata baloberabu bata añaaŋenaaw ata kûboñaku kata Emitay, baloom mata Baŋiicerabu Bâñoyyaabu oo humuumool, 21 mata bajut balober bata añaaŋena ata kûboñaku kata Emitay, bakayumulom di hunongoor hata ajamaat, be Buynumabu Bunapaabu bûyisem bukanaku elobay yata Emitay ya kulobem.